ˈDe kun Zɔbö ˈka?

ˈUuzö ˗sɛ ˈgü, gɔndë do ˗kun mü ˈö kun Zoova ˗dhɔkë ˗ni ˈgü. ˗Wo ˗kun ˗a ˗dhɛ ˗ni ˈgü Zɔbö. ˗Yö ˗kun ꞊nɔɔnmɛn ˈkpii˗ ˈka, ˈö˗ ˗bha ˈkɔdhigümɛn ˗nu kun ꞊va. ˗A ˈˈgblü ˗kun ˗së, ˈö kun ˈˈflɛɛmɛn ˗nu, ꞊gɛɛndhe ˗nu waa ˗tenën ˗nu ˗takun ˗ni ˈgü. ˗A këwɔn ˗nu ˗kun ˗së. ˈDhɛ ˗kë ꞊dhɛ ˗a ˈˈgblü ˗kun ˗së bhë, kö ˈwɔn ˈˈgbɩɩ˗ ˈˈwɛɛ ˈbha ˈyaa ꞊mɔɔn˗ ˗bha kö ˗ya ꞊slɔɔ ˗ee?

Zɔbö ˈyaa kun ˗a ˈwɔn dɔ ˗ni ˈgü ꞊dhɛ Sɔtraan ˈˈɲan ˗kun ˗a ˗bha. Zoova ˗ya pö Sɔtraan ˗dhɛ: ‹ˈBha n ˗dhɔkëmɛn Zɔbö ˈˈsuanbho ˗ee? Mɛn ˈbha ˈö dho kë ꞊dhɛ ˗a ˈdhö ˈˈsɛ ˗ta ˈyaa ˈdhö. ˗Yö ö ˈˈtʋ ˗to n ˗wo ˗bha ˈö ˈwɔn ˗së ˗kë.› ˈYö Sɔtraan ˗ya pö: ‹˗A ˗dhɛ ˗mü kö ˗yö ˈwɔn man ü ˗ta ˗dhe. Ü˗ ˗takpa, ˈü ˈdhuëë˗ kpɔ ˗a ˗bha, ˈü ˈbhlaadhɛ waa wü ˗nu nu ˗a ˗dhɛ. Kö ˈü˗ ꞊slɔɔpë ˗nu ꞊gban ˈkun ˗a ˗gɔ, yö ˈti ˈdho ü ˗dhɔkë ˈzü.› ˈYö Zoova ˗ya pö: ‹Ü ꞊mɔɔn˗ ˗bha ˈü˗ ˈgüdan, ˈˈkɛɛ ˈbha ˈdho ˗a zë.› ˈMën ˗kë ˈö Zoova ˗yö ö ˗kwaa Sɔtraan ˗zü ˈö Zɔbö ˈgüdan? ˗Yö ˗kun ga ˗sü ˈka Zoova ˈgü ꞊dhɛ Zɔbö ˗dho ˈto ˗klu ˗sü ˈka ö ˗bha.

Sɔtraan ˗yö ˈwɔn ˈˈgbɩɩ˗ ˗nu ˗wɔ Zɔbö ˗ta ˈzü. ˗A ˗blɛɛsü ˈka, ˗yö ˗nu Sabe ˗mɛn ˗nu ˈka kö ˗wo Zɔbö ˗bha wü ˗nu waa˗ ˗bha ꞊sofëŋ ˗nu ꞊kwaan. ˈYö˗ ˗kë ˈzü ˈö ˈˈwo ˗ya ˗bha ˈˈbhlaa ˗nu zë. ˗Ya ˗kë ˈzü ˈö ꞊kwaanmɛn ˗nu ˈwo go Kalüdeɛn ˗sɛ ˈgü, ˈwo˗ ˗bha ꞊ɲɔɔnmian ˗nu ꞊kwaan, ˈgo mü ˈwo˗ ˗bha yökëmɛn ˗nu ˈwo kun ˗a ˗bha ˗tuëë ˗nu ˗maankë ˗ni ˈgü ˗an zë ˈpö. ˗A yaa ˈö ˗ʒiö mü ˈyö ˗tɔ ˈkɔ ˈö˗ ˗bha ˈnën ˗nu ˈwo kun pë ˗bhö ˗ni ˈgü ˗a ˈgü bhë, ˗yö ˗pö ˗an ˗ta, ˈö ˗an ꞊gban zë. ˗Wëë ꞊dede ˗yö ˗bɔ Zɔbö ˗ta, ˈˈkɛɛ ˈkö kë ˈˈdhʋ̈, yö ˈti ˈˈkan Zoova ˗bha.

