Nɔɔn˗ ˗së ˗nu ˈwo bhë ˗wo ˗go ˗Zlan ˈˈpiʋ̈ ꞊dedewo ˗ee?

1. De ˈö ˗tɔ Biblö Dëmɛn?

Nɔɔn˗ ˗së ˈö ˗kë ꞊dhɛ mɛnbhɩɩdhe ˗nu ˗dho ˗tosɛta kë ˈˈkpɔnŋ ꞊taa yi ꞊gban ˈka bhë, ˗yö ˗ya ˗sü ˈka Biblö ˈgü. (Psaume 37:29) ˈSëëdhɛ ˗be ˈsɛɛn˗ 66 ˈnën ˈwo Biblö ˈgü. ˗Zlan ˗dhɔkëmɛn ˗nu kpɛnŋdhö 40 ˈnën ˗Zlan ö ˗kɔ ˗yɛ ˗an ˗bha ˈyö ˈwo ˗an ˗ya. ˗A ˈsëëdhɛ ˗be ˈsɛɛn˗ ˈˈsoodhu ˗blɛɛsü ˗nu bhë, Moizö ˈnën ˈö ˗an ˗bɛn zë, ˗a ˗kwɛ ˗ya ˗mɔɔn ˗kwɛ 3.500 ˗bha ꞊dɛɛ. ˗A ˈsëëdhɛ ˗be ˗totaabhasü bhë, bɔmɛn Zan ˈnën ˈö˗ ˗bɛn zë, ˗a ˗kwɛ ˗ya ʒiö ˗kwɛ 1.900 ˗ta ꞊dɛɛ. De ˈö Biblö ˗yamɛn ˗nu ˈwo˗ ˗zopiʋ̈wɔn ˗ya? ˗Zlan ˗yö ˗bɔ ö ˗bha ˗zuu ˈˈslʋ̈ʋ̈slʋ̈ ˗ta, ˈö dhiaŋ zë Biblö ˗yamɛn ˗nu ˗dhɛ. (2 Samuel 23:2) ˗Zlan ˗zopiʋ̈wɔn ˗nu ˈnën ˈwo˗ ˗ya, ˗an ˗de ˗bhaa ˈyaa ˗mü. ˈDhɛ ˈö ˗kë ˈˈdhʋ̈ kö Zoova ˈnën ˈö ˗tɔ Biblö Dëmɛn.​—2 Timote 3:16; 2 Piɛdhö 1:20, 21 ˗wo pö.

˗Bhö video ˈDe ˈö ˗tɔ Biblö Dëmɛn? ˗ga.

2. Kwa ˗dho ˗a ˈwɔn dɔ ˗kɔ ˗kë ꞊dhɛ ꞊dhɛ Biblö ˗yö ˗go ˗Zlan ˈˈpiʋ̈?

Kwa˗ ˈwɔn ˗dɔ ꞊dhɛ Biblö bhë ˗yö ˗go ˗Zlan ˈˈpiʋ̈, ˈyö ˗tɔ ꞊dhɛ ˈwɔn ˗nu ˈwo ˗dho kë, ˗yö ˗an ˗to ˈˈdhiʋ̈ ˈö ˗an ꞊gban ꞊blɛɛ ˈkpakpadhö. Mɛn ˈbhaa ˗kɔ ˈyaa ꞊mɔɔn˗ ˗bha kö ˗ya kë ˈˈdhʋ̈. (Josué 23:14) ˈˈPiigbɩɩ˗ ꞊va Dë ˗Zlan dosɛnŋ ˈnën ˈö ꞊mɔɔn˗ ˗bha kö ˗yö mɛnbhɩɩdhe ˗bha ˗dhɛkpaɔ dhiʋ̈ˈˈ pö ˈkpakpadhö.​—Titö 1:1-4 ˗wo pö.

Pë ˈö ˈkwa˗ ˈˈpiʋ̈ ˈyö ˗tɔ kö ˈsëëdhɛ ˗be ˈö go ˗Zlan ˈˈpiʋ̈ ˗yö kë ö ˗de ˗ta ꞊dhɛ ˗kɔ bhë ˗a ˈdhö. Biblö ˗yö ˈˈdhʋ̈ ꞊dede ˈka ˈpö. ˗A ˗be ˈˈmliya ꞊va ˈnën ꞊waa˗ ˗gblü ˗wo ꞊këŋ ꞊va ˈgü. ˈKö ˗kë ꞊dhɛ ˗yö zii, ˈö ˈyaa ꞊klaŋ ˗nu ˗bha ˈsëëdhɛ ˗be ˈka, Biblö ˗ya ˈwɔn ˗nu ˈwo ˗gban ˗dapë ˗nu waa ˈˈkpɔnŋtaadhɛ ˗nu ˗bha ˗an ˗wɔn blɛɛˈˈ, ˗yö ˗an ˗blɛɛ ˈkpakpadhö. ꞊Ya ˈgo mü ˈzü mɛn 40 ˈwo Biblö ˗bɛn zë bhë, ˗an ˗wo ˗yö ˗dho ˈko ˈˈpiʋ̈.a Pë ˗nu ˈö Biblö ˗ya pö ˈö ˗gban ˗dhɔ ˗bha, ˗ya ˗zɔn ꞊dhɛ ˗a ˈgo ˗dhɛ ˈˈwɛɛ ˈbhaa ˈyaa ˈdhö kö yö ˈti kë ˗Zlan ꞊dede ˈö ˗kë ˗dhɔkaa ˗Zlan ˈka bhë ˗a ˈˈpiʋ̈. ꞊Faan ˗ya ˗gɔ ˈzü ꞊dɛɛ kö ˗yö mɛnbhɩɩdhe ˗nu ˗bha ˗tosɛta ˈˈgla, kö ˗ya kë ˗së. ˗A ˈwɔn ˗nu ˈwo bhë ˗wo mɛn ˈˈmliɲɔn ꞊vadhɛ ˗zokun ꞊dhɛ Biblö ˈö bhë ˗Zlan ˗Wo ˗mü.​—1 Tesadhonikö 2:13 ˗wo pö.

