Zedhizadhɛmö ˈkɔ ˈˈbhaŋ

˗Kwa kwa yeekë ˈnënbhaawo ꞊taabha. Neemi ˗yö ˗kë ˗gblüdë Atazɛsɛsö ˗bha yökëmɛn do ˈka. ˗Yö ˗kun Izraɛdhö mi ˈö Suzö, Pɛɛsö ˗pö ˈgü ˗a ˈka. ˗A ꞊dhegblü ˗yö ˗go Zuda ˈö nu nɔɔn˗ yaa ˈka˗ ˗dhɛ. ˗Ya ˗pö ˗a ˗dhɛ: ‹Zuifö ˗nu ˈwo wo ꞊yɛɛ ˗kë Zedhizadhɛmö bhë, ˈwaa ˗ya ˗sü ˈka wo ˗de ˈflëëgü. ˈˈKwipö ˈö bhë ˗a ˈˈkplʋʋ waa˗ ˈˈkwee ˗nu ˈö Babidhɔnömɛn ˗nu ˗wo ˗an ꞊shiö bhë, mɛn ˈbha ˈyii ˗an baaˈˈ ˈzü.› Nɔɔn˗ ˈö bhë ˗yö Neemi ˈgü ˗ga. ˗Yö ˗kun ˗a ˈˈpiʋ̈ ˈö ˈdho Zedhizadhɛmö kö ˈö ö ˗bha ˈˈsɛgümɛn ˗nu ˗takun. ˗A ˗wɔn ˈgü, ˗yö ˗bhɛɛ ˗Zlan ˗dhɛ kö ˗gblüdë ˗yö ˈˈwɩ ˗a ˗bha kö ˈö ˈdho.

ˈDhɛ ˈˈtʋ̈ŋ ˈbha ˗yö ˗ʒiö, ˗gblüdë ˗ya ˈsuan˗ ˗bho ꞊dhɛ Neemi ˗ta ˗ya kë ˗saa. ˈYö˗ pö ˗a ˗dhɛ: ‹N ˈti ü yö ꞊dhɛ ˗kɔ ˈö yö ˗a ˈdhö do. ˗Mën ˈö ü ˗bha?› ˈYö Neemi ˗ya pö: ‹ˈMën ˗kë ˈö n zuʋ̈ˈˈ ꞊nii dho ˗da, ˈˈkɛɛ ˈkö n ˗man ˈpödhɛ Zedhizadhɛmö ˗yö ˈˈkpaandhɛ ˈka?› ˈYö ˗gblüdë ˗ya dhɛɛˈˈ ˗kë ˈö˗ pö: ‹ˈMën ˈü˗ ˈˈpiʋ̈ kö ˈa˗ kë ü ˗dhɛ?› Neemi ˗yö ˗to mü ˈö ꞊bhɛɛ ö zuʋ̈ˈˈ ˈˈpiʋ̈, ˈyö˗ pö ˗a ˗dhɛ: ‹˗Bhö dɔ ˈˈgbɩɩ˗ ˈü ˈˈwɩ ˗a ˗bha kö ˈa ˈdho Zedhizadhɛmö kö ˈa˗ ˈˈkplʋʋ ˗nu ˗yö kë.› ˗Gblüdë Atazɛsɛsö ˗yö ˗we ˗a ˗bha kö Neemi ˗yö ˈdho, ˈö pë ˗nu ˈö˗ ˗bhawɔn ˈdhö˗ ˗bha kö ˗yö ˈˈta ꞊gblɛɛn bhë˗ ˈsü, ˗yö ˈdho ˗yö ˗wo ˗së ˈka ˗a nu ˗a ˗dhɛ. ˗Yö ˗go mü ˈö Neemi ˗kë ˈˈsɛkɔɔnmɛn ˈka, ˈö ˈˈdhü ˗nu ˈö ˗dho ˈˈkwipö ˈˈkwee ˗nu ˗yö kë ˗an ˈka ˗an nu ˗a ˗dhɛ.

ˈDhɛ Neemi ˗yö ˗wo Zedhizadhɛmö, ˗yö ˗ʒiö ˈˈkplʋʋ bhë ˗a ˈˈpiʋ̈ ˈö˗ ˗ga ˗së ˈka. ˈDhɛ ˈö ö bo, ˈyö ˈˈsaabhomɛn ˗nu waa Zuifö ˗nu ˗gɔmɛn ˗nu ˗dhɛ wo ˈkwëëdhö ˈö˗ pö ˗an ˗dhɛ: ‹ˈWɔn ˈˈgbɩɩ˗ ˈnën kwa ˗ta yö. Kwa dua ˗mü kö ˈkwa ˗ya yö ˗bha.› ˈYö ˈˈsɛgümɛn ˗nu ꞊gban ˈˈpɛpɛ ˗wo ˗yö ˗mɔn ˗a ˈgü, ˈö ˈwo ˗ya ˈˈkplʋʋ bhë ˗a ˗yö ˗bha.

