Mɛn ˗nu ˗wo ˗ya kë ˗sü ˗bha kletiɛn ˗nu ˈka ˈˈsɛ ꞊va ˈgü

Yesu ˗ya ˗pö bɔmɛn ˗nu ˗dhɛ ˗wo nɔɔn˗ ˗së pö ˈˈsɛ ꞊gban ˈgü. Pë ꞊dede ˈwo˗ ˗kë, ˈyö bhë! ˗Kwɛ 47 ˈka, kwa ꞊dhegblü ˗nu ˈwo kun Antiɔshö ˗wo Pɔdhö waa Baanabasö ˗an ˗bɔ kö ˗wo ˗zlanwopö. ˗Zlanwopömɛn ˗nu ˈgü ˈˈgbɩɩ˗ ꞊plɛ ˈwo bhë, ˗wo ˗dho Azi Minë ˗pö ˗nu ˈwo ˗kë ꞊dhɛ Dɛɛbe, Dhitrö waa Ikoniɔmö ˗nu ˈdhö bhë, ˗an ˈgü.

Pɔdhö waa Baanabasö ˗wo zlanwopö ꞊nɔɔnmɛn ˗nu, ˈˈflɛɛmɛn ˗nu, wlüünën ˗nu, mɛn ˈˈgblʋ̈gblʋ̈ ˗nu waa mɛn suu ꞊gban ˗dhɛ. Mɛn ꞊va ꞊dede ˗wo ˗we gagade ˈö ˗gban Klito ˗bha, ˗a ˗bha. ˈDhɛ ˈwo ˗zlanwopö Shiplë ꞊kɔɔnmɛn Sɛɛziusö Podhusö ˗dhɛ, ˈˈzʋʋmi do ˗yö ˗gban ˗an ˗gɔ. ˈYö Pɔdhö ˗ya pö ˗a ˗dhɛ: ‹Zoova ˗dho ˈwɔn bho ü ˈgü.› ˈˈZʋʋmi ˈö bhë ˗yö ˗to ˈˈshia˗ mü ˈö˗ ˈˈɲan ˗yö ꞊tröö. ˈDhɛ ˈö ˈˈsɛkɔɔnmɛn ˗yö ˈwɔn bhë˗ ˗dhɛ yö, ˈyö ˗we ˗Zlan ˗wo ˗bha.

Pɔdhö waa Baanabasö ˗wo ˗zlanwopö ˗dhɛ ꞊gban ˈgü. ˗Wa ˗pö ˈkɔ ˈgü ˈkɔ ˈgü, ˈˈdhɔɔkwëëdhɛ ˗nu, ʒiaan ˈˈpiʋ̈ ˗dhɛ ˗nu waa ˗yakwëëkëgükɔ ˗nu ˈgü. ˗Wo ꞊niɔɔnmɛn do ˗dhɛ ˗bo Dhitrö ˗pö ˈgü. Mɛn ˗nu ˈö ˗an ˈˈɲan ˗yö ˗da ˗a ˈgü, ˗wo ˗an ˗sü ꞊dhɛ ˗zlan ˗nu ˈdhö, ˈyö ˈwo ˗an gbasü ˈˈslö ꞊mɛɛn. ˈYö Pɔdhö waa Baanabasö ˗wa pö ˗an ˗dhɛ: ‹Mɛnbhɩɩdhe ˗mü yi ˈka ˈpö ꞊dhɛ ka ˈdhö. ˗Ka ˗Zlan dosɛnŋ ˈnen ˗a ˗dhɔkë.› Zuifö ˈbhaa ˗nu ˗wo ˗nu ˈwo ˗da mɛn ˗nu bhë ˗an ˈˈtʋʋ ˈö ˈwo ˗gban Pɔdhö ˗gɔ. ˗Wo Pɔdhö ˗zuö ˗gwö ˈka, ˈwo go ˗a ˈka ˈpödhɛ bhë˗ ˈgü. ˗Wo wo ˗kwaa ˗a ˗zü ˈyö ˗tɔ ˗an ˗bha ˈgü ˗ya ga. ˈˈKɛɛ Pɔdhö ˗kun ˈˈɲaan. ˗A ꞊dhegblü ˗nu ˗wo ˗nu ˈˈvaandhö ˈwo˗ sü ˈwo dho ˗a ˈka ˈpödhɛ ˈö bhë, ˗a ˈgü ˈzü. ˈDhɛ ˈˈtʋ̈ŋ ˈbha ˗yö ˗ʒiö Pɔdhö ˗yö ö ꞊yɛɛ ˗kë Antiɔshö.

