˗Zobodhe ˈö ˗gban ˗bhɔkwëë ˈkpii˗ ˗bha

◼ ˈˈLɛlɛ ˗nu: ˗Bhɔkwëë kë ˗dhɛ ˈˈkwee ˗dho ˈˈpʋ dhiaapiʋ̈ˈˈ 8:00 ˈka. ˗Dhɛkpaɔyi ˗yaaga ˈwo bhë ˗an ˈka, ˗bhɔkwëë züdɔ ˈˈtan ˗dho ˗ya ˈˈwɩ ˗sü ˗bha dhiaapiʋ̈ˈˈ 9:20 ˈka. ˗A ˈˈtʋ̈ŋ bhë ˗a ˈka, mɛn ꞊gban ˈˈpɛpɛ kwa dua ˗mü kö ˈkwa ˈdho ˈkwa ˈˈɲaannu kwa ˗yɛɛ ˈgü, kö ˗a ˗bhɔkwëë ˗yö züdɔ ꞊bhlëë ˈgü. ˗Bhɔkwëë ˈˈdhiʋ̈ ˗dho ta ˈˈmaandhooyi waa ˈˈsɩyi ˈˈdooka 5:00 ˈka, ˈyö˗ ˈˈdhiʋ̈ ta ˗tɛɛdhoowayi ˈˈdooka 4:00 ˈka.

◼ ‘˗Kwa Zoova ˈtɔ ˗bhɔ ˈˈtan ˈka’: ˗Zlan ˗bha mɛn ˗nu ˈwo kun ꞊kwɛŋzü ˗wa ˈtɔ ˗bhɔ ˈˈtan bho ˗sü ˈka. ˈˈTan ˗wɔn ˗yö ꞊kun ˈˈgbɩɩ˗ ˗Zlan ˗dhɔkësü ˈgü ꞊dɛɛ. (Ps. 28:7) ˗A ˗bhɔkwëë ˈˈpian ˈˈpɛpɛ zü ˗dho dɔ ˈˈtan ˗ta. ˗A ˈˈtan bhë ˈyaa ˈˈtan ˈˈwɛɛ ˗nu ˈwo˗ ˗we ˗an ˈka, ˈˈkɛɛ ˗wa ˗pëkë kö ˈwɔn ˈö ˗gban Zoova waa˗ ˗dhɔkësü ˗bha, ˈkwa˗ draanˈˈ. ˗Dhɛ ˈö ˈˈdhʋ̈, kö ˗bhɔkwëë ˈˈdhiʋ̈sümɛn ˗ya pö ˈˈtan ˈˈwɩ ˈˈtʋ̈ŋ ꞊ya ꞊lo, kö ˗a ˈˈtʋ̈ŋ bhë ˗a ˈgü, ˗kwa ˈɲaannu kö ˈkwa kwa ˈˈtʋ ˈto ˗a ˈˈtan ˗bha ˗së ˈka, kwa ˈdho˗ ˈto ˈˈdoodɔsü ˗bha. ˗A ˗kë ˈˈdhʋ̈ ˗sü ˗dho ˗a ˗zɔn ꞊dhɛ yö ˈö Watchtower ˗bha ˈˈtanbhomɛn ˗nu ˗wa ˗kë bhë ˗yö kwa ˗dhɛ ꞊bhlëësü. ˗Gɛn ˗ɲaan ˈka ꞊plɛ ˗kwɛ do ˈgü, kwa ꞊dhegblü ˗nu wo ˗de ˗bha gɔ ꞊saa ˗bho ˈwo dho Patɛsɔnö, ˈNu ˈYɔkö, kö ˈwo ˈˈtan ˈˈnɛɛnnɛn ˗nu bhë ˗an ˗pë kë kwa ˗bhaa ˈka. ˈKwa kwa bo ˈˈtʋ ˈto ˗sü ˗bha ˗së ˈka ˈˈtan ˗bha, mɛn ˈˈpɛpɛ dua ˗mu kö ˗wo Zoova ˈtɔ bhɔ kwa ˗bha ꞊Gblüdëdhɛ ˈˈtan ˗nu bho ˗sü ˈka.

