ˈWƆN ˗GƆ 08
Ü ˗mɔn ˗a ˗bha ˈü kë Zoova ˈˈtɔŋdë ˈka
Zoova ˗ya ˈˈpiʋ̈ kö ˈü ö dɔ. ˗Mën ˈö ˗kë? ˈYö ˗tɔ ˗ya ˈwɔn ˗dɔ ꞊dhɛ kö ˈü ö dɔ ˗së ˈka, kö ˈü ö këwɔn ˗nu waa ö ˗zopiʋ̈wɔn ˗nu dɔ, ˗kë ˗a ˈˈtɔŋdë ˈka ˗sü ˗dhɔ ˗dhö ˗da ü ˈgü. ˈˈKɛɛ kwa ˗mɔn ˗a ˗bha ꞊dedewo kö ˈkwa kë Zoova ˈˈtɔŋdë ˗nu ˈka ˗ee? (Psaume 25:14 ˗wo pö.) Ü ˗mɔn ˗a ˗bha ˈü kë Zoova ˈˈtɔŋdë ˈka ˗kɔ ˗kë ꞊dhɛ? Dhɛɛˈˈ ˗nu bhë ˗an ˗yɔ ˗nu ˗wo Biblö ˈgü. ˈPë ˗kë ˈö ˗kë Zoova ˈˈtɔŋdë ˈka ˗sü ˗wɔn ˈdhö ˈˈgbɩɩ˗ ˈö ˗ʒiö ˗a ˈka ˈˈtɔŋdëdhɛ ꞊gban ˈˈpɛpɛ ˗ta ˗ya ˈgü ˗pʋ.
1. ˗Mën ˈö Zoova ˈdhö ˗a ˈˈpiʋ̈ kö ˈü˗ kë?
«˗Ka ꞊yɔɔn ˗Zlan ˗bha kö yö ˗de ˈpö ˗yaan ꞊yɔɔn ka ˗bha.» (Zakö 4:8, NTBL) Biblö ˈˈɲan ˈö bhë ˗a ˗gɛn ˈnën ˗tɔ ˗mën? Zoova ˗ya ˈˈpiʋ̈ kö ˈü kë ˗a ˈˈtɔŋdë ˈka. Mɛn ˈbhaa ˗nu ˗bha ˈgü ˈwaa ꞊mɔɔn˗ ˗bha kö ˈwo kë Zoova ˈˈtɔŋdë ˈka ˈyö ˗tɔ ꞊dhɛ ˈwaa ˗kpan ˗a ˗bha. ˈˈKɛɛ pë ˈˈpɛpɛ ˈwo ˗gban Zoova ˗bha, ˈö kwa ˗bhawɔn ˈdhö ˗an dɔ ˗sü ˗bha kö ˈkwa ꞊ɲɔɔn ˗a ˗bha, ˗yö ˗an ˗zɔn kwa ˗dhɛ ˗a ˈˈDhiwo ˈö ˗kë Biblö ˈka bhë ˗a ˈgü. ˗A ˗bha ˈsëëdhɛ ˈö˗ bɔ kwa ˗dhɛ ˈö ˗kë Biblö ˈka bhë kwaa˗ ˗wo pö ˗ni ˈgü ˗kplawo, ˈkö ˗kë ꞊dhɛ ˈkwaa ˗kpan ˗a ˗bha, kwaa˗ ˗nu kwa ˗bha ˈˈtɔŋdëdhɛ ˗gɛn ˗dhö ˗gban.
2. ˈMën ˗kë ˈö Zoova ˈdhö ˈˈtɔŋdë ˗së ꞊dede ˈü ꞊mɔɔn˗ ˗bha ˈü ꞊slɔɔ ˗a ˈka?
