Zoova ˗yö Zedhemi ˗bɔ kö ˈö˗ ˗wo ˈˈdhiʋ̈ ˗lo

Zoova ˗yö ö ˗kɔ ˗yɛ Zedhemi ˗bha kö ˗yö kë ö ˗wodhiʋ̈lomɛn ˈka Zuda ˗sɛ ˈgü. ˗Ya ˗pö ˗a ˗dhɛ ˗yö ö ˗bha nɔɔn˗ dɔ, ˗ya pö ˈˈsɛgümɛn ˗nu ˗dhɛ ꞊dhɛ ˗wo ˈˈkan ˈwɔn yaa ˗bha. ˈYö Zedhemi ˗ya pö: ‹ˈˈKɛɛ Zoova, ˗a ꞊tun wlüünën ˈka. N ˈˈdhi ˈyaa ˈˈkan ˈwɔn blɛɛˈˈ ˗sü ˗bha.› ˈYö Zoova ˗ya pö ˗a ˗dhɛ: ‹ˈˈSuʋ̈ ˈyaa ˈdho ü kë. Pë ˈü dho ˗a pö man ˈnën ˗a dho ˗a pö ü ˗dhɛ. ˗A dho ü ˗takun.›

Zoova ˗ya ˗pö Zedhemi ˗dhɛ ˗yö mɛn zii ˗nu ˈwo ˈˈsɛ bhë˗ ˈgü ˗an kpaaˈˈ ˈkwëë˗ kö ˗yö gbɔ ˈˈsɛ do ˈwü ˗an wëëdhö, kö ˗ya pö ˗an ˗dhɛ: ‹Zedhizadhɛmö ˗sɛ ˗dho ˈwü ꞊dhɛ ˗kɔ ˈö yö ˗a ˈdhö.› ˈDhɛ Zedhemi ˗ya ˗kë ˈˈdhʋ̈, ˈwɔn ˗yö ˗shiö ꞊dedewo mɛn zii ˗nu bhë ˗an ˗dhɛ. ˈˈSaabhomɛn do ˈwo˗ ˗dhɛ Pashuu, ˗yö Zedhemi ˗man ˈö˗ ˗kɔ waa˗ ˗gɛn ˗nu ˗da ˈˈdhü ˈgü. Gbeŋ ˈö ˗bhë ˗a ˈka Zedhemi yö ˈti ꞊mɔn vin ˗sü ˗bha. ˈDhɛ ˗ta ˗dhɛ ˗yö ꞊kpɔɔ, ˈyö Pashuu ˗yö ˗kwaa ˗zü. ˈYö Zedhemi ˗ya pö: ‹N ˈgü ˗ya ga, a dho ˗zlanwopösü ˈduannu.› ˈˈKɛɛ ˗ya ˗kë ˈˈdhʋ̈ ꞊dedewo ˗ee? ˗Abin! ˈDhɛ Zedhemi ˗yö ö ˗zota, ˈyö˗ pö ö ˗de ꞊dhɛ: ‹Zoova ˗bha nɔɔnwo ˗yö ꞊dhɛ ˈˈwo ˈdhö n kwi ˈgü. ˈMaan ꞊mɔɔn˗ ˗bha kö ˈa˗ pö ˗sü ˈduannu.› Zedhemi ˗yö ˈˈsɛgümɛn ˗zokpɔɔ ˗kplawo ˈö dho˗ ˈka.

ˈDhɛ ˗kwɛ ꞊va ˗yö ˗ʒiö, ˗gblüdë ˗dɛɛ ˗yö ˗ya Zuda ˗gɔ ˈˈdhiʋ̈. Zedhemi ˗bha nɔɔn˗ ˈö bhë yö ˈti dhi ˈˈsaabhomɛn waa ˗Zlan ˗wodhiʋ̈lomɛn ꞊suasü ˗nu ˗dhɛ. ˗A ˗wɔn ˈgü ˗wa ˗pö ˗gblüdë gbö ˗nu ˗dhɛ: ‹Gɔndë ˈö yö, kwa dua ˗mü kö ˈkwa˗ zë.› ˈYö Zedhemi ˗ya pö: ‹ˈKa n zë, kö ˈka mɛn kpɛnŋdhö zë. Zoova ˗wo ˈnën ˈa˗ ˈˈdhiʋ̈ ꞊lo, n ˗de ˗bha ˈyaa ˗mü.› ˈDhɛ ˗gblüdë gbö ˗nu ˗wa man ˈˈdhʋ̈, ˈyö ˈwo˗ pö: ‹Gɔndë ˈö bhë, kwa dua ˈyaa ˗mü kö ˈkwa˗ zë.›

ˈDhɛ Zedhemi ˗yö dho ˗zlanwopösü ˈka ˈˈdhiʋ̈, ˈwɔn ˗yö ˗shiö ꞊dedewo ˗gblüdë gbö ˗nu ˗dhɛ. ˗A ˗wɔn ˈgü ˗wa ˗pö ˗gblüdë ˗dhɛ ˗yö Zedhemi zë. ˈYö ˗gblüdë ˗ya pö ˗an ˗dhɛ ˗wo pë ˈö ˗dhi ˗an ˗dhɛ, ˗a kë ˗a ˈka. ˗Wo Zedhemi ˗sü, ˈwo˗ ˗zuö ˗klɔŋ ꞊gblɛɛn ˈö böö˗ ˈˈyi ˈdhö˗ ˈgü ˗a ˈgü. ˈYö Zedhemi ˗yö ˗ya ˈdho ˗sü ˗bha böö˗ ˈgü.

ˈDhɛ ˗kë ˈˈdhʋ̈, ˈyö gɔndë do ˈwo˗ ˗dhɛ Ebɛdö Melɛkö ˈö kun yö kë ˗ni ˈgü ˗gblüdë ˗gɔ ˈkɔɔ bhë, ˈö˗ pö ˗gblüdë ˗dhɛ: ‹˗Gblüdë gbö ˗nu ˗wa Zedhemi ˗zuö ˗klɔŋ ˈgü ˗wa! ˈKwa˗ ˈto mü, ˗yö ˗dho ga.› ˈYö ˗gblüdë ˗ya ˗pö ˗a ˗dhɛ ˗yö mɛn 30 ˈsü kö ˗wo ˈdho ˗wo Zedhemi bho ˗klɔŋ bhë ˗a ˈgü. Zedhemi yö ˈti ö ꞊kwaa pë ˈbha ˗zü kö ˗yö ö ˗kɔ ˈˈkan ˗zlanwopösü ˗bha. Ü ˗dho ʒiö Zedhemi ˗bha ˈwɔnzuan ˈˈpiʋ̈ ˗ee?