ˈDe ˈö ˗tɔ Yesu Klito?

1. Yesu ˗yö ˗go ˈˈmɛn? ˈDe ˈö˗ ˗da?

Yesu ˈyaa ꞊dhɛ mɛn ˈˈwɛɛ ˗nu ˈwo to ˗an ˈdhö, ˈyö ˗tɔ ˗yö ˗kun ˗Zlan ˗bha ˈˈkiö do ˈka dhaŋ˗ ˈgü ˈyö ꞊kun bhɔ ˗ni mɛnbhɩɩdhe ˈka ˈˈkpɔnŋ ꞊taa. (Zan 8:23) Yö ˈnën ˗Zlan ˗ya ˗da ˗blɛɛsü. Yö ˈnën ˈö ˗Zlan ˗yö ˈbɔ ˗a ˗ta ˈyö pë ˈˈpɛpɛ ˗nu ˈwo to ˗an ˗da. Yö dosɛnŋ ˈnën ˈö Zoova ˗ya ˗da vɛɛdhö. ˈDhɛ ˈö ˈˈdhʋ̈ ˗yö ˗së kö ˗wa ˗dhɛ ˗Zlan ˗bha “ˈnë ga do”. (Zan 1:14) Yesu ˗kun ˗Zlan ˗Wodhiʋ̈lomɛn ˈka, ˗a ˗wɔn ˈgü ˗wa ˗dhɛ ˈpö “˗Zlan ˗Wo.”​—Proverbes 8:22, 23, 30; Eblö 1:2 ˗wo pö.

2. ˗Mën ˈö ˗kë ˈö Yesu nu ˈˈkpɔnŋ ꞊taa?

˗Zlan ˗yö ö Gbö ˗sü dhaŋ˗ ˈgü ˈö˗ bɔ Zuifö ˈnëndhiëŋ do ˈwo˗ ˗dhɛ Madhi ˈö ˈyaa gɔɔn˗ ˗wɔn dɔ ˗a ˈˈgblüü kö ˗yö bhɔ ˈˈkpɔnŋ ꞊taa. ˈDhɛ ˈö ˈˈdhʋ̈ Yesu dë ˈyaa kun ˈˈkpɔnŋtaamɛn ˈka. (Dhukö 1:30-35) Yesu ˗yö ˗nu ˈˈkpɔnŋ ꞊taa kö (1) ˗yö gagade ˈö ˗gban ˗Zlan ˗bha, ˗a ˗zɔn kwa ˗dhɛ, (2) ˈkwa kë ˈwɔn ˈˈgbɩɩ˗ ˗nu ˈgü ˗kɔ ˈö ˈkwa ˗dho ˗Zlan dhɔɔbhawɔn kë ˗a ˈka, ˗ya ˈwɔnzuan ˗zɔn kwa ˗dhɛ, (3) ˗yö ö ˗bha ˗tosɛta ˈˈslʋ̈ʋ̈slʋ̈ nu kwa “˗gɔtadhɔpë” ˈka.​—Matiö 20:28 ˗wo pö.

3. ˗Mën ˈö ˗kë ˈö kwa ˗bhawɔn ˗yö yö ˗gɔtadhɔpë ˗bha?

˗Gɔtadhɔpë ˈnën ˗tɔ pë ˈö ˈwo˗ nu kö ˗wo mɛn bho ga ˗yɛ ˈˈdhiʋ̈. (Exode 21:29, 30) Pë ˈö kun ˗Zlan zuʋ̈ˈˈ ˈˈpiʋ̈ ˗be ˈyaa ˈnɛn ˈö ˗tɔ kö mɛnbhɩɩdhe ˗nu ˗wo ga ɛɛnˈˈ kö ˗wo kë zii. Kwa˗ ˈwɔn dɔ ˗kɔ ˗kë ꞊dhɛ? ˗Zlan ˗ya pö mɛn ˗blɛɛsü ˈwo˗ ˗dhɛ Adan bhë, ˗a ˗dhɛ ꞊dhɛ, kö ˗yö pë ˈö Biblö ˗ya ˗dhɛ “ˈwɔn yaa” ˗ya kë, ˗yö ˗dho ga. ˈDhɛ ˈö ˈˈdhʋ̈, ꞊ya kë ꞊dhɛ Adan yö ˈti ˈwɔn yaa kë ˗be, yö ˈti ˗dho ga toŋtoŋdhö. (ˈWunzüdɔdhɛ 2:16, 17; 5:5) Biblö ˗ya ˗pö ga ˗yö ˗bɔ Adan ꞊nën˗ ˗ta ˈyö “˗da” ˈˈkpɔnŋ ꞊taa. ˈDhɛ ˈö ˗kë ˈˈdhʋ̈ ˈyö Adan ˗yö ˈwɔn yaa ˈö bhë waa ˗a ˈˈpiʋ̈pë ˈö ˗kë ga ˈka ˗an nu ˈö ˈgü ˈnën ˗nu ˗dhɛ. ˗A ˗wɔn ˈgü, kwa ˗bhawɔn ˗yö ˗gɔtadhɔpë ˗bha kö ˗yö kwa bho ga ˈö Adan ˗ya to kwa ˗gɔ ˈkɛnŋpë ˈka bhë ˗a ˗gɔ ˈˈgan ˈgü.​—Wlɔmö 5:12; Zan 17:3 ˗wo pö.

