˗Zlan ˗bha yö ˗bhɔkwëë ˗nu ˈö ˗an kë ˗gɛn ˈdhö ˈdhö
1. ˗Zlanwopö ˗yö ˗bhɔkwëë kë ˗gɛn ˈtɔ˗ ˗mën?
1 Yi do ˈka kö wo ˈdho˗ ˈdho ˗zlanwopö, Yesu waa ö ˗bha ꞊klaŋdhiʋ̈nën 70 ˗wo ˗bhɔkwëë ˈdɛdɛ do ˗kë. (Dhukö 10:1-11) ˗Yö ˗an ꞊faan mën, ˗an ˗zo ˗bo ˗sü ˈka ꞊dhɛ wo ˈti ˗dho ˈto wo do ˈka, “ˈBhlaadë” Zoova ˗dhö ˈˈdhiʋ̈sü ˗an ˈka. ˗Yö ˈˈslö ˗zɔn ˗an ˗dhɛ kö ˗an ˗kɔ ˗yö ˗mɔɔn yö ˈö bhë ˗a kë ˗sü ˗bha. ˈYö ˗an dan “꞊plɛ ꞊plɛ”. ꞊Dɛɛ, ˗bhɔkwëë ˗nu ˈö ˈkwa ˗an ˗kë kö ˈkwa ˗dho ˗zlanwopö bhë, ˗an kë ˗gɛn ˗yö do—˗wo kwa ꞊faan ˗mën, ˈwo kwa ꞊baa, ˈwo kwa ˗kɔ ˗mɔɔn ˗zlanwopösü ˗bha.
2. ˗Zlanwopö ˗yö ˗bhɔkwëë ˗dho kë minitö ꞊dhɛ ˈka?
2 ꞊Dɛɛ, ˗zlanwopö ˗yö ˗bhɔkwëë, ˈwo mɛn dan kpö kpö ˈka, ˈö ˈwo ˗zlanwopödhɛ ˗zɔn, ˈö ˈwo ꞊bhɛɛ bhë, ˗a ˈˈtʋ̈ŋ ˗yö minitö 10 ˈö yö ˗a ˈka 15 ˗bha. ˈˈKɛɛ ˈyaa ˈˈdhʋ̈ ˈzüdho. ˈÖ go Avlidhö ˈˈsu ˗bha, ˗zlanwopö ˗yö ˗bhɔkwëë ˗dho ˗kë minitö ˈˈsoodhu ˈö yö ˗a ˈka ˈˈsɔɔplɛ ˗bha. ˈˈKɛɛ ꞊ya kë ꞊dhɛ ˗yö ˗dho dɔ ˗zlanwokɔ ˗bha ˗bhɔkwëë ˈˈwɛɛ ˈbhaa ˈˈpiʋ̈, ˗a dua ˗mü kö ˗yö kë ꞊klöö˗, ˈyö ˗tɔ ꞊dhɛ mɛn ˗nu ˈwo nu ˗a ˗ta, ꞊wa wo bo Biblö ˈˈdoo ˈˈnɛɛnnɛn dɔ ˗sü ˈka. ˗Zlanwopö ˗yö ˗bhɔkwëë ˈˈtʋ̈ŋ ꞊ya kë ꞊klöö˗, ˈyö mɛn ˗yö ˈˈlɛlɛ ꞊va ˗kë ˗zlanwopödhɛ ˈgü. ꞊Ya ˈgo mü ˈzü ˗yödhiʋ̈ˈˈ ˗nu ɛɛnˈˈ ˗zlanwopömɛn ˗nu ˈwo ˗zlanwopösü züdɔ ˗a ˗bhɔkwëë ˈˈdhiʋ̈ bhë, wo ˈti ˗dho wo ˗bha ˗zlanwopösü ˈduaannu ˈˈtʋ̈ŋ ꞊gblɛnŋ ˈˈpiʋ̈.
3. ˗Kɔ ˗mɛɛn ˈö ˗zlanwopö ˗yö ˗bhɔkwëë ˈdhö˗ kë˗ ˗bha kö ˗yö ˗zlanwopömɛn ˈˈpɛpɛ ˗takun?
3 ˗Zlanwopö ˗yö ˗bhɔkwëë kë ˗kɔ dua ˗mü kö ˗yö ˗zlanwopömɛn ˈˈpɛpɛ ˗takun ꞊dedewo. ˗Zlanwokɔ ꞊vadhɛ ˈgü, ˗yö ˗së kö ˗wo ˗zlanwöpömɛn ˗nu ˗ya kpö kpö ˈka. ˈYaa ˗së kö ˗wo ˗lokota ˗zlanwopödhɛ do ˈgü. ˗A ˗kë ˈˈdhʋ̈ ˗sü ˗dho ˗a kë ˈö ˗go ˗bhɔkwëëkëdhɛ ˈgü ˗sü ˈwo dho ˗zlanwopödhɛ ˈgü bhë ˈö ˈyaa kë ˈˈgbɩɩ˗ ˗zlanwopömɛn ˗nu ˗gɔ. ꞊Ya ˈgo mü ˈzü ˗zlanwopömɛn ˗nu ˗dan ꞊plɛ ꞊plɛ ˗sü ˈyaa ꞊gbɔɔn, ˈö ˗zlanwopömɛn ˗nu kpö ˈˈdhiʋ̈sümɛn ö ˗zokë ˗zlanwopömɛn ˈdhɛ ˈdhö ˗a ˈˈpiʋ̈ ˗së ˈka. Mɛn zii kpö ˈwo ˗zlanwokɔɔdhö, ˗wo ꞊mɔɔn˗ ˗bha ˈwo ˗dhɛga ˈwɔn ˗nu ˈwo ˗an ˈˈpian ˈˈpiʋ̈ ˗a ˈgü kö ˗a kë ˗kɔ ˈö ˗së ˗an ˗bhaa ˈka ˗wa dɔ. Mɛn ˈˈpɛpɛ dua ˗mü kö ˗dhɛ ˈwo ˗dho ˗zlanwopö ˗bha, waa ˈmɛn waa˗ ˗nu ˈwo ˗dho ˗zlanwopö wo ˈkwëë˗ ˗wo ˗an dɔ kö ˗bhɔkwëë ˈˈdhiʋ̈ ꞊kun ta ˗ni bhɛɛsü ˗ta.
