Ɛdrasö ˗yö mɛn ˗nu ꞊klaŋkë ˗Zlan ˗bha ˈtɔŋ˗ ˈka

ˈDhɛ ˈö Izraɛdhömɛn ˗nu ꞊vadhɛ ˈwo wo yee ˗kë Zedhizadhɛmö, ˗a ˗kwɛ ˗ya ꞊mɔɔn ˗kwɛ 70 ˗bha. ˈˈKɛɛ ˗a ˗mɛn ˈbhaa ˗nu ˗kun ˗kplawo Pɛsö ˈˈkwipö ꞊vadhɛ ˈgü. ˗A mɛn do ˈnën ˗tɔ Ɛdrasö. ˗Yö ˗kun ˈˈsaabhomɛn ˈka, ˈgo mü ˈzü ˗yö ˗kun mɛn ˗nu draanˈˈ ˗ni ˈgü Zoova ˗wo ˈka. Ɛdrasö ˗ya ˗man ꞊dhɛ Zedhizadhɛmö ˗mɛn ˈbhaa ˗nu ˈwaa kun ˗Zlan ˗bha ˈtɔŋ˗ ˗nu ˗ya ˗ni ˈgü ˈzü ꞊bhlëë ˈgü. ˗A ˗wɔn ˈgü ˗yö ˗kun ˗a ˈˈpiʋ kö ˈö ˈdho mü kö ˈö ˗an ˗takun. Pɛsö ˗gblüdë Atazɛsɛsö ˗ya ˗pö ˗a ˗dhɛ: ‹˗Zlan ˗ya ꞊kpɔɔdhɛ nu ü ˗dhɛ kö ˈü mɛn ˗nu ꞊klaŋ kë ˗a ˗bha ˈtɔŋ˗ ˗nu ˈka. ˗Bhö mɛn ˈˈpɛpɛ ˈwo˗ ˈˈpiʋ̈ kö ˗wo ʒiö ü ꞊kee˗ ˗an ˈsü kö ˈka ˈdho.› Ɛdrasö ˗yö mɛn ˗nu ˈwo kun ˗a ˈˈpiʋ̈ kö ˗wo wo ꞊yɛɛ kë Zedhizadhɛmö bhë ˗an ˗sü ˈö ˈwo dho. ˈˈSanni ˗wo ˈdho, ˗wo ˗bhɛɛ Zoova ˗dhɛ kö ˗yö ö ˗kɔ kpa ˗an ˗ta, kö ˗an ˗bha ˈˈta ˗yö dhi.

ˈDhɛ ˈˈsu ˗yiishiö ˗yö ˗ʒiö ˈyö ˈwo ꞊lo Zedhizadhɛmö. ˗Gblüdë gbö ˗nu ˈwo kun Zedhizadhɛmö ˗wa ˗pö Ɛdrasö ˗dhɛ: ‹Izraɛdhömɛn ˗nu ˈwii ˈwɔnman Zoova ˗ta. ˗Wa dhebɔ ˗nu ˈö ˈwo ꞊sua ˗zlan ˗nu ˗dhɔkë ˗an ˈsü dhe ˈka.› ˈMën Ɛdrasö ˗ya ˗kë? Ɛdrasö ˗yö ˗yö ö kpɔn ˈgü mɛn ꞊gban ˈˈɲan ˈˈdhiʋ ˈö ꞊bhɛɛ Zoova ˗dhɛ ˈö˗ pö: ‹Zoova, ˈbha pë ꞊va ꞊dede kë yi ˗dhɛ, ˈˈkɛɛ yi zë yi ˈti ˈwɔnman ü ˗ta. ˈˈSɛgümɛn ˗nu ˗wo ˗go wo ˗bha ˈwɔn yaa ˈgü, ˈˈkɛɛ ˗wo ˗kun ˈwɔn ˈbhaa ˗nu ˈö ˈwaa kun kpɛnŋdhö ˗an kë ˗ni ˈgü ˗kplawo. Ɛdrasö ˗yö ö ˗kɔ ˗yɛ mɛn zii ˗nu waa zakanmɛn ˗nu ˗bha kö ˗wo ˈwɔn ˗nu ˈwo ˈˈdhʋ̈ ˗an ˈˈɲan bhɔ. ˈˈSu ˗yaaga ˗nu ˈwo dɔ ˗a ˈˈpiʋ̈, ˗wo mɛn ˗nu ˈö ˈwii ˈwɔnman Zoova ˗ta, ˗an ˗bho ˗Zlan ˗dhɔkëmɛn ˗nu ˈwo to ˗an ˈˈpiʋ̈.

