Zoova ˗yö dhiaŋ zë ˗ni ˈgü Samiɛ ˗dhɛ

ˈNëngɔɔn˗ ꞊plɛ ˗wo ˗kun ˈˈsaabhomɛn ˈkpii˗ Edhi ˗gɔ, ˈö ˈwo kun ˗an ˗dhɛ ˗ni ˈgü Ɔfini waa Fineasö. ˗Wo ˗kun ˈˈsaabhomɛn ˈka ˗Zlan ˗dhɔkëgükɔ ˈgü. ˈˈKɛɛ ˈwaa kun Zoova ˗bha ˈtɔŋ˗ ˗nu ˗ya ˗ni ˈgü ꞊bhlëë ˈgü. ˈGo mü, ˗wo ˗kun ˈˈsɛgümɛn ˗nu ˈkun ˗ni ˈgü ˈya˗. Izraɛdhömɛn ˗nu ˗wa nu ˈˈsaapë ˈka Zoova ˗dhɛ, ˈyö ˈwo ˗a wü kpö ˗sɛŋbɔ ˗nu sü wo ˗bhaa ˈka. ˈWɔn yaa ˈö Edhi ˗bha ˈnën ˗nu kun ˗a kë ˗ni ˈgü bhë ˗yö ˗da Edhi ˈˈtʋʋdhö, ˈˈkɛɛ ˈyaa kun pë ˈbha pö ˗ni ˈgü ˗an ˗dhɛ. Zoova ˗dho ö ꞊kwaa˗ ˗an ˗zü kö ˗wo ˈdho ˈwɔn yaa ˈka ˈˈdhiʋ̈ ˗kplawo ˗ee?

Samiɛ ˗kun ˈˈtɩtɩ Fineasö waa Ɔfini ˗an ˗bha, ˈˈkɛɛ ˗a ˈˈtakɔ ˗kun ˗së ˈö kun Zoova ˗dhɛ ˗së. Gbeŋ do ˈka kö Samiɛ ˗yö yi zë ˗ni ˈgü, ˗a ˈˈtʋ ˗yö ˗da ˗wo do ˈbha ˈgü kö ˗ya ꞊dhɛ ˗ni ˈgü ö ˈtɔ ˈka. ˈYö ꞊luu ˈˈvaandhö ˈö dho Edhi ꞊kee˗ ˈö˗ pö ˗a ˗dhɛ: ‹Man ꞊nën ˈa yö.› ˈˈKɛɛ ˈyö Edhi ˗ya pö: ‹ˈMaan ꞊nën ˈa ü ˗dhɛ, ˗bhö ˈdho ü ˈwaannu.› ˈYö Samiɛ ˗yö dho ˈwaannu. ˈYö ˗wo bhë ˗a man ˈzü. ˈDhɛ Samiɛ ˗yö ˗wo bhë ˗a man ˈzü ˗yaaga ˗naan wo, ˈyö Edhi ˗ya ˈwɔn dɔ ꞊dhɛ Zoova ˈnën˗ Samiɛ ˗dhɛ ˗ni ˈgü bhë. ˈYö Edhi ˗ya pö ˗a ˗dhɛ ˗ya ˗wo bhë ˗a man ˗dɛɛwo, ˗ya pö: ‹˗Bhö dhiaŋ zë Zoova, ü ˗bha yökëmɛn ˈˈtʋ ˗yö ü ˗bha.›

Yö Samiɛ ˗yö ˗dho ˈö ˈwaannu. ˈYö ˗wo bhë ˗a man ˗ˈzü ˈbhawo kö ˗ya pö ˗ni ˈgü: ‹Samiɛ Samiɛ.› ˈYö˗ pö ˗a dhɛ: ‹˗Bhö dhiaŋ zë Zoova, ü ˗bha yökëmɛn ˈˈtʋ ˗yö ü ˗bha.› ˈYö Zoova ˗ya pö: ‹ˈWɔn yaa ˈö Edhi gbö ˗nu ˈwo˗ kë ˗ni ˈgü n ˗dhɔkëdhɛ ˈgü bhë, ˗yö ˗kpan ˗a ˗bha ˈˈkɛɛ ˗yö ö ˗kwaa ˗an ˗zü ˈwo˗ ˗kë. ˗A pö ˗a ˗dhɛ ˈa ˗dho ˈwɔn bho waa ö ˗bha ˈkɔdhigümɛn ˗nu ˗an ˈgü.› ˗A ˗dhɛkpɔayi ˈö dɔ˗ ˈˈpiʋ̈, ˈyö Samiɛ ˗yö dho ˈö ˗Zlan ˗dhɔkëdhɛ ˈˈkwee ˗pʋ ˗dhɛ ˗kɔ ˈö˗ ˗kë ˈka ˈˈtʋ̈ŋ ꞊gban ˈka bhë ˗a ˈdhö. Pë ˈö Zoova ˗ya ꞊blɛɛ ˗a ˗dhɛ bhë, ˗a ˗blɛɛ ˈˈsaabhomɛn ˈkpii˗ ˗dhɛ ˗sü ˈˈsuʋ̈ ˗kun ˗a ˈgü. ˈDhɛ ˗kë ˈˈdhʋ̈, Edhi ˗ya ˗dhɛ ˈö˗ dhɛɛˈˈ kpɔ ˈö˗ pö: ‹N man ˈnën, ˗mën ˈö Zoova ˗ya pö ü ꞊dhɛ? ˗A ꞊gban pö n ˗dhɛ.› Yö Samiɛ ˗yö ʒiö˗ ꞊gban ˈgü Edhi ˗dhɛ.

ˈDhɛ Samiɛ kun ˈˈgla ˗ni ˈgü Zoova ˗yö ˗to ˗a ˈˈpiʋ̈. ˈˈSɛgümɛn ˗nu ꞊gban ˈˈpɛpɛ ˗kun ˗a ˈwɔn dɔ ˗ni ˈgü ꞊dhɛ Zoova ˗ya ö ˗kɔ ˈˈyɛ Samiɛ ˗bha kö ˈö˗ kë ö ˗wodhiʋ̈lomɛn waa zakanmɛn ˈka.