Kwa ˗bha mɛn ˗nu ˈö ꞊wa ga kwa ˗dho ˗kpan ˗an ˗bha yi ˈbhaa ˈka ˗ee?

1. Nɔɔn˗ ˗së ˗mɛɛn ˈö ˗gban mɛn ˗nu ˈö ꞊wa ga ˗an ˗bha?

ˈDhɛ ˈö Yesu ˗yö dho Betani ˗dhɛ ˈö Zedhizadhɛmö ˗dhɛ ˈˈsuee bhë ˗a ˈgü, kö ˗a ˈˈtɔŋdë Dhazaa ꞊ya ga ˗a ˗dhɛkpaɔyi ꞊ya kë ˗yiishiö. ˈYö Yesu waa mɛn ˈö ga bhë ˗a ꞊dhegblü Matö waa Madhi ˗nu wo dho ˗wo ˗a bun ˗ta. ˈDhɛ ˈö ˈwo ˗wo mü, ˗a ˗dhɛ yö ˈti ꞊gɔɔ ˈyö mɛn ˗nu ˗wo ˗dhɛ pa. Yi ˈö Yesu ˗yö Dhazaa bho ˗a ˈka ga ˈgü bhë, ü ˗bha ˈgü Matö waa Madhi ˗an ˗bha zuʋ̈gblüdhi ˗kun ˗kɔ ˗kë ꞊dhɛ?​—Zan 11:21-24, 38-44 ˗wo pö.

Nɔɔn˗ ˗së ˈö ˗gban ˗go ga ˈgü ˗sü ˗bha bhë ˗yö ˗kun Matö ˈˈɲaan ˈka zii ˗be. ˗Ya ˈwɔn ˗dɔ ꞊dhɛ Zoova ˗dho mɛn ˗nu ˈö ꞊wa ga ˗an ˗bo kö ˗wo ˗tosɛta kë ˈzü ˗dɛɛwo ˈˈkpɔnŋ ꞊taa.​—Zan 11:24 ˗wo pö.

2. ˈKwa ga ˗mën ˈö ˈkwa ˗kë ˗a ˈka?

˗Zlan ˗yö mɛnbhɩɩdhe ˗pëkë ˈˈsɛ ˈka. (ˈWunzüdɔdhɛ 2:7; 3:19) Kwa ˗zuu ˈyaa ˈdhö. Kwa ga pë ˈbhaa ˈyaa ˈgo kwa kwi ˈgü kö ˗yö ˗tosɛta kë ˗dhɛ ˈbhaa ˈgü. ˈKwa ga kwa ˗tëŋ ˗yö ga ˈpö, ˈö kwa ˗bha ˗zotadhe ˗yö ꞊shiʋ̈. ˗A ˗wɔn ˈgü, Dhazaa yö ˈti ga ˈgü ˗wɔn ˈˈwɛɛ ˈbhaa blɛɛˈˈ, ˈyö ˗tɔ ꞊dhɛ mɛn ˗nu ˈö ꞊wa ga ˈwaa pë ˈbhaa ˈwɔn dɔ.​—Psaume 146:4; Ecclésiaste 9:5, 6, 10 ˗wo pö.

Mɛn ˗nu ˈö ꞊wa ga ˗Zlan ˗yö ˗an ˗wëë ˗kë ˗wo ˈˈwo ˈgü ˗ee? ˈDhɛ ˈö ˗kë ꞊dhɛ Biblö ˗ya ˗pö mɛn ˗nu ˈö ꞊wa ga ˈwaa ˈwɔn ˈbhaa ˈwɔn dɔ bhë, kö ꞊klaŋwo ˈö ˗kë mɛn ˗zuö ˈˈwo ˈgü ˗sü ˈka bhë, ˈpë ˈö ˗Zlan ˈyaa˗ kë ˗a ꞊sua ˗ya ˗a ˗bha ˗sü ˗mü. ˗Zotadhe ˈö ˗kë mɛn ˗wëë ˗kë ˗wo ˈˈwo ˈgü ˗sü ˈka bhë, ˗yö ˗Zlan ˗dhɛ ˈyaa˗.​—Jérémie 7:31 ˗wo pö.

