Dhɛɛˈˈ ˗yɔ ˗nu

◼ ˗Zlanwopömɛn ˗nu dua ˗mü kö ˗wo bɔ ɛntɛnɛtö ˗ta kö ˗wo ˗zlanwopö ˗dhɛŋ ˗nu ˈwo ˈˈsɛ ˈˈwɛɛ ˈgü ˗an ˗dhɛ ɛɛnˈˈ kö ˗wo Biblö draanˈˈ ˗an ˈˈpiʋ̈ ˗ee?

˗Zlanwopömɛn ˈbhaa ˗nu ꞊wa bɔ ɛntɛnɛtö ˗ta ꞊wa Biblö ˗zɔn mɛn ˗nu ˈwo ˈˈsɛ ˗nu ˈö ꞊wa kwa ˗bha yö ꞊kiɛ ˈˈkan mü ɛɛnˈˈ ˈö ˗zlanwopömɛn ˗nu ˈwaa mü ꞊va ˗an ˈgü ˗an ˗dhɛ. ˗A ꞊klaŋ ˗nu ˈwo ˈˈdhʋ̈ ˗an ˈbha ˗nu ꞊trɔɔn ˗kë ˗dhö. ˈˈKɛɛ ˗zlanwopömɛn ˗bha nɔɔn˗ bɔ ˗sü ɛɛnˈˈ waa ˗dhɛŋ ˗an ˗bha ˈˈdoo dɔ ˗sü ˈö ɛntɛnɛtö ˗ta bhë, ˗a ˈgü ˗wɔn yaa ˗nu ˗dhö. (˗Bhö kpɔɔˈˈ ˗kwɛ 2007 Ʒue ˗bha Kwa ˗bha ˗Gblüdëdhɛ ˗yö ˈsëëdhɛ, p. 3 ˗ta.) ˈKö ˗kë ꞊dhɛ ˗wa ˗kë ˈˈdhʋ̈ kö ˈwo ˗Gblüdëdhɛ ˗nɔɔn pö zuʋ̈sëmɛn ˗nu ˗dhɛ, ˗a ˈˈdoo ꞊suu ˈö ˈˈdhʋ̈ ˗yö ꞊mɔɔn˗ ˗bha ˈö˗ ˗kë ˈö kwa ꞊dhegblü gɔɔn˗ ɛɛnˈˈ ˗a dhebɔ ˗yö ˗ya nënŋ mɛn yaa ˗bha ˗sü ˗bha. ˗Yö ꞊mɔɔn˗ ˗bha ˗ʒianwo ˈö ˗kë ˗gban ˗Zlan ˗gɔ ˗mɛn ˈka. (1 Kod. 1:19-25; Kodh. 2:8) ꞊Ya ˈgo ˗a ˈgü ˈzü, ˈˈsɛ ˗nu ˈö ꞊wa ˗Gblüdëdhɛ ˗yö ꞊kiɛ ˈˈkan ˗an ˈgü ɛɛnˈˈ ˈö ꞊wa ˗wo ˗kɔ yö ˗a ˗ta mü, kö ˗wo ˗zlanwopö mɛn ˗nu ˈwo mü ˗an ˗dhɛ ɛntɛnɛtö ˗ta, ˗a ˈwɔn ꞊mɔɔn˗ ˗bha ˈö ˗puö ˈˈsɛgɔdhiʋmɛn ˗nu ꞊kwɛɛ˗ ˈö kwa ꞊dhegblü ˗nu ˗da ˈwɔn ˈgü. ˈDhɛ ˈö ˈˈdhʋ̈, ˗zlanwopömɛn ˗nu dua ˈyaa mü kö ˗wo ˈdho ɛntɛnɛtö ˗ta kö ˗wo ˗zlanwopö ˈˈsɛ ˈˈwɛɛ ˈgümɛn ˗nu ˗dhɛ ˗sü ˈgüdan.