4. ˗Mën ˈö ˗kë kwa dua ˈyaa ˗mü kö ˈkwa ˗zlanwopö ˗yö ˗bhɔkwëë ˈsü ˗bhaasü ˗bhɔkwëë ˈˈwɛɛ ˗nu ˈwo to ˗an ˗bha?
4 ˗A ˗wɔn ˗yö ˈˈgbɩɩ˗ ꞊dhɛ ˗zlanwokɔdhi ˗bha ˗bhɔkwëë ˈˈwɛɛ ˗nu ˈwo to ˗an ˈdhö: ˈDhɛ ˈö kë ꞊dhɛ ˗zlanwopö ˗yö ˗bhɔkwëë ˗yö mɛn ˈwo ˗dho ˈdho˗ ˗zlanwopö ˗an ˗bhaa ˈka bhë, ˗zlanwokɔdhigümɛn ˈˈpɛpɛ ˈwaa ꞊mɔɔn˗ ˗bha kö ˗wo nu ˗a ˗ta. ˈKö ˗kë ˈˈdhʋ̈, ˗a ˗dhɛ ˈyaa˗ ˗bha kö ˗wa ˈsü ˗bhaasü, ɛɛnˈˈ ˈwo˗ yö ꞊dhɛ ˗a ꞊bhlëë ˈyaa ˈdhö ꞊dhɛ ˗bhɔkwëë ˈˈwɛɛ ˗nu ˈwo ˗to ˗an ˈdhö. Zoova ˗yö ˗bɔ ˗zlanwopö ˗yö ˗bhɔkwëë ˗ta ˈö kwa ꞊faan mën, kö ˈkwa kwa ˈko ˗nu ꞊faan ˈmën ˗dhɔ waa ˈwɔn ˗së kë ˗sü ˗bha ꞊dhɛ kwa ˗bha ˗bhɔkwëë ˈˈwɛɛ ˗nu ˈdhö. (Ebl. 10:24, 25) ˈDhɛ ˈö ˈˈdhʋ̈, ˗a ˈˈdhiʋ̈sümɛn dua ˗mü kö ˗yö ö ˗de baaˈˈ ˗tiaandhö ˈka, kö ˈˈdoo ˈö bhë ˗yö Zoova ˈtɔ bhɔ, kö ˈmɛn ˈwo nu ˗a ta ˗wa ꞊trɔɔn yö. ꞊Ya kë ꞊dhɛ yö ˈti ˗dho kë ˗an ˗gɔ ˈˈgbɩɩ˗, ˗zlanwopömɛn ˗nu ˈwo ˗dho ˈdho˗ ˗zlanwopö, ˗an dua ˗mü kö ˗wo kë ˗bhɔkwëë ˈö bhë ˗a ˗ta.
5. (a) ˗Zlanwopö ˗yö ˈˈdhiʋ̈sümɛn ˗dho ˗zlanwopö ˗yö ˗bhɔkwëë ˈgü ˗wɔn baaˈˈ ˗kɔ ˗kë ꞊dhɛ? (b) Kwa ꞊dhegblü dhebɔ do ꞊mɔɔn˗ ˗bha ˈö ˗zlanwopö ˗yö ˈˈdhiʋ̈sü ˗kɔ ˗kë ꞊dhɛ?
5 ˗A ˈˈdhiʋ̈sümɛn ˗bha ö ˗de baaˈˈ ˗kɔ: ˈMɛn ˈö ˈˈpiʋ̈ ˈö ö ˗de baaˈˈ ˗së ˈka ˗bhɔkwëë ˈˈpian ˈbha ˈˈdhiʋ̈sü ˗sü ˗bha, ˗yö ˗së kö ˗wa yö nu ˗a ˗dhɛ ˈˈdhiʋ̈ ˗be. Pë do ˈö bhë, ˈyö˗ ˈka ˈpö ˗zlanwopö ˗yö ˗bhɔkwëë ˗ta. ꞊Ya kë ꞊dhɛ ˗zlanwopömɛn ˗nu ꞊wa kë kpö kpö ˈka, ˗a ˗zlanwopömɛn ˗nu kpö ˈˈdhiʋ̈sümɛn ɛɛnˈˈ ˗a ˗kɔlöö ˈnën ˗bhɔkwëë bhë ˈö˗ ˈˈdhiʋ̈ sü. ˈˈKɛɛ ꞊ya kë ꞊dhɛ ˗zlanwokɔgümɛn ˗todhʋ̈sü ˈnën ˈwo ˗dho ˗zlanwopö wo ˈkwëë˗, ˗zlanwopö yö ˈˈdhiʋ̈sümɛn ˈö ˗zlanwokɔɔdhö ˗yö ö ˗kɔ ˈˈyɛ mɛn ˈö ˗dho ˗a ˈˈdhiʋ̈sü ˗a ˗bha. ˗Zlanwopö ˗yö ˈˈdhiʋ̈sümɛn ˈbhaa ˗nu, ˗wo mɛn ˗nu ˈwo ˗dho ˈˈdhiʋ̈sü, ˗an ˈtɔ waa˗ ˗dhɛkɛpaɔyi ˗nu ˗ya ˈsëëdhɛ ˗ta, ˈwo˗ ˗gblü mɛn ˗nu ˈwo ˗dho ˈˈdhiʋ̈sü ˗an ˗ta, ˈö ˈwo˗ do ꞊nënŋ tablo ˗ta. ˈˈTʋ̈ŋ ˈö ˗zlanwopö ˗yö ˈˈdhiʋ̈sümɛn ˈdhö ˈˈdhiʋ̈süsü nu ˗ni ˈgü mɛn ˗nu ˗dhɛ ˗a ˈka bhë, ˗ya kë ꞊kpɔɔdhɛ ˈka. ˗Yö kë ˗an ˈˈɲaan ꞊dhɛ ˗a ˗bhɔkwëë ˈö bhë, ˗a ˗bha ˗kë ˗së ˗sü ˗yö ˗sü ˈmɛn ˈˈdhiʋ̈ sü ˗a ˗bha mɛn ˗nu ꞊klaŋ kë ˗kɔ waa˗ ˗bha mɛn ˗nu baaˈˈ ˗kɔ ˗bha. ꞊Ya kë ꞊dhɛ mɛn zii do, mɛn zii ˗kɔlöö do, ɛɛnˈˈ kwa ꞊dhegblü gɔɔn˗ do ˈö ꞊ya bɔ ˈˈyi ꞊bhaa, ˈö ꞊mɔɔn˗ ˗bha kö ˗ya ˈˈdhiʋ̈sü ˗dhɛkpaɔyi ˈbhaa ˈka ˈyaa ˈdhö, ˗zlanwopö ˗yö ˈˈdhiʋ̈sümɛn ꞊mɔɔn˗ ˗bha ˈö ö ˗kɔ ˗yɛ ꞊dhegblü dhebɔ do ˗tiaandhö ˗bha kö ˗ya ˈˈdhiʋ̈sü.—Kpɔɔˈˈ ˈwɔn ˗gɔ ˈö kë “꞊Ya kë ꞊dhɛ kwa ꞊dhegblü dhebɔ do ˗dhö ˈˈdhiʋ̈sü” ˗a ˗bha.