˗Kwɛ ˗kɔŋ do ö ga ꞊plɛ ˗ya ʒiö, ˗wa wo bo Zedhizadhɛmö ˗dhɛ ˈˈkplʋʋ ˗nu dɔ ˗sü ˈka. Ɛdrasö ˗yö ˈˈsɛgümɛn ˗nu ˗kpaakwëë ˈˈdhɛɛtadhɛ do ˈgü kö ˈö ˗Zlan ˗bha ˈtɔŋ˗ ˗nu ˗wo pö ˗an ˗dhɛ. ˈDhɛ Ɛdrasö ˗yö ˗Zlan ˗bha ˈsëëdhɛ ˗be ˈˈdhiʋ̈ ˗pʋ, ˈyö ˈˈsɛgümɛn ˗nu ˗wo dɔ wo ˗gɛn ˗ta. ˈYö Ɛdrasö ˗yö Zoova ˈtɔ bhɔ, ˈyö ˈˈsɛgümɛn ˗nu ˗wo wo ˗kɔ ˈˈdhiʋ̈ ꞊wlü, ˗a ˗zɔn ˗sü ˈka ꞊dhɛ ˈwa ˈˈwɩ˗ ˗bha. ˈDhɛ ˗kë ˈˈdhʋ̈ ˈyö Ɛdrasö ˗yö ˗Zlan ˗bha ˈtɔŋ˗ ˗wo ˗pö, ˈö go mü ˈyö˗ ˗gɛn pö ˗an ˗dhɛ. ˈÖ kun ˈˈdhʋ̈ kö ˈˈsɛgümɛn ˗nu ˗wo wo ˈˈtʋ ˈto ˗ni ˈgü ˗a ˗bha ˗së ˈka. ˈYö ˈwo˗ yö ꞊dhɛ ˗wa ˈdho Zoova ˈka ꞊gblɛɛn ˈzü. ˈYö ˈwo ˈˈgbʋ bɔ. ˈDhɛ ˈö˗ ˗tadhɛ ˗yö ꞊kpɔɔ, Ɛdrasö ˗yö ˗Zlan ˗bha ˈtɔŋ˗ ˗wo ˗pö ˈzü. ˗Wa ˈgüman ꞊dhɛ ˗a ˈˈtʋ̈ŋ ˈyaa ꞊gblɛɛn ˈzü kö ˗wo gbakɔ ˈwlaan˗ kë.

˗Dhɛkpaɔyi ˈˈsɔɔplɛ ˈwo˗ kë ˈwlaan˗ bhë ˗kë ˗sü ˈgü ˗bhë, ˈˈsɛgümɛn ˗nu zuʋ̈ˈˈ ˈˈgblü ˗yö ˗dhi, ˈyö ˈwo Zoova ˈˈnuɛ bho ˈyö ˗tɔ ꞊dhɛ ˗an ˗bha ˗tapë ˗nu ˗wa dhi. Gbakɔ ˈwlaan˗ ˈwo˗ ˗kë bhë, ˗ya ˈˈkan ˗a ˈdhɛ ˈwo˗ ˗kë Ʒozue ˗bha ˈˈtʋ̈ŋ ˈgü ˗a ˗bha, ˗a suu ˈyii kë do. ˗Dhɛ ö ˈwlaan˗ bhë ˗yö ɲën, mɛn ˗nu ˗wo ˗kpaa wo ˈkwëë˗ ˈwo ꞊bhɛɛ ˈwo˗ pö: ‹Zoova, ü yi ˗bho ꞊dhuëŋdhɛ ˈgü, ˈü yi ˈˈdhigba ˈˈyɛɛta, ˈö ˈü ˈˈsɛ ˗së ˈö yö ˗a nu yi ˗dhɛ. ˈˈKɛɛ yi ˈti ˈwɔnman ü ˗ta ˗gɛnɲan ˈka ꞊va. Ü ü ˗wodhiʋ̈lomɛn ˗nu ˗bɔ kö -wo yi ˗zokpɔɔ, ˈˈkɛɛ yi ˈti yi ˈˈtʋ ˈto ˗an ˗bha. ˈˈKö ˗kë ˈˈdhʋ̈, ü ü zuʋ̈ˈˈ ˗kë ˗saa ˗kplawo yi ˈˈpiʋ̈. ˈGo mü ˈzü, ü ˗wo ˈü˗ ˗bhö Abaamö ˗dhɛ bhë, ü˗ ˈgüwɔn ˗kë. ˗A ˗wɔn ˈgü yi ˗dho ˈwɔn man ü ˗ta.› Wo ˗wo ˈwo˗ bhö bhë, ˗wa ˗bɛnzë, ˈyö ˗gblüdë gbö ˗nu, Levi ˗gɔ ˈkɔɔmɛn ˗nu waa ˈˈsaabhomɛn ˗nu ˈwo wo ˗kɔ ˈˈgblʋʋ kë ˗a ˗ta.