Dhutö waa Noemi

ˈDhɛ din˗ ˗yö ˗da Izraɛdhö ˗sɛ ˈgü, Izraɛdhö dhebɔ do ˈwo˗ ˗dhɛ Noemi waa ö ꞊gɔn waa wo gbö ˗nu ꞊plɛ ˗wo ˗dho Moabö. ˈDhɛ ˈö ˗kwɛ ˗nu ˗wo ˗ʒiö, ˈyö Noemi ꞊gɔn ˗yö ga. ˗A gbö ˗nu ˗wo Moabö dhebɔ ˗nu ˈwo˗ ˗an ˗dhɛ Dhutö waa Ɔɔpa ˗an ˗sü dhe ˈka. ˗Wëëwɔn ˈö ˗kë ˈzü ˈyö ˗tɔ Noemi gbö ˗nu bhë ˗wo ˗ga.

ˈDhɛ Noemi ˗ya man ꞊dhɛ din˗ ˗ya ɲën Izraɛdhö, ˈyö˗ pö ö ˗dho ꞊yɛɛkë mü. Dhutö waa Ɔɔpa ˗wo ˗ʒiö ˗a ꞊kee˗, ˈˈkɛɛ ˈdhɛ ˈwo ˗da ʒiaan˗, ˈyö Noemi ˗ya pö ˗an ˗dhɛ: ‹Ka ˗kun dhebɔ ˗tiaandhö ˗nu ˈka n gbö ˗nu ˗bha ˈka, ˈö ˈka ˈˈgblüsëdhɛ ˗kë n ˈka. A˗ ˈˈpiʋ̈ kö ˈka gwaan˗ ˗dɛɛ ˈkpɔ. ˗Ka ka ꞊yɛɛkë Moabö.› ˈYö ˈwo˗ pö ˗a ˗dhɛ: ‹Ü ˗dhɔ ˗yö yi ˗kë! ˈYaa˗ ˈˈpiʋ̈ ꞊dhɛ ˈyi ˈˈkan ü ˗bha.› Kë ˈö˗ wo ꞊dhɛ Noemi ˗kun ˗a pö ˗ni ˈgü ˗kplawo ˗wo ˈdho bhë, ˈyö Ɔɔpa ˗yö ö ꞊yɛɛkë. Dhutö ˗zë ˗yö ˗to Noemi ꞊kee˗. ˈYö Noemi ˗ya pö ˗a ˗dhɛ: ‹Ɔɔpa ˗ya ö ꞊yɛɛkë ö ˗bha ˈˈsɛgümɛn ˗nu waa ö ˗bha ˗zlan ˗nu ˈˈpiʋ̈. ˗Bhö ʒiö ˗a ꞊kee˗ ˈpö.› ˈYö Dhutö ˗ya pö: ‹ˈMaan ꞊mɔɔn˗ ˗bha ˈa ˈˈkan ü ˗bha. Ü ˗bha ˈˈsɛgümɛn ˗nu ˗dho kë n ˗man ˈˈsɛgümɛn ˗nu ˈka, ˈö ü ˗bha ˗Zlan ˗yö ˗kë n ˗man ˗Zlan ˈka.› Ü ˗bha ˈgü, ˈdhɛ Dhutö ˗ya pö ˈˈdhʋ̈, ˗yö ˗kë Noemi ˈgü ˗kɔ ˗kë ꞊dhɛ?

Dhutö waa Noemi ˗wo ˗wo Izraɛdhö ˗sɛ ˈgü kö ˈˈklëën ˈˈkan ˈˈtʋ̈ŋ zü ˗ya dɔ. Yi do ˈka, ˈyö Dhutö ˗yö dho gɔndë do ˈwo˗ ˗dhɛ Boazö, ˈö ˗kë Dhaabö gbö ˈka bhë ˗a ˗gɔ ˈbhlaa kö pë ˗kpaaga ˗nu ˈö yökëmɛn ˗nu ˗wa to ˈˈshia˗ ˈö ˗an ꞊lö. Boazö ˗ya ˗man ꞊dhɛ Moabö dhebɔ ˈö Noemi ˗takun yö ˗mü Dhutö ˈka. ˈYö˗ pö ö ˗bha yökëmɛn ˗nu ˗dhɛ ˗wo pë ˗kpaaga ˗nu ˈto ˈˈshia˗ ˈbhlaa ꞊va kö Dhutö ˗yö ˗an ꞊lö.

Gbeŋ bhë˗ ˈka, ˈyö Noemi ˗yö Dhutö dhɛɛˈˈ kpɔ ˈö˗ pö: ‹De ˈü yö ˗kë ˗a ˗gɔ ˈbhlaa ꞊dɛɛ?› ˈYö Dhutö ˗ya pö: ‹Boazö.› ˈYö Noemi ˗ya pö ˗a ˗dhɛ: ‹Boazö ˈö ˗bhë, n ꞊gɔn ˗bha ˈkɔdhigümɛn ˗mü. ˗Bhö yö kë ˗a ˗gɔ ˈbhlaa ˗kplawo ˈnëndhiëŋnën ˈˈwɛɛ ˗nu ˈwo mü ˗an ˈˈpiʋ̈. Wo ˈti ˗dho pë ˈbhaa kë ü ˈka.›

Dhutö ˗yö yö ˗kë Boazö ˗bha ˈbhlaa ˈö dho ˈö yö˗ ˈka pë ˈˈkan ˈˈtʋ̈ŋ ɲën ˗sü ˗bha. Boazö ˗ya ˗yö ꞊dhɛ Dhutö ˈgü ˗yö ˈˈgbɩɩ˗, ˈö dhebɔ ˗tiaandhö ˈka. ˗A ˈˈtʋ̈ŋ ˈö bhë ˗a ˈgü, gɔɔn˗ ˈbha ˗ya ga kö ˈnëngɔɔn˗ ˈyaa ˗gɔ, ˗a ꞊dhegblü ˗ya ˗bha dhebɔ ˈö to ˗a ˗sü dhe ˈka. ˗A ˗wɔn ˈgü Boazö ˗yö Dhutö ˗sü dhe ˈka. ˗Wo ˈnëngɔɔn˗ do ˗kpɔ, ˈö ˈwo˗ ˗dhɛ Obɛdö. Obɛdö ˗yö ˗dho ˈö ˗kë ˗gblüdë Davi ˈʒiö˗ ˈka. Noemi ˈˈtɛɛbɔ ˗nu zuʋ̈ˈˈ ˈˈgblü ˗yö ˗dhi. ˗A ˗wɔn ˈgü ˗wa ˗pö: ‹Zoova ˗yö Dhutö ˈö˗ ˈˈgblü ˈdhö ˗së bhë ˗a ˗nu ü ˗dhɛ. ˈˈKɛɛ ꞊dɛɛ ˗ya ü ˗gba ˈˈnaannën ˈka. Zoova ˈtɔ ˗yö bhɔ.›