Ka ˈbhü ˗yö ˈˈflʋ̈
1 Mɛn ˗nu ˈwo kwa ˗züzü ˈˈkpɔnŋ ꞊taa yö, ˗wo ˈˈta ˗kɔ ˗së waa ˗Zlan dɔ ˗sü ˗dhɛtiidhɛ ˈgü. Gagade ˈbhü ˗yö ˈˈdhɛ ˗bho “ˈˈwlaawɔn ˗nu ˈö ˗nu ˗zun ˈˈdhiʋ̈ ˗bhlɔɔ ˈyaa kë” ˈwo ˗kë ˗dhɛtiidhɛ ˈgü ˗wɔn ˗nu ˈka bhë ˗an ˗ta, kö mɛn ˈgü ˈˈshiʋ̈ ꞊döŋ ˈö bhë, mɛn ˗nu ˗wo ˈkpɔ ˗a ˈka. ˗A ˗wɔn ˈgü bɔmɛn Pɔdhö ˗ya ˗pö Kletiɛn ˗nu ˗dhɛ: “˗Ka ˗tosɛta kë ꞊taabhasü ya˗ ˈgü ꞊dhɛ ˈmɛ ˈwo ˗dhɛpuudhɛ ˈgü ꞊në˗ ˈdhö.”—Efɛ. 5:8, 11.
2 “ˈMɛ ˈkö ˗dhɛpuudhɛ ˈgü” ˗a këwɔn waa mɛn ˈkpɔnŋtaadhɛ ˗bha ˗dhɛtiidhɛ ˈgü ˗an këwɔn ˈwaa do. (Efɛ. 5:9) Kwa pö ˈkwa kë ˗dhɛpuudhɛgümɛn ˈka, kwa dua mü ˈkwa kë Kletiɛn ˗tiaandhö, mɛn ꞊suu ˗nu ˈö ˗an ˗dhɔ Yesu kë ˗an ˈka. Kwa dua ˗mü ˈpö kö ˈˈklʋʋsë ˗nu ˈwo ˗kë ꞊dhɛ, gagade ˗dhɔ ˗bha kwa kë ˗sü ˈö kwa zuʋ̈ˈˈ ꞊gban ˈka, zuʋ̈ˈˈ ˈˈpuu ˗bha, waa ꞊niidadhe ˈka bhë, ˈkwa˗ ˗zɔn. ˗Dhɛpuudhɛ ˈgü ˗wɔn ˗nu bhë, ˗kwaa ˗zɔn kwa ˗bha ˗tosɛta ˈö ˗dhɛkpaɔyi ˈˈpɛpɛ ˈka, waa kwa ˗bha ˗zlanwopösü ˗nu ˈgü.
3 Ka bhü ˗yö ˈˈflʋ̈ ˈwɔn ꞊suu ꞊gban ˈˈpɛpɛ ˈgü: Yesu ˗ya ˗pö ö ˗bha ꞊klaŋ ˗nu ˗dhɛ: “Ka ˈbhü ˗yö ˈˈflʋ̈ kö mɛ ꞊gban ˗wa yö.” (Mat. 5:16) ˗Wo Zoova ˗bha ˈˈwo ˈbhü ˗yö kwa ˗bha ˗Zlan ˗bha ꞊Gblüdëdhɛ waa˗ ꞊dhɔbhaawɔn ˗nu blɛɛsü ˈka ꞊dhɛ Yesu ˈdhö. Kwa ˈbhü ˗yö ˗flʋ̈ ꞊dhɛ ˈˈwo ˈblü ˈdho ˈˈtʋ̈ŋ ˈö ˈkwa ˗wo mɛn ˗nu ˗dhɛ ˗an ˗gɔ ˈˈkwɛnŋdhö waa ˈˈtʋ̈ŋ ˈö ˈwɔn ˈö ˗gban gagade ˗bha ˈkwa˗ ꞊blɛɛ yö ˈˈdhiʋ̈, ꞊klaŋplöö, kwa ˗züzü ˗mɛn ˗nu ˗dhɛ ˗a ˈka, ɛɛnˈˈ ˗dhɛ ˈˈʋʋ ˗dhɛ ˈö kwa ˈˈwo ˈbhü ꞊mɔɔn˗ ˗bha ˈö ˈbhü mü, ˗a ˗dhɛ ˈgü.—Fdh. 2:15.
4 Yesu ˗ya ˗pö ꞊dhɛ ˗dhɛpuudhɛ ˗san ˗dhö mɛn ˈbhaa ˗nu kë. (Zan 3:20) ˗Dhɛ ˈö ˈˈdhʋ̈, ˗a kë ˗sü kö mɛn ꞊vadhɛ ˗wo ˗kɔ ‘Klito ˗bha nɔɔn˗ ˗së’ ˈö yö ˈnën ꞊dhɛ dhangba ˈdhö ˗a ˈka bhë, ˈyaa kwa ˈgü ga. (2 Kod. 4:4) ˗Zoova ˗yö ˗dhɛ ˗yö mɛnbhɩɩdhe zuʋ̈ga ˈˈpiʋ̈, ˈö ˈyaa ˈˈpiʋ̈ kö ˈwɔnyaakëmɛn ˗nu ˗wo kë ö ˗bha mɛn ˗nu ˈˈpiʋ̈.
5 Kö ˈkwa ˈto Zoova ˗bha ʒiaan ˗nu ˈˈpiʋ̈, kö ˗zuu ˈgü ˈˈwo ˈbhü ˗dhɔ ˗yö kwa kë, mɛn ˈˈwɛɛ ˗nu ˗dho ˗a ˈsü kwa ˗bha. Kö mɛn ˗nu ˗wa yö kwa ˈˈta ˗kɔ ˗bha ꞊dhɛ ‘˗dhɛ ˗yö ˈˈpʋ ˗sü ˈka kwa ˗bha ˗tosɛta ˗ta,’ ˗yö ꞊mɔɔn˗ ˗bha ˈö ˗an ˗blü, ˈwo wo ˗bha ˗tosɛta bho ˈˈgblʋʋ, kö ˈwo ˗dhɛpuudhɛ bhë ˗a ꞊slɔɔ ˈpö.—Zan 8:12.
6 ꞊Ya kë ꞊dhɛ ˈkwa kwa ꞊kwaa kwa ˗bha ˈˈwo ˈbhü ˗zü kö ˗yö ˈˈflʋ̈, kwa kwa ˗Damɛn ˈtɔ ˗bhɔ, ˈö ˈkwa zuʋ̈puumɛn ˗nu ˗takun kö ˗wa dɔ, kö ˗wo ˗zoyödhe ˈö ˗gban ˗tosɛta ˈö ˈyaa ɲën ˗a ˗bha bhë ˗a ꞊slɔɔ. (1 Piɛ. 2:12) ˈˈTʋ̈ŋ ˈö ˈˈwo ˈbhü ˈö bhë ˈö ꞊kun kwa ˗ta ˗a ˈka, ˗kwaa ˈsü kö ˈkwa mɛn ˗nu ˗takun ˗a ˈka, kö ˗wo ˈgo ˗dhɛtiidhɛ ˗bha, kö ˗wo ˈmɛn ˈwo ˗dhɛpuudhɛ ˈgü ˗an ˈˈta ˗kɔ ˈsü.