◼ Gɔdɔdhɛ: ˗Bhɔkwëë ˈkpii˗ ˈˈpɛpɛ kë ˗dhɛ ˈgü, ˗dhɛ ˈwo˗ nu kwa ˗dhɛ gɔ dɔ ˗dhɛ ˈka, kwa gɔ ˗dɔ mü ˈˈwɛwɛ, kö ˗a ˗dhɛ ˗yö pa ˈˈdhiʋ̈dhiʋ̈. ˈDhɛ ˈö ˗kë ꞊dhɛ gɔ dɔ ˗dhɛ ˈyaa ˈˈgbɛɛ bhë, mɛn ꞊vadhɛ ˗bha ˗nu gɔ do ˈgü ˗sü ˗dho kë ˗së. Mɛn ˗nu ˈö gɔdɔdhɛ ˈsëëdhɛ ˈdhö ˗an ˗gɔ, ɛɛnˈˈ ꞊niɔɔnmɛn ˗nu ˈnën ˗an dua ˈdhö ˗mü kö gɔdɔdhɛ ˈö ˈwo˗ ˗ya ˗de ˗ta ˗an ˗bhaa ˈka, ˗wo gɔ dɔ mü.

◼ ˗Wɛɛ ˈkun ˗sü: ꞊Ya kë ꞊dhɛ ꞊wa ˗bhɔkwëëkëdhɛ ˈˈkwee ˈˈpʋ dhiaapiʋ̈ˈˈ ˈˈpɛpɛ ˈka, ˗ka dɔ ˈˈgbɩɩ˗ ka ˈdho˗ ˗bia ˗lö ˗yɛɛ ˈkun ˗sü ˈka ꞊dhɛ ˈpë kaa ka ꞊dhegblü ˗nu ˈka pë kɔɔˈˈ ˗ni ˈgü ˗a ˈdhö. ˗Ka dɔ ˈˈgbɩɩ˗ ˈka ˈˈtʋ̈ŋ kë mɛn ˈˈwɛɛ ˗nu ˗wɔn ˈgü, kö ˈkwa kwa ꞊dhegblü ˗nu ˗bhawɔn ˈsü ˗së kwa ˗de ˗bhaa ˗bha. ˗De ˗kë ˈˈsaa˗ ˈka ˗sü ˈnën ˈwo kwa dɔ ˗a ˗bha ꞊dhɛ Kletiɛn ˗nu ˈdhö, ˈyö mɛn ˗nu ˈö ˗an ˈˈɲan ˈdhö kwa ˗bha, ˈyö ˗an ˗blü ˗Zlan ˈtɔ bhɔ ˗sü ˗bha. (Zan 13:34, 35; 1 Kod. 13:5; 1 Piɛ. 2:12) Mɛn kaa˗ ˗nu ˈka nu gɔ do ˈgü, ˈö ˈka ˗wɔ ˈkɔ do ˈgü, ɛɛnˈˈ ü ˗bha Biblö ꞊klaŋdhiʋ̈nën ˗nu dosɛnŋ ˈnën ˈü ˗dho ˗an ˗bha ˗yɛɛ ˈkun˗. ˗Bho dɔ ˈˈgbɩɩ˗ bha ˈdho˗ pë ˈbhaa ˗ya ˗wɛɛ ˈö ü ˈti˗ ˈsü ˗a ˈgü. Kö ˈü ü ˈˈtʋ ˈto ˈwɔn ˈö bhë ˗a ˗bha, mɛn ˈˈwɛɛ ˗nu ˗dho ˗a ˈwɔn dɔ ꞊dhɛ ˗wɛɛ ˈdhɛ bhë mɛn ˈyaa˗ ˈgü. Mɛn ˗nu ˈö ꞊wa kë zii waa ꞊niɔnmɛn ˗nu ˗wɛɛ ˗yö ö ˗de ˗ta. ˈˈKɛɛ ˈdhɛ ˗kë ꞊dhɛ ˗an ˗ya ˗dhɛ bhë ˈyaa ˈˈgbɛɛ bhë, mɛn do ɛɛnˈˈ mɛn ꞊plɛ ˈwo wo ˗zokë mɛn zii ɛɛnˈˈ ꞊niɔnmɛn ˈˈpiʋ̈, wo ˈnën ˗an dua ˈdhö ˗mü kö ˗wo ˗ya ˈdhɛ bhë ˗a ˈgü.

