ˈWƆN ˗GƆ 46
ˈMën ˗kë ˈö ü dua ˈdhö ˗mü kö ˈü ü ˗de nu ˗Zlan ˗dhɛ kö ˈü bɔ ˈˈyi ꞊bhaa?
Ö ˗de ˗nu Zoova ˗dhɛ ˗sü ˈnën ˈö ˗tɔ ˗a ˗pö ˗a ˗dhɛ ˗sü ˈö bhɛɛwo ˈgü ꞊dhɛ yö dosɛnŋ ˈnën ˈü ˗dho ˗a ˗dhɔkë, ˈü˗ dhɔɔbhaawɔn bɔ ˈˈdhiʋ̈ ü ˗bha ˗tosɛta ˈgü. (Psaume 40:8) ˈBha ü bo ˗a ˗kë ˈˈdhʋ̈ ˗sü ˈka ˈyö ˈwo ü bɔ ˈˈyi ꞊bhaa, ˈyö ˈü˗ ˗zɔn mɛn ꞊gban ˈˈpɛpɛ ˗dhɛ ꞊dhɛ ˈbha ü ˗de nu ˗Zlan ˗dhɛ. Ö ˗de ˗nu ˗Zlan ˗dhɛ ˗sü ˈö bhë, ˈwɔn ꞊bhlëësü ꞊dede ˈö ˈkwa ꞊mɔɔn˗ ˗bha ˈkwa˗ ˗kë kwa ˗bha ˗tosɛta ˈgü yö ˗mü. ˈˈKɛɛ ˈmën ˈö ˗dho ü ꞊faanmën ˈwɔn ˈkpii˗ ˈö ˗dho ü ˗bha ˗tosɛta kë ˗kɔ bho ˈˈgblʋʋ bhë, ˗a kë ˗sü ˗bha?
1. ˗Mën ˈö mɛn ꞊faanmën ˈö ö ˗de nu ˗Zlan ˗dhɛ?
Zoova ˗dhɔ ˈnën ˈö mɛn ˗blü ö ˗de ˗nu ˗a ˗dhɛ ˗sü ˗bha. (1 Zan 4:10, 19) Biblö ˗ya ˗pö: «Kwa Dëmɛ bha˗ ˗dhɔ ˗yö ka kë ka zuëˈˈ ꞊gban ˈka, ka ˗zʋtakɔ ꞊gban ˈka, ka faan ꞊gban ˈka». (Makö 12:30) ˈKwaa- pö kwa ˈˈdhii ˈˈkpaan ꞊dhɛ ˗Zlan ˗dhɔ ˗yö kwa ˗kë, ˈˈkɛɛ kwa˗ ˗zɔn ˈpö kwa këwɔn ˗nu ˈgü. ˗Kɔ do ˈö ˗dhɔ ꞊dede ˗yö dhe waa gɔɔn˗ ˗an ˗blü ˈö ˈwo wo ˈko sü bhë, ˗kɔ do ˈö bhë ˗a ˈka ˈpö Zoova ˗dhɔ ˗yö kwa ˗blü ˈö ˈkwa kwa ˗de nu ˗a ˗dhɛ, ˈö ˈkwa bɔ ˈˈyi ꞊bhaa.
2. ˈWɔn ˗së ˗mɛɛn ˗nu ˈö Zoova ˗yö ˗an ˗kë ö ˗bha ꞊Gbɛkiö ˗nu ˈö ˗wa bɔ ˈˈyi ꞊bhaa ˗an ˗dhɛ?