Ü ˗dhɔ ˗yö Zoova ˗kë ˈö ˗ʒiö ˗a ˈka mɛn ꞊gban ˗ta. ˗Ya ˈˈpiʋ̈ kö ˈü kë zuʋ̈niidadhe ˈgü, kö ü ˗bhawɔn ˗ya yö ˗takundhe ˗bha ˈˈtʋ̈ŋ ˗su ˈˈoo ˗su ˈgü, ˈü˗ blɛɛˈˈ ö ˗dhɛ. Ü ˗mɔn ˗a ˗bha ‹ˈü ü ˗ta bho ü ˗bha ˗zʋgɔndhe ˗nu ˗kwɛɛ ˈka˗ ˗ta, ˗a ˗gɛn ˗mü ꞊dhɛ ˗a ˈˈtʋ̈ng ˗yö ü ˈgü.› (1 Piɛdhö 5:7) Zoova ˗yö ö ˗kɔ ˗ya ö ˈˈtɔŋdë ˗nu ˗gɔ, ˈö ˗an ˗zogban, ˈö ö ˈˈtʋ to ˗an ˗wo ˗bha ˈˈtʋ̈ŋ ꞊gban ˈˈpɛpɛ ˈka.—Psaume 94:18, 19 ˗wo pö.
3. ˗Mën ˈö ˈkwa ˗dho ˗a kë kö ˈkwa kë Zoova ˈˈtɔŋdë ˈka?
Mɛn ˈˈpɛpɛ ˗dhɔ ˗yö Zoova ˗kë, ˈˈkɛɛ «mɛn ˗nu ˈwo kpɛnŋdhö [ˈyö] ˗an ˗kë ö ˈˈtɔŋdë ˗nu ˈka.» (Proverbes 3:32) ˈKwa˗ pö ˈkwa kë Zoova ˈˈtɔŋdë ˈka, kwa dua ˗mü kö ˈkwa kwa ˈgü dɔ ˈˈgbɩɩ˗ kö ˈkwa˗ ˗zokunwɔn kë, kö ˈkwa ˈˈkan pë ˈö˗ ˗dhɛ ˈyaa˗ ˗a ˗bha. Mɛn ˈbhaa ˗nu ˗bha ˈgü, Zoova ˗bha ˈtɔŋ˗ ˗nu ˈwo ˗gban ˈˈta ˗kɔ ˗së ˗bha, ˈwaa ꞊mɔɔn˗ ˗bha ˈwo ˗an ˈkun. ˈˈKɛɛ kwa ˗wëë ˗ya ˗kë. Mɛn ˗nu ˈö Zoova ˗dhɔ ˗yö ˗an ˗kë ꞊dedewo, ˈö ˈwo wo ˈgü dɔ ˈˈgbɩɩ˗ kö ˈwo kë ˗a ˗dhɛ ˗së, ˗yö ö ˗kɔ ˗kpɔ ˗an ˗gɔ kö ˗wo kë ˗a ˈˈtɔŋdë ˗nu ˈka.—Psaume 147:11; Këwɔn ˗nu 10:34, 35.
˗KAA ˈˈPIƲ̈ ˈPƆN
Pë ˈö ˗kë ˈö ü dua ˈdhö ˗mü kö ˈü kë Zoova ˈˈtɔŋdë ˈka waa pë ˈö˗ ˗zɔn ꞊dhɛ ˗kë Zoova ˈˈtɔŋdë ˈka ˗sü ˗yö ˗së ˈö ˗ʒiö ˗a ˈka ˈˈtɔŋdëdhɛ ꞊gban ˈˈpɛpɛ ˗ta, ˗kwaa ˗ga.
4. Ablaamö ˗yö ˗kun Zoova ˈˈtɔŋdë ˈka.
Ablaamö (ˈö ˈwo˗ ˗dhɛ ˈpö Ablamö bhë) ˗a ˗bha ˗kwɛzlan ˈö Biblö ˈgü ˗yö ˈpë ˈkwa ˗dho ˗a kë kö ˈkwa kë Zoova ˈˈtɔŋdë ˈka ˗a ˗zɔn kwa ˗dhɛ. ˗Ka ˈWunzüdɔdhɛ 12:1-4 ˗an ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
ˈMën Zoova ˗ya pö Ablaamö ˗dhɛ ˗ya kë?