˗Bhö video Kwa ˗dho ˗a ˈwɔn dɔ ˗kɔ ˗kë ꞊dhɛ ꞊dhɛ Biblö ˗yö ˗go ˗Zlan ˈˈpiʋ̈? ˗ga.

3. ˗Mën ˗nu ˈö Biblö ˗yö ˗an ˗wɔn ꞊blɛɛ?

ˈWɔn ˗gɔ ˗nu ˈwo Biblö ˈgü, ˗a do ˗yö ˗gban ˈwɔn ˗së ˈö ˗Zlan ˗zopiʋ̈ mɛnbhɩɩdhe ˗nu ˗bhaa ˈka ˗a ˗bha. ˈWɔn ˗së ˈö ˈkun mɛnbhɩɩdhe ˗nu kwa ˗bhaa ˈka ˗be, kö ˈkwa ˗tosɛta kë ꞊bhɔɔ ˈˈsɛ ˗ta ˈˈsɛ züdɔyi ˈka bhë, Biblö ˗yö ˗a ˗dhiɔŋ kwa ˗gɔ ˗kɔ ˗wɔn ˗blɛɛ. ˗Kɔ ˈö ˗Zlan dho ꞊bhɔɔ ˈˈsɛ bhë ˗a nu ˗a ˈka kwa ˗dhɛ ˈzü, ˗ya ˗wɔn ˗blɛɛ ˈpö.​—˗Dhɛkpaɔ dhiaˈˈ ˈsëëdhɛ 21:4, 5 ˗wo pö.

˗Zlan ˗Wo ˈö bhë, ˈtɔŋ˗ ˗nu, ˈtɔŋ˗ ˗gɛngbandhɛ ˗nu waa ˗dhioo ˗nu ˗wa ˈgü ˈpö. ˗Ya ˗go ˗mü ˈzü ˗kɔ ˈö ˗Zlan ˗yö mɛnbhɩɩdhe ˗nu kun ˗a ˗bha ˗a ˈwɔnzuan ˗yö Biblö ˈgü. Kwa ˗Zlan ˗bha ˈwɔn kë ˗kɔ ˗nu ˗yö ˈwɔnzuan ˗nu bhë ˗an ˗bha. ˈDhɛ ˈö ˈˈdhʋ̈ Biblö ꞊mɔɔn˗ ˗bha ˈö ü ˗takun kö ˈü ˗Zlan dɔ. ˗Kɔ ˈü ˗dho ˗a kë ˗a ˗bha kö ˈü kë ˗Zlan ˈˈtɔŋdë ˈka ˗ya ˗zɔn.​—Psaume 19:7, 11; Zakö 2:23; 4:8 ˗wo pö.

4. Ü ˗dho Biblö ˈgüman ˗kɔ ˗kë ꞊dhɛ?

ˈSëëdhɛ ˗be ˈnën ˈö yö ˗yö ˗dho ü ˗takun Biblö ˈgüman ˗sü ˗bha ꞊dhɛ ˗kɔ do ˈö Yesu ˗ya ˗kë ˗a ˈka bhë ˗a ˈdhö. ˗Ya Biblö ˈˈɲan do ˈsü ꞊ya˗ ˗gɛn pö, ˈyö˗ ˈˈwɛɛ ˈbhaa sü ˈyö˗ “ˈklɔɔ˗ pö” ˈzü.​—Dhukö 24:27, 45 ˗wo pö.

Pë ˗nu ˈwo ˗dho mɛn ˗nu zuʋ̈ˈˈ ˈsü ꞊dhɛ nɔɔn˗ ˗së ˗nu ˈwo go ˗Zlan ˈˈpiʋ̈ ˗an ˈdhö ˈwaa ꞊va. ˈKö ˗kë ˈˈdhʋ̈, mɛn ˗nu ˈˈtʋ ˈyaa ˗an ˗bha, ˈö ˈwo mɛn ˈbhaa ˗nu ˈˈtënŋ sü. ˈˈKɛɛ ˈyaa ˈdho˗ ü ˈgü ga. Ü ˗bha ˗tosɛta ˈö ˈyaa ɲën ˗a ꞊slɔɔ ˗sü ˗dho ˈsü ü ˗bha ˗Zlan dɔ ˗sü ˗bha.​—Zan 17:3 ˗wo pö.