ˈSëëdhɛ ˈö kwa ˈˈdhiʋ̈ʒiöwomɛn ˗nu ˈwo˗ bɔ

꞊Dhegblü ˗wɔn ˈˈgbɩɩ˗ ˗sü ˗nu:

˗Zlan waa mɛnbhɩɩdhe ˗nu ˗dhɔ ˈö kwa ˈgü ˗yö kwa ˗blü ˈyö ˈkwa ‹ˈdho mɛ ˗nu ˈpiö ˈsɛ ˈsaadhö ˈgü, ˈkwa ˗an ˗kë [Yesu ˗bha] ꞊guëˈ ˗nu ˈka! ˈGo mü, ˈkwa ˗an ˗bɔ yiö.› (Mat. 28:​19, 20, NTBL; Mak. 12:​28-31) ˗Dhɔ ꞊dede ꞊faan ˗yö ˈˈgbɩɩ˗. ˗Yö ꞊mɔɔn˗ ˗bha ˈö pa mɛn ˗nu «ˈö ˈwo˗ ˈˈpiʋ̈ kö ˗wo ˗tosɛta ˈö ˈyaa ɲën ˗a ꞊slɔɔ» ˗an zuʋ̈ˈˈ ˈka.—Këw. 13:48.

˗Kwɛ ˗nu ˈö ˈwo ʒiö yö ˗an ˈka, pë ˗nu ˈö ˈkwa kun ˗an kë ˗ni ˈgü ˈyö ˗tɔ ˗zlanwopö ˗kɔ ˈˈslö ˗nu draansü waa ˈsëëdhɛ ˗nu ˗to mɛn ˗nu ˗gɔ ˗sü. ꞊Dɛɛ, ˗a ˗dhɛa ˗bha kö ˈkwa baaˈˈ kwa ˗bha ˈˈdoo ˗dɔ mɛn ˗nu ˈˈpiʋ̈ ˗kɔ ˗nu ˗bha. Kwa˗ ˈˈpiʋ̈ kö mɛn ˗nu ˗wa ˈwɔn dɔ ꞊dhɛ ˗an ˗dhɔ ˗yö kwa ˗kë, ˈwɔn ˗gɔ ˗nu ˈö ˗an ˗dhɛ ˗së ˗an ˈˈdoo ˗dɔ ˗an ˈˈpiʋ̈ ˗sü ˈka. ˗A ˗wɔn ˈgü kwa dua ˗mü kö ˈkwa kwa ˗bha ˈwɔn kë ˗kɔ ˈbha ˗nu bho ˈˈgblʋʋ, kö ˈkwa kwa ˗zota ˗së ˈka ˈwɔn ˈö mɛn ˈö ˈdhö ˈö bɔ ˗ni ˈgü ˗a ˈgü, waa pë ˈö˗ ˗dhɛ ˗së ˗an ˈgü. ˈSëëdhɛ ˗be ˈnën ˈö yö ˗dho kwa ˗takun ˗kɔ ˗kë ꞊dhɛ kö ˈkwa ꞊mɔɔn ˗a kë ˈˈdhʋ̈ ˗sü ˗bha?

ˈWɔn ˗gɔ 12 ˈnën ˈwo ˈsëëdhɛ ˗be ˈnën ˈö ˗yö ˗a ˈgü. ˗Wo ˗gban ˈˈklʋʋsë ˗nu ˈö ˈwo dho kwa ˗takun kö ˈkwa ˗dhɔ ˗zɔn mɛn ˗nu ˗dhɛ, ˈkwa ˗an kë Yesu ˗bha gwëëˈˈ ˗nu ˈka, ˗an ˗bha. ˈWɔn ˗gɔ ˗dhɛ ˈö ˈdhö ˗yö ˗gban ˗sü ˈka ˗kwɛzlan do ˈö Biblö ˈgü, ˗a ˗ta. ˗A ˗kwɛzlan ˈö ˈˈdhʋ̈ ˗a ˈgü, Yesu ɛɛnˈˈ ˗zlanwopömɛn do ˈö kun ˗kwɛ këŋ do ˗blɛɛsü ˈgü ˗yö ˈˈklʋʋsë ˈbha ˗zɔn ˗zlanwopödhɛ ˈgü. ˈSëëdhɛ ˗be ˈnën ˈö yö, ˈyii yö ˈˈkpɛnŋ kö ˗yö kwa ˗takun kö ˗zlanwopö ˗kɔ ˈˈslö ˗nu ˈto kwa ˈˈɲaan, ˗abin. ˗Yö ˗yö ˈˈkpɛnŋ kö ˗kɔ ˈö ˈkwa ˗dho ˗dhɔ ˗zɔn ˗a ˈka mɛn ˗nu ˗dhɛ, ˈkwa˗ dɔ. ˈˈKlʋʋsë ˗nu ˈö ˈwo bhë, kwa ˗bhawɔn ˗yö ˗an ꞊gban ˗bha kwa ˗bha ˗zlanwopö ˗kɔ suu ꞊gban ˈgü. ˈˈKɛɛ ˗kɔ ˈö ˈkwa dho ˗a ˈbhaa ˗nu ˗zɔn ˗a ˈka kö ˈkwa ˈˈdoo züdɔ ˗ni ˈgü mɛn ˗nu ˈˈpiʋ̈, ˈkwa ˗wo ˗ni ˈgü mɛn ˗nu ˗dhɛ ɛɛnˈˈ kö ˈkwa ˗an ꞊klaŋ kë ˗ni ˈgü, ˈnën ˈkwa ˗dho ˗a yö ˈsëëdhɛ ˗be ˈnën ˈö yö ˗a ˈgü.

ˈKa˗ ˈwɔn ˗gɔ ˗dhɛ ˈö ˈdhö ˗a draanˈˈ ˗ni ˈgü, ˗ka ka ˗zota ˗së ˈka ˗kɔ ˈö ˈka ˗dho ˈˈklʋʋsë ˈö˗ ˈgü ˗a ˗ya ˈka ꞊bhlëë ˈgü kö ka ˈˈdoo dɔ ˗ni ˈgü mɛn ˗nu ˈˈpiʋ̈ ka ˗bha ˈˈyasa ˈgü, ˗a ˈgü. ˗Ka ka ˈgü dɔ ˈˈgbɩɩ˗ kö Zoova waa mɛnbhɩɩdhe ˗dhɔ ˈö ˈka ˈgü, ˈka˗ ˗gɛn ˗gban. ˗Dhɔ ˗zɔn ˗sü ˗yö ˗së ˈö ˗ʒiö ˗a ˈka mɛn ꞊klaŋ kë ˗kɔ suu ꞊gban ˗ta. ˗A ˗wɔn ˈgü mɛn ˗nu ˗dhɔ ˗ya ka kë, ka ˗dho ꞊mɔɔn ˗an ˗kë Yesu ˗bha gwëëˈˈ ˗nu ˈka ˗sü ˗bha.

꞊Bhlëë ˈkpii˗ ꞊dede ˗mü yi ˗bhaa ˈka kö ˈyi yö kë ka ˈˈpiʋ̈ ˗dɔ kwa ˈko ˗nu ˗gban ˗gɔ ˗sü ˈka. (Soph. 3:9) Kö mɛn ˗nu ˗dhɔ ˗yö ka kë ˗kplawo, kö ˈka ˗an kë Yesu ˗bha gwëëˈˈ ˗nu ˈka, ˈgo mü ˈzü kö Zoova ˗yö ˈdhuëë˗ ˈkpɔ ka ˗bha bhë, ˈaa ˗yö kë!