6. ˗Mën ˈö ˗kë ˈö ˗së kö ˗zlanwopö ˗yö ˈˈdhiʋ̈sümɛn ˗yö ö ˗de baaˈˈ ˗së ˈka?
6 ꞊Ya kë ꞊dhɛ ꞊wa yö nu kwa ˗dhɛ ˗Zlan ˗bha yö ꞊klaŋ ɛɛnˈˈ ˗Zlan ˗bha yö ˗bhɔkwëë ˗ta, kwa˗ ˗sü ˗sɔbhɛɛ ˗bha, ˈö ˈkwa kwa ˗de ꞊baa˗ ˗bha ˗së ˈka. Kwa kpö ˈgü, mɛn ꞊vadhɛ ˈti ˗dho wo ˈˈɲaan to, kö wo ˈdho ˗ni ˈgü ˗bhɔkwëë ˗ta, kö ˈpë ˈwo ˗dho ˗a pö ˗wo ꞊kun wo ˗zota ˗ni ˗a ˈgü. ˗Kɔ do ˈö bhë ˗a ˈka ˈpö ˈyö ˈkwa ˗dho ˗zlanwopö ˗yö ˗bhɔkwëë ˈˈdhiʋ̈süsü ˈsü ˗a ˗bha. ˈDhɛ ˈö ˗kë ꞊dhɛ ˗zlanwopö ˗yö ˗bhɔkwëë ˈˈtʋ̈ŋ ˗dho kë klöö˗ bhë, ˗de baaˈˈ ˗kɔ ˗së ˗wɔn ˗yö ˈˈgbɩɩ˗ kö ˗a ˗bhɔkwëë kë ˗së, kö ˗yö ɲën ö ˈˈtʋ̈ŋ ˗bha. ˗De baaˈˈ ˗kɔ ˗së ˈnën ˗tɔ ˈpö ˗zlanwopödhɛ dɔ ˗sü ˈö ˈˈdhiʋ̈ ˗be.
7. ˗Mën ˗nu ˈö ˈˈdhiʋ̈sümɛn ꞊mɔɔn˗ ˗bha ˈö ˈˈdoo ˗gban ˗an ˗ta?
7 ˗A ˈˈdoo ˗dho ˗gban ˗mën ˗ta? ˈKö kë ꞊dhɛ ˗zlanwopödhɛ ˗nu ˈgü ˗wɔn ˗nu ˗wo ˈgo ˗sü ˈka wo ˈko ˈˈpiʋ̈, ‘gwëëmi ˗towʋtasü’ ˈti ˗zlanwopö ˗yö ˗bhɔkwëë ˈdhɛ ˈö ˈdhö ˗a ˈsëëdhɛ ˗yö kë do. ˈKɔnën ˈö ˗kë “Pë ˗nu ˈö ˗zlanwopö yö ˗bhɔkwëë ˈˈdoo ꞊mɔɔn˗ ˗bha ˈö ˗gban ˗an ˗ta, ˈyö ˈwo yö:” ˈka bhë, ˗ya ˈˈslö ˈbhaa ˗zɔn. Yi ꞊vadhɛ ˈka, ˗a ˗bhɔkwëë kë ˗kɔ ˗yö kë ꞊dhɛ ˈˈdoo ˈdhö. Yi do do ˈka, ˈˈslö ˈwo wo ˗de ꞊baa ˗bha ˗së ˈka ɛɛnˈˈ video ˗nu ˈwo jw.org ˗ta ꞊mɔɔn˗ ˗bha ˈwo˗ ˗da ˗bhɔkwëë ˈgü ˗wɔn ˈgü. ꞊Ya kë ˗zlanwopö ˗bhɔkwëë ˈˈdhiʋ̈sümɛn ö ˗de baaˈˈ ˗ni ˈgü ˗bhɔkwëë ˗bha, ˗a dua ˗mü kö ˗yö ö ˗zota pë ˗nu ˈwo ˗dho ˈmɛn ˈwo ˗dho ˈdho˗ ˗zlanwopö ˗an ꞊faan ˈmën, kö ˗an ˗kɔ ˗yö ꞊mɔɔn ˗zlanwopösü ˗bha yi ˈö bhë ˗a ˈka, ˗an ˈgü.
8. ˗Mën ˈö ˗dho kë ˗së kö ˗wo ˗zlanwopö ˗yö ˈˈdoo ˗gban ˗a ˗ta ˈˈsɩyi waa ˗tɛɛdhoowayi ˗nu ˈka?
