Ka˗ ˈwɔn ˗dɔ ˗ee?

ˈˈWɩ ˈö Zoova ˗ya wo ˗a ˗bha ꞊kwɛŋzü kö ˗wo ˈˈblü ˗toŋ waa ˈpö˗ ˗toŋ kë ˈˈsaapë ˈka bhë, ˈmën ˗kë ˈö kun ˈwɔn ˗së ˈka?

ˈTƆŊ˗ ˈö˗ nu Moizö ˗dhɛ ˈkpa bhë ˗a ˈgü, Zoova ˗yö ˗wɩ ˗a ˗bha kö Izraɛdhömɛn ˗nu ˗wo ˈˈblü ˗toŋ waa ˈpö˗ ˗toŋ ˗nu kë ˈˈsaapë ˈka. ˗A ˗bha ˈtɔŋ˗ ˗nu ˈwo ˗gban ˈˈsaa˗ ˗nu ˗bha ˗an ˈgü, ˗yö ˗man suu ꞊plɛ ˈwo bhë ˗an ˗wɔn ˗blɛɛ, ˈö˗ pö ˗ʒiaanwo ꞊dhɛ ˗wo ꞊mɔɔn˗ ˗bha ˈwo ˗an nu wo ˈko ꞊ʒiaan˗ ˈgü. (Lév. 1:14; 12:8; 14:30) ˈMën ˗kë ˈö kun ˈtɔŋ˗ ˗së ˈka? ˗A ˗gɛn do ˈnën ˗tɔ ꞊dhɛ ˈˈblü ˗toŋ ˗nu ꞊slɔɔdhɛ ˈyaa kun ˈˈplëëplë ˈˈtʋ̈ŋ ꞊gban ˈka. ˈMën ˗kë?

ˈˈBlü ˗toŋ ˗nu ˗wo ˗man ˗nu ˈwo ˗glü ˈˈsɛ ˈˈpiʋ̈ ˗an ˈka. ˈKwa dɔ ˈˈwo dɔ ˈˈtʋ̈ŋ ˗nu ˈka, ˈyö ˈwo ˗kë Izraɛdhö ˗sɛ ˈgü ꞊va. Ɔtɔblö ˈˈsu ˈˈpɛpɛ ˈka, ˗wo ˗go wo ˈˈgblʋʋ ˈyö ˈwo dho ˈˈsɛ ˗nu ˈö ˈˈwo dɔ ˗an ˈgü ˈgbɛ ˗an ˈgü, ˈyö ˈˈwo dɔ ˈˈtʋ̈ŋ ˗ya ˗wo, ˈwo wo ꞊yɛɛ˗ ˗kë ˈwo nu. (Chant de S. 2:11, 12; Jér. 8:7) ˗A pö ˗sü ˗mü ꞊dhɛ Izraɛdhö ꞊kwɛŋzü, ˈˈblü ˗toŋ ˗nu ꞊slɔɔ ˗sü kö ˗wa kë ˈˈsaapë ˈka dhayi ˈˈtʋ̈ŋ ɛɛnˈˈ ˈˈnɛnnɛn ˈˈtʋ̈ŋ ˈgü, ˗yö ˗kun ˈˈgbɩɩ˗.

ˈPö˗ ˗toŋ ˗nu ˗zë, ˈwaa ˗man ˗nu ˈwo ˗glü ˈˈsɛ ˈˈpiʋ̈ ˗an ˈka. ˗Yö ˗kë ˈˈtʋ̈ŋ ˈˈoo ˗tʋ̈ŋ ˈka ˗kwɛ ˈgü, ˗wo ˈbhë ˗kplawo. ˗Ya ˈgo mü ˈzü ˗man ˗nu ˈwo ˗kë mɛn ˗nu ˈˈpiʋ̈ ˈplöö wo ˗mü. (Zan 2:14, 16) ˈˈSëëdhɛ ˗be do ˈbha ˗ya ˗pö ꞊dhɛ «ˈpö˗ ˗toŋ ˗nu ˗kun ˈpödhɛ ɛɛnˈˈ ˈˈkwipö ˈˈpɛpɛ ˈwo Padhɛsinö ˗an ˈgü. Mɛn ˈˈpɛpɛ ˈö ˗kɔ kun ˗an ˗gɔ ˗an ˗bha ˗toŋ wɔdhɛ ˗kë ˗an ˗bha ˈkɔ ˈˈbhaŋ ˗bha, ɛɛnˈˈ ˈzü ˗wo ˗yɛga ˈbha ˗to wo ˗bha ˈkɔ ˈˈbhaŋ ˈgü kö ˗yö kë ˗an wɔdhɛ ˈka.»—Isaïe 60:8.

Zoova ˗wɩ ˗a ˗bha kö ˗man ˈdhɛ ꞊slɔɔ Izraɛdhömɛn ˗nu ˗gɔ ˗wa nu ö ˗dhɛ ˈˈsaapë ˈka. ˗Ya ˗zɔn ꞊dhɛ mɛn ˗nu ˗dhɔ ˗ya ˗kë, ˈö ˈwɔngümanmɛn ˈka.