Zoova ˗bha ˈˈsɔdha kpö ˈö ꞊dhɛ ˈˈwo dhö

Siidhimɛn ˗nu ˗bha ˗gblüdë Bɛnadadö ˗kun ˈdho ˗ni ˈgü Izraɛdhömɛn ˗nu ˗gɔ ꞊shiöŋ. ˈˈKɛɛ ˗wo ˗dha ˗an ˗gɔ ˈˈtʋ̈ŋ ꞊gban ˈka ˈyö ˗tɔ ꞊dhɛ ˗Zlan ˗wodhiʋ̈lomɛn Edhize ˗kun ˗an ꞊kpɔɔ ˗ni ˈgü. ˈDhɛ Bɛnadadö ˗ya yö ˈˈdhʋ̈, ˈyö˗ pö ö dho ˗Zlan ˗wodhiʋ̈lomɛn Edhize ˈkun. ˈDhɛ ˈö˗ man ꞊dhɛ Edhize ˗yö ˈˈkwiipö ˈwo˗ Dotanö ˗kë bhë ˗a ˈgü, ˈyö˗ pö ö ˗bha ˈˈsɔdha ˗nu ˗dhɛ ˗wa ˈkun ˈwo nu ˗a ˈka.

Siidhimɛn ˗nu ˗wo ˗nu Dotanö gbeŋ. ˈDhɛ Edhize ˗bha gwëëmi ˗yö yö ˈˈkpɛnŋ dhiapiʋ̈, ˗yö ˗kpan ˈˈsɔdha ꞊va ˗bha kö ˗wa ꞊klëën ˈˈkwipö bhë ˗a ˗züzü. ˈYö ˈˈsuʋ̈ ˗yö ˗da ˗a ˈgü ˈö˗ ˈpö: ‹Edhize, ko dho ˗a kë ˗dhɛ?› ˈYö Edhize ˗ya pö: ‹Mɛn ˗nu ˈwo kwa ˈˈpiʋ̈ ˗wo ꞊va ꞊dedewo ˈö ˈwo ˗ʒiö ˗a ˈka ˗an ˗ta.› Zoova ˗yö Edhize ˗bha yökemɛn ˈˈɲan ˗pʋ ˈö ˗kpan ꞊soo waa ˗gblügɔn ˗a ˈka ˗gɔ ˗nu ˈö ˈˈwo ˈdhö kun ˗an ˗bha, ˗an ˗bha ˗tɔn ˗nu ˈwo kun ꞊klëën ˗sü ˈka ˗an ˗züzü bhë ˗an ˗ta.

ˈDhɛ Siidhi ˈˈsɔdha ˗nu ˈwo kun ˗a ˈˈslö mɛɛnˈˈ ˗ni ˈgü kö ˈwo Edhize ˈkun, ˗yö ˗bhɛɛ Zoova ˗dhɛ ˈö˗ pö: ‹ˈˈAa Zoova, dɔ ˈˈgbɩɩ˗ kö ˈü ˗an ꞊gban ˈˈɲɛɛntröö.› ˈKö ˗kë ꞊dhɛ Siidhi ˈˈsɔdha ˗nu ˗kun ˗dhɛ yö ˗ni ˈgü, ˗wo ˗to ˈˈshia mü ˈö ˗dhɛ ˈwo kun ˗a ˗bha bhë ˈö go ˗an ˈˈɲaan. Edhize ˗ya ˗pö ˗an ˗dhɛ: ‹ˈˈKwiipö ˈö ˈka dho ˗a ˈgü ˈyaa ˈnën ˈö yö. ˗Ka nu ˈkwa ˈdho gɔndë ˈö ˈka˗ mɛɛnˈˈ ˗ni ˈgü bhë ˗a ꞊kee˗.› ˗Wo ˗ʒiö ˗a ꞊kee˗ ˈö ˈwo ˈdho Samadhi ˗dhɛ ˈö Izraɛdhömɛn ˗nu ˗bha ˗gblüdë ˈdhö˗ ˗bha bhë ˗a ˈgü.

ˈDhɛ Siidhi ˈˈsɔdha ˗nu ˗wa ˈwɔn dɔ ꞊taabha ꞊dhɛ ˈwa ˗wo Samadhi, kö mɛn ˗nu ˗kɔ ˗ya ꞊mɔɔn ˗an ˗bha. Izraɛdhömɛn ˗nu ˗bha ˗gblüdë ˗yö Edhize dhɛɛˈˈ ˗kpɔ ˈö˗ pö: ‹A ꞊mɔɔn˗ ˗bha ˈa ˗an zë ˗ee?› Edhize ˗yö ˗bɔ ˈwɔn ˈö ˈˈdhʋ̈ ˗a ˗ta ˈö ˈwɔn yaa ˈˈyoobho ˈwɔn yaa ˈka ˗ee? ˗Abin. ˗Ya ˗pö ꞊ʒian: ‹ˈBha dho ˗an zë. ˗Bhöpë ˗nu ˗an ˗dhɛ kö ˈü ü ꞊kwaa ˗an ˗zü kö ˗wo ˈdho.› ˈDhɛ ˗kë ˈˈdhʋ̈, ˗gblüdë ˗yö ˈwlaan˗ ˈkpii˗ do ˗ya ˗an ˗bha ˈka. ˈDhɛ ˈwlaan˗ ˗yö ɲën, ˈö ö ꞊kwaa ˗an ˗zü.