8 ˗A ˈwɔnzuan ˈtɔ˗ ˈˈsɩyi ˗nu ˈka, La Tour de Garde waa Réveillez˗vous ! ˈnën ˗zlanwopömɛn ꞊vadhɛ ˗wa nu mɛn ˗nu ˗dhɛ. Mɛn ꞊vadhɛ ˈwo ˗zlanwopö ˈˈsɩyi ˈka ˈwaa yö ˈˈkpɛnŋ ˗dhɛkpaɔyi ˈˈwɛɛ ˈka ˈˈdhoogɔ ˈgü. ˈDhɛ ˈö ˈˈdhʋ̈, ˈsëëdhɛ nu ˗kɔ ˈˈslö ˗nu ˈwo ˗an ꞊draan ˗an ˗bha ˗Zlan ˗dhɔkë ˈkɔɔ ˗sü ˈö gbeŋ ˗a ˗ta bhë, ˗an ˗zo ꞊mɔɔn˗ ˗bha ˈö bhɔ ˗an ˈka. ˗A ˗wɔn ˈgü, ˗yö ˗dho kë ˗së kö ˗zlanwopö ˗yö ˈˈdhiʋ̈sümɛn ˗yö ˈsëëdhɛ nu ˗kɔ ˈˈslö ˈbhaa ˗nu ˈwo Kwa ˗bha ꞊Gblüdëdhɛ ˗yö ˈsëëdhɛ ꞊taa bhë, ˗yö ʒiö ˗a do ˈgü. ˗A kë ˗kɔ ˈbhaa ˈnën ˗tɔ, ˗kɔ ˈwo ˗dho nɔɔn˗ ˗dɛɛ ˗nu ˈwo ka ˈˈpian ˈˈpiʋ̈, ˈwɔn ˗nu ˈwo kë ˗an ˗da ˈsëëdhɛ nu ˗kɔ ˈˈslö ˈˈpiʋ̈ ˗a ˈˈdoo dɔ ˗sü. ƐƐnˈˈ ˈzü ꞊wa wo ˗kɔ ˈkpɔ ˈˈsu ˗bha ˈsëëdhɛ ˗be ˈnën ˗nu ˗gɔ, ˗kɔ ˈö ˈka ˗dho ka ˗bha ˗wo ˗an ˗dhɛ ˗sü ˗dɛɛ zügban ˗a ˈka, ˗kaa ˈˈdoo dɔ. ꞊Ya kë ꞊dhɛ mɛn ˈbhaa ˗nu ˗wo ˗zlanwopö ˗yö ˗bhɔkwëë ˗ta, ˈö ꞊wa ˈˈsu ˗bha ˈsëëdhɛ ˈö ˈˈdheedhö ˗a nu mɛn ˗nu ˗dhɛ ˗blɛɛsü, ˈˈdhiʋ̈sümɛn ꞊mɔɔn˗ ˗bha ˈö ˗an dhɛɛˈˈ kpɔ kö ˗wa ˈˈslö ꞊klöö˗ ˗zɔn ɛɛnˈˈ ˈwɔn ˗së ˈbhaa ˗nu ˈwo bɔ ˗an ˈgü ˗wo ˗an ˗dhiaŋ zë. ˗Tɛɛdhoowayi ˈka, ˈˈdhiʋ̈sümɛn ꞊mɔɔn˗ ˗bha ˈö ˈˈslö do bhë ˈö˗ ˗kë ˈpö ˈsëëdhɛ ˈwo nu ˗pë ˈka ˈˈsu ˈgü ˗an ˗bhaa ˈka. ˈSëëdhɛ ˗nu ˈwo draanpë ˈka ꞊dhɛ ˈsëëdhɛ ˗be ˈnën Nɔɔn˗ ˗së waa ˗Ka ka ˈˈtʋ ˈto ˗Zlan ˗Wo ˗bha waa ˈsëëdhɛ ˗be Qu’enseigne la Bible ˗nu ˈdhö, ˗wo ꞊mɔɔn˗ ˗bha ˈwo ˗an nu mɛn ˗nu ˗dhɛ ˗dhɛkpaɔyi ꞊gban ˈˈpɛpɛ ˈka. ˈDhɛ ˈö ˈdhʋ̈ ˗bhɔkwëë ˈˈdhiʋ̈sümɛn ꞊mɔɔn˗ ˗bha ˈö ˗man ˈsëëdhɛ ˗nu bhë ˗a do nu ˗kɔ ˈˈslö ˗bha ˈdɛdɛ ˈka.
9. ꞊Ya kë ꞊dhɛ ˈsëëdhɛ ˗gblü ˗sü ɛɛnˈˈ mɛn ˗dhɛ ˗sü ˈbhaa ꞊ya kë ˈˈsɩyi waa ˗tɛɛdhoowayi ˈka, ˗mën ˈö ˈˈdoo dho ˗gban ˗a ˗ta?
9 ꞊Ya kë ˗dhɛ ˗zlanwokɔdhigümɛn ˗nu mɛn ˗nu ˗dhɛ ˗ni ˈgü ˈwɔn ˈbhaa ˗bha ɛɛnˈˈ ˈsëëdhɛ ˈbhaa ˗gblü ˗ni ˈgü, ˈˈsɩyi ꞊waa ˗tɛɛdhoowayi ˈka, ˈˈdhiʋ̈sümɛn ꞊mɔɔn˗ ˗bha, ˗kɔ ˈwo ˗dho ˈˈsu ˗bha ˈsëëdhɛ ˗be ˈnën ꞊nënŋ ˗a ˈka mɛndhɛsëëdhɛ ɛɛnˈˈ ˈsëëdhɛ ˈˈpɛn ˗bha kö ˗wa ˗nu mɛn ˗nu ˗dhɛ ˗a ˈka, ˗a ˈˈdoo dɔ. Ɛɛnˈˈ ˈzü ꞊ya kë ꞊dhɛ ka ˗bha nɔɔnwo ˗ya ˈˈyɛ mɛn ˈˈbhaa zuʋ̈ˈˈ ˗bha, ˈpë ˈka ˗dho ˗a kë, ˗ya ˗da ˈˈdoo ˈgü. ˗A ˈˈslö ˈbhaa ˈtɔ˗ ˈzü kö ˗bɔ ˗a ˈgü ˗wɔn ˗nu ˈwo ˗dho ˈsëëdhɛ ˈö bhë ˗a ꞊bhlëë ˗zɔn, ˗yö ˗an blɛɛˈˈ.
