˗Kwa yö kë ˗së ˈka pë ˗nu ˈwo ˈsëëdhɛ ˗be Qu’enseigne la Bible ? ˈgü, ˗an ˈka

Pë ˈö Biblö ˗ya pö kpɛnŋdhö, kö Biblö ꞊klaŋ ˗ya dɔ, kö ˗ya ˗ya ꞊bhlëë ˈgü, ˗a ˗gɛn ˗dho ˈdho ˈˈdhiʋ̈ ˗Zlan ˗bha ʒiaan ˗ta, ˈö ˗kian. (Ps. 1:1-3) Pë ˗nu ˈwo ˈsëëdhɛ ˗be Qu’enseigne la Bible ? ˈgü, kö ˈkwa yö kë ˗an ˈka ˗së ˈka, kwa ˗dho ꞊mɔɔn˗ ˗bha ˈö ˈkwa kwa ˗bha ꞊klaŋ ˗takun kö ˗a ˗gɛn ˗yö ˈdho ˈˈdhiʋ̈.

Dhɛɛˈˈ ˗nu ˈwo˗ ˈwɔn ˗gɔ ˗nu ˗züdɔdhɛ ˈgü: ˈWɔn ˗gɔ ꞊gban ˈˈpɛpɛ zü ˗yö ˗dɔ dhɛɛˈˈ ˗nu ˈö ˗an ˗yɔ ˈdhö ˗a ˈwɔn ˗gɔ do bhë ˈgü, ˗an ˗ta. Ü ꞊mɔɔn˗ ˗bha ˈü dhɛɛˈˈ ˗nu bhë ˗an kpɔ kö pë ˈö ˈka ˗dho ˗a draanˈˈ bhë, ˈü˗ draansü ˗dhɔ ˗da ü ˗bha ꞊klaŋ ˈgü. Ɛɛnˈˈ ü ꞊mɔɔn˗ ˗bha ˈü˗ pö ˗a ˗dhɛ kö ˗yö dhɛɛˈˈ ˈö ˈdhö ˗a ˗yɔ ꞊klöö˗ nu. ꞊Ya kë ꞊dhɛ ˗a ˗yɔ ˈö˗ nu ˈyaa ˗së, ˈbha ˗dho ˗a pö ˗a ˗dhɛ ˈyaa ˗së. ˗A ˗yɔ ˈö˗ nu bhë ˗yö ˗dho ü ˗takun kö ˈwɔn ˗nu ˈö ü dua ˈdhö ˗mü kö ˈü ꞊gbɔɔn ˗an ˗ta, ɛɛnˈˈ kö ˈü ˗an ˈgü ˈˈpʋ ˗së ˈka, ˈü ˗an ˗bho ˈkoo dɔ.​—Prov. 16:23; 18:13.

ˈWɔn ˗gɔ ꞊taa ˗nu: Pë ˗nu ˈö ˈka ˗an ꞊draan, ꞊ya kë ꞊dhɛ ü ˗bha ꞊klaŋdhiʋ̈nën ˗ya ꞊gban ˈˈpɛpɛ ˈgüman ˗së ˈka, ˈö ˗ya ˈˈwɩ ˈpö ˗an ˗bha, ü ꞊mɔɔn˗ ˗bha ˈü˗ ꞊faan ˗mën kö ˗ya ˈwɔn ˗gɔ ꞊taa ˈö˗ ˈsëëdhɛ ˈˈdhiʋ̈todhɛ ˈgü bhë˗ draanˈˈ ö ˗de ˗ta. ˈBha nu ꞊taabha, ü ꞊mɔɔn˗ ˗bha ü minitö ˈnën ˈbha ˈsü kö ˈü ʒiö ˗a ˈgü, kö ꞊ya kë ꞊dhɛ ꞊ya˗ ˈgüman, ˈü˗ ˈwɔn dɔ. ˈˈKɛɛ, ꞊ya kë ꞊dhɛ ˗a ˗kë ˈˈdhʋ̈ ˗sü ˗dho ˗a ꞊klaŋdhiʋ̈nën ˗takun, ü ꞊mɔɔn˗ ˗bha ˈü ˗a ˈwɔn ˗gɔ ꞊taa bhë, ɛɛnˈˈ ˗a ˈˈpian ˈbha ˗ draanˈˈ ˗a ˈˈpiʋ̈ ka ˗bha Biblö draansü ˈˈtʋ̈ŋ ˈka. ˈKa ˗wo ˗bhüöö kpö ˗nu ˗wo pö, ü ꞊mɔɔn˗ ˗bha ˈü dhɛɛˈˈ ˗nu ˈö bhii ꞊dede ˈü ˗an ꞊mɛɛn ˈˈdhiʋ̈ ˗be, ˗an kpɔ ˗a ˗gɔ.

˗Zo ˗bo ˗a ˈka ˗wɔn ˈkɔnën: Dhɛɛˈˈ ˗nu ˈwo˗ ˈwɔn ˗gɔ ˗nu ˗züdɔdhɛ ˈgü bhë, ˗an ˗yɔ ˗nu ˗wo ˗zo ˗bo ˗a ˈka ˗wɔn ˈkɔnën ˗nu ˈwo ˗an ˈwɔn ˗gɔ ˗nu ˈˈdhiʋ̈todhɛ ˗nu ˈgü bhë, ˗an ˈgü. Ü ꞊mɔɔn˗ ˗bha ˈü yö kë ˈkɔnën bhë˗ ˈka, kö ꞊ya kë ꞊dhɛ ü ˗bha ꞊klaŋdhiʋ̈nën ˗ya ˈwɔn ˗gɔ bhë˗ ˈgüman, ɛɛnˈˈ ꞊ya kë ꞊dhɛ ˗yö ꞊mɔɔn˗ ˗bha ˈö ˗a ˈwɔn ga ga ˗nu ˈgü ˈˈpʋ, kö ˈü˗ ˈwɔn dɔ. ˗Bhö pë ˈˈpɛpɛ ˈwo ˗bɛn zë ˗sü ˈka waa Biblö ˈˈɲan ˗nu ˈwo ˗an ˈˈsuee, ˗an ˗wo pö. ˈBha ü bo ˗an ˗wo pö ˗sü ˈka, ˗bhö ˗a pö ü ˗bha ꞊klaŋdhiʋ̈nën ˗dhɛ kö ˗yö Biblö ˈˈɲan do ɛɛnˈˈ Biblö ˈˈɲan ˗nu bhë, ˗an ˈsü kö ˗ya ˗zɔn ꞊dhɛ pë ˗nu ˈü ˗an ˗wo pö bhë ˗wo gagade ˈka.​—Këw. 17:2, 3.