ˈˈKɛɛ Izraɛdhömɛn ˗nu ˈyɔɔ˗ ˈbha ˗nu ˗wo ˈˈyɩɩ ˗to ˗an ˗bha, ˈwo˗ pö: ‹˗Dɛnpë do ꞊mɔɔn˗ ˗bha ˈö ka ˗bha ˈˈkplʋʋ bhë ˗a ˗pö.› ˈˈKɛɛ yökëmɛn ˗nu ˈwii wo ˈˈtʋ̈ŋ kë ˗an ˈgü. ˗Wo ˗dho wo ˗bha yö ˈka ˈˈdhiʋ̈, ˈö ˈˈkplʋʋ bhë ˗yö ꞊ɲɔɔn ˈˈdhuŋ ˈö ˗kë ˈˈgbɩɩ˗.

ˈDhɛ ˗kë ˈˈdhʋ̈, ˗an ˈyɔɔ˗ ˗nu ˗wa ˗pö ꞊dhɛ ˗wo ˗dho ˈgo ˗dhɛ ˗nu ˈgü do do kö ˗wo nu Zedhizadhɛmö ˗dhɛ ˗gɔ Izraɛdhömɛn ˗nu tii ˈka. ˈDhɛ Zuifö ˗nu ˗wa man, ˈˈsuʋ̈ ˗yö ˗da ˗an ˈgü. ˈˈKɛɛ Neemi ˗ya ˗pö ˗an ˗dhɛ: ‹ˈKaa ˈdho ˈˈsuʋ̈. Zoova ˗yö kwa ˈˈpiʋ̈.› ˗Yö ˈˈgladhiʋ̈sümɛn ˗nu ˗ya kö ˗wo ˈˈɲan ˈto yökëmɛn ˗nu ˈˈdhiʋ̈. ˗A ˗wɔn ˈgü, ˗an ˈyɔɔ˗ ˗nu ˈwii ꞊mɔɔn ˗a ˗bha kö ˗wo pë ˈbha ˗kë ˗an ˈka.

˗Dhɛkpaɔyi 52 ˈˈkpaan ˈnën ˈwo˗ sü ˈwo ˈˈkplʋʋ ˈö bhë waa˗ ˈˈkwee ˗nu yökë ˗a ˈka. Neemi ˗yö Levi ˗gɔ ˈkɔɔmɛn ˗nu ꞊gban ˈˈpɛpɛ ˗dhɛ kö ˗wo nu ˗a ˈwlaan˗ ˗ta. ˗Yö ˗an ˗pɛ ˈkoo ꞊plɛ kö ˗wo ˈˈtan bho. ˗Wo ˗da ˗dhɛ ˈö ˈˈyi ˗gɔgodhɛ ˈˈkwee ˈˈpian ˗ta bhë ˗a ˗bha, ˈö ˈwo ˗wo ˈˈkplʋʋ bhë ˗a ˗ta ˈˈdhuŋ. ˗Wo ˈˈta ˗sü ˈpö˗ ˈö bhë ˗a ˗züzü ˈˈtruu ˗piö ˗sü, kɔŋ zë ˗sü waa ˗we Zoova ˈˈpiʋ̈ ˗sü ˈka. Ɛdrasö ˗kun ˈˈtanbhomɛn ˗nu kpö do ˈgü, ˈö Neemi kun ˗a kpö ꞊plɛ ˗naan ˈgü. ˗Wo ˈˈta ˗sü ˈwo ˗kpan ˈwo ˈko ˗bha ˗Zlan ˗dhɔkëgükɔ ˈgü. ˈˈSɛgümɛn ˗nu ꞊gban ˈˈpɛpɛ ˗wo ˈˈsaa˗ ˗bho Zoova ˗dhɛ, ˈwo trʋʋˈˈ ˗kë. ˈNën ˗nu, gɔɔn˗ ˗nu waa dhoŋ ˗nu ꞊gban ˗wa ˗kë ˈˈdhʋ̈. ˗Wo ˗kun ˗an ˈˈyɩɩwo man ˗ni ˈgü ˗dhɛ ꞊gbɛɛn ꞊dede ˈgü.