ˈMën Zoova ˗ya ˈˈplüün bho ˗a ˗dhɛ?
ˈDhɛ ˈö Zoova ˗ya pö Ablaamö ˗dhɛ ˈˈdhʋ̈ ˗mën ˈö˗ ˗kë?
5. ˈPë Zoova ˈdhö˗ ˈˈpiʋ̈ kö ˗a ˈˈtɔŋdë ˗nu ˗wa kë
꞊Ya kë ꞊shiö, kwa˗ ˈˈpiʋ̈ kö kwa ˈˈtɔŋdë ˗nu ˗wo pë ˈbhaa kë.
˗Mën ˈü˗ ˈˈpiʋ̈ kö ü ˈˈtɔŋdë ˗nu ˗wa kë ü ˗dhɛ?
˗Ka 1 Zan 5:3 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
˗Mën ˈö Zoova ˈdhö ˗a ˈˈpiʋ̈ kö ö ˈˈtɔŋdë ˗nu ˗wa kë?
ˈKwa˗ pö ˈkwa ˈwɔnman Zoova ˗ta, kwa dua ˗mü kö ˈkwa kwa ˈˈta ˗kɔ ɛɛnˈˈ kwa ˗bha ˈwɔn kë ˗kɔ ˈbhaa ˗nu bho ˈˈgblʋʋ. ˗Ka Isaïe 48:17, 18 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
ˈMën ˗kë ˈö Zoova ˗ya pö ö ˈˈtɔŋdë ˗nu ˗wo wo ˈˈta ˗kɔ ˗nu bho ˈˈgblʋʋ?
Kwa ˈˈtɔŋdë ˗yö ˗dhioo ˗dɔ kwa ˗ta kö ˈkwa˗ ꞊trɔɔn ˗së yö, kö ˈkwa dha ˈwɔn ˈˈgbɩɩ˗ ˗gɔ. Pë do bhë ˈyö Zoova ˗ya ˗kë ˈpö ö ˈˈtɔŋdë ˗nu ˗dhɛ.
6. ˈPë Zoova ˗ya ˗kë ö ˈˈtɔŋdë ˗nu ˗dhɛ
Zoova ˗yö ö ˈˈtɔŋdë ˗nu ˗takun kö ˗wo bɔ ˈwɔn ˈˈgbɩɩ˗ ˗nu ˈgü. ˗Kaa VIDEO ˗ga, kö dhɛɛˈˈ ˈö ˈˈshia bhë ˈka˗ ˗yɔ mɛɛnˈˈ.
Dhebɔnën ˈö video bhë ˗a ˈgü bhë, Zoova ˗ya ˗takun ˗kɔ ˗kë ꞊dhɛ kö ˗yö ˗gban ˗zotadhe yaa ˗gɔ?
˗Ka Isaïe 41:10, 13 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
ˈMën ˈö Zoova ˗ya pö ö ˗dho ˗a kë ö ˈˈtɔŋdë ˗nu ˗dhɛ?
Ü ˗bha ˈgü, Zoova ˗yö ˈˈtɔŋdë ˗tiaandhö ˈka ˗ee? ˈMën ˗kë ˈü˗ pö ˈˈdhʋ̈?
Kwa ˗bhawɔn ˗ya yö kwa ˈˈtɔŋdë ˗nu ˗bha ˗takundhe ˗bha, ˗wo ˗nu kwa ˗dhɛ. Zoova ˗yö ˗dho ü ˗takun ˈpö.
