ˈWƆN ˗GƆ 10
Ü ˗dho ˗Zlan gba ˗kɔ ꞊dede dɔ ˗kɔ ˗kë ꞊dhɛ?
1. ˗Zlanwo ꞊dede ˗yö dosɛnŋ ˗ee?
“˗Ka ka ˗dɩ ˈkun ˗së [˗Zlan] ˗wodhiʋ̈loomɛ ꞊flüsü ˗nu ˗gɔ.”—MATIÖ 7:15.
Yesu ˗yö ö ˗bha gwëëˈˈ ˗nu ꞊klaŋ ˗kë ˗zlanwo ꞊dede ˈö dosɛnŋ ˗a ˈka. ˗Ya ˗zɔn ʒiaanga ˈö ꞊wa bɔ ˗a ˗ta ˈö ˈwo ˗tosɛta ˈö ˈyaa ɲën ˗a ꞊slɔɔ ˗a ˈka. ˗Ya ˗pö: “Mɛ ˈwo bɔ˗ ˗ta ˈwaa ˈgbɛ.” (Matiö 7:14) ˗Zlan ˗dhɔkë ˗kɔ dosɛnŋ ˈö ˗gban ˗a ˗Wo ˈö Biblö ˈka bhë ˗a ˗ta, ˈyö˗ ˗dhɔ ˗ya ˗kë. ˗Zlan ˗dhɔkëmɛn ˗nu ꞊dede ꞊gban ˈˈpɛpɛ ˗bha ˗zoyödhe ˗yö do.—Zan 4:23, 24; 14:6; Efɛzö 4:4, 5 ˗wo pö.
˗Bhö video ˗Zlan ˗dhɔkë ˗kɔ ˈˈpɛpɛ ˗yö ˗Zlan ˗dhɛ ˗së ˗ee? ˗ga.
2. ˗Mën ˈö Yesu ˗ya pö ˈö ˗gban Kletiɛn ꞊sua ˗sü ˗nu ˗bha?
“˗Wa ˗pö wo ˗dɩ ˗dhɛ ꞊dhɛ wo [˗Zlan] dɔ, ˈˈkɛɛ kö˗ ˗nu këwɔn ˗zë ˈbha ˈyaa bhɔ ˈmɛ ˈwo [˗Zlan] dɔ ˗a ˗nu këwɔn ˗nu ˗bha.”—TITÖ 1:16.
Yesu ˗ya ˗to ˈˈdhiʋ̈ ˈö˗ pö ꞊dhɛ ˗Zlan ˗wodhiʋ̈lomɛn ꞊sua ˗sü ˗nu ˗dho ꞊sua ˗da Kletiɛn ˗nu ˗bha ˗Zlanwopö ˗kɔ ˈgü. ꞊Waa ˗an ꞊ga, ˗wo ˗bhɔ ˗zlanwopömɛn ˗nu ꞊dede ˗bha. ˗An ˗bha ˗zlanwokɔgümɛn ˗nu wo ˗de ˗sü Kletiɛn ˈka. ˈˈKɛɛ mɛn ˗nu ˈwo ˈˈdhʋ̈ pë ˈwo˗ ˈka ꞊dedewo, ü ꞊mɔɔn˗ ˗bha ˈü˗ dɔ. ˗Kɔ ˗kë ꞊dhɛ? ˗Zlan ˗dhɔkë ˗kɔ ˗së dosɛnŋ ˈö ˈdhö, yö ˈnën ˈö˗ ˈgümɛn ˗nu ˗kë Kletiɛn kpɛnŋdhö ˗nu ˈwo ˗an dɔ ˗an ˈˈta ˗kɔ ˗së waa ˗an ˗bha ˈˈklʋʋsë ˗bha bhë ˗an ˈka.—Matiö 7:13-23 ˗wo pö.
3. Ü ˗dho ˗Zlan ˗dhɔkëmɛn ˗nu ꞊dede dɔ ˗kɔ ˗kë ꞊dhɛ?
Pë ˈˈsoodhu ˈwo Kletiɛn ˗nu dɔ˗ ˗bha, yö ˈwo ꞊nɛn:
˗Zlan ˗dhɔkëmɛn ꞊dede ˗nu ꞊bhlëë ˗ya Biblö ˗bha ˗a ˗bha ˗kë ˗Zlan ˗Wo ˈka ˗sü ˗wɔn ˈgü. ˗Wo pë ˈˈpɛpɛ ˗kë kö ˗an ˗bha ˗tosɛta ˗yö ˗bɛ ˗Zlan ˗bha ˈtɔŋ˗ ˗gɛngbandhɛ ˗nu ˗bha. ˈDhɛ ˈö ˈdhʋ̈ ˗zlanwo ꞊dede ˈö bhë ˗yö ˈgo ˗sü ˈka ˗zlanwo ˗nu ˈwo ˗gban mɛnbhɩɩdhe ˗nu ˗bha ˈwɔndɔdhe ˗ta bhë ˗an ˈˈpiʋ̈. (Matiö 15:7-9) ˗Zlan ˗dhɔkëmɛn ꞊dede ˗nu bhë, ˈpë ˈwo mɛn ˗nu ꞊klaŋ ˗kë ˗a ˈka, woo ꞊dede ˗wa ˗kë.—Zan 17:17; 2 Timote 3:16, 17 ˗wo pö.
