Ʒonatan ˗yö ˈgügbɩɩmɛn waa ˗towotamɛn do ˈka

Saidhö gbö ˗blɛɛsü Ʒonatan ˗kun ˈˈsɔdha ˈgügbɩɩsü do ˈka. Davi ˗ya pö˗ ꞊dhɛ ˗a ˗bha ˈˈɲangüshiʋ̈dhɛ waa˗ ˗bha ˈgügbɩɩdhɛ ˗nu ˗wo ˗ʒiö ˈˈgblëë˗ waa ꞊laa ˗an ˗bha ˗ta. Yi do ˈka ˈyö Ʒonatan ˗yö ˗kpan Fidhitɛn ˈˈsɔdha ˗nu 20 ˗bha gootadhɛ do ˈgü. ˈYö˗ pö ö ˗bha ˗gblü ˗gɔn ˗a ˈka ꞊kwɛɛ˗ bun mɛn ˗dhɛ: ‹Zoova ꞊yaa˗ pö kwa ˗dhɛ ˈyö ˈkwa dho ˗dho ˗an ˗gɔ. ꞊Waa˗ pö ˈkwa nu ˗an ˗gɔ ˈyö ˈkwa dho ˗a ˈwɔn dɔ ꞊dhɛ kwa dho ˈdho ˗an ˗gɔ.› ˈYö Fidhitɛn ˗nu ˗wo ˗gbla ˈˈgbɩɩ˗ ˈka ˈwo˗ pö: ‹˗Ka ˗da ˈkwa ˈkozë!› ˈYö mɛn ꞊plɛ bhë ˈwo ˗da goo ˗ta, ˈyö ˗an ˗kɔ ˗yö ˗ʒiö ˈˈsɔdha ˗nu bhë ˗an ˗gɔ.

ˈDhɛ ˗kë ꞊dhɛ Ʒonatan ˗kun Saidhö gbö ˗blɛɛsü ˈka bhë, yö ˈnën dho kë ˗be ˗gblüdë ˈka ˗a dë ʒiandhö. ˈˈKɛɛ ˗yö ˗kun Ʒonatan ˈˈɲaan ꞊dhɛ Zoova ˗ya ö ˗kɔ ˈˈyɛ Davi ˗bha kö ˗yö kë Izraɛdhö ˗bha ˗gblüdë ˗dɛɛ ˈka. ˗A ˗wɔn ˈgü yö ˈti ꞊druɛɛ kë ˗a ˗bha. Ʒonatan waa Davi ˗wo ˗kë ˈˈtɔŋdë ˈˈgbɩɩ˗ ˗nu ˈka ˈwo˗ pö ˗wo ˗dho wo ˈko ˗nu ˗takpa ˈwo wo ˈko ˗nu ˗takozë. Ʒonatan ˗yö ö ˗de ˗bha gblɔŋ, ˗blaandhaa, ˗saa waa ö ˗bha ˈfëŋga ˗nu ˗nu Davi ˗dhɛ ˗an ˗bha ˗kë ˈˈtɔŋdë ꞊dede ˈka ˗sü ˗wɔn ˈgü.

ˈDhɛ Davi kun ꞊duëë ˗ni ˈgü kö ö dha Saidhö ˗gɔ, Ʒonatan ˗yö ˗dho ˗a ˈˈpiʋ̈ ˈö˗ pö ˗a ˗dhɛ: ‹Ü ˈgü ˗yö kë ˈˈgbɩɩ˗ ꞊faan ˗yö kë ü ˗gɔ. Zoova ˗ya ö ˗kɔ ˈˈyɛ ü ˗bha kö ˈü kë ˗gblüdë ˈka. N dë ꞊dede ˗ya ˈwɔn dɔ ˈˈdhʋ̈.› ˈˈTɔŋdë ˈö ˗kë ꞊dhɛ Ʒonatan ˈdhö bhë, ü˗ ˈˈpiʋ̈ ˗yö kë ü ˗gɔ ˗ee?

Ʒonatan ˗yö ö ˗bha ˗tosɛta ˗dɔ ga ˗yɛ ˈˈdhiʋ̈ ˈko ˗ta ꞊va, kö ˈö ö ˈˈtɔŋdë ˗takun. ˗A ˈwɔn ˗kun ˗a ˈˈɲaan ꞊dhɛ ö dë ˗kun ˗a ˈˈpiʋ̈ kö ˈö Davi zë, ˗a ˗wɔn ˈgü ˈö˗ pö ˗a ˗dhɛ: ‹ˈBha Davi zë kö ˈbha ˈwɔn yaa kë, yö ˈti ˈwɔn yaa ˈbha kë ü ˈka.› ˈWɔn ˗yö ˗shiö Saidhö ˗dhɛ ꞊dedewo Ʒonatan ˗bha. ꞊Taabha, ˈyö Saidhö waa Ʒonatan ˗wo ga ˗gblü ˈˈdhiʋ̈.

˗Dhɛ ö Ʒonatan ˗yö ga, Davi ˗ya gbö Mefibosɛtö ˗mɛɛn. ˈDhɛ Davi ˗yö ˗kpan ˗a ˗bha, ˈö˗ pö Mefibosɛtö ˗dhɛ: ‹Ü dë ˗kun n ˈˈtɔŋdë ˈˈgbɩɩ˗ ꞊dede ˈka, ˗a ˗wɔn ˈgü a dho n ˗zokë ü ˈˈpiʋ̈ ˈö dho ˈö yö˗ ˈka ü ga yi ˗bha. Ü dho ˗ya n ˗gɔ ˈkɔɔ, ˈü pë ˗bhö man tablö ˈˈdhiʋ̈. Davi ˗zo ˈti bhɔ ö ˈˈtɔŋdë Ʒonatan ˈka toŋtoŋdhö.