˗Kwɛ 49 ˈka, Pɔdhö ˗yö ö ˗bha ˗zlanwopösü ˈˈta ꞊plɛ ˗naan ˗kpɔ. ˈDhɛ ˈö dho ˗wo ö ꞊dhegblü ˗nu ˈwo kun Azi Minë bhë ˗an ˗dhɛ, ˗yö ˗go mü ˈö ˈdhö ˗zlanwopö ꞊dhɛ ꞊gblɛɛn ꞊dede ˈgü Edhɔpö. ˗Yö ˗bɔ Filipö, Efɛzö, Tesalonikö waa ˈˈkwipö ˈˈwɛɛ ˈbha ˗nu ˈgü. Silasö, Lukö waa ˈnëngɔɔnnën do ˈwo˗ ˗dhɛ Timote ˗wo ˗ʒiö ˗a ꞊kee˗. ˗Wo yö ˗kë wo ˈko ꞊bhaa ˈwo ˗zlanwokɔdhi ˗nu ˗dɛɛ ˗ya, ˈwo˗ ˈgümɛn ˗nu ˗takun kö ˗an ˗gɛn ˗yö ˗gban. Pɔdhö ˗yö ˗Kwɛ do waa ö ˈgbu ˗kë Kolɛntö, ˈö ö ꞊dhegblü ˗nu ꞊faanmɛn. ˗Yö ˗zlanwopö, ˈö mɛn ˗nu ꞊klaŋ ˗kë, ˈö ˈsëëdhɛ ˗ya ˗zlanwokɔdhi ˗nu ˗dhɛ. ˗Yö sɔ ˈkɔ yö ˗kë ˈpö kö ˈö ö ˗zokë ö ˗de ˈˈpiʋ̈. ˈDhɛ ˈˈtʋ̈ŋ ˈbha ˗yö ˗ʒiö, ˗yö ö yɛɛ ˗kë Antiɔshö.

Pɔdhö ˗yö ö ˗bha ˈˈta ˗yaaga ˗naan ˗kpɔ ˗kwɛ 52 ˈka. ˗Ya züdɔ Azi Minë. ˗Yö ˗dho ˗a ˈˈdhuŋ ˗ʒian ˈka Filipö. ˈDhɛ go mü, ˈö ꞊yɔɔ Kolɛntö. Pɔdhö ˗yö ˗kwɛ ꞊va ˗kë Efɛzö. ˗Yö mɛn ˗nu ꞊klaŋ ˗kë mü, ˈö mɛn ˗nu ˈˈdhɛkë, ˈö ˗zlanwokɔdhigümɛn ˗nu ˗takun. ˗Yö ˈˈdhɛɛtadhiaŋ˗ ˗zë yi ꞊gban ˈka ꞊klaŋplöödhɛ do ˈgü. Mɛn ꞊va ˗wo wo ˈˈtʋ ˗to ˗a ˗bha, ˈö ˈwo wo ˈˈtakɔ ˗nu bho ˈˈgblʋʋ. Pɔdhö ˗yö zlanwopö ˈˈsɛ ꞊va ꞊dede ˈgü. ˈDhɛ ˈö ö bo, ˈö dho Zedhizadhɛmö.