˗Kpɔɔkpö do ˗yö ˈgʋ̈ ˗ni ˈgü

˗Kwɛ 40 ˈnën Moizö ˗ya ˗kë Madianö ˗sɛ ˈgü. ˗Yö dhe ˗sü ˈö ˈnën ˗nu kpɔ. ˗Dhɛkpaɔyi do ˈka kö ˗yö ö ˗bha ˈˈbhlaa ˗nu ˗maankë ˗ni ˈgü Sinai ˗tɔn ˈˈsuee, ˈö ˗kpan ˈwɔn ˈˈmlünmlünsü do ˗bha. ˗Yö ˗kpan ˈˈglɛɛn ˗kpɔɔ do ˗bha kö ˈˈwo ˗ya ˗bha ˈˈkɛɛ kö ˈyaa˗ ˗bhö ˗ni ˈgü. ˗Dhɛ ˈö Moizö ˗yö ꞊ɲɔɔn ˗a ˈˈsuee kö ˈpë ˗kë ˈö ˗kë ˈˈdhʋ̈ ˈö˗ dɔ, ˈö ˗wo do ˈbhaa man kö ˗yö ˈgo ˗ni ˈgü ˗kpɔɔkpö bhë˗ ˈgü ˈö pö: ‹Moizö, ˈbha ˈdho ꞊ɲɔɔn ˗dhɛ ˈö bhë ˗a ˗bha. ˗Sabha bho ü ˗gɛn ˈgü, ˗a ˗gɛn ˗mü ꞊dhɛ ˗dhɛ ˈü ˗dɔ ˗a ˗bha bhë, ˗dhɛ ˈˈslʋ̈ʋ̈slʋ̈ ˗mü.› Zoova ˈnën bɔ ö ˗bha ˈˈkië do ˗ta ˈö ˈwɔn ꞊blɛɛ bhë.

ˈˈSuʋ̈ ˗yö ˗da Moizö ˈgü ˈö pë kpa ˈö wëëdhö. ˈYö ˗wo bhë ˈö˗ pö: ‹ˈMan ˗kpan Izraɛdhömɛn ˗nu ˗bha saanˈˈ ˗bha. ˗A ˗dho ˗an dha Ezitömɛn ˗nu ˗gɔ ˈyö ˈa ˈdho ˗an ˈka ˈˈsɛ ˗së ˈgü. Bhi ꞊dede ˈnën ˈü dho ˗an bho Ezitömɛn ˗nu ꞊kwɛɛ˗.› Pë ˈö Moizö ˗ya man bhë, ˗a ˈwɔn ˗ya ˗kun ꞊dedewo.

ˈYö Moizö ˗ya pö: ‹ˈˈSɛgümɛn ˗nu ꞊waa˗ pö ˈde ˈü bɔ, ˗mën ˈa dho ˗a pö ˗an ꞊dhɛ?› ˈÖ ˗Zlan ˗ya ˗yɔ bɔ ˗a ˗gɔ ˈö˗ pö: ‹˗Bhö ˗a pö ˗an ˗dhɛ ꞊dhɛ Zoova Ablaamö ˗bha ˗Zlan, Izaakö ˗bha ˗Zlan waa Zakɔbö ˗bha ˗Zlan ˈnën ˈö ü bɔ.› ˈYö Moizö ˗ya pö: ‹꞊Ya kë ꞊dhɛ ˈˈsɛgümɛn ˗nu wo ˈti wo ˈˈtʋ ˈto n ˗bha ꞊wɛ?› ˗Dhɛ ˈö˗ pö ˈˈdhʋ̈, ˈyö Zoova ˗ya ˗zɔn ˗a ˗dhɛ ꞊dhɛ ö ˗dho ˗a ˗takun. Zoova ˗ya ˗pö Moizö ˗dhɛ ˗yö ö ˗bha ˈˈdhü ˈˈkpla ˗zuö ˈˈshiaŋ. ˗Dhɛ ˈö˗ ˗zuö ˈˈshiaŋ, ˈyö˗ ˈˈdhü ˈˈkpla ˗yö ˗kë ꞊mlɛɛn ˈka. ˗Dhɛ ˈö Moizö ˗yö ꞊mlɛɛn bhë ˗a weŋ kun ˈö kë ˈzü ˈˈdhü ˈˈkpla ˈka. Zoova ˗ya ˗pö ˗a ˗dhɛ: ‹˗Dhidha ˈö ˈˈdhʋ̈ ˈbha˗ kë ˗an wëëdhö, ˗yö ˗dho ˗a ˗zɔn ꞊dhɛ man ˈnën ˈa ü bɔ.›

ˈYö Moizö ya pö : ‹ˈMaan ꞊mɔɔn ˈˈwɩ ˗sü ˗bha ˗së ˈka.› ˈYö Zoova ˗ya pö ˗a dhɛ: ‹Pë ˈü dho ˗a pö, a ˗dho ˗a ˗zɔn ü ˗dhɛ, ˈgo mü a ˗dho ü ꞊dhegblü Aadhɔn bɔ kö ˗yö ü ˗takun.› ˗Dhɛ ˈö Moizö ˈö˗ ˈwɔn dɔ ꞊dhɛ Zoova ˗yö ö ˈˈpiʋ̈, ˈyö ö ˗bha dhebɔ waa ö ˗bha ˈnën ˗nu sü ˈwo dho Ezitö ˗sɛ ˈgü.