˗Wo ˗gban ˗Zlan ˗gɔ

ˈDhɛ ˈˈtʋ̈ŋ ˈbha ˗yö ʒiö kö Izraɛdhömɛn ˗nu ˗wo ˈˈyɛɛta ˗dhɛ ˈgü, ˈö Kore, Datanö, Abidhamö waa mɛn ˗nu 250 ˈˈwɛɛ ˈbha ˗nu ˗wo ˗gban Moizö ˗gɔ. ˈWo˗ pö ˗an ˗dhɛ: ‹Ka ˗san ˗ya yö yi ˈgü, ˈmën ˗kë ü dho ˈˈdhiʋ̈sü yi ka, kö Aadhɔn ˗yö kë ˈˈsaabhomɛn ˈkpii˗ ˈka? Zoova ˗yö mɛn ˈˈpɛpɛ ˈkwa ˈˈpiʋ̈, ˈyaa kaa Aadhɔn ka dosɛnŋ ka ˈˈpiʋ̈.› ˈWɔn bhë yö ˈti dhi Zoova ˗dhɛ, ˈö sü ꞊dhɛ yö ˈnën ˈwo ˗gban ˗a ˗gɔ.

ˈYö Moizö ˗ya pö Kore waa mɛn ˈwo kun ˗a ꞊kee˗ ˗an ˗dhɛ: ‹Dhiʋ̈ˈˈ, ˗ka nu ˗Zlan ˗dhɔkë ˈgü sɔ ˈkɔ ˈˈdhiʋ̈ ka ˗bha ˈˈtɛɛnën ˈö ansansö ˈö pa ˗sü ˈka ˗a ˈgü ˗a ˈka. Zoova ˗dho mɛn ˈö ö ˗kɔ ˗yɛ ˗a ˗bha ˗a ˗zɔn.›

Kore waa ˗gɔndë 250 ˗nu ˈwo bhë ˗wo dho ˈwo ˗kpan Moizö ˗bha dhiapiʋ̈ ˗kpo tii ˈgü ˗Zlan ˗dhɔkë ˈgü sɔ ˈkɔ ˈˈdhiʋ̈ ˈwo ansansö ˗gʋ̈ ꞊dhɛ ˈˈsaabhomɛn ˗nu ˈdhö. ˈYö Zoova ˗ya pö Moizö waa Aadhɔn ˗an ˗dhɛ: ‹˗Ka ˈgo Kore waa ˗gɔndë ˗nu bhë ˗an ˈˈsuee.›

ˈKö ˗kë ꞊dhɛ Kore ˗yö ˗dho ˈö ˗kpan Moizö ˗bha ˗Zlan ˗dhɔkë ˈgü sɔ ˈkɔ ˈˈdhiʋ̈, Datanö, Abidhamö waa wo ˗bha ˈkɔdhigümɛn ˗nu wo ˈti ˈdho. ˈYö Zoova ˗ya pö Izraɛdhömɛn ˗nu ˗dhɛ ˗wo dho Kore, Datanö waa Abidhamö ˗an ˗bha sɔ ˈkɔ ˗nu ˈka ꞊gblɛɛn. ˗Wo ˗to mü ˈwo ˈwɔn man Zoova ˗ta. Datanö, Abidhamö waa wo ˗bha ˈkɔdhigümɛn ˗nu ˗wo ˗kun wo bha sɔ ˈkɔ ˗nu ˈˈdhiʋ̈. ˈYö ˈˈsɛ ˗yö ˗pɛ ˈkoo ꞊plɛ ˈö ˗an ꞊gban ˈwo ˗püö ˗gblü ˈˈdhi ˈkpii˗ bhë˗ ˈgü. ˈˈTʋ̈ŋ do bhë˗ ˈka, ˗Zlan ˗dhɔkë ˈgü sɔ ˈkɔ ˈˈdhiʋ̈, ˈˈwo ˗yö Kore waa ö ˗bha mɛn 250 bhë ˗an ꞊gban ˗bhö ˈpö.

ˈYö Zoova ˗ya pö Moizö ˗dhɛ: ‹˗Bhö ˈˈdhü ˈˈkpla do ˗dhɛ ˈˈkwɛnŋgɔ ˗dhɛ ˈö ˈdhö ˗a ˗gɔmɛn ˗gɔ kö ˈü ˗an ˈtɔ ˗ya ˗a ˗ta. ˈˈKɛɛ ˗a ˗dhɛ ˈö ˗gban Levi ˗bha ˈˈkwɛnŋgɔ ˗bha bhë, ˗bhö Aadhɔn ˈtɔ ˗ya ˗a ˈˈgblʋʋ ˈgü. ˗Bhö ˈˈdhü ˈˈkpla ˗nu bhë ˗an ˈsü ˈü ˗an ˗da n ˗dhɔkëdhɛ ˈgü. Mɛn ˈa dho n ˗kɔ ˈˈyɛ ˗a ˗bha, blëë ˈˈbin dho bhɔ ˗a ˗bha ˈˈdhü ˈˈkpla ˗bha.›

Yi ˈö dɔ˗ “piʋ̈, ˈyö Moizö ˗yö dho ˈö ˈˈdhü ˈˈkpla ˗nu ˈwo bhë ˗an ꞊gban sü ˈö nu ˈö ˗an ˗zɔn ˈˈkwɛnŋgɔ ˗dhɛ ˈö ˈdhö ˗a ˗gɔmɛn ˗dhɛ. Blëë ˈˈbin ˗yö ˗bhɔ Aadhɔn ˗bha ˈˈdhü ˈˈkpla ˗bha ˈö Amandö ˈö ˗ya tan ˈö kun˗ ˗ta ˈpö. ˗Kɔ ˈö bhë ˈnën˗ Zoova ˗ya ˗zɔn ˗a ˈka ꞊dhɛ ˗ya ö ˗kɔ ˈˈyɛ Aadhɔn ˗bha kö ˗yö kë ˈˈsaabhomɛn ˈkpii˗ ˈka.