Pɔdhö waa Timote

Timote ˗kun wlüünën do ˈö ˗kun Dhitrö ˗bha ˗zlanwokɔdhi ˈgü, ˗a ˈka. ˗A dë ˗kun Glɛkö mi ˈka, ˈö˗ dhe ˈdhö kun Zuifö ˈka. ˗A dhe Nisö waa˗ ˈˈnan Dhoisö ˈnën ˈwo Zoova ˗wɔn ˗zɔn ˗a ˗dhɛ ö ˈnëndhɛ ˈgü.

Pɔdhö ˗bha ˈˈta ꞊plɛ ˗naan ˈˈtʋ̈ŋ ˈka, ˈdhɛ ˈö ꞊lo Dhitrö, ˗ya ˗yö ꞊dhɛ Timote ˗dhɔkë ꞊dedewo ö ꞊dhegblü ˗nu ˈka, ˈö ˗an ˗takun. ˈYö˗ pö˗ ˗dhɛ ˗yö ʒiö ˗a ꞊kee˗. Pɔdhö ˗yö Timote ˗kian ˈö˗ ˗takun kö ˗yö kë nɔɔnsëpömɛn waa˗ mɛn ꞊klaŋkëmɛn ˗së ˈka.

˗Zlan ˗bha ˗zuu ˈˈslʋ̈ʋ̈slʋ̈ ˗yö ˈˈdhiʋ̈sü Pɔdhö waa Timote ˗an ˈka ˗dhɛ ˈˈpɛpɛ ˈwo dho ˗a ˗bha, ˗a ˈgü. Gbeŋ do ˈka, mɛn ˈbha ˗ya ˗pö Pɔdhɛ ꞊dhɛ ˈˈɲɛɛn ˈgü ꞊dhɛ ˗yö bɔ Maseduanö kö ˗yö ˗an ˗takun. ˈDhɛ ˗kë ˈˈdhʋ̈, Pɔdhö, Timote, Silasö waa Lukö ˗wo dho mü ˈö ˈwo ˗zlanwopö, ˈö ˈwo ˗zlanwokɔdhi ˗dɛɛ ˗nu ˗ya.

Maseduanö ˗sɛ ˈgü, mɛn ꞊va ˗wo ˗kë kletiɛn ˈka ˈˈkwipö ˈwo˗ ˗dhɛ Tesalonikö bhë, ˗a ˈgü. ˈˈKɛɛ Zuifö ˈbha ˗nu ˗wo ˗druɛɛ ˗kë Pɔdhö waa ö ˈˈtayoo ˗nu ˗bha. ˗Wo ˗nu mɛn kpö ˈka ˈö ˈwo kwa ꞊dhegblü ˗nu kun, ˈwo ˈdho ˗an ˈka ˈpödë ˗nu ˗kuu ˈˈdhiʋ̈, kö ˗wo ˈˈgbla ˗ni ˈgü ˗a pö ˗sü ˈka: ‹Wlɔmö ˗sɛ ꞊kɔɔnmɛn ˗nu ˈyɔɔ˗ ˗nu ꞊nɛɛn!› ˗Dhɛ ˈö ˗kë ꞊dhɛ Pɔdhö waa Timote ˗an ˗bha ˗tosɛta ˗kun ga ˈˈyɛ ˈˈdhiʋ̈ bhë, ˗wo ˗duëë gbeŋ ˈö ˈwo dho Beedhe.

Nɔɔn˗ ˗së ˗dhɔ ꞊dede ˗kun Beedhemɛn ˗nu kë ˗ni ˈgü. ˗A ˈwɔn ˈgü, Glɛkö waa Zuifö ˗nu ˈwo kun mü, ˗wo ˈdhaŋ ˗bho Yesu ˈˈdhiʋ̈. ˈˈKɛɛ Zuifö ˈbha ˗nu ˗wo ˗go Tesalonikö ˈwo nu ˗bhluubhludhe ˗da Beedhe. Pɔdhö ˗yö ˗duëë ˈö dho Atɛnö. Timote waa Silasö ˗zë, ˗wo ˗to mü ˈö ˈwo wo ꞊dhegblü ˗nu ˗zogban. ˈDhɛ ˈˈtʋ̈ŋ ˈbha ˗yö ˗ʒiö, Pɔdhö ˗yö Timote ˗bɔ ˈzü Tesalonikö kö ˗yö kwa ꞊dhegblü ˗nu ˗takun kö ˈˈklʋʋbhɔdhe ꞊va ˈwo kun˗ ˗wɔ ˗ni ˈgü ˗an ˗ta mü bhë, ˈwo ꞊mɔɔn ˗bɔ ˗an ˈgü ˗sü ˗bha. ꞊Taabha, Pɔdhö ˗yö Timote ˗bɔ kö ˗yö ˗wo ˗zlanwokɔdhi ꞊va ˗dhɛ, kö ˗yö ˗an ꞊faan ˈmën.

Pɔdhö ˗ya ˗pö Timote ˗dhɛ: ‹Mɛn ˗nu ˈwo˗ ˈˈpiʋ̈ kö ˗wo Zoova ˗dhɔkë, ˗wo ˗dho ˗an ˈˈklʋʋ bhɔ.› ˗Wo Timote ˈˈklʋʋ ˗bhɔ ˈö ˈwo˗ ˗da ˗kasho ˈgü ˗a ˗bha ˗zoyödhe ˗wɔn ˈgü. ˗A zuʋ̈ˈˈ ꞊nii ˗yö ˗da, ˈyö ˗tɔ ꞊dhɛ ˗a ˈˈse ˗kun ˗a ˗dhɛ ˈˈtʋ̈ŋ bhë˗ ˈka kö ˗ya ˗zɔn Zoova ˗dhɛ ꞊dhɛ ö ˗klu ˗sü ˈka˗ ˗bha.

Pɔdhö ˗ya ˗pö Filipö ˗mɛn ˗nu ˗dhɛ: ‹ˈMan Timote ˗bɔ ka ˗dhɛ ˈgü. ˗Yö ˗dho pë ˈwo˗ ˗dhɛ ˗klu ˗Zlan ˗bha ˗sü, ˗a ˗zɔn ˈka ˗dhɛ. ˈGo mü ˈzü ˗yö ˗dho ka ˗kian ˗zlanwopösü ˗bha.› ˗A ˈwɔn ˗kun Pɔdhö ˈˈɲaan ꞊dhɛ ˗yö ꞊mɔɔn˗ ˗bha ˈö ö ˗zoyö Timote ˗dhɛ. ˗Wo ˗dho ˈˈta ˈgü wo ˈˈkwëë ˈö ˈwo yö ˗kë wo ˈko ꞊bhaa ꞊dhɛ ˈˈtɔŋdë ˗nu ˈdhö ˗kwɛ ꞊va ˈˈpiʋ̈.