˗Glüdëdhɛ ˈö ˈˈpɛ ˗sü ˈka ˈkoo

Zuʋ̈niidadhe ˗kun Izraɛdhö ˗sɛ ˈgü ˈˈtʋ̈ŋ ˈö Sadhomɔn ˗kun Zoova ˗dhɔkë ˗ni ˈgü ˗a ˈka. ˈˈKɛɛ ˗yö dhebɔ ˗nu ˈwo ꞊geebɔ ˗dhɔkë ˈwo go ˈˈsɛ ˈˈwɛɛ ˈgü ˗an ˗sü dhe ˈka. ˗A ˗bha ˈwɔn yö ˗kɔ ˗nu ˗wo go ˈˈgblʋʋ ˈˈdhiʋ̈ ˈˈdhiʋ̈, ˈö ˗ya ꞊geebɔ gba ˗sü ˗bha ˈpö. ˗A ˈwɔn ˗yö ˗shiö Zoova ˗dhɛ ꞊dedewo, ˈö˗ pö Sadhomɔn ˗dhɛ: ‹A ˗dho Izraɛdhö ˗sɛ bho kaa ü ˗bha ˈkɔdhigümɛn ˗nu ka ꞊kwɛɛ˗ ˈa˗ ˗pɛ ˈkoo ꞊plɛ. ˗A dhö ˗a ˈˈpian ˈkpii˗ ˗sü nu ü ˗bha ˗yökëmɛn do ˗dhɛ, ˈa˗ ˗dhɛ ˈö to ˗a nu ü ˗bha ˈkɔdhigümɛn ˗nu ˗dhɛ.›

Zoova ˗yö pë ˈö˗ pö bhë, ˗a ˈgü ˈˈpʋ ˗kɔ ˗së ˈˈwɛɛ ˈbha ˗kë. ˈDhɛ ˈö kun ˈˈta ˈkpɔ ˗ni ˈgü, Sadhomɔn ˗bha yökëmɛn do ˈwo˗ ˗dhɛ Zedhoboamö bhë, ˗yö ˗kpan ˗zlanwodhiʋ̈lomɛn Aiya ˗bha. ˈYö Aiya ˗yö ö ˗bha sɔ ˗pɛ ˈkoo 12 ˈö˗ pö ˗a ˗dhɛ: ‹Zoova ˗dho Izraɛdhö ˗sɛ ꞊kɔɔnsü bho Sadhomɔn ˗bha ˈkɔdhigümɛn ˗nu ꞊kwɛɛ˗ ˈö˗ ˗pɛ ˈgü ꞊plɛ. Sɔ ˈˈpɛn 10 ˈwo yö ˗a ˈkun, ˈyö ˈtɔ ꞊dhɛ ü ˗dhö ˗kë ˗gblüdë ˈka ˈˈkwɛɛngɔ 10 ˗ta.› ˈDhɛ ˗gblüdë Sadhomɔn ˈˈtʋ ˗yö ˗da ˗a ˈgü, ˈö˗ ˈˈslö ˗mɛɛn kö ˈö Zedhoboamö zë. ˈYö Zedhoboamö ˗yö ꞊duëë ˈö dhö Ezitö. ˈDhɛ Sadhomɔn ˗yö ga, ˈö˗ gbö Roboamö ˗yö ˗kë ˗gblüdë ˈka ˗a ꞊ʒiaan ˈgü. ˈYö Zedhoboamö ˗yö ö ꞊yɛɛkë Izraɛdhö.

˗Kwɛnën ˗nu ˈwo kun Izraɛdhö ˗wa ˗pö Roboamö ˗dhɛ: ‹ˈBha ˈˈsɛgümɛn ˗nu ˈkun ˗së, ˗wo ˗dho ˈto ˗klu ˗sü ˈka ˈü ˗bha.› ˈˈKɛɛ Roboamö ˈˈtɛɛbɔ ˗nu ˈwo wlüünën ˈka ˗wa pö ˗a ˗dhɛ: ‹Ü dua ˗mü kö ˈü ˈˈgbɩɩdhɛ wɔ ˈˈsɛgümɛn ˗nu ˗ta. ˗An ˗bha yö ˗dadhiʋ̈ ꞊dedewo ˗yö ˗ʒiö ˗a ˈka mü.› ˈYö Roboamö ˗yö ˗to ˗a ˈˈtɛɛbɔ ˗nu ˗bha ˗dhioo ˗nu ˈˈpiʋ̈. Zuʋ̈yaadhɛ ˈö˗ ˗kë ˈˈsɛgümɛn ˗nu ˈka bhë, ˗ya ˗kë ˈwo ˗gban ˗a ˗gɔ. ˗A ˗wɔn ˈgü ˈwö Zedhoboamö ˈö ˈˈkwɛɛnŋgɔ 10 ˗gɔdhiʋ̈ bhë˗ ˗kë ˗gblüdë ˈka Izraɛdhömɛn ˗nu ˗ta. ˈˈKwɛɛnŋgɔ ꞊plɛ ˗nu ˈwo to ˈwo ˗an ˗dhɛ ꞊taabha Zuda ˗bha ˗gblüdëdhɛ. ˈWo ˈnën˗ ˈwo to ˗klu ˗sü ˈka Roboamö ˗bha. ˗Kɔ ˈö Izraɛdhö ˗bha ˈˈkwɛɛnŋgɔ 12 ˈwo ˗pɛ ˈkoo ˗a ˈka, ˈyö bhë.

Zedhoboamö ˈyaa kun ˗a ˈˈpiʋ̈ kö ˈˈsɛgümɛn ˗wo ˈdho ˗Zlan ˗dhɔkë Zedhizadhɛmö, ˈö sü ꞊dhɛ ˗yö Roboamö ˗bha ˗gblüdëdhɛ kë ˗dhɛ ˈgü. Pë ˗kë ˈö˗ pö ˈˈdhʋ̈ ü˗ ˗gɛn ˗dɔ ˗ee? ˈˈSuʋ̈ ˗kun ˗a ˈgü ꞊dhɛ ˈˈsɛgumɛn ˗nu ˗wo ˗dho ˈˈkan ö ˗bha ˈwo ˗ʒiö Roboamö ꞊kee˗. ˗A ˗wɔn ˈgü, ˗yö ˈˈsënŋ ˗dunɛn ꞊plɛ ˗pëkë ˈö˗ pö ö bha ˈˈsɛgümɛn ˗nu ˗dhɛ: ‹Zedhizadhɛmö ˗dhɛ ˗yö mü ꞊gblɛnŋ, ka ꞊mɔɔn˗ ˗bha ˈka ˗Zlan ˗dhɔkë yö.› ˈYö ˈwo ˗ya ˈˈsënŋ ˗dunɛn ˗nu bhë ˗an ˗dhɔkësü ˗bha ˈö ˗an ˗zo ˗yö bhɔ Zoova ˈka ˈzü.