˗Zuu ˈˈslʋ̈ʋ̈slʋ̈ ˗yɔɔ Kɔɔnɛi ˗ta

Sezadhe ˗pö ˈgü, ˈˈsɔdha ˗gɔmɛn do ˈbha ˗kë mü ˈö ˈwo kun ˗a ˗dhɛ ˗ni ˈgü Kɔɔnɛi. ˈYaa kun Zuifö ˈka, ˈˈkɛɛ Zuifö ˗nu ˗kun ˗a ꞊bhlëë ˗ya ˗ni ˈgü. ˗Yö ˈˈflɛɛmɛn ˗nu ˗takun zuʋ̈ˈˈ ˈˈpuu ˗bha, ˈö nu mɛn ˗nu ˗dhɛ. Kɔɔnɛi ˗kun ö ˗zoyö ˗ni ˈgü Zoova ˗dhɛ, ˈö ꞊bhɛɛ ˗a ˗dhɛ ˗kplawo. Yi do ˈka, ˗Zlan ˗bha ˈˈkiö do ˗yö ö ˗de ˗zɔn ˗a ˗dhɛ ˈö˗ pö: ‹˗Zlan ˗ya ü ˗bha bhɛɛwo ˗nu man. ˗Bhö mɛn bɔ Ʒope, Piɛɛ ˈˈpiʋ̈, kö ˗yö nu.› Kɔɔnɛi ˗to ˈˈshia˗ mü ˈö mɛn ˗yaaga bɔ Ʒope, ˈˈkidhʋŋ 30 ˈˈdhiʋ̈.

˗A ˈˈtʋ̈ŋ do ˈö bhë ˗a ˈka Ʒope, Piɛɛ ˗yö ˈˈɲɛɛn ˗bho. ˗Yö ˗kpan wü ˗nu ˈö Zuifö ˗nu ˈwaa ˗an ˗bhö ˗an ˗bha, ˈö ˗wo do ˈbha ˗ya pö ˗a ˗dhɛ ˗yö ˗an ˗bhö. Piɛɛ ˗yö ˗kɔ ˈö˗ pö: ‹ˈMiin wü ˗dhiisü suu ˗nu ˈwo ˈˈdhʋ̈ ˗an ˗bhö do n ˗man ˗tosɛta ˈgü.› ˈˈKɛɛ ˗wo ˈö bhë, ˗ya ˗pö ˗a ˗dhɛ: ‹ˈBhaa ˈdho wü ˗nu ˈwo bhë ˗an ˗dhɛ ˈzü wü ˗dhiisü ˗nu. ˗Zlan ꞊yaa ˗an kë ˈˈslʋ̈ʋ̈slʋ̈.› ˗Wo ˈö bhë ˗ya ˗pö ˈzü Piɛɛ ˗dhɛ: ‹Mɛn ˗yaaga ˗wo ü ˗bha ˈˈkwɛɛ ˈˈdhiʋ̈. ˗Bhö ʒiö ˗an ꞊kee˗.› ˈDhɛ ˗kë ˈˈdhʋ̈ ˈyö Piɛɛ ˗yö ˈˈkwɛɛ ˗pʋ, ˈö mɛn ˗nu ˈwo bhë ˗an dhɛɛˈˈ ˗kë ˗an nu ˗gɛn ˈka. ˈYö ˈwo˗ pö ˗a ˗dhɛ: ‹Wlɔmö ˗bha ˈˈsɔdha ˗gɔmɛn Kɔɔnɛi ˈnën yi bɔ. ˗Ya ˗pö ˈü nu ˗a ˗gɔ ˈkɔɔ Sezadhe.› ˈYö Piɛɛ ˗ya pö ˗an ˗dhɛ ˗wo wɔ. ˈDhɛ ˈö˗ ˗ta ˗dhɛ ˗yö ꞊kpɔɔ, ˈyö Piɛɛ waa ö ꞊dhegblü ˈbha ˗nu ˈwo kun Ʒope, ˈwo ʒiö ˗an ꞊kee˗ ˈwo dho Sezadhe.

ˈDhɛ Kɔɔnɛi ˗yö ˗kpan Piɛɛ ˗bha, ˈyö yö ö kpɔn ˈgü. ˈˈKɛɛ Piɛɛ ˗ya ˗pö ˗a ˗dhɛ: ‹˗Bhö luuˈˈ! Mɛnbhɩɩdhe ˗mü n ˈka ꞊dhɛ ü ˈdhö. ˗Zlan ˈnën˗ pö n ˗dhɛ ˈa nu ü ˈˈpiʋ̈, ˈkö ˗kë ꞊dhɛ Zuifö ˗nu ˈwaa ˗da mɛn ˗nu ˈö ˈwaa Zuifö ˗nu ˈka ˗an ˗gɔ ˈkɔɔ. ˗Dhɛ ˈö ˈˈdhʋ̈, ˗bhö dɔ ˈˈgbɩɩ˗ kö ˈpë ˗kë ˈü mɛn bɔ n ˈˈpiʋ̈, ˈü˗ pö n ˗dhɛ.›

ˈYö Kɔɔnɛi ˗ya pö Piɛɛ ˗dhɛ: ‹˗A ˗dhɛkpaɔyi ˗ya kë ˗yiishiö, a kun bhɛɛˈˈ ˗ni ˈgü ˗Zlan ˗dhɛ, ˈö˗ ˗bha ˈˈkiö do ˗ya pö n ˗dhɛ ˈa mɛn bɔ ü ꞊kee˗. ˗Dhɛ ˈö ˈˈdhʋ̈ dɔ ˈˈgbɩɩ˗ ˗bhö Zoova ˗wo ˗zɔn yi ˗dhɛ.› ˈYö Piɛɛ ˗ya pö: ‹ˈMan˗ ˈwɔn dɔ ˈzlöö ꞊dhɛ ˗Zlan ˈyaa mɛn ˗nu zë ˈgü. Mɛn ˈˈʋʋ ˗mɛn ˈö˗ ˈˈpiʋ̈ kö ˗ya ˗dhɔkë, ˗yö ö ˗kɔ ˗ya ˗a ˗gɔ.› Piɛɛ ˗yö ˈwɔn ꞊va ˈö ˗gban Yesu ˗bha ˗a ˗zɔn ˗an ˗dhɛ, ˈyö ˗Zlan ˗bha ˗zuu ˈˈslʋ̈ʋ̈slʋ̈ ˗yö ꞊yɔɔ Kɔɔnɛi waa mɛn ˈˈpɛpɛ ˈwo kun ˗a ˈˈpiʋ̈ ˈkɔɔ bhë ˗an ˗ta, ˈyö ˈwo ˗an ꞊gban bɔ ˈˈyi ꞊bhaa.