Yesu ˗bha gwëëˈˈ ˗nu ꞊dede ˗wo ꞊bhlëë ˗ya ˗Zlan ˈtɔ ˈö ˗kë Zoova ˈka bhë ˗a ˗bha. Yesu ˗yö ꞊bhlëë ˗ya ˗Zlan ˈtɔ ˗bha ˗a ˗zɔn mɛn ˗nu ˗dhɛ ˗sü ˈka. ˗Yö mɛn ˗nu ˗takun kö ˗wo ˗Zlan dɔ, ˈö ˗an ꞊klaŋ ˗kë ˗kɔ ˈwo ˗dho bhɛɛˈˈ ˗a ˗bha kö ˗Zlan ˈtɔ ˗yö kë ˈˈslʋ̈ʋ̈slʋ̈ ˗a ˈka. (Matiö 6:9) ˗Zlanwo ˗mɛɛn ˈö ˗Zlan ˈtɔ ˗zɔn mɛn ˗nu ˗dhɛ ˈdhɛ ˈü˗ ˗bha ˗a ˈgü?—Zan 17:26; Wlɔmö 10:13, 14, NW ˗wo pö.
Kletiɛn ꞊dede ˗nu ˗wo ˗Zlan ˗bha ˗Gblüdëdhɛ ˗wɔn ˗blɛɛ. ˗Zlan ˗yö Yesu ˗bɔ kö ˗yö ˗Gblüdëdhɛ nɔɔn˗ ˗së pö. ˗Zlan ˗bha ˗Gblüdëdhɛ ˈnën ˈö ˗tɔ mɛnbhɩɩdhe ˗nu ˗zoyödhɛpë dosɛnŋ. Yesu ˗yö ˗to nɔɔn˗ ˈö bhë ˗a pö ˗sü ˗bha ˈö to˗ ˈka ˈˈdhʋ̈ ˈö yö ˗a ga yi ˗bha. (Dhukö 4:43; 8:1; 23:42, 43, NW) ˗Ya ˗pö ö ˗bha gwëëˈˈ ˗nu ˗dho nɔɔn˗ ˈö ˗gban ˗Gblüdëdhɛ ˗bha bhë ˗a pö. ꞊Ya kë ꞊dhɛ mɛn ˈbha ꞊ya nu ˗Zlan ˗bha ˗Gblüdëdhɛ ˗wɔn ˗nɔɔn pö ü ˗dhɛ, ü ˗bhaa ˈka kö ˗yö ˗zlanwo ˗mɛɛn ˈgü?—Matiö 24:14 ˗wo pö.
Yesü ˗bha gwëëˈˈ ˗nu ˗kɔ ˈyaa ˈˈkpɔnŋtaadhɛ yaa ˈö yö ˗a ˈgü ˗wɔn ˗nu ˈgü. Ü ꞊mɔɔn˗ ˗bha ˈü ˗an dɔ, ˈyö ˗tɔ ˗an ˗kɔ yaa ˈˈsɛkɔɔwɔn ˗nu ɛɛnˈˈ ˗gban ˈˈsɛkɔɔnmɛn ˗nu ˗gɔ ˗sü ˈgü. (Zan 17:16; 18:36) ꞊Ya ˈgo mü ˈzü ˈwaa ʒiö ˈˈkpɔnŋtaamɛn ˗nu ˈˈpiʋ̈ wɔkɔ yaa waa ˈˈta ˗kɔ yaa ˗nu kë ˗sü ˈka.—Zakö 4:4 ˗wo pö.
Kletiɛn ˗nu ꞊dede ˈwo bhë ˗an ˈko ˗nu ˗dhɔ ˗yö ˗an ˈko ˗kë. ˗Wo ˗wopömɛn ˗nu ˈˈpɛpɛ ꞊bhlëë ˗ya ˗sü ˗draan ˗Zlan ˗Wo ˈgü. ꞊Sua ˗zlanwo ˗nu ˗kɔ ˗yö ˗gblü ˗nu ˈwo ˈˈsɛ ˗nu ˈgü ˗an ˈgü ꞊shiöŋ ꞊shiöŋ, ˈˈkɛɛ ˗Zlan ˗dhɔkëmɛn ꞊dede ˗nu ˈwaa˗ kë ˈˈdhʋ̈. (Mika 4:1-3) Kletiɛn ˗nu ꞊dede ˗zë, ˗wo wo ˗bha ˈˈtʋ̈ŋ waa wo ˗bha ꞊nɔɔnpë ˗nu ˗sü ˈö ˈwo mɛn ˈˈwɛɛ ˗nu ˗takun ˈö wo ˗an ꞊faan mën ˗an ˈka.—Zan 13:34, 35; 1 Zan 4:20 ˗wo pö.
4. Ü ꞊mɔɔn˗ ˗bha kö ˈü ˗zlanwo ꞊dede dɔ ˗ee?
Ü ˗bhaa ˈgü, ˗zlanwo ˗mɛɛn ˈö˗ ˗bha ꞊klaŋwo ˗yö ˗gban Biblö ˗ta, ˈö ˈgümɛn ˗nu ˗Zlan ˈtɔ ꞊bhlëë ˗ya, ˈö ˈwo ˗Zlan ˗bha ˗Gblüdëdhɛ ˗wɔn ꞊blɛɛ ꞊dhɛ mɛnbhɩɩdhe ˗nu ˗zoyödhɛpë dosɛnŋ ˈdhö? ˗Zlanwo ˗mɛɛn ˈö ˗dhɔkaadhe ˈdhö ˗a ˈgümɛn ˗nu ꞊zinŋ ˈgü, ˈö ˗an ˗kɔ ˈyaa ˗gblü ˗nu ˈgü?—1 Zan 3:10-12 ˗wo pö.