˗Wo Yesu ˗kun

Yesu waa ö ˗bha bɔmɛn ˗nu ˗wo ˗bɔ Sedrɔn ˈˈyi goo ˈgü ˈö ˈwo dho Olivie ˗tɔn ˗ta. ˗Yö ˗kun ˈˈdhʋ̈ gbeŋ ꞊zinŋgü kö ˗gbɔdë ˗yö ˈbhü ˗ni ˈgü klaŋklaŋdhö. ˈDhɛ ˈwo ˗wo Zɛsemane ˈˈdhü ˗bhla ˈgü, ˈyö Yesu ˗ya pö ˗an ˗dhɛ: ‹˗Ka ˈto yö, ˗ka ˗ya ˈka ˈˈɲaan.› ˈYö Yesu ˗yö bhɔ ˗an ˗dhɛ ꞊taa ˈdɛdɛ ˈö yö ö kpɔn ˈgü. ˈÖ ˗ya bhɛɛˈˈ ˗sü ˗bha Zoova ˗dhɛ kö ˗wëë ˗yö bɔ ˗ni ˈgü ˗a ˗ta, ˈö˗ pö: ‹Ü dhɔɔbhaawɔn ˈnën ˗yö kë.› Zoova ˗yö ö ˗bha ˈˈkiö do ˗bɔ kö ˗yö Yesu ꞊faan ˈmën. ˈDhɛ ˈö ö ꞊yɛɛ ˗kë ö ˗bha bɔmɛn ˗yaaga ˗nu bhë ˗an ˈˈpiʋ̈, kö ˗wo yi zë ˗ni ˈgü. ˈYö˗ pö ˗an ˗dhɛ: ‹˗Ka ꞊bo, yi zë ˈtʋ̈ŋ ˈyaa ˗kë ˗ni! N ˗dɔ n ˈyɔɔ˗ ˗nu ˗gɔ ˈˈlɛlɛ ˗ya ˗wo.›

˗A ˗dhɛ ˈyii ꞊gwëë ˈyö Zuda ˗yö ˗wo. Mɛn ꞊va ꞊dede ˈö ˗blaan ˗dhaa waa ˈˈdhü ˈˈkpla ˗nu ˗wo kun ˗an ˗gɔ, ˗wo ˗kun ˗a ꞊kee˗. Zuda ˗yö ˗dhɛ ˈö Yesu ˗yö kun ˗a ˗bha bhë ˗a ˗dhɛ ˗dɔ, ˈyö ˗tɔ ꞊dhɛ waa˗ ˗nu ˗wo ˗dho mü ꞊shiöŋ. Zuda ˗ya ˗pö ˈˈsɔdha ˗nu dhɛ ꞊dhɛ ˗wa ˗wo mü ö dho Yesu ˗zɔn ˗an ˗dhɛ. ˈDhɛ ˈwo ꞊loo mü, ˈyö dho Yesu ˈˈpiʋ̈ ˈö˗ pö ˗a ˗dhɛ: ‹N Dëmɛn, ˈbha ꞊bo!› Yö ˗lo ˗a ˗bha ˈö˗ ˈˈkpɛnŋ mü. ˈyö Yesu ˗ya pö: ‹Zuda ˈpë ˈü ˗dho bɔ ˗a ˗ta kö ˈü n ˈˈdhoodɔ ˗yö ˈnën ˗tɔ n ˈˈkpɛnŋ mü ˗sü ˗ee?›

ˈYö Yesu ˗yö dɔ mɛn kpö ˈwo bhë ˗an wëëdhö ˈö˗ pö: ‹De ˈö ˈka˗ ꞊mɛɛn?› ˈYö ˈwo˗ pö: ‹Yesu ˈö go Nazadhɛtö bhë.› ˈYö˗ pö ˗an ˗dhɛ: ‹Man ˗mü.› ˈYö ˈwo bhɔ ˗a ˗dhɛ ꞊taa ˈö ˈwo ˗puö ˈˈshia˗. ˈYö ˗an dhɛɛˈˈ kpɔ ˈzü ˈö˗ pö: ‹Ka˗ ˗pö de ˈö ˈka˗ ꞊mɛɛn?› ˈYö ˈwo˗ pö ˗a ˗dhɛ ˗dɛɛwo: ‹Yesu ˈö go Nazadhɛtö bhë yö ˗mü.› ˈYö Yesu ˗ya pö ˗an ˗dhɛ: ‹A˗ ˗pö ka ˗dhɛ man ˗mü. ˈDhɛ ˈö ˈˈdhʋ̈, ˗ka ka ꞊kwaa mɛn ˗nu ˈwo to ˗an ˗zü kö ˗wo ˈdho.›

ˈDhɛ Piɛɛ ˗yö ˈwɔn ˗nu bhë˗ ˈgüman, ˈyö ˗blaan ˗dhaa do sü ˈö ˈˈsaabhomɛn ˈkpii˗ ˗bha yökëmɛn Maakisö ˈˈtʋdhɛ ˈˈdhiʋ̈ bho ˗a ˈka. ˈˈkɛɛ ˈyö Yesu ˗yö ö ˗kɔ ˗yɛ Maakisö ˈˈtʋdhɛ ˗bha ˈö˗ ˗dhɛ bo. ˈYö Yesu ˗ya pö˗ Piɛɛ ˗dhɛ: ‹Ü ˗bha ˗dhaa ˗da ö ˗kpee ˈgü, ˗a ˗gɛn ˗mü ꞊dhɛ mɛn ˈˈpɛpɛ ˈwo ˗dhaa sü mɛn ˗gɔ, ˗wo ˗dho ga ˗dhaa ꞊kɔa. ˈDhɛ ˈö ˗kë ˈˈdhʋ̈ ˈyö ˈˈsɔdha ˗nu ˗wo Yesu kun ˈwo˗ ˗kɔ ˗nu ꞊klu. ˈYö˗ ˗bha gwëëˈˈ ˗nu ꞊gban ˈˈpɛpɛ ˗wo ˗kan ˗a ˗zü ˈkwëë˗, ˈö ˈwo ꞊duëë. Mɛn ˗nu ˈwo Yesu kun bhë ˗wo ˗dho ˗a ˈka ˈˈsaabhomɛn ˗nu ˗gɔmɛn Anö ˈˈpiʋ̈. ˈDhɛ Anö ˗yö ˈˈdhɛɛ ˗nu kpɔ Yesu ˗gɔ, ˈyö˗ bɔ ˈˈsaabhomɛn ˈkpii˗ Kaifö ˗dhɛ. ˈˈKɛɛ ˈmën ˗kë ˗a ˗bha bɔmɛn ˗nu ˈka?