˗Zlan ˗zopiʋ̈wɔn ˈö ˗gban ˈˈkpɔnŋtaadhɛ ˗bha ˈyö ˗tɔ ˗mën?

1. ˗Mën ˈö ˗kë ˈö ˗Zlan ˗yö ˈˈsɛ ˗da?

Zoova ˗yö ˈˈsɛ ˗da mɛnbhɩɩdhe ˗nu ˗bhaa ˈka. Yö ˈnën ˈö ˗tɔ kwa ˗yɛɛbhaadhɛ. Adan waa Ɛvö ˈwo ˗kë dhe waa gɔɔn˗ ˗blɛɛsü ˈka bhë, ˗Zlan yö ˈti ˗an ˗da kö ˗wo ˗tosɛta kë dhaŋ˗ ˈgü, ˈyö ˗tɔ ꞊dhɛ ˗Zlan ˗yö ö ˗bha ˈˈkiö ˗nu ˗da kö ˗wo kë dhaŋ˗ ˈgü. (Job 38:4, 7) ˗Zlan ˗yö mɛn ˗blɛɛsü ˗sü ˈö˗ ˗ya ꞊bhɔɔ ˈˈsɛ ˗së ˈwo˗ ˗dhɛ Edɛnö ˈˈdhüdhɛɛdhɛ bhë ˗a ˈgü. (ˈWunzüdɔdhɛ 2:15-17) Zoova ˗yö ˗tosɛta ˗së ˈö ˈyaa ɲën ˗a ˗ya yö waa ö ˗bha ˈnën ˗nu ˈwo ˗dho bhɔ ˗an ˗bhaa ˈka.​—Psaume 37:29; 115:16 ˗wo pö.

ˈˈSɛ züdɔyi ˈka, Edɛnö ˈˈdhüdhɛɛdhɛ yö dosɛnŋ ˈnën ˈö kun ꞊bhɔɔ ˈˈsɛ ˈka. Adan waa Ɛvö ˗an dua ˗mü ˗be kö ˗wo ˈˈkpɔnŋtaadhɛ pa wo ˗bha ˈnën ˗nu ˈka. ꞊Ya ˈgo mü ˈzü kö ˗wo wo ˗zo kë ˈˈsɛ ˗todhʋ̈sü ˈˈpiʋ̈ kö ˗wa kë ꞊bhɔɔ ˈˈsɛ ˈka. (ˈWunzüdɔdhɛ 1:28) ˈˈSɛ ˈgü yö ˈti ˗dho shiʋ̈ˈˈ toŋtoŋdhö, ˗yö ˗dho ˈto˗ mɛnbhɩɩdhe ˗nu ˗yɛɛbhaadhɛ ˈka ˈˈtʋ̈ŋ ꞊gban ˈka.​—Psaume 104:5 ˗wo pö.

˗Bhö video ˗Mën ˈö ˗kë ˈö ˗Zlan ˗yö ˈˈsɛ ˗da? ˗ga.

2. ˗Mën ˈö ˗kë ˈˈkpɔnŋtaadhɛ ˈyaa ꞊bhɔɔ ˈˈsɛ ˈka ꞊dɛɛ?

Adan waa Ɛvö ˗wo ˗gban ˗Zlan ˗gɔ, ˗a ˗wɔn ˈgü ˈyö Zoova ˗yö ˗an ˗kë ˈˈdhüdhɛɛdhɛ ˈö bhë ˗a ˈgü. ˈDhɛ ˈö ˗kë ˈˈdhʋ̈ ˈyö ꞊bhɔɔ ˈˈsɛ ˗yö dha ˗an ˗gɔ. ˈÖ sü yi ˈö bhë ˗a ˗bha mɛn ˈˈwɛɛ ˈbhaa yö ˈti ꞊mɔɔn˗ ˗bha kö ˗ya ˈˈwɛɛ ˗pë kë. ˈDhɛ ˈö ˗kë ˈˈdhʋ̈ ˈyö ˈˈkpɔnŋtaadhɛ ˗yö pa ˈwɔnyaakëmɛn ˗nu ˈka.​—ˈWunzüdɔdhɛ 3:23, 24 ˗wo pö.

꞊Ya kë ˈˈdhʋ̈ kö ˗Zlan ˗kɔ ˈpö kun ˗a ˗zopiʋ̈wɔn ˈö ˗gban mɛnbhɩɩdhe ˗nu ˗bha ˗a kë ˗sü ˈka bhë ˗ee? ˗Abin! ˗A ˈˈpii ˗yö ˈˈgbɩɩ˗ ꞊gbɔɔnsü. ˗A ˗kɔ ˈyaa ˈkun pë ˈbhaa ˈka. (Isaïe 45:18) ˗Yö ˗dho mɛnbhɩɩdhe ˗nu ˗bha ˗tosɛta baaˈˈ ꞊dhɛ ˗kɔ ˈö kun ˗a ˗zo ˈˈpiʋ̈ ˗be ˗a ˈdhö.​—Psaume 37:11, 34 ˗wo pö.

3. ꞊Bhɔɔ ˈˈsɛ ˈö bhë ˗a ˈˈwɛɛ ˗pë ˗dho kë ˗kɔ ˗kë ꞊dhɛ?

