Anö ˗yö bhɛɛˈˈ ˗ni ˈgü kö ˈö ˈnën do ꞊slɔɔ

Izraɛdhö mi do ˗kun ˗dhö ˈwo˗ ˗dhɛ Ɛkana. Dhe ꞊plɛ ˈnën kun ˗a ˗gɔ. ˗Wa mɛn do ˗dhɛ Anö ˈwo˗ mɛn do ˗dhɛ Penina. ˈˈKɛɛ Anö ꞊nën˗ ˗dhɔ kun ˗a ˗kë ˗ni ˈgü ꞊dedewo. ˈNën ꞊va ˗kun Penina ˗gɔ, ˗a ˗wɔn ˈgü ˗yö ˗kun ˗wɛɛdɔ ˗ni ˈgü Anö ˗bha ˈö sü ꞊dhɛ ˈnën ˈyaa kun ˗a ˗gɔ. ˗Kwɛ ˈˈpɛpɛ ˈka, Ɛkana waa ö ˗bha ˈkɔdhigümɛn ˗nu ˗wo ˗dho Zoova ˗dhɔkë ˗a ˗dhɔkëgükɔ ˈö Silo bhë ˗a ˈgü. Yi do ˈka, Ɛkana ˗ya ˈsuanbho ꞊dhɛ ˗a ˗bha ˗dhɔɔdhe Anö ˗ta ˗yö ˗saa. ˈYö˗ pö ˗a ˗dhɛ: ‹Anö ˈbha ˈdho ˈˈgbʋ bɔ, a ü ˈˈpiʋ̈, ü ˗dhɔ ˗yö n ˗kë ꞊dedewo.›

Yi do ˈka, ˈyö Anö ˗yö dho kö ˈö bhɛɛˈˈ. ˗Yö ˗kun bhɛɛˈˈ ˗ni ˈgü ˈˈgbʋ ˈka Zoova ˗dhɛ kö ˗yö ö ˗takun. ˈYö˗ pö: ‹Zoova ˗ya kë ꞊dhɛ ˗bha n ˗gba ˈnëngɔɔn˗ do ˈka, a dho ˗a nu ü ˗dhɛ kö ˗yö ü ˗dhɔkë ˗a ˗bha ˗tosɛta ꞊gban ˈgü.›

ˈDhɛ ˈˈsaabhomɛn ˈkpii˗ ˗yö ˗kpan Anö ˗bha kö ˈˈgbʋ kpö ꞊yaa˗ kun, ˈyö ˗kë ˗a ˈgü ꞊dhɛ we ꞊yaa˗ kun. ˈˈKɛɛ ˈYö Anö ˗ya pö: ‹˗Abin, n dëmɛn n ˈti we mü. ˈWɔn ˈˈgbɩɩ˗ ˈbha ˈnën˗ n ˗bha ˈyö ˈa˗ pö ˗ni ˈgü Zoova ˗dhɛ.› Edhi ˗ya ˗yö ꞊dhɛ pë ˈö ö ˗zota ˗a ˈgü Anö ˗bha bhë ˈyaa ˗mü, ˈyö˗ pö ˗a ˗dhɛ: ‹Pë ˈü˗ ˗dhɛ ˗ni ˈgü ˗Zlan ˗gɔ bhë, ˗yö ü ˗gba ˗a ˈka.› ˈYö Anö ˗yö ˗kë ö ˗de ˈgü ˗së ˈyö ö ˗bha ʒian sü. ˗A ˗kwɛ do ʒian yö ˈti ʒiö, ˈö Anö ˗yö ˈnëngɔɔn˗ do ˈwo˗ ˗dhɛ Samiɛ ˗a kpɔ. ˗Ka ka ˗zota zuʋ̈niidadhe ˈö kun Anö ˗gɔ bhë ˗a ˈgü!

Anö ˗zo yö ˈti bhɔ ö ˗wo ˈö˗ bhö Zoova ˗dhɛ bhë ˗a ˈka. ˈDhɛ Samiɛ ˗yö go ˈɲɔn ˗bha, ˗yö ˗dho ˗a ˈka ˗Zlan ˗dhɔkëgükɔ ˈgü kö ˗yö Zoova ˗dhɔkë. ˗Ya ˗pö Edhi ˗dhɛ: ‹ˈNëngɔɔn˗ ˈa ꞊bhɛɛ ˗a ˗wɔn ˈgü bhë, yö ꞊nɛn, ˈman˗ nu Zoova ˗dhɛ.› ˗Kwɛ ˈˈpɛpɛ ˈka, Ɛkana waa Anö ˗wo ˗dho ˈwo ˗wo Samiɛ ˗bha ˈwo gblɔŋ ˈö˗ gban ˈyaa˗ mü, ˗a nu ˗a ˗dhɛ. ꞊Taabha, Zoova ˗yö ˈnëngɔɔn˗ ˗yaaga waa ˈnëndhebɔ ꞊plɛ ˗nu Anö ˗dhɛ.