꞊Ya kë ꞊dhɛ ˗zlanwopösü ˈö ˗kan mɛn ˈgü ˗a ˈˈtʋ̈ŋ ˈgü, kö ˈkwa ˗zlanwopö mɛn ˈbha ˈö go ˈˈsɛ ˈˈwɛɛ ˈgü ˈö nu ˗wo kwa ˗bha ˈˈsɛ ˈgü ˗a ˗dhɛ, kwa ꞊mɔɔn˗ ˗bha kö ˗kɔ ˈö ˗dho ˈdho ˗a ˈka jw.org ˗ta kö ˗ya ꞊va ˈˈbhaa ˈgüman ɛɛnˈˈ kö ˗yö yö filiadhö mɛn ˗nu ˗bha, ˈkwa˗ ˗zɔn ˗a ˗dhɛ. ˗Kwa ˈdho ˗zlanwopö ˗a ˗dhɛ ˗sü ˈgüdan kö ꞊ya ö ꞊yɛɛkë ö ˗gɔ ˈˈsɛ ˈgü. Kwa ꞊mɔɔn˗ ˗bha ˈzü ˈö ˈkwa˗ ꞊faan mën kö ˗yö ˈdho wo ˗bhɔkwëëkëgükɔ ˈö˗ ˗bha ˈkɔ ˈˈsuee ˗mü ˗a ˈgü. ˈˈKɛɛ gagade ˗mü ˈpö ꞊dhɛ ˗bhɔkwëëkëgükɔ ˈyaa ˈˈsɛ ꞊gban ˈˈpɛpɛ ˈgü. ꞊Ya kë ꞊dhɛ ˗ya ˈˈpiʋ̈ kö Zoova ˗bha ꞊Gbɛkiö ˗nu ˗wo ö ˗dhɛ ˗dhɛ ˈö˗ ˗bha ˗a ˈgü, kwa dua ˗mü kö ˈkwa pë ˗ya ˈsëëdhɛ ˈˈpɛn Veuillez suivre l’intérêt (S-43) ˗ta kö ˈkwa˗ nu ˗zlanwokɔdhi ˗bha ˈsëëdhɛ ˗bɛnzëmɛn ˗dhɛ kö ˗ya bɔ ˈˈpian ˈwo˗ ˗dhɛ “Congrégation” jw.org ˗ta bhë, ˗a ˗ta. Filiadhö ˈö ö ˗zo ˗kë ˗zlanwopö ˗yö ˈö ˈˈsɛ ˈö mɛn ˗yö go ˗a ˈgü bhë ˗a ˈˈpiʋ̈, yö ˈnën ˈwɔn ˈö˗ ˈˈsɛ bhë˗ ˈgü ˗a ˗dɔ. Yö ˈnën ˈö ˗ya ˗sü ˈka ˗së ˈzü kö ˗ya ˗mɛn ˗takun ꞊dedewo.—Kpɔɔˈˈ ˗kwɛ 2014 Ʒuɛn ˗bha Kwa ˗bha ˗Gblüdëdhɛ ˗yö ˈsëëdhɛ, p. 7 ˗ta, waa ˗kwɛ 2011 Novanblö ˗bha Kwa ˗bha ˗Gblüdëdhɛ ˗yö ˈsëëdhɛ, p. 2 ˗ta.

꞊Ya kë ꞊dhɛ mɛn ˈbha ˈö ˈkwa ˗wo ˗a ˗dhɛ ꞊shiö ꞊shiö ˗ya ˈdho ˈˈsɛ ˈˈwɛɛ ˈgü, ɛɛnˈˈ ꞊ya kë ꞊dhɛ kwa Biblö ˗draan mɛn ˈbha ˈö ˈkwa˗ ˗dɔ ɛntɛnɛtö dosɛnŋ ˈnën˗ ˗ta, ˈö˗ mɛn ˈdhö ˈˈsɛ ˈˈwɛɛ ˈgü ˗a ˈˈpiʋ̈, kwa dua ˗mü kö ˗dhioo ˗nu ˈwo ˈˈdhuŋ bhë, ˈkwa ˈto ˗an ˈˈpiʋ̈. ˈˈKɛɛ ˗yö dɔ kö ˗zlanwopömɛn do ˈö˗ ˗bha ˈˈsɛ ˈgü ˗yö ˗kpan ˗a ˗bha, kwa ꞊mɔɔn˗ ˗bha ˈkwa kwa ˗zo kë ˗a ˗mɛn ˈˈpiʋ̈ ˈkwa ˈdho ˗a ˈka ˈˈdhiʋ̈. ˈˈKɛɛ ꞊ya kë ꞊dhɛ mɛn ˈö bhë ˗yö ˈˈsɛ ˈö kwa ˗bha yö ꞊kiɛ ˈdhö ˈˈkan ˗sü ˈka˗ ˈgü ˗a ˈgü, kwa dua ˗mü kö ˗zlanwopösü ˈö telefɔnö ˈˈdhiʋ̈, ˈsëëdhɛ ˈka, ɛɛnˈˈ ɛntɛnɛtö ˗ta, ˈkwa˗ pö ˗gleŋ ˈka.​—Mat. 10:16.