˗Yö ˗kun Sɔtraan ˈˈpiʋ̈ ꞊dhɛ Zɔbö ˗yö saanˈˈ ꞊dedewo, ˗a ˗wɔn ˈgü ˗yö ˈˈyua yaa ˗ya ˗a ˗bha. ˗Dhiëë ˈˈgblʋ̈gblʋ ˈˈdhiʋ̈dhiʋ̈sü ˗nu ˗wo ˗lo Zɔbö kwibhadhɛ ꞊gban ˈgü. Zɔbö zuʋ̈ˈˈ ˈˈklʋʋ ˗yö ˗bhɔ ꞊dedewo. ˈKö ˗kë ꞊dhɛ ˈyaa kun ö ˗bha saanˈˈ ˗gɛn ˈgodhɛ dɔ ˗ni ˈgü ˗yö ˗to ˗klu ˗sü ˈka Zoova ˗bha. ˈWɔn ˈˈpɛpɛ ˈö Zɔbö ˈö kun bɔ ˗ni ˈgü ˗an ˈgü, Zoova ˗ya ꞊gban ˗yö, ˈö˗ ˈˈtakɔ ˈˈdhiaa ˗yö ˗mën ˗a ˈgü.

꞊Taabha, Sɔtraan ˗yö gɔɔn˗ ˗yaaga ˗nu ˗bɔ kö ˈö Zɔbö ˈgüdan. ˗Wa ˗pö ˗a ˗dhɛ: ‹˗A ˈbha ˗ya kë kö ˈbha ˈˈdhaŋ ˈsü ˗Zlan ˗bha, ˈyö ˈü˗ ˈˈpiʋ̈ kö ˈü˗ ˗bin. ˗Zlan ˈnën ˈwɔn bho ˗ni ˈgü ü ˈgü bhë.› ˈYö Zɔbö ˗ya pö: ‹N ˈti pë yaa ˈˈwɛɛ ˈbha kë.› ˈˈKɛɛ ˗yö ˗ya ö ˗zota ˗sü ˗bha ꞊dhɛ ˗Zlan ˈnën ˈwɔn bho ˗ni ˈgü ˗a ˈgü bhë, ˈö˗ pö ˗Zlan ˗ya ˈwɔn yaa kë ö ˈka.

Wlüünën gɔɔn˗ do ˈwo˗ ˗dhɛ Edhiu, ˗yö ˗kun ö ˈˈtʋ ˈto ˗ni ˈgü ˗an ˗bha. ˗Dhɛ ˈö ꞊ɲɔɔn mü, ˈö˗ pö: ‹Pë ˗nu ˈka ˗an pö bhë, ˈwaa gagade ˈka. Zoova ˈˈpii ˗yö ˈˈgbɩɩ˗, ˈkwaa ꞊mɔɔn˗ ˗bha ˈkwa˗ ˗bha ˈwɔn kë ˗kɔ ˗nu ˈgüman. ˈYaa ˈwɔn yaa kë toŋtoŋdhö. ˗Yö ˈwɔn ꞊gban ˗yö, ˈö nu mɛn ˗nu ˈwo bɔ ˗ni ˈgü ˈwɔn ˈˈgbɩɩ˗ ˈgü ˗an ˗dhɛ.›

Zoova ˗yö ˈwɔn ˗blɛɛ ˈzü Zɔbö ˗dhɛ ˈö˗ pö: ‹ˈA kun ˈˈsɛ waa dhaŋ˗ ˗an ˗da ˗ni ˈgü, kö ü ˈˈmɛn? ˈMën ˗kë ˈü˗ pö ꞊dhɛ ˈmaan kpɛnŋdhö? ˈPë ˗kë ˈö ˈwɔn ˗nu bhë ˈwo ˗kë ˈbhaa˗ ˗gɛn dɔ.› ˈYö Zɔbö ˗ya yö ꞊dhɛ ˈya ˈwɔn yaa kë, ˗a ˗wɔn ˈgü ˈö˗ pö: ‹ˈWɔn ꞊nën ˈö zë n ˗gɔ. A ü ˗tɔŋ ˗man, ˈˈkɛɛ ˈman ü dɔ ꞊zlöö˗, ü ˗fiëëbhawɔn ˈyaa ˈdhö. N ˗bhawɔn ˈto pë ˈa˗ pö bhë˗ ˗bha.›

ˈDhɛ Zɔbö ˗bha ˈwɔn ˈˈgbɩɩ˗ ˗nu ˗wo ɲën, ˈö Zoova ˗yö ˗potaadhe nu ˗a ˗dhɛ, ˈö ˗tuëë ˗nu ˈwo kun Zɔbö ˗gɔ, ˗a ˈdhɛ ˗ʒiö ˗a ˗ta, ˗a nu ˗a ˗dhɛ ˈzü ˗dɛɛwo. Zɔbö ꞊sii ˗yö ꞊gwëë ˈö ˗tosɛta ˗kë ˈzü zuʋ̈gblüdhi ˈgü. Zoova ˗yö ˈdhuëë˗ ˗kpɔ Zɔbö ˗bha ˈyö ˗tɔ ꞊dhɛ ˗yö ˈwɔn ˗man ö ˗ta, ˗a ˗de ˗ʒian ˈwɔn ˈˈgbɩɩ˗ ˗nu ˈgü. ˈKö ˗kë ꞊dhɛ ˈwɔn suu ˈˈoo ˗su ˗nu ü ˗ta, ü ˗dho ˈto ˗klu ˗sü ˈka Zoova ˗bha ˗kplawo ꞊dhɛ Zɔbö ˈdhö ˗ee?