Yesu ˗yö gɔndë do ˗dhɛ ˗bo ꞊glooyi ˈka

Yesu ˗san ˗kun Fadhiziɛn ˗nu kë ˗ni ˈgü. ˗A ˗wɔn ˈgü ˗wo ˗kun ˗a ˈkun ˗gɛn mɛɛnˈˈ ˗ni ˈgü ˗kplawo. ˗Wa ˗pö ˗a ˗dhɛ ꞊dhɛ ˗a dua ˈyaa ˗mü kö ˗yö mɛn ˗nu ˈˈdhɛkë ꞊Glooyi ˈka. ˈˈKɛɛ ꞊Glooyi do ˈka, Yesu ˗yö ˗kpan ˈˈɲɛɛntiimɛn do ˗bha kö ˗yö gbadhɛ ˗ni ˈgü ˗kpinŋ ˈˈpiʋ̈. ˈYö˗ pö ö ˗bha gwëëˈˈ ˗nu ˗dhɛ: ‹˗Kɔ ˈö ˗Zlan ˗bha ˈˈpiigbɩɩdhɛ ˈö ˗dho gɔndë ˈö yö ˗a ˗takun ˗a ˈka, ˗kaa ˗ga.› ˗Dhɛ ˈö˗ pö ˈˈdhʋ̈, ˈö ö ˈˈdhidhi ꞊kaan ˈˈsɛ ˈka ˈö˗ ˗böö sü ˈö˗ ʒiö ˗a gɔndë ˈˈɲan ˗bha. ˈYö˗ pö ˗a ˗dhɛ: ‹˗Bhö ˈdho kö ˈü ü wëëdhɛ ˈˈzu Siloe ˈˈyi ˗gblü ꞊bhaa.› Gɔndënën ˗yö ˗to ˗a ˗wo ˈˈpiʋ̈, ˈö ˗dhɛ yö. ˗A ˗bha ˗dhɛ yö ˗kɔ ˗blɛɛsü ˈnën kun bhë!

˗A ˈwɔn ˗yö mɛn ˗nu ˗kun, ˈö ˈwo˗ pö: ‹Gɔndë ˈö kun ˈɲaannu ˗sü ˈka, ˈö kun gbadhɛ ˗ni ˈgü bhë ˈyaa ˈnën ˈö yö ˗ee? Ɛɛnˈˈ mɛn ˈbhaa ˈö bhɔ ˗a ˗bha yö ˗mü ˗ee?› ˈYö˗ gɔndënën ˗ya pö: ‹Man ˗mü!› ˈYö ˈwo˗ dhɛɛˈˈ kpɔ ˈwo˗ pö: ‹˗Yö ˗kë ˗mü ꞊dhɛ ˈsa ˈü ˗dhɛ yö?› ˈDhɛ ˈwɔn ˈö ˗kë ˗a ꞊blɛɛ ˗an ˗dhɛ, ˗wa ˗sü ˈwo dho ˗a ˈka Fadhiziɛn ˗nu ˗dhɛ.

ˈYö˗ gɔndë ˗ya pö Fadhiziɛn ˗nu ˗dhɛ: ‹Böö˗ ꞊nën ˈö Yesu ˗ya ˗ʒiö n ˈˈɲan ˗bha, ˈö˗ pö n ˗dhɛ ˈa dho n wëëdhɛ ˈˈzu. A to ˗a ˗wo ˈˈpiʋ̈ ˈö ˈa ˗dhɛ yö.› ˈYö Fadhiziɛn ˗nu ˗wa pö: ‹Yesu ˗ya mɛn ˈˈdhɛkë ꞊Glooyi ˈka, kö ˈˈpiigbɩɩdhɛ ˈö˗ ˗gɔ bhë ˈyii go ˗Zlan ˈˈpiʋ̈ ˈsa.› ˈˈKɛɛ mɛn ˈbha ˗nu ˗wa pö: ‹꞊Ya kë ꞊dhɛ ˈˈpiigbɩɩdhɛ ˈö˗ ˗gɔ bhë ˈyii go ˗Zlan ˈˈpiʋ̈, ˈyii ˈdho ꞊mɔɔn˗ ˗bha kö ˗yö mɛn ˈˈdhɛkë toŋtoŋdhö.›

ˈYö Fadhiziɛn ˗nu ˗wo gɔndë ˈö bhë, ˗a ˗mɛn ˗nu ˗dhɛ ˈö ˈwo ˗an dhɛɛˈˈ kpɔ, ˈwo˗ pö: ‹˗Yö ˗kë ˗mü ꞊dhɛ ˈö ka gbö ˗yö ˗dhɛ yö?› ˈˈSuʋ̈ ˗yö ˗da ˗a ˗mɛn ˗nu ˈgü ˈyö ˗tɔ ꞊dhɛ Fadhiziɛn ˗nu ˗wa ˗pö ꞊dhɛ mɛn ˈˈʋʋ ˗mɛn ˈö ö ˗zoyö Yesu ˗dhɛ, ˗wo ˗dho ˗a bho ˗Zlan ˗dhɔkëgükɔ ˈgü. ˗A ˗wɔn ˈgü, ˗wa ˗pö Fadhiziɛn ˗nu ˗dhɛ: ‹ˈYiëë˗ ˈwɔn dɔ. ˗Ka yö ꞊dede ˗a dhɛɛˈˈ ˈkpɔ.› Fadhiziɛn ˗nu ˗wo dhɛɛˈˈ ꞊va ꞊dede ˗kpɔ ˗a gɔndënën ˗gɔ. ˈDhɛ ꞊ɲɔɔn mü ˈö˗ pö ˗an ˗dhɛ: ‹ˈMan ˈwɔn ꞊gban blɛɛˈˈ ka ˗dhɛ. ˈMën ˈka˗ ˈˈpiʋ̈ ˈa˗ pö ˈzü?› ˈWɔn ˗yö ˗shiö ꞊dedewo Fadhiziɛn ˗nu ˗dhɛ ˈö ˈwo˗ ˗zuö ˈˈkpɛnŋ.

Yesu ˗yö ˗dho ˈö ˗kpan gɔndë bhë ˗a ˗bha, ˈö˗ pö ˗a ˗dhɛ: ‹Ü ü ˗zoyö Mesi ˗dhɛ ˗ee?› ˈYö˗ gɔndën ˗ya pö: ‹A˗ dɔ ˗be, a ˗dho n ˗zoyö ˗a ˗dhɛ.› ˈYö Yesu ˗ya pö ˗a ˗dhɛ: ‹Man ꞊nën ˈa ˗tɔ Mesi.› Yesu ˈˈgblü ˗yö ˗së ꞊dedewo! ˗Yö gɔndënën bhë ˗a ˗dhɛ ˗bo, ˈö go mü ˈzü ˈö˗ ˗takun kö ˗zoyödhe ˗yö kë ˗a ˗gɔ.