10, 11. ˗Mën ˈö ˗kë ˗zlanwopömɛn ˗nu ˗bha wo ˗de baaˈˈ ˗sü ˈdhö ˗së kö ˗zlanwopö ˗yö ˗bhɔkwëë ˗yö kë ˗së?
10 ˗Zlanwopömɛn ˗nu ˗bha wo ˗de baaˈˈ ˗kɔ: ˗Zlanwopömɛn ˗nu ˗de ˈpö, ˈpë ˈwo ꞊mɔɔn˗ bha ˈwo˗ kë kö ˗zlanwopö yö ˗bhɔkwëë ˗yö kë ˗së, ˗yö ˗dhö. ˗A ˈbhaa ꞊ya kë, ꞊wa wo ˗de baaˈˈ ˗a ˗bha ˈˈdhiʋ̈ ˗be ˗an ˗bha ˗Zlan ˗dhɔ ˗kë ˈkɔɔ ˗sü ˈˈtʋ̈ŋ ˈka, ˗wo ˗dho ꞊mɔɔn˗ ˗bha ˈwo ˗zlanwopömɛn ˈˈwɛɛ ˗nu ꞊faan mën. ˗De baaˈˈ ˗kɔ ˗së ˈnën ˗tɔ ˈzü ˈˈsu ˗bha ˈsëëdhɛ ˗be ˈnën ˗nu waa ˈsëëdhɛ ˈˈwɛɛ ˗nu ˈsü ˗sü ˈö ˈˈdhiʋ̈ ˗be kö ˗wo ꞊kun nu ˗ni ˗zlanwopö ˗yö ˗bhɔkwëë ˗ta. ꞊Ya kë ˈˈdhʋ̈ ˈyö ˈwo dho ˗zlanwopödhɛ ˈgü ˈpë˗, ˈyö ˈwaa ˈˈtʋ̈ŋ shiʋ̈ˈˈ ˈˈwɛwɛ.
11 ˗Yö ˗së ˈpö kö ˗wo wo ˗de baaˈˈ kö ˗wo nu ˗bhɔkwëë ˗ta ˈpë˗ kö˗ züdɔ ˈˈtʋ̈ŋ yö ˈti ˗wo ꞊köŋ. ˗Yö gagade ˈka ꞊dhɛ kwa kwa ˈgü ˗dɔ ˈˈgbɩɩ˗ ˈkwa ˗wo ꞊vaandhö ˗zlanwokɔdhi ˗bha ˗bhɔkwëë ˗nu ˗ta. ˈˈKɛɛ ˗nu ˗zlanwopö ˗yö ˗bhɔkwëë ˗ta ˗sü kö ˈˈlɛlɛ ꞊ya ʒiö bhë, ˗yö ꞊mɔɔn˗ ˗bha ˈö mɛn ˗nu ˈˈtënŋ sü. ˗Kɔ ˗kë ꞊dhɛ? Kwa ꞊dhegblü ˈö ˈˈdhiʋ̈ sü, ˗yö ö ˗zota ˈwɔn ꞊vadhɛ ˈgü ˈyö ꞊kun mɛn dan ˗ni ꞊plɛ ꞊plɛ. ꞊Ya kë ꞊dhɛ mɛn ˗nu ˈwo nu ˗zlanwopö ˈwaa ꞊va, ˗yö ꞊mɔɔn˗ ˗bha ˈö ˈmɛn ˈdhö ˈö˗ bɔ ˈdhɛ ꞊wa ˗zlanwopö ˗a ˗bha, ˗a ˈˈklu ˈö to ˗a ˈˈdhiʋ̈. ꞊Ya kë ꞊dhɛ mɛn ˈbhaa ˗nu ˗wo ˈˈta ˗sü ˈwo nu ˗bhɔkwëë ˈö ˈˈdhʋ̈ ˗a ˗ta, ˈˈkɛɛ kö ˗a ˗zlanwopödhɛ ˗yö ꞊gblɛnŋ, ˗yö ꞊mɔɔn˗ ˗bha ˈö ˗an bɔ ˈmɛn gɔ ˈdhö ˗an ˗gɔ ˗an ˈˈpiʋ̈. ꞊Ya kë ꞊dhɛ ˗a ˗zlanwopödhɛ ˈö bhë pëyaa ˗kë mɛn ˈka ˗dhɛ ˗mü , ˗yö ꞊mɔɔn˗ ˗bha ˈö˗ pö kwa ꞊dhegblü gɔɔn˗ ˗nu waa dhebɔ ˗nu ˗wo yö kë wo ˈkö ˈˈpiʋ̈, ɛɛnˈˈ kö ˗wo yö kë kwa ꞊dhegblü dhebɔ ˗nu kpö ˈˈsuee. ꞊Niɔɔnmɛn ˗nu ꞊mɔɔn˗ ˗bha ˈwo ˗zlanwopö ˗dhɛ ˈö baandhö ˗a ˈgü ɛɛnˈˈ ˈö˗ ˈkɔ ˗nu ˈdhö ˈˈshia˗ ˈˈdhiʋ̈ŋ bhë ˗a ˈgü. ˗Zlanwopömɛn ˗dɛɛ ˗nu ꞊mɔɔn˗ ˗bha ˈwo ˗zlanwopö ˗zlanwopömɛn ˈö ˗an ˗zo ˗ya ˗gban ˗an ˈˈpiʋ̈. ˈˈKɛɛ ˗zlanwopömɛn ˈbhaa ˗nu ꞊wa ˈto ꞊taabha, mɛn ˗nu ˈö ꞊wa ˗an dan ꞊plɛ ꞊plɛ ˗be bhë, ˗wo ꞊mɔɔn˗ ˗bha ˈwo ˗an bho ˈkwëë˗ ˈwo ˗an ꞊kaan ˈˈkwöö kö ˈmɛn ˈwo to ꞊taabha ˗wo yö ˗kë ˗an ˈˈpiʋ̈mɛn ꞊slɔɔ. Gagade ˗mü ꞊dhɛ ˈwɔn ˈbhaa ꞊mɔɔn˗ ˗bha ˈö ˗da kwa ˗gɛn ˈgü ˈö ˈkwa to ˈzlöö. ˈˈKɛɛ kwa ˈtuöö˗ ꞊ya kë ˗to ˈzlöö ˗sü ˈka, ˗yö ˗dho kë ˗së kö ˈkwa kwa ˗de dhɛɛˈˈ ˈkpɔ ꞊dhɛ: ˗zlanwopö ˗yö ˗bhɔkwëë ˈpö ˗dhɔ ˈyaa n kë ˗ee? Ɛɛnˈˈ ˗mɔɔn ˈnën ˈmaan˗ wo ˗bha kö ˈa n ˗de baaˈˈ ˈˈdhiʋ̈ ˗be ˗ee?