˗Bhö video ˈKwa ga ˗mën ˈö ˈkwa ˗kë ˗a ˈka? ˗ga.

3. Mɛn ˗nu ˈö ꞊wa ga ˗wo ꞊mɔɔn˗ ˗bha ˈwo dhiaŋ zë kwa ˗dhɛ ˗ee?

Mɛn ˗nu ˈö ꞊wa ga ˈwaa ꞊mɔɔn˗ ˗bha kö ˗wo dhiaŋ zë ɛɛnˈˈ kö ˗wo ˈwɔn man. (Psaume 115:17) ˈˈKɛɛ ˗zuu yaa ˗nu ˗wo -dhö, ˈö ˈwo ꞊mɔɔn˗ ˗bha ˗wo wo ˗de kë ꞊dhɛ mɛn ˈö ꞊ya ga ˗a ˈdhö, ˈyö ˈwo dhiaŋ zë mɛn ˗nu ˗dhɛ. (2 Piɛdhö 2:4) Zoova ˈyaa˗ ˈˈpiʋ̈ toŋtoŋdhö kö ˈkwa dhiaŋ ˗zë mɛn ˗nu ˈö ꞊wa ga ˗an ˗dhɛ ˗sü ˈgüdan.​—Deutéronome 18:10, 11 ˗wo pö.

4. De ˗nu ˈwo ˗dho ˈgo ga ˈgü?

Mɛn ˈˈmliɲɔn ꞊va ˈö ꞊wa ga ˗wo ˗dho ˈgo ga ˈgü ˈwo ˗nu ˈˈkpɔnŋ ꞊taa. Mɛn ˗nu ˈö wo ˈti ˗Zlan dɔ ˗ʒianwo, ˈö ˈwo ˈwɔn yaa ˗kë, ˗wo ˗dho ˈgo ga ˈgü ˈpö.​—Këwɔn ˗nu 24:15 ˗wo pö.

Mɛn ˗nu ˈwo ˗dho ˈgo ga ˈgü bhë, ˗wo ˗dho ꞊mɔɔn˗ ˗bha kö gagade ˈö ˗gban ˗Zlan ˗bha ˗wa draanˈˈ, kö ˗wo wo ˗zo yö Yesu ˗dhɛ ˈwɔn ˗man ˗a ˗ta ˗sü ˈka. (˗Dhɛkpaɔ dhiaˈˈ ˈsëëdhɛ 20:11-13) ꞊Ya kë ꞊dhɛ ˗wa ˈwɔn ˗së kë, ˗wo ˗dho ˗tosɛta kë yi ꞊gban ˈka ˈˈkpɔnŋ ꞊taa.​—Zan 11:25, 26 ˗wo pö.

5. ˗Mën ˈö ˗go ga ˈgü ˗sü ˗ya ˗zɔn kwa ˗dhɛ ˈö ˗gban Zoova ˗bha?

˗Zlan Gbö ˈö˗ bɔ, ˗a ˗bha ˗ga kwa ˗wɔn ˈgü ˗sü ˈnën ˈö˗ ˗kë ˈyö ˈkwa ˗dho ˗kpan kwa ˗bha mɛn ˗nu ˈö ꞊wa ga ˗an ˗bha. ˈDhɛ ˈö ˈˈdhʋ̈ ˗go ˗ga ˈgü ˗sü ˗yö Zoova ˗bha ˗dhɔ waa˗ ˗bha ˈˈklʋʋsëdhɛ ˗nu ˗zɔn kwa ˗dhɛ. ˈˈTʋ̈ŋ ˈö gamɛn ˗nu ˈdho˗ ˗bo ˗a ˈka bhë, de ˈü˗ ˈˈpiʋ̈ kö ˈü ˗kpan ˗a -bha?​—Zan 3:16; Zan 17:3 ˗wo pö.