De ˈö ˗dho ꞊mɔɔn˗ ˗bha kö ˗yö ˗gɔtadhɔpë bhë ˗a nu kö ˗yö kwa bho ga ˗gɔ ˈˈgan ˈgü? Mɛn ˈö ˈwɔn yaa ˗dhii ˈdhö ˗a ˈgü, ˈyaa ꞊mɔɔn˗ ˗bha kö ˗yö mɛn ˈˈwɛɛ ˗bha ˈwɔn yaa ˈˈpo bho, ˈyö ˗tɔ ꞊dhɛ ˈkwa ga, kö kwa ˗de ˗bha ˈwɔn yaa ˈnën ˈö ˈkwa˗ ˈˈpo bho.​—Wlɔmö 3:23 ˗wo pö.

4. ˗Mën ˈö ˗kë ˈö Yesu ˗yö ga?

Yesu ˈyaa kun ꞊dhɛ ˈˈkpɔnŋtaamɛn ˈˈwɛɛ ˗nu ˈdhö, ˗yö ˗kun ˈˈslʋ̈ʋ̈slʋ̈. ˈDhɛ ˈö ˈˈdhʋ̈ ˈyaa ꞊mɔɔn˗ ˗bha kö ˗yö ga ö ˗bha ˈwɔn yaa ˗wɔn ˈgü, yö ˈti ˈwɔn yaa kë toŋtoŋdhö. Yesu ˗yö ˗ga mɛn ˈˈwɛɛ ˗nu ˗bha ˈwɔn yaa ˗nu ˗wɔn ˈgü. Ö Gbö bɔ ˈö ˗Zlan ˗ya wo kö ˗yö ga kwa ˗wɔn ˈgü bhë, ˗dhɔkaa ˈˈmlimlisü ˈnën ˈö˗ ˗zɔn kwa ˗dhɛ bhë. Yesu ˗de ˈpö ˗dhɔkaa ˈnën ˈö˗ ˗zɔn kwa ˗dhɛ, ˗gɔ ˗dho ö dë ˗dhɛ ˈˈshia ˗sü ˈka, ˈyö ö ˗de nu kwa ˗bha ˈwɔn yaa ˗nu ˗wɔn ˈgü.​—Zan 3:16; Wlɔmö 5:18, 19 ˗wo pö.

˗Bhö video ˗Mën ˈö ˗kë ˈö Yesu ˗yö ga? ˗ga.

5. ˗Mën ˈö Yesu ˈdhö ˗a kë ˗ni ˈgü ꞊dɛɛ?

ˈˈˈTʋ̈ŋ ˈö kun ˗a ˈka ˈˈkpɔnŋ ꞊taa Yesu ˗yö ˈˈyua ˗nu ˗bho mɛn ˗nu ˗bha, ˈö mɛn ˗nu bho ga ˈgü, ˈö nu mɛn ˗nu ˈwo kun saanˈˈ ˈgü ˗an ˗dhɛ. Mɛn ˗nu ˈwo wo ˗gɔ dho ˈˈshia ˗Zlan ˗dhɛ, pë ˗nu ˈö ˗dho ˗a kë ˗an ˗dhɛ ˗dhɛkpaɔ dhiʋ̈ˈˈ ˈgü, yö ˈnën ˈö˗ blɛnŋˈˈ ˗zɔn bhë. (Matiö 15:30, 31; Zan 5:28) ˈDhɛ ˈö Yesu ga, ˗Zlan ˗ya ˗bho ga ˈgü, ˈö˗ ˗kë ˗zuu ˈka. (1 Piɛdhö 3:18) ˈDhɛ ˈö go mü, Yesu ˗yö ö ˈˈɲan ˗to ˗Zlan ˗kɔ ˗së ˈgü, kö Zoova ˗yö ˗kɔmɔnwɔnbhasü nu ˗a ˗dhɛ, kö ˗yö kë ˗Gblüdë ˈka ˈˈkpɔnŋtaadhɛ ˗todhʋ̈sü ˗ta. (Eblö 10:12, 13) ꞊Dɛɛ Yesu ˗yö ˗Gblüdë ˈka dhaŋ˗ ˈgü ˈmü. ˗A ˗bha gwëëzë ˗nu ˗wa nɔɔn˗ ˗së pö ˗ni ˈgü ˈˈkpɔnŋtaadhɛ ˗todhʋ̈sü ˈgü.​—˗Dhɛkpaɔ dhiaˈˈ ˈsëëdhɛ 11:15; Matiö 24:14 ˗wo pö.

˗A yi ˈyaa ꞊gblɛnŋ ˈzü kö Yesu ˗yö ö ˗bha ˗Gblüdëdhɛ ˗faan ˈsü kö ˗yö saanˈˈ waa pë ˈˈpɛpɛ ˈwo nu saanˈˈ ˈka ˗an bho ˈˈshia˗. Mɛn ˈˈpɛpɛ ˈwo wo ˗zo yö Yesu ˗dhɛ ˗gɔ ˗dho ˗a ˗dhɛ ˈˈshia ˗sü ˈka, ˗wo ˗dho ˗tosɛta kë ꞊bhɔɔ ˈˈsɛ ˗ta ˈˈkpɔnŋ ꞊taa.​—Psaume 37:9-11, ˗wo pö.