12. ꞊Ya kë ꞊dhɛ ˈmɛn ka˗ ˗nu ˈka ˗dho ˗zlanwopö bhi ꞊dede ˈnën ü ˗kɔ ˗yɛ ˗an ˗bha ˈˈtʋ̈ŋ ꞊gban ˈgü, ˗mën ˈü ꞊mɔɔn˗ ˗bha ˈü ü ˗zota ˗a ˈgü?
12 ˗Zlanwopömɛn ˈö ˈwo˗ ˈˈpiʋ̈ ˈwo yö kë wo ˈkwëë˗, ˗an ˗wo ꞊mɔɔn˗ ˗bha ˈö ꞊mɔn ˈˈdhiʋ̈ ˗be kö ˗bhɔkwëë ꞊kun züdɔ ˗ni, ɛɛnˈˈ ˈwo wo ˗bha yökëyoo kun ˈˈdhiʋ̈ ˗be. ꞊Ya kë ꞊dhɛ kaa mɛn ˈbhaa ka ˗wo ˗yö ˗mɔn ˈˈtʋ̈ŋ ꞊gban ˈˈpɛpɛ ˈka kö ˈka yö kë ka ˈkwëë˗, ü ꞊mɔɔn˗ ˗bha ˈü ü “zuëˈˈ ˈˈdhiʋ̈ ˗pʋ” mɛn ˈˈwɛɛ ˗nu ˗dhɛ kö ˈü ˗zlanwopö ˗an ˈˈpiʋ̈, kö ya ˈdho˗ kë ü ˈˈtɛɛbɔ ˗nu dosɛnŋ ˈka ˈˈtʋ̈ŋ ꞊gban ˈka. (2 Kod. 6:11-13) Ü ꞊mɔɔn˗ ˗bha ˈü yö ˗kë ˗zlanwopömɛn ˗dɛɛ ˗nu ˈˈpiʋ̈, kö ˈü ˗an ˗takun ˗an ˗bha mɛn draansü ˈgü ˗ee? (1 Kod. 10:24; 1 Tim. 4:13, 15) ˗Bhö ü ˈˈtʋ ˈto ˗së ˈka ˈwɔn ˈˈpɛpɛ ˈwo ˗dho ˗an pö ü ˗dhɛ, ˈö˗ ˈbhaa ˗gban ˗dhɛ ˈü ˗dho ˗zlanwopösü züdɔ ˗a ˗bha bhë ˗an ˗bha. ˗Bhɔkwëë ꞊ya ɲën, pë ˈö ˈˈdhiʋ̈sümɛn ˗ya pö, bha ˈdho ˗a bho ˈˈgblʋʋ, ˗bhö ˈˈdhʋ ˗zlanwopödhɛ ˈgü vɛɛdhö.
13. ꞊Ya kë ꞊dhɛ mɛn ˈˈpɛpɛ ˈö ˗an ˗kɔ ˈdhö yö bhë˗ ˈgü, ꞊wa ˗zlanwopö ˗yö ˗bhɔkwëë ˈsü wo ˗sɔbhɛɛ ˗bha, ˗yö ˗dho kwa ˗takun ˗kɔ ˗kë ˗dhɛ?
13 ˈDhɛ ˈwo wo bo ˗zlanwopö ˗sü ˈka, mɛn 70 ˈö Yesu ˗yö ˗an bɔ bhë, ˗wo yee ˗kë ˈwo nu ꞊niidadhe ꞊dede ˈka. (Dhukö 10:17) ˈYaa za ˈgü ˗dhɛ ˗bhɔkwëë ˈö waa Yesu ˗nu ˈwo˗ kë bhë, ˗yö ˗an ˗takun ˈyö ˗zlanwopösü ˈyö ˗dhi ˗an ˗gɔ. ꞊Dɛɛ ˈpö, ˗zlanwopö ˗yö ˗bhɔkwëë ˗yö ꞊mɔɔn˗ ˗bha ˈö kwa ˗takun ˗kɔ do bhë˗ ˈgü. ꞊Ya kë ꞊dhɛ mɛn ˈˈpɛpɛ ˈö ˗an ˗kɔ ˈdhö yö bhë˗ ˈgü ꞊waa˗ ˈsü wo ˗sɔbhɛɛ ˗bha, ˗wa ˈpë ˗an dua ˈka, ꞊wa˗ kë, ˗zlanwopö ˗yö ˗bhɔkwëë ˗dho kwa ꞊faan ˈmën, ˈö kwa ꞊baa, ˈö kwa ˗kɔ ꞊mɔɔn˗ ‘˗zlanwopö ˈˈsɛ ꞊gban ˈˈpɛpɛ ˈgü mɛn ˗nu ˗dhɛ ˗sü ˗bha’.—Mat. 24:14.
