˗Gblüdë Davi ˗bha ˈwɔnyaa ꞊gbɔɔnsü ˈö˗ ˗kë

˗Dhɛ ˈö Saidhö ˗yö ga, ˈö Davi ˗yö ˗kë ˗gblüdë ˈka kö ˗a ˗kwɛ ˗ya kë 30. Kö ˗ya ˗gblüdëdhɛ ˗kë ˈˈtʋ̈ŋ ˈnën ˈbha ˈˈpiʋ̈, gbeŋ do ˈka kö ˗yö ö ˗bha ˈkɔ ˈta ˈˈdhuŋ, ˗yö ˗kpan dhebɔ ˗së do ˗bha. ˈYö Davi ˗yö mɛn ˗bɔ kö ˈmɛn dhebɔ bhë ˈö˗ ˈka, ˈö˗ ˗dɔ. ˗Ya ˗yö ꞊dhɛ ˗wa ˗dhɛ Bɛtösabe, ˈwo˗ ˗gɔn ˗dhɛ Uudhi ˈö ˗kë ˈˈsɔdha ˗mi do ˈka. ˈYö Davi ˗yö Bɛtösabe ˗dhɛ ˈö ˗gɔ ˈkɔɔ˗. ˈYö ˗an ˗bha sɛɛˈˈ ˗yö ˗kë do, ˈö Bɛtösabe˗yö ˈgwu sü ˗a ˗gɔ. Davi ˗kun ˗a ˈˈpiʋ̈ kö ˈwɔn yaa ˈö˗ ˗kë bhë ˈö˗ ˗bin. ˈYö˗ pö ö ˗bha ˈˈsɔdha ˗gɔmɛn ˗dhɛ ˗yö Uudhi ˗dɔ ˈˈgblü ˗gɔ ˈˈdhiʋ̈ ˗wo ˈgo ˗a ꞊taabha kö ˗a ˈyɔɔ˗ ˗nu ˗wa zë. ˗Dhɛ ˈwo Uudhi zë ˈö Davi ˗ya ˗bha debhɔ sü dhe ˈka.

ˈWɔnyaa ˗nu ˈö˗ ˗kë bhë Zoova ˗yö ˗kpan ˗bha. ˈMën ˈö Zoova dho ˗a kë? ˗Yö ö ˗wodhiʋ̈lomɛn Natan ˗bɔ Davi ˈˈpiʋ̈. ˈYö˗ pö Davi ꞊dhɛ: ‹꞊Nɔɔnmɛn do ˗yö ˗kun ˗dhö ˈö ˈˈbhlaa ꞊va ˈdhö ˗kun ˗a ˗gɔ, ˈyö ˈˈflɛɛmɛn ˈö˗ ˗bha ˈˈbhlaa dosɛnŋ ˈö ˗kun ˗gɔ ˈö˗ ˗dhɔ ˗kun ˗a kë ˗ni ˈgü ꞊dedewo ˈö ˗kun ˗dhö ˈpö. ˈYö ꞊nɔɔnmɛn bhë ˈö ˈˈflɛɛmɛn ˗bha ˈˈbhlaa do ˈö bhë˗ sü ˗a ˗gɔ.› ˈDhɛ Davi ˗ya man, ˈö ˈwɔn ˗yö ˗shiö ˗a ˗dhɛ ꞊dedewo ˈö˗ pö: ‹꞊Nɔɔnmɛn bhë˗ dua ˗mü kö ˗yö ga.› ˈYö Natan ˗ya ˗yɔ bɔ ˈö˗ pö: ‹Bhi ꞊dede ꞊nën ˈü tɔɔ ꞊nɔɔnmɛn bhë.› ˈYö Davi zuʋ̈ˈˈ ˗yö ˗kaankwë, ˈö˗ pö Natan ˗dhɛ: ‹ˈMan ˈwɔn ˈyaa ꞊gbɔɔnsü kë Zoova ˈka.› ˈPë ˈö Davi ˗ya kë bhë ˗yö ˗nu ˈwɔn ˈˈgbɩɩ˗ ꞊va ˈka waa ö ˗bha ˈkɔdhigümɛn ˗nu ˗an ˗ta. Zoova ˗yö ˈwɔn ˈˈgbɩɩ˗ ꞊dede ˗wɔ Davi ˗ta. ˈˈKɛɛ yö ˈti˗ zë ˈö sü ꞊dhɛ ˗yö ö ˗de ˗sü ˈˈtɩtɩ ˈö ˈkpɛnŋdhö.

Davi ˗kun ˗a ˈˈpiʋ̈ kö ˈö Zoova ˗dhɔkëgükɔ dɔ. ˈˈKɛɛ Zoova ˗yö ˈö ˗kɔ ˗yɛ ˗a gbö Sadhomɔn ˗bha. Pë ˈö Sadhomɔn ˗bhawɔn ˈdhö yö ˗a ˗bha kö ˗yö ˗Zlan ˗dhɔkëgükɔ dɔ bhë, Davi ˗yö ˗ya ˗an baaˈˈ ˗sü ˗bha. ˈYö˗ pö: ‹Zoova ˗dhɔkëgükɔ dua ˗mü kö ˗yö kë ˗së ꞊dedewo. Sadhomɔn ˗yö ꞊tun wlüünën ˈka, ˗dhɛ ˈö ˈˈdhʋ̈ pë ˗nu ˈö˗ ˗bhawɔn ˈdhö˗ ˗bha bhë, n dua ˗mü kö ˈa˗ ˗takun ˗an baaˈˈ ˗sü ˗bha.› Davi ˗yö ö ˗de ˗bha ˈwëëga ꞊va ˗da ˗Zlan ˗dhɔkëgükɔ dɔ ˗sü ˈgü. ˈÖ ö ˗kɔ ˗yɛ ˗yökëmɛn ˗nu ˗tiaandhö ˗nu ˗bha. ˗Yö ˈˈsënŋ, ˈwëëga waa ˈˈdhü ˈwo˗ ˗dhɛ sɛdrö ˈö go ˈTii˗ waa Sidɔn bhë, ˗an ˗lo ˈko ˗ta. Kö Davi ga ˈˈtʋ̈ŋ ˈyaa ꞊gblɛɛn, ˗yö ˗kɔ ˈwo dho ˗Zlan ˗dhɔkëgükɔ dɔ ˗a ˈka ˗a ˗zɔn Sadhomɔn ˗dhɛ ˈsëëdhɛ ˈˈpɛn ˗ta. ˗Ya ˗pö: ‹Zoova ˈnën ˈö n ˗takun ˈkɔ ˈˈbin ˈö yö ˗a ˗yökësü ˗bha ü ˗bha ˈka. Zoova ˗dho ü ˗takun. ˈˈSuʋ̈ ˗ya ˈdhö ü ˗kë. Ü ˈgü dɔ ˈˈgbɩɩ˗ kö ˈü yö bhë ˗a kë ü ꞊faan ˈka.›