Ɛstɛɛ ˗yö ö ˗bha ˈˈsɛgümɛn ˗nu ˗dha

Ɛstɛɛ ˗kun Zuifö ˈnëndhiëŋnën do ˈö kun Suzö Pɛsö ˈˈkwipö do ˈgü ˗a ˈka. Nabukodonozɔ ˈö˗ ˗bha ˈˈsɛgümɛn sü Zedhizadhɛmö ˈö dho ˗an ˈka ö ˗bha ˈˈsɛ ˈgü, ˗a ˗kwɛ ꞊va ˗ya ʒiö. ˗A ꞊dhegblü Madoshe ˈö kun ˗gblüdë Asiedhisö ˗bha yökëmɛn ˈka bhë, ˈnën ˈö˗ ˗to.

˗Gblüdë Asiedhisö ˗bhawɔn ˗kun ˗gblüdhe ˗dɛɛ ˗bha. ˗A ˗bha gwëëˈˈ ˗nu ˗wo ˗nu ˗a ˗dhɛ dhebɔ ˗sɛŋbɔ ˗nu ˈka. Ɛstɛɛ ˗kun ˗an kpö ˈgü ˈpö. ˈˈKɛɛ Ɛstɛɛ ˈnën ˗gblüdë ˗yö ö ˗kɔ ˗yɛ ˗a ˗bha. Madoshe ˗ya ˗pö Ɛstɛɛ ˗dhɛ ꞊dhɛ ˈyaa ˈdho ˗a pö ꞊dhɛ ö Zuifö ˈka.

˗Desüvamɛn do ˈwo˗ ˗dhɛ Amanö ˗kun ˗gblüdë gbö ˗nu ˗gɔ ˈˈdhiʋ̈. ˗Yö ˗kun ˗a ˈˈpiʋ̈ kö mɛn ꞊gban ˗wo wo ˗gɔ ˈgblëënnu ˗a ˈˈdhiʋ̈. Madoshe ˈti ˈˈwɩ˗ ˗bha. ˗A ˗wɔn ˈgü ˈwɔn ˗yö ˗shiö Amanö ˗dhɛ ꞊dedewo, ˈö˗ pö ꞊dhɛ ö dho ˗a zë. ˈDhɛ ˈö Amanö ˗ya ˈwɔn dɔ ꞊dhɛ Madoshe ˗yö Zuifö ˈka, ˈyö˗ ˈˈslö ꞊mɛɛn kö ˈö Zuifö ˗nu ꞊gban zë ˈˈsɛ bhë˗ ˈgü. Amanö ˗ya ˗pö ˗gblüdë ˗dhɛ: ‹Zuifö ˗nu ˈwaa ˗tiaandhö. Ü dua ˗mü kö ˈü ˗an zë.› ˈYö Asiedhisö ˗ya pö: ‹Pë ˈˈpɛpɛ ˈü˗ ˈˈpiʋ̈ kö ˈü˗ kë, ˗bhö ˗a kë.› ˗Gblüdë ˗yö ˗we ˗a ˗bha ˈpö kö Amanö ˗yö ˈtɔŋ˗ do ˗ya. Amanö ˗yö ˈtɔŋ˗ ˈö ˈˈdhʋ̈ ˗a ˗ya ˈö˗ pö ˗a ˈgü ꞊dhɛ Adaa 13 ˈka, ˗wo Zuifö ˗nu ꞊gban zë. Zoova ˈˈɲan ˗kun ˈwɔn ˈö bhë ˗a ˗bha.

ˈTɔŋ˗ ˈwo˗ ˗ya bhë ˗a ˈwɔn ˈyaa kun Ɛstɛɛ ˈˈɲaan. Madoshe ˗yö ˈtɔŋ˗ ˈsëëdhɛ bhë ˗a do ˗bɔ Ɛstɛɛ ˗dhɛ ˈö˗ pö: ‹˗Bhö ˈdho kö ˈü˗ ˗wɔn blɛɛˈˈ ˗gblüdë ˗dhɛ.› ˈYö Ɛstɛɛ ˗ya pö: ‹Mɛn ˈˈoo ˗mɛn ˈö dho ˗gblüdë ˗kuu ˈˈdhiʋ̈ kö ˈyii˗ ˗mɛn ˗dhɛ, ˗a zë ˈnën ˈwo˗ wo.› ˗A ˗dhɛkpɔayi ˗ya kë 30 ꞊dɛɛ, ˗gblüdë ˈti n ˗dhɛ, ˈˈkɛɛ a dho ˈdho. ˗Ya ö ˗bha ˗taadhü ˗zɔn n ˈka, kö ˈman dha. ˈYii˗ kë ˈˈdhʋ̈ ˗wo ˗dho n zë.›