ˈBha bɔ ˈˈyi ꞊bhaa kö ˈbha ˗da Zoova ˗bha ˈkɔdhi ˈö zuʋ̈gblüdhi ˈdhö mü bhë ˗a ˈgü. ꞊Ya kë ˈˈdhʋ̈, ˗kɔ ꞊va ˈö ˗dho ˗a ˗zɔn ˗a ˈka ꞊dhɛ ü ˗dhɔ ˗ya ˗kë bhë ü ˗dho ˗an yö, ˈö ka ˗bha ˈˈtɔŋdëdhɛ ˗yö ˗kë ˈˈgbɩɩ˗ ˈzü ꞊dedewo. (Malachie 3:16-18 ˗an ˗wo pö.) Zoova ˗dho kë ü Dë ˈka, ˈö ˈü ˗da ˈkɔdhi ˈkpii˗ ˈö ˈˈkpɔnŋtaadhɛ ˗todhʋ̈sü ˈgü bhë ˗a ˈgü. Ü ꞊dhegblü ˗nu ˈwo˗ ˈgü, Zoova ˗dhɔ ˗yö ˗an ˗kë, ˈö ü ˗dhɔ ˗yö ˗an ˗kë ˈpö. (Makö 10:29, 30 ˗wo pö.) ˈKwa˗ yö ˈsaadhö ꞊dhɛ ü dua ˗mü kö ˈü pë ˈbhaa ˗nu kë ˗blɛɛsü kö ˈü ꞊kun bɔ ˈˈyi ꞊bhaa. Ü dua ˗mü kö ˈü Zoova dɔ ˗sü draanˈˈ, kö ˗a ˗dhɔ ˗yö ü kë, kö ˈü ü ˗zo yö ˗a Gbö ˗dhɛ. ˈBha ü bo ˗a ˗kë ˈˈdhʋ̈ ˗sü ˈka ˈyö ˈü ü ˗de nu Zoova ˗dhɛ. ˈWɔn ˗nu ˈwo bhë ˈbha ˗an kë, ˈyö ˈwo ü bɔ ˈˈyi ꞊bhaa, ˈyö ˈü ˗da ˗tosɛta ˈö ˈyaa ɲën bhë ˗a ˗ʒian ˗ta. ˗Zlan ˗Wo ˗ya ˗pö: «˗Bɔyibhaasü ˗yö ka ˗dha.»—1 Piɛdhö 3:21, NWT.
-KAA ˈˈPIƲ̈ ˈPƆN
ˈPë ˗kë ˈö ˗së ꞊dedewo kö ˈü ü ˗de nu Zoova ˗dhɛ kö ˈü bɔ ˈˈyi ꞊bhaa, ˗kwaa ˗ga.
3. Mɛn ˈö ˈdhö ˗a dua ˗mü kö ˗yö ö ˗kɔ ˈˈyɛ mɛn ˈö ˗dho ˗a ˗dhɔkë ˗a ˗bha.
ˈÖ kun ꞊kwɛŋzü, Izraɛdhömɛn ˈbhaa ˗nu ˗bhaa ˈgü wo ꞊mɔɔn˗ ˗bha ˈwo Zoova ˗dhɔkë ˈö ˈwo go mü ˈzü ˈö wo ꞊sua ˗zlan Baadhö gba. ˈˈKɛɛ Zoova ˗yö ö ˗wodhiʋ̈lomɛn Edhi ˗bɔ kö ˗yö ˗an ˗zokpɔɔ ꞊dhɛ ˗an ˗bha ˈwɔn yö ˗kɔ ˈö bhë ˈyaa ˗së. ˗Ka 1 Rois 18:21 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
Biblö ˈˈɲan ˈö bhë ˗a ˈgü, Edhi ˗ya ˗pö Izraɛdhömɛn ˗nu ˗dhɛ ˗wo ˗mën kë?
Kwa dua ˗mü ˈpö kö ˈmɛn ˈkwa ˗dho ˗a ˗dhɔkë ˈkwa kwa ˗kɔ ˈˈyɛ ˗a ˗bha ꞊dhɛ Izraɛdhömɛn ˗nu ˈdhö. ˗Ka Dhukö 16:13 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
ˈMën ˗kë ˈö ˈkwaa ꞊mɔɔn˗ ˗bha kö ˈkwa Zoova ˗dhɔkë kö ˈkwa ˈgo mü ˈzü ˈkwa mɛn ɛɛnˈˈ pë ˈˈwɛɛ ˈbhaa ˗dhɔkë?
Kwa ˗dho ˗a ˗zɔn Zoova ˗dhɛ ˗kɔ ˗kë ꞊dhɛ ꞊dhɛ yö dosɛnŋ ˈnën ˈkwa˗ ˈˈpiʋ̈ kö ˈkwa˗ ˗dhɔkë?
