Yesu ˗yö ö ˗kɔ ˗yɛ ö ˗bha bɔmɛn ˗nu ˗kɔŋ do ga ꞊plɛ ˗bha

˗Dhɛ ˈö ˗ya ˗zlanwopö ˗kwɛ do waa ö ˈgbu ˈˈpiʋ̈, Yesu ˗yö pë ˈwɔngbɩɩsü do ˗kë. De ˗nu ˈö dho ö ˗kɔ ˈˈyɛ ˗an ˗bha kö ˗wo yökë wo ˈko ꞊bhaa? De ˗nu ˈö dho ˗an ˗kian kö ˗wo ˈˈdhiʋ̈sü kletiɛn ˗nu ˗bha ˗zlanwokɔdhi ˈka? ˈDhɛ ˈö Yesu kun˗ ˈˈpiʋ̈ kö ˈö ö ˗kɔ ˈˈyɛ ˗an ˗bha, ˗a ˗bhawɔn ˗kun Zoova ˗bha ˗takundhe ˗bha. ˗A ˗wɔn ˈgü, ˗yö ˗dho ˗tɔn ˗ta ö do ˈka ˈö ꞊bhɛɛ Zoova ˗dhɛ gbeŋ ˗todhʋ̈sü ˈgü. Dhiapiʋ̈ kpo tii ˈgü, Yesu ˗yö ö ˗bha gwëëˈˈ ˗nu ˗kpaakwëë, ˈyö ö ˗kɔ ˗yɛ mɛn 12 ˗bha. Ü ˗an ˈtɔ ˗dɔ ˗ee? Wo ˈnën ˈwo ˗tɔ Piɛɛ, Andre, Zakö, Zan, Fidhipö, Batedhemi, Toma, Matiö Zakö ˈö ˗kë Alüfe gbö ˈka, Tade, Simɔn waa Zuda Isikadhiɔtö.

˗A ˗bha bɔmɛn ˗nu ˗kɔŋ do ö ga ꞊plɛ bhë, ˗wo ˗dho ˗a ꞊kee˗ ˈˈta ˗nu ˈpö. ˈDhɛ ˈö ˗an ˗kian, ˈyö ˗an bɔ kö ˗wo ˗zlanwopö. Zoova ˗yö ˗kɔmɔnwɔnbhasü ˗nu ˗an ˗dhɛ kö ˗wo ˗zuu yaa ˗nu bho mɛn ˗nu ˈgü, kö ˗wo ˗an ˗dhɛbo.

Yesu ˗yö ö ˗bha bɔmɛn ˗nu ˗kɔŋ do ö ga ꞊plɛ ˈwo bhë ˗an ˗dhɛ ö ˈˈtɔŋdë ˗nu, ˈö ˈdhaŋ bho ˗an ˈˈdhiʋ̈. Fadhiziɛn ˗nu ˗bha ˈka, bɔmɛn ˗nu ˈwo bhë mɛn ˗nu ˈö ˈwaa pë ˈbha dɔ wo ˗mü. ˈˈKɛɛ Yesu ˗yö ˗an ˗kian yö ˈö bhë ˗a ˗bha. ˗Wo ˗to ˗a ˈˈpiʋ̈ ˗a ˗bha ˈˈtʋ̈ŋ ˗wɔngbɩɩsü ˗nu ˈgü. ˗A ˈwɔnzuan ˈtɔɔ˗ ˗yö dɔ kö ˗yö ga, ˈgo mü ˈdhɛ ˈgo ga ˈgü, ˗wo ˗to ˗a ꞊kee˗. Yesu ˗bha bɔmɛn ˗nu ˗kɔŋ do ö ga ꞊plɛ ˗nu bhë ˗wo ˗go Galile ꞊dhɛ ˗a ˈdhö. ˗A mɛn ˈbha ˗nu ˗kun dhegɔndë ˗nu ˈka.

˗A ˗bha bɔmɛn ˗nu ˗kun mɛn ˗nu ˈö ˈwɔnyaa kë ˗dhii ˈö kun ˗an ˗bha ˗an ˈka. ˈˈTʋ̈ŋ ˈbha ˗nu ˈka ˗wo dhiaŋzë ˈö ˈwo ꞊tun wo ˗zota ˗ni ˈgü. ˗A ˗wɔn ˈgü ˗wo ˗da ʒiaan yaa ˗nu ˗ta. ˗An zuʋ̈ˈˈ ˈyaa kun ˗saa yi ˈbhaa ˗nu ˈka. ˈGo ˈzü ˗wo ˗kun zɔɔdhe mën ˗ni ˈgü kö ˈwo mɛn ˈö ˈkpii˗ ˗a dɔ. ˈˈKɛɛ ˗wo ˗kun mɛn ˗tiaandhö ˗nu ˈö Zoova ˗dhɔ ˗yö ˗an ˗kë ˗an ˈka. Yesu ˗ya ˈdho dhaŋ˗ ˈgü, ˗wo ˗dho kë kletiɛn ˗nu ˗bha ˗zlanwokɔdhi ˗gɛngbandhɛ ˈka.