Zɛfute ˗wo ˈö˗ ˗bhö

Izraɛdhömɛn ˗nu ˗wo ˗kan ˈzü Zoova ˗bha ˗dɛɛwo ˈwo ˗ya ꞊sua ˗zlan ˗nu ˗dhɔkësü ˗bha. ˈDhɛ Amɔnömɛn ˗nu ˗wo nu ˗gblü ˈka Izraɛdhömɛn ˗nu ˗gɔ, ꞊sua ˗zlan ˗nu ˈwo kun ˗an ˗dhɔkë ˗ni ˈgü bhë wo ˈti ˗an ˗takun. ˗A ˗wɔn ˈgü ˗wo ˗saan ˗kwɛ ꞊va ˈˈpiʋ̈. ˗A ˈˈdhiʋ̈tadhɛ ˈgü, ˗wa ˗pö Zoova ˗dhɛ: ‹ˈYa ˈwɔn yaa kë. Dɔ ˈˈgbɩɩ˗ kö ˈü yi dha yi ˈyɔɔ˗ ˗nu ˗gɔ.› Izraɛdhömɛn ˗nu ˗wo wo ˗bha ꞊sua ˗zlan ˗nu ˈwo kun ˗an gba ˗ni ˈgü bhë ˗an ꞊gban ˗shiö, ˈwo wo ꞊yɛɛkë Zoova ˈˈpiʋ̈ kö ˈwo˗ ˗dhɔkë. Zoova ˈyaa kun ˗a ˈˈpiʋ̈ kö ˗wo saanˈˈ ˗kplawo.

˗Wo wo ˗kɔ ˗yɛ ˗gblügɔnmɛn do ˈwo˗ ˗dhɛ Zɛfute ˗a ˗bha kö ˗yö ˗gblü ˗gɔn Amɔnömɛn ˗nu ˈka. ˗Ya ˗pö Zoova ˗dhɛ: ‹ˈBha yi ˗takun ˗gblü ˗ya dhi yi ˗gɔ, ˈman nu n ꞊plöö, mɛn ˗blɛɛsü ˈö dho nu n ˗gɔ ʒiaan˗ yö ˈnën ˈa dho ˗a nu ü ˗dhɛ.› Zoova ˗ya ˗takun ˈö ˗gblü ˗yö ˗dhi ˗a ˗gɔ.

ˈDhɛ Zɛfute ˗yö ö ꞊yɛɛkë ˈö ˗gɔ ˈˈkwɛnŋdhö, mɛn ˗blɛɛsü ˈö nu ˗a ˗gɔ ʒiaan˗ ˈyö ˗tɔ ˗a ˈdhu, ˈnën ga do ˈö kun ˗a ˗gɔ bhë. ˗Yö ˗kun ˈˈtan kë ˗ni ˈgü kö ˗yö ö ˗bha ˗bhaŋnën zë ˗ni ˈgü. ˈMën Zɛfute dho ˗a kë? ˗A ˗zo ˗yö ˗bo ö ˗wo ˈö˗ ˗bhö bhë ˗a ˈka ˈö˗ pö: ‹Aa! mi, n ˈdhu! ˈBha pë ˈˈdhiʋ̈˗ kë n ˈka. ˈMan n ˗wo ˗bhö Zoova ˗dhɛ, ˈman˗ pö ˈa˗ ˈgü ˗wɔn kë, n dua ˗mü kö ˈa dho ü ˈka ˗Zlan ˗dhɔkëgükɔ ˈö Silo bhë˗ ˈgü kö ˈü kë ˗a ˗dhɔkëdhe ˈka.› ˈˈKɛɛ ˈyö˗ ˈdhu ˗ya pö ˗a ˗dhɛ: ‹N dë, ꞊ya kë ꞊dhɛ ˈbha ü ˗wo ˗bhö Zoova ˗dhɛ, ü dua ˗mü kö ˈü˗ ˈgüwɔn kë. Pë dosɛnŋ ˈa˗ ˗dhɛ ü ˗gɔ ˈyö ˗tɔ ˈü n ˗gba ˈˈsu ꞊plɛ ˈka kö yaa n ˈˈtɛɛbɔ ˗nu ˈyi dho ˗tɔn ˈgü. ˈMan n ꞊yɛɛkë kö ˈa ˈdho.› Zɛfute ˈdhu ˗yö Zoova ˗dhɔkë ˈö dho ˈö yö˗ ˈka ˗a ga yi ˗bha. ˗Kwɛ ˈˈpɛpɛ ˈka, ˗a ˈˈtɛɛbɔ ˗nu ˗kun ˈdho ˗ni ˈgü ˗wo ˗a ˗dhɛ Silo.