Ʒozue waa Gabaɔnmɛn ˗nu

ˈWɔn ˈö ˗kë Ʒedhikomɛn ˗nu ˈka bhë, ˗a ˗wɔn ˗yö ˗pɛn Kanaan ˗sɛ ˈgü. ˈDhɛ ˗kë ˈˈdhʋ̈, ˈyö Kanaan ˗gblüdë ˗nu ˗wo dho wo ˈkwëëdhö kö ˗wo ˗gblü ˗gɔn Izraɛdhömɛn ˗nu ˈka. ˈˈKɛɛ Gabaɔnmɛn ˗nu ˗zë, ˗wo ˈˈslö do ˈbha ˗kë. ˗Wo sɔ yaa ˗nu ˗da wo ˗bha ˈwo dho Ʒozue ˈˈpiʋ̈ ˈwo˗ pö: ‹Yi go ˈˈsɛ ꞊gblɛɛn ꞊dede ˈgü, pë ˗nu ˈö Zoova ˗ya ˗kë ka ˗dhɛ Ezitö waa Moabö ˗sɛ ˈgü bhë, yi ˗taɔŋ ˗man. ˈBha ˈü ˗wo ˗bhö yi ˗dhɛ ꞊dhɛ ü ˈti dho nu yi ˗gɔ, yi ˗dho kë ü ˗bha ˗dhuëŋ ˗nu ˈka›.

Ʒozue ˗yö ˈdhaŋ ˗bho ˗an ˈˈdhiʋ̈ ˈö ö ꞊kwaa ˗an ˗zü. ˈDhɛ ˗dhɛkpaɔyi ˗yaaga ˗yö ˗ʒiö, ˈö˗ ˈwɔn dɔ ꞊dhɛ ˗wo ˗go ˗an ˈˈsuee, Kanaan ˗sɛ ˈgü. ˈYö Ʒozue ˗yö Gabaɔnmɛn ˗nu dhɛɛˈˈ kpɔ ˈö˗ pö: ‹ˈMën ˗kë ˈka ꞊sua ˗kë n ˗gɔ?› ˈYö ˈwo˗ pö: ‹ˈˈSuʋ̈ ˈnën˗ yi ˗kë, yi˗ ˈwɔn dɔ ꞊dhɛ Zoova ü ˗bha ˗Zlan ˈnën ˈko zë ü ˗bha ˈka. ˗Bhö dɔ ˈˈgbɩɩ˗ ˈbhaa ˈdho yi zë.› Ʒozue ˗yö ˗to mü ˈö˗ pö ˗dhɛ yö ˈti dho ˗an zë.

ˈDhɛ ˈˈtʋ̈ŋ ˈbha ˗yö ˗ʒiö, ˈö ˗gblüdë ˈˈsoodhu ˗nu ˈwo go Kanaan waa ˗an ˗bha ˈˈsɔdha ˗nu ˗wo ˈˈsuʋ̈ ˗da Gabaɔnmɛn ˗nu ˈgü. ˈYö Ʒozue waa ö bha ˈˈsɔdha ˗nu ˗wo ˈˈta sü gbeŋ kë ˈˈdhʋ̈ kö ˗wo ˗an ˗takun. ˗Wo ˗ya ˗gblü ˗gɔn ˗sü ˗bha dhiapiʋ̈ ˗kpo tii ˈgü. ˈYö Kanaan mɛn ˗nu ˗wo ˗ya ꞊duëë ˗sü ˗bha ʒian ꞊gban ˈka. ˗Dhɛ ˗nu ˈwo kun ˈdho ˗ni ˈgü ˗an ˗bha, Zoova ˗ya ˗kë ˈö mënŋga kpö ˈˈgblʋ̈gblʋ̈ ˗nu ˈwo ˗puö ˗an ˗ta. ˈYö Ʒozue ˗ya pö Zoova ˗dhɛ ˗ya kë kö ˈɲanŋ˗ ˈyaa dho ˈgo ö ˈˈgblʋʋ ˈgü. ˈMën ˗kë ˈö Ʒozue ˗ya pö Zoova ˗dhɛ ˗ya kë kö ˈɲanŋ˗ ˗yö ˈduannu ˈˈkɛɛ ˈkö ˈwɔn ö ˈˈdhʋ̈ yö ˈti kë do? ˈYö ˈtɔ ꞊dhɛ ˗yö ˗kun ˈö ˗zo yö ˗ni ˈgü Zoova ˗dhɛ. ˈƝanŋ˗ ˗yö ˗to ö ˈˈgblʋʋ ˈgü ˗dhɛkpaɔyi do ˈˈpiʋ̈ ˈö dho ˈö yö˗ ˈka Izraɛdhömɛn ˗nu ˗bha ˗kɔ ʒiö Kanaan ˗gblüdë ˗nu waa wo ˗bha ˈˈsɔdha ˗nu ˗gɔ ˗sü ˗bha.