4. ˗Kɔ ˈö ü ˗dhɔ ˗yö Zoova ˗kë ˗a ˈka bhë, ˗bhö ü ˗zota ˗a ˈgü.
Zoova ˗yö pë ˗së ꞊va ꞊dede ˗gbɔɔ kwa ˗gɔ. Kwa ˗dho ˗a ˈˈnuɛ bho ˗kɔ ˗kë ꞊dhɛ? ˗Kaa VIDEO ˗ga.
Zoova ˗ya ˗zɔn ˗kɔ ˗kë ꞊dhɛ ꞊dhɛ ü ˗dhɔ ˗yö ö ˗kë? ˗Ka Psaume 104:14, 15 waa 1 Zan 4:9, 10 ˗an ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
Zoova ˗bha gbɔɔdhe ˗nu ˗mɛɛn ˈö ˗an ˗dhɔ ˗yö ü ˗kë ꞊dedewo?
ˈBha ü ˗zota gbɔɔdhe ˗nu ˈwo bhë ˗an ˈgü, ü Zoova ˗yö ˗kɔ ˗kë ꞊dhɛ?
Kö mɛn ˈbhaa ˗yö pë ˈö kwa ˗dhɛ ˗së ꞊dedewo ˗a gbɔɔ kwa ˗gɔ, kwa pë ꞊gban ˈˈpɛpɛ ˗kë kö ˈkwa˗ ˈˈnuɛ bho. ˗Ka Deutéronome 16:17 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
ˈBha ü ˗zota pë ˗së ˈˈpɛpɛ ˈö Zoova ˗yö ˗an nu ü ˗dhɛ ˗an ˈgü, ˈmën ˈü˗ ˈˈpiʋ̈ ˈü˗ nu ˗a ˗dhɛ kö ˈü˗ ˈˈnuɛ bho ˗a ˈka?
5. Ö ˗de ˗nu Zoova ˗dhɛ ˗sü ˗yö ˈwɔn ˗së ꞊va ˗kë mɛn ˗dhɛ.
Mɛn ꞊vadhɛ ˗bha ˈgü, ˈtɔbhɔdhe, yö ˗tiaandhö ɛɛnˈˈ ꞊nɔɔn ꞊va ˈnën ˈwo zuʋ̈gblüdhi nu mɛn ˗dhɛ. ˈˈKɛɛ gagade ˗mü ˗ee? ˗Kaa VIDEO ˗ga, kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ.
ˈKö ˗kë ꞊dhɛ ꞊balɔn ˗zuö ˗sü ˗dhɔ ˗yö Andrei ˗kë, ˈmën ˗kë ˈö ö ꞊kwaa ˗a ˗zü?
˗Yö ö ˗kwaa ꞊balɔn ˗zü kö ˈö ö ˗bha ˗tosɛta ꞊gban ˈˈpɛpɛ nu Zoova ˗dhɛ. Ü ˗bha ˈgü ˗ya ˗kë ˗së ˗ee? ˈMën ˗kë ˈü˗ pö ˈˈdhʋ̈?
Pɔdhö ˗yö ˗kun Zuifö ˗nu ˗bha ˈtɔŋ˗ ꞊klaŋgɔmɛn ˈkpii˗ do ˗bha ꞊klaŋnën ˈka ˗be ˈyö ꞊kun kë kletiɛn ˈka. ˈˈKpɔnŋ ꞊taa ˗yö ˈkpii˗ ˗yö ˗kun ˗a ˈˈdhiʋ̈gan ˗ni ˈgü, ˈˈkɛɛ ˗yö ö ˗kwaa ˗a ˗zü ˈö ˗kë kletiɛn ˈka. Ü ˗bha ˈgü, ˗a ˗kë ˈˈdhʋ̈ ˗sü ˗yö ˗mën ˗a ˈka ꞊taabha ˗ee? ˗Ka Fidhipö 3:8, NTBL ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
ˈMën ˗kë ˈö Pɔdhö ˗ya pö ꞊dhɛ pë ˈˈpɛpɛ ˈö ˗an ˗kë ˗be ˈö ꞊kun kë kletiɛn ˈka bhë, ö ˗an ˗yö ꞊dhɛ «ˈdunngtaapë ˈdhö»?