[˗Tomɛnɲaanwɔn, ˈˈpian 4]
Kwa dua ˈyaa ˗mü kö ˈkwa ˗zlanwopö ˗yö ˗bhɔkwëë sü ˗bhaasü, ɛɛnˈˈ kö ˈkwa˗ yö ꞊dhɛ ˗a ꞊bhlëë ˈyaa ˈdhö ꞊dhɛ ˗bhɔkwëë ˈˈwɛɛ ˗nu ˈwo ˗to ˗an ˈdhö.
[˗Tomɛnɲaanwɔn, ˈˈpian 5]
ˈˈTʋ̈ŋ ˈö ˈˈdhiʋ̈sümɛn ˈdhö ö ˗de baaˈˈ ˗ni ˈgü˗ ˈka ˗zlanwopö yö ˗bhɔkwëë ˗bha bhë, ˗a dua ˗mü kö ˗yö ˈö ˗zota pë ˈö ˗dho mɛn ˗nu ˈwo ˗dho ˗zlanwopö ˗dhɛkpaɔyi bhe˗ ˈka , ˗an ꞊faan ˈmën, kö ˗an ˗kɔ ꞊mɔɔn yö ˗bha ˗a ˈgü.
[ˈKɔnën, ˈˈpian 6]
꞊Ya kë ꞊dhɛ kwa ꞊dhegblü dhebɔ do ˗dhö ˈˈdhiʋ̈sü
Kwa ꞊dhegblü dhebɔ ˈö bhë dua ˗mü kö ˗yö ˈfaan˗ ˗man ö ˗gɔ ˗bha, kö ˗yö ˈɲaannu ˈˈtʋ̈ŋ ˈö ˗zlanwopö yö ˗bhɔkwëë ˈˈdhiʋ̈sü ˗ni ˈgü ˈka bhë˗ ˈka. ˈPë ˗dho ˗a ˈˈdoo dɔ bhë, ˗yö kë pë do ˈö gɔɔn˗ dho ˗a pö ˗be bhë ˗a ˈka. ˈKö ˗kë ˈˈdhʋ̈, ya ˈdho˗ pö ˈö˗ kë ꞊dhɛ mɛn ˗dhio dɔ ˈmɛn ˈwo nu ˗bhɔkwëë ˗ta bhë ˗an ˗ta. ꞊Ya kë ꞊dhɛ mɛn kpö ˗bha ˈˈdoo dɔ ˗sü ˈdhö. ꞊Ya kë ꞊dhɛ ꞊yaa˗ pö kwa ꞊dhegblü dhebɔ do ˈö ꞊ya bɔ ˈˈyi ꞊bhaa ˗a ˗dhɛ ˗yö bhɛɛˈˈ, ˗a dua ˗mü ˈpö kö ˗yö ˈfaan˗ ˗ya. ꞊Ya kë ꞊dhɛ kwa ꞊dhegblü gɔɔn˗ do ˈö ꞊ya bɔ ˈˈyi ꞊bhaa, ˗a nu ˗sü ˈka kö ˗bhɔkwëë ꞊ya zü bho, kwa ꞊dhegblü dhebɔ ˗a ˗dhɛ kö ˗ya ˗bhɔkwëë ˈˈdhiʋ̈ta. ˗Zlanwopö ˗yö ˈˈdhiʋ̈sümɛn dua ˗mü kö ˈwɔn ˗nu ꞊suu ˈwo ˈˈdhʋ̈ ˗ya ˈto ˈˈdhiʋ̈ ˗ya ˗dhio dɔ, kö mɛn ˈˈtënŋ ˈsü ˗wɔn ꞊suu ˈö ˈˈdhʋ̈ ˈya ˗dho kë. ˗A ˈwɔnzuan ꞊nɛn: ˗wo ꞊mɔɔn˗ ˗bha ˈwo ˗bhɔkwëë ˈˈdhiʋ̈sü ˗sü dɔ ˈkwa ꞊dhegblü dhebɔ do ˗kɔ ˈka ˈˈkɛɛ kö ˈnën gɔɔn˗ ˈnën ˈdɛdɛ ˈö ꞊ya bɔ ˈˈyi ꞊bha yö mü. ˗A ˗gɛn ˈtɔ˗ mɛn zii ˗nu ˗wa ˗yö ꞊dhɛ ˈyaa ˗kian ˗sü ˈka ˈˈdhiʋ̈sü ˗sü ˗bha. ꞊Ya kë ˗dhɛ ˗kɔ bhë˗ ˈdhö, ˗zlanwopö ˗yö ˗bhɔkwëë ˈˈdhiʋ̈sümɛn dua ˗mü kö mɛn ˈˈpɛpɛ ˈwo nu ˗bhɔkwëë ˗ta mü bhë, ˗yö ˗a pö ˗an ˗dhɛ ꞊dhɛ, kwa ꞊dhegblü dhebɔ ˈnën ˗dho ˗bhɔkwëë ˈˈdhiʋ̈sü ˈˈkɛɛ kwa ꞊dhegblü ˈnën gɔɔn˗ bhë ˈnën ˈö˗ dua ˈdhö ˗mü kö, ˈö ꞊ya kë ˗dhɛ ˈö ꞊mɔɔn bhɛɛsü ˗bha , kö ˗yö bhɛɛˈˈ. Ɛɛnˈˈ ˈbhaa ˗ya kë, kwa ꞊dhegblü gɔɔn˗ ˗zogbansü do ˈö ˗wa ˈˈdhiʋ̈sü ˗yö ɛɛnˈˈ ˗bhɛɛ ˗zlanwokɔɔdhösü ˈsü˗ ˗gɔ ˗a ˈka, ˈö˗ ˈsü ˗a gɔ ˗gɛn ˈdhö mɛn zii ˗nu ˈˈɲaan ˗yö ˗mü. Mɛn zii ˗nu dua ˗mü kö ˗wo ˈˈdhɛ ˈto ˈwɔn ˗nu bhë ˗an ˗ta, kö ˗wa pö kwa ꞊dhegblü dhebɔ ˗dhɛ ꞊dhɛ, ˈkö ˗kë ꞊dhɛ kwa ꞊dhegblü gɔɔn˗ bhë ˗yö ˗kë ˗bhɔkwëë ˗ta ꞊wɛ, yö ꞊nɛn˗ dua ˈdhö ˗mü kö ˗yö ˗bhɔkwëë ˈˈdhiʋ̈sü , kö ˗yö bhɛɛˈˈ. Mɛn zii dua ˗mü ˈpö kö ˗dhɛkpɔayi ˗nu ˈö kwa ꞊dhegblü dhebɔ bhë˗ ˈtɔ ˈdhö ˈsëëdhɛ ˗ta kö ˗yö yö ˗bhɔkwëë ˈˈdhiʋ̈sü bhë, ˗wa pö kwa ꞊dhegblü gɔɔn˗ bhë ˗dhɛ.
[ˈKɔnën, ˈˈpian 6]
Pë ˗nu ˈö ˗zlanwopö yö ˗bhɔkwëë ˈˈdoo ꞊mɔɔn˗ ˗bha ˈö ˗gban ˗an ˗ta, ˈyö ˈwo yö:
• ˈSëëdhɛ nu ˗kɔ ˈˈslö ˈö Kwa ˗bha ˗Gblüdëdhɛ ˗yö ˈsëëdhɛ ˈgü.
• Video ˈö ˗gban ˗zlanwopö ˗yö ˗bha, ˈö jw.org ˗ta.
• ˗Zlanwopö ˗kɔ ˗së ˈˈpian ˈbhaa, ˈö ꞊mɔɔn˗ ˗bha ˈö kë, dhiaŋ züdɔdhɛ, ˗womɛndhɛsü zü ˗gban ˗dhɛ, ɛɛnˈˈ gbɔɔpë ˗wɔn blɛɛˈˈ ˗sü kö ꞊wa ˈˈwɩ ˈsëëdhɛ ˈsü ˗sü ˗bha.
• Biblö ˈˈɲan ˈö mɛn ꞊faan mën ɛɛnˈˈ ˈö ˗gleŋ ˗së ˈö ˗gban ˗zlanwopö ˗yö ˗bha ˗a ˗da mɛn ˗bha.
• ˗Bɔ ˗a ˈgü ˗wɔn do ˈö ka ˈˈpian ˈˈpiʋ̈ ɛɛnˈˈ ˈö ˈsëëdhɛ ˈgü, ˈö ˗gban ˗zlanwopö ˗yö ˗bha.
• Nɔɔn˗ ˈö go ˈwɔn ˗gɔ do ˈö Kwa ˗bha ˗Gblüdëdhɛ ˗yö ˈsëëdhɛ ˈgü, ˗a ˈgü.
• Nɔɔn˗ ˈö go ˗Zlan ˗bha yö ˗bhɔkwëë ˗dɛɛ ˈˈpian ˈbha ˈgü.
• ˗Zlanwopö ˗yö ˗nɔɔn ˈö go La Tour de Garde ˈgü.
• ˗Zlanwopö ˗yö ˗nɔɔn ˈö go ˈsëëdhɛ ˗nu ˈö ˈwo kë ꞊dhɛ Tirez profit de l’École waa Viens, suis˗moi ˗nu ˈdhö bhë, ˗an ˈgü.
• Pë ˗dɛɛ ˗nu ˈwo go jw.org ˗ta ˈö ˈwo ꞊mɔɔn˗ ˗bha ˈwo yö kë ˗an ˈka ˗zlanwopödhɛ ˈgü.
• La Traduction du monde nouveau ˈgüpë ˈbhaa ˗nu ˈwo ꞊mɔɔn˗ ˗bha ˈwo yö kë ˗an ˈka ˗zlanwopödhɛ ˈgü.
• ˗Kɔ ˈö ˈkwa ˗dho ˈˈdoo zü bho ˈka mɛn ˈö ˈyaa ˗zo yö ˗Zlan ˗dhɛ, ˈmɛn ˈö ˗zo yo pë ˗bha ˈˈglasü ˗dhɛ, Ɛndumi ɛɛnˈˈ Budisömi ˈö ˈkwa ˗dho ˗kpan ˗a ˗bha ˗zlanwopödhɛ ˈgü ˗a ˈka.
• ˗Kɔ ˈö ˈkwa ˗dho ˈwɔn ˗daa kë˗ ˈka mɛn ˈö ˈˈdhiʋ̈luusü ˈka˗ ˗bha kö ˗yö kwa ˗bha dhiaŋ ˈˈdhiʋ̈bho ˗a ˗gɔ.
• ˗Kɔ ˈö ˈkwa ˗dho kwa ˗bha ˗zlanwopö ˗yö kë ˈˈyɔɔ ˗takun ˗a ˈka kö ˗a ˈˈdhi ˗yö ˈˈkan ˈkɔ ˈˈkpan ˈˈdhiʋ̈ ˗a ˗bha.
• ˗Kɔ ˈö ˈkwa ˗dho ˈwɔn ˗daa kë˗ ˈka ˗wo ˈˈwɛɛ pömɛn ˗gɔ.
• ˗Kɔ ˈö ˈkwa ˗dho ˗zlanwopö ˗kɔ ꞊suu, ˈö ˗kë ˗wo ꞊suu ˈbha pö ˗mɛn ˗nu mɛɛnˈˈ ˗sü ˈka, ꞊gbɛkiödhɛ kë ˗sü ˈö telefɔnö ˈˈdhiʋ̈ ɛɛnˈˈ ˈö ˈˈdheetadhɛ ˗nu ˈgü, ˗womɛndhɛsü, waa mɛn ꞊klaŋ ˗kë Biblö ˈka ˗sü, kë ˗a ˈka.
• ˗Zobodhe ˈö ˗gban ˗zlanwopö ˈsuan˗ ˈka ˗sü, ˈˈta ˗kɔ ˗së, ˗zota ˗kɔ ˗së ˗bha ˗kë mɛn ˗gɔ ˗sü waa ˗an ˈbhaa ˈwo do, ˗an ˗bha.