7. Kwa dua ˗mü ˈkwa ˈwɔn blɛɛˈˈ Zoova ˈˈpiʋ̈ kö ˈkwa kë ˗a ˈˈtɔŋdë ˈka.
ˈMɛn ˈwo ˈˈtɔŋdhɛ ˗bha, ˗wa ˈwɔn blɛɛˈˈ wo ˈko ˗dhɛ, ˈyö ˗an ˗bha ˈˈtɔŋdhɛ ˗gɛn ˗yö ˗gban. ˗Ka Psaume 86:6, 11 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
Kwa ꞊mɔɔn˗ ˗bha ˈkwa ˈwɔn blɛɛˈˈ Zoova ˗dhɛ ˗kɔ ˗kë ꞊dhɛ?
Zoova ˗yö ˈwɔn ˗blɛɛ kwa ˗dhɛ ˗kɔ ˗kë ꞊dhɛ?
Kwa ˗bɔ bhɛɛsü ˗ta ˈö ˈkwa ˈwɔn ꞊blɛɛ Zoova ˗dhɛ, ˈö bɔ Biblö ˗ta ˈö ˈwɔn ꞊blɛɛ kwa ˗dhɛ ˈpö.
MƐN ˈBHAA ˗NU ˗WA ˗PÖ: «ˈKwaa ˗mɔn ˗a ˗bha kö ˈkwa kë ˗Zlan ˈˈtɔŋdë ˈka.»
Biblö ˈˈɲan ˗mɛɛn ˈü ˗dho bɔ ˗a ˗ta kö ˈü˗ ˗zɔn ˗an ˗dhɛ ꞊dhɛ kwa ˗mɔn ˗a ˗bha ˈkwa ˗kë Zoova ˈˈtɔŋdë ˈka?
˗A ˈDHƐ TO KWA ˈˈƝAAN
Zoova ˗ya ˈˈpiʋ̈ kö ˈü kë ö ˈˈtɔŋdë ˈka, ˗yö ˗dho ü ˗takun kö ˈü ꞊ɲɔɔn ˗a ˗bha.
˗Zobuödhe
Zoova ˗yö ö ˈˈtɔŋdë ˗nu ˗takun ˗kɔ ˗kë ꞊dhɛ?
ˈMën ˗kë ˈö Zoova ˗ya pö ö ˈˈtɔŋdë ˗nu ˗dhɛ ˗wo wo ˈˈta ˗kɔ bho ˈˈgblʋʋ?
Pë ˗nu ˈö Zoova ˗ya pö ö ˈˈtɔŋdë ˗nu ˗wa kë, ˗yö ˈˈgbɩɩ˗ ˗ee? ˈMën ˗kë ˈü˗ pö ˈˈdhʋ̈?
˗AN ˗GA ˈPÖ
˗Mën ˈü ˗dho ˗a ꞊slɔɔ ˗kë Zoova ˈˈtɔŋdë ˈka ˗sü ˈgü?
«Zoova: ˗Zlan ˈö kwa dua ˈdhö ˗mü kö ˈkwa˗ dɔ, yö ˗mü» (˗Kwɛ 2003 Fevlie 15 ˗bha ˈˈGlaadhiʋ̈ ˗tɔn)
˗Kɔ ˈü ꞊mɔɔn˗ ˗bha ˈü kë Zoova ˈˈtɔŋdë ˈka ˗a ˗bha, ˗a ˗ga.
Dhebɔnën do ˗ya ˗yö ꞊dhɛ waa ˗Zlan wo ˗bha ˈˈtɔŋdëdhɛ ˗ya ö dha. Pë ˈö˗ pö ˗a ˗ga.
«ˈYaa kun n ˈˈpiʋ̈ ꞊dhɛ ˈa ga!» (˗Kwɛ 2017 ˗bha ˈˈGlaadhiʋ̈ ˗tɔn No. 1)
Wlüünën ˗nu ˗wo waa Zoova ˗nu wo ˗bha ˈˈtɔŋdëdhɛ ˗wɔn ˗blɛɛ. Pë ˈwo˗ pö ˗a ˗ga.
ˈMɛn ˈö ˗Zlan ˈˈtɔŋdë ˈka ˗yö ˗kë ö ˗de ˈgü ˗kɔ ˗kë ꞊dhɛ? (1:46)