Pë ˈˈpɛpɛ ˈö ö ꞊kwaa ˗an ˗zü bhë, ꞊trɔɔn ˗mɛɛn ˈö˗ ꞊slɔɔ ˗an ꞊ʒiaangü?
Ü ˗bha ˈgü, ˈmën ˗dho ü ˗bha ˗tosɛta kë ˗së, Zoova ˗dhɔkësü ˗mü ˗ee ɛɛnˈˈ pë ˈˈwɛɛ ˈbhaa kë ˗sü ˗mü ˗ee?
ˈDhɛ Pɔdhö ˗yö ˗kë kletiɛn ˈka, pë ˗nu ˈö ˗an ꞊slɔɔ ˗a ˈgü ˗wo ˗së ꞊dedewo ˈö ˈwo ˗ʒiö ˗a ˈka pë ˈˈpɛpɛ ˈö ö ꞊kwaa ˗an ˗zü bhë ˗an ˗ta.
MƐN ˈBHAA ˗NU ˗WA ˗PÖ: «ˈMaan˗ ˈˈpiʋ̈ ˈa n ˗de nu ˗Zlan ˗dhɛ kö ˈa ꞊nënŋ, a ˗dho n ˗man ˗tosɛta kë n ˗deflëëgü.»
Ü ˗bha ˈgü, ü ˗de ˗nu Zoova ˗dhɛ ˗sü ˗yö ˗së ˗ee?
˗A ˈDHƐ TO KWA ˈˈƝAAN
˗Dhɔ ˗yö kwa ˗blü ˈö ˈkwa kwa ˗de nu Zoova ˗dhɛ ˈö ˈkwa bɔ ˈˈyi ꞊bhaa.
˗Zobuödhe
ˈMën ˗kë ˈö kwa dua ˈdhö ˗mü kö Zoova ˗dhɔ ˗yö kwa kë, kö ˈkwa˗ ˗dhɔkë kwa zuʋ̈ga ꞊gban ˈka?
Zoova ˗yö ˈdhuëë˗ ˗kpɔ ö ˗bha ꞊Gbɛkiö ˗nu ˈö ˗wa bɔ ˈˈyi ꞊bhaa ˗an ˗bha ˗kɔ ˗kë ꞊dhɛ?
Ü˗ ˈˈpiʋ̈ ˈü ü ˗de nu Zoova ˗dhɛ ˗ee?
˗AN ˗GA ˈPÖ
ˈPë ˗kë ˈö ˈˈtanbhomɛn waa ꞊balɔnzuömɛn do ˗wo wo ˗de nu Zoova ˗dhɛ, ˗a ˗ga.
Dhɛɛˈˈ ˗nu ˈö wlüünën ˗nu ˗wa kpɔ: ˈMën ˈa ˗dho ˗a kë n ˗man ˗tosɛta ˈgü?: ˗Zobuödhe (6:54)
Pë ˈˈwɛɛ ˈbhaa ˗nu ˈö ˈwo mɛn ˗blü ö ˗de ˗nu ˗Zlan ˗dhɛ ˗sü ˗bha, ˗an ˗ga.
Video ˈˈtan ˈö mɛn ˗nu ˈwo wo ˗de nu Zoova ˗dhɛ ˗an ˗bha zuʋ̈gblüdhi ˗zɔn, ˗a ˗ga.
Pë ˈö dhebɔnën do ˗takun ˈö pë ˗nu ˈö ˗an ˗wɔn ˈdhö˗ ˗gɔ ˈˈgbɩɩ˗ ˗an ˗ga ˗së ˈka ˈzü bhë, ˗a ˗ga ˗kwɛzlan ˈö˗ ˗gɔ ˗kë «˗Kwɛ ꞊va ꞊dede ˈˈpiʋ̈ a n ˗de dhɛɛˈˈ ˗kpɔ ‹mɛnbhɩɩdhe ˗nu ˗bha ˗tosɛta kë ˗gɛn› ˈka» ˈka bhë ˗a ˈgü.
«Biblö yö mɛn ˗bha ˗tosɛta ˗bho ˈˈgblʋʋ» (˗Kwɛ 2012 Novanblö 1 ˗bha ˈˈGlaadhiʋ̈ ˗tɔn)