ˈYö Ɛstɛɛ ˗yö dho ˗gblüdë ˗kuu ˈˈdhiʋ̈. ˈDhɛ ö ˗gblüdë ˗yö ˗kpan ˗bha, ˈö ö ˗bha ˗taadhü ˗zɔn ˗a ˈka. Ɛstɛɛ ˗yö ˗ɲɔɔn ˗a ˈˈsuee ˈö ˗Gblüdë ˗ya dhɛɛˈˈ kpɔ ˈö˗ pö: ‹ˈMën ˈü˗ ˈˈpiʋ̈ ˈa˗ kë ü ˗dhɛ, Ɛstɛɛ?› ˈYö˗ pö: ‹ˈYö n ˈˈpiʋ̈ kö ˈa kaa Amanö ka ˗dhɛ kö ˈkwa kwa ˗kɔ ˗da ˈˈkwöö.› ˈDhɛ ˈwo kun pëbhö ˗ni ˈgü, Ɛstɛɛ ˗yö ˗an ˗dhɛ ˈzü bhöpë ˈˈwɛɛ ˈbha ˈka. ˗A ˈwlaan˗ ꞊plɛ ˗naan ˗ta, ˗gblüdë ˗ya dhɛɛˈˈ ˗kpɔ ˈzü ˈö- pö: ‹˗Mën ˈü˗ ˈˈpiʋ̈ ˈa˗ kë ü ˗dhɛ?› ˈYö Ɛstɛɛ ˗ya pö: ‹Mɛn ˈbhaa ˗ya ˈˈpiʋ̈ kö ˈö yaa n ˗man ˈˈsɛgümɛn ˗nu yi zë. Dɔ ˈˈgbɩɩ˗ ˈü yi dha›. ˈYö ˗gblüdë ˗ya pö: ‹De ˈö˗ ˈˈpiʋ̈ kö ˈö ü zë?› ˈYö Ɛstɛɛ ˗ya pö: ‹Amanö, mɛn yaa ˈö yö, yö ˗mü.› ˗Yö ˗shiö Asiedhisö ˗dhɛ ꞊dedewo, ˈyö to ˈˈshia˗ mü ˈö˗ pö ˗wo Amanö zë.

ˈTɔŋ˗ ˈö Amanö ˗ya ˗ya bhë mɛn ˈbha ˈyaa kun ꞊mɔɔn ˗ni ˈgü ˗a ˗bha kö ˗ya bho ˈˈgblʋʋ, ˗a ˗de ˗ʒian ˗gblüdë yö ꞊dede. ˗Gblüdë ˗yö Madoshe ˗ya ˗a ˗kɔ ꞊lö ˗mɛn ˗blɛɛsü ˈka, ˈö˗ pö ˗yö ˈtɔŋ˗ ˗dɛɛ ˗ya. ˈTɔŋ˗ ˈö ˗dho ˗a kë kö Zuifö ˗nu ˗wo wo ˗de ˗takozë ˗ya kë ꞊dhɛ ˗an ˈyɔɔ˗ ˗nu ˗wa nu ˗an ˗gɔ, Madoshe ˗yö ˗a ˗ya. Adaa 13 ˈka, Zuifö ˗nu ˗kɔ ˗yö ˗ʒiö ˗an ˈyɔɔ˗ ˗nu ˗gɔ. ˈÖ sü ˈˈtʋ̈ŋ ˈö bhë ˗a ˗bha, ˗wo ˗gblü ˈö dhi ˗an ˗gɔ bhë, ˗a ˈwlaan˗ ˗kë ˗kwɛ ˈˈpɛpɛ ˈka.