꞊Bhɔɔ ˈˈsɛ ˗pë ˗dho kë ˗Zlan ˗bha ˗Gblüdë Yesu ˗bha mɛn ꞊kɔɔn ˈˈtʋ̈ŋ ˈgü. ˗Gblü ˈwo˗ ˗dhɛ Aamagedɔn bhë ˗a ˈˈtʋ̈ŋ ˈka, Yesu ˗dho yö ˗Zlan ˗bha ˈˈkiö ˗nu ˗dhɛ ˈˈdhiʋ̈ kö ˗wo mɛn ˈˈpɛpɛ ˈwo ˗gban ˗Zlan ˗gɔ ˗an ˈgüshiʋ̈ˈˈ. ꞊Ya ˈgo mü ˈzü Yesu ˗dho Sɔtraan ˗zuö ˗klɔŋ züʒiösü ˈgü kö ˗yö ˗kwɛ 1.000 kë mü. ˗Zlan ˗dhɔkëmɛn ˗nu ˗dho dha ˈgüshiʋ̈dhe ˈö bhë ˗a ˗gɔ, ˈyö ˗tɔ ꞊dhɛ Yesu ˗dho ˈˈdhiʋ̈sü ˗an ˈka, ˈö ö ˗kɔ kpa ˗an ˗ta. ˗Wo ˗dho ˗tosɛta ˈö ˈyaa ɲën ˗a kë ꞊bhɔɔ ˈˈsɛ ˗ta zuʋ̈gblüdhi ˈgü.​—˗Dhɛkpaɔ dhiaˈˈ ˈsëëdhɛ 20:1-3; 21:3, 4 ˗wo pö.

4. Saanˈˈ ˗dho ɲën ˈˈtʋ̈ŋ ˗mɛɛn ˈgü?

˗Zlan ˗dho ˈwɔn yaa bho ˈˈkpɔnŋ ꞊taa ˈˈtʋ̈ŋ ˗mɛɛn ˈgü? ˈWɔn ˈö ˈkwa ˗dho ˗a “ˈsuanbho” ˗a ˗bha ˗dhɛ ˈˈkpɔnŋtaadhɛ ˈˈdhiʋ̈ta ˈˈtʋ̈ŋ ꞊ya ˗lo Yesu ˗ya ˗zɔn. ˈWɔn ˗nu ˈwo kë ˗ni ˈgü ˈˈkpɔnŋ ꞊taa ꞊dɛɛ kö ˗wo kë ˗wo ˈdho ˗a ˈka ˈˈdhiʋ̈, ˗wo ˗dho mɛnbhɩɩdhe ˈˈpɛpɛ ˈgüshiʋ̈, ˈˈkɛɛ ˗wa ˗zɔn ꞊dhɛ ˈkwa ˗da “ˈˈkpʋngtaadhɛ yën ˈˈtʋ̈ng” ˈgü.​—2 Timote 3:1; Dhukö 21: 7-14 ˗wo pö.

Yesu ˗bha ˗ya dhaŋ˗ ˈgü ˗sü kö ˗yö ˈˈkpɔnŋtaadhɛ ꞊kɔɔn ˗kwɛ 1000 ˈˈpiʋ̈ bhë, ˗yö ˗dho saanˈˈ ꞊gban ɲën. (Isaïe 9:6, 7; 11:9) ꞊Ya ˈgo ˗a ˈgü, ˗a ˗bha ˗kë ˈˈSaabhomɛn ˈKpii˗ ˈka ˗sü ˗wɔn ˈgü, ˗yö ˗dho mɛn ˈˈpɛpɛ ˈö ˗Zlan ˗dhɔ ˗yö ˗an ˗kë ˗an ˗bha ˈwɔn yaa ˗nu ˗bhawɔn ˈto. ˈDhɛ ˈö ˈˈdhʋ̈ ˗Zlan ˗dho bɔ Yesu ˗ta kö ˗yö ˈˈyua ˗nu, ˗kë zii ˗sü waa ga ˗nu ɲën.​—Isaïe 25:8; 33:24 ˗wo pö.

5. De ˗nu ˈwo ˗dho ˗tosɛta kë ꞊bhɔɔ ˈˈsɛ ˗dɛɛ ˈö bhë ˗a ˗ta?

Mɛn ˗nu ˈwo wo ˗gɔ dho ˈˈshia ˗Zlan ˗dhɛ wo ˈnën ˈwo ˗dho ˗tosɛta kë ꞊bhɔɔ ˈˈsɛ ˗ta. (1 Zan 2:17) Yesu ˗yö ö ˗bha gwëëˈˈ ˗nu ˗bɔ kö ˗wo mɛn ˗nu ˈwo wo ˗de ˗kë ˈˈtɩtɩ ˗an mɛɛnˈˈ, kö ˗wo ˗an ꞊klaŋ kë pë ˈwo ˗dho ˗a kë kö ˗wo kë ˗Zlan ˗dhɛ ˗së ˗a ˈka. Zoova ˗yö mɛn ˈˈmliɲɔn ꞊vadhɛ ꞊klaŋ kë ˗ni ˈgü ˈˈtʋ̈ŋ ˈö yö ˗a ˈgü kö ˗wo ˗tosɛta kë ꞊bhɔɔ ˈˈsɛ ˈö ˗dho kë bhë ˗a ˗ta. (Tsephania 2:3) Zoova ˗bha ꞊Gbɛkiö ˗nu ˗bha ˗bhɔkwëëkëgükɔ ˗nu ˈgü, ˗kɔ ˈö mɛn ˗nu dho˗ kë ˗a ˗bha dhegɔndë ɛɛnˈˈ ˈnëndë ˗tiandhö ˈka, kö ˗wo kë gwaanbhadhe ɛɛnˈˈ ˈnëndhö ˗tiandhö ˈka ˗wa ˗draan ˗mü. ˈNën ˗nu waa wo ˗mɛn ˗nu ˗wo ˗Zlan ˗dhɔkë wo ˈko ˈˈpiʋ̈, ˈyö nɔɔn˗ ˗së ˗nu ˈwo ˗dho ˗an ˗bha ˗tosɛta kë ˗së ˈwo˗ ꞊draan.​—Mika 4:1-4 ˗wo pö.