◼ ˗Kwa sɔ ˗da ö ˗da ˗kɔ ˈka: Kwa sɔ ˗da ˗kɔ ˈö ˗bhɔkwëë ˈkpii˗ ˗ta ˗a dua ˗mü kö ˗yö kë sɔ ˗da ˗kɔ ˗së ˈka, ya ˈdho˗ kë ꞊dhɛ ˈˈkpɔnŋtaamɛn ˗nu ˗bha sɔ ˗da ˗kɔ ˗dɛɛ ˈwo˗ ˗da ˗ni ˈgü˗ ˈka ˗a ˈdhö. (1 Tim. 2:9) ꞊Ya kë ꞊dhɛ kwa ˗da ˗ni ˈgü ɛɛnˈˈ kwa ˈgo ˗ni ˈgü otɛdhö ˈgü, ɛɛnˈˈ ˈzü ˈkwa kë ˗bhɔkwëë ˈˈtʋ̈ŋ ˈˈdhiʋ̈ ɛɛnˈˈ ˗a ꞊zlöö, ˗kwa sɔ ˗da ˗kɔ ˗së kë. ˗Dhɛ ˈö ˈˈdhʋ̈, kwa ˗bha ˗bhɔkwëë ˈbaadiö ˗yö kë kwa ˗bha ˗sɔ ˗bha kö ꞊gbɛkiödhɛ kë ˗sü ˈlëë˗ ya ˈdho kwa kë ˗dhɛ ˈˈpɛpɛ ˈkwa ꞊mɔɔn˗ ˗bha ˈkwa˗ kë mü ˗a ˈgü. Kwa sɔ ˗da ˗kɔ waa kwa ˈˈta ˗kɔ ˗së ˈö ˗dho kë ˗bhɔkwëë ˈkpii˗ ˈö nu ˗ni ˈgü bhë ˗a ˈˈtʋ̈ŋ ˈka bhë, ˗yö ˗dho zuʋ̈puumɛn ˗nu ꞊ɲɔɔn ˗tosɛta ˈö ˈyaa ɲën ˗a nɔɔnwo ˈö Biblö ˈgü bhë ˗a ˗bha, ˈˈkɛɛ ˈzü ˗yö ˗dho Zoova zuʋ̈ˈˈ ˈˈgblü dhi.​—Tseph. 3:17.

◼ ˗Kë ˗a ˈgü ˗kɔ ˗së ˈö telefɔnö waa parɛ ˈˈwɛɛ ˗nu ˈka: ˗Bhɔkwëë ˈˈtʋ̈ŋ ˈka, ˗kwa ˗kë ˗a ˈgü ˗kɔ ˗së ˗zɔn ˗baa kwa ˗bha telefɔnö waa parɛ ˈˈwɛɛ ˗nu ˗bha ˗sü ˈka kö wa ˈdho mɛn ˈˈwɛɛ ˗nu ˈˈtënŋ ˈsü. ꞊Ya kë ꞊dhɛ kwa pë ˈˈbin ˈsü ˗ni ˈgü kwa ˗bha kamedha, video ˈsü pë, tablɛtö, ɛɛnˈˈ parɛ ˈˈwɛɛ ˗nu ˈka, ˗kwaa kë ˗së ˈka kö kwa ˈdho mɛn ˈˈwɛɛ ˗nu ˈˈtënŋ ˈsü ɛɛnˈˈ ˈkwa dɔ ˗an ˈˈdhiʋ̈. ˗Kë ˗a ˈgü ˗kɔ ˗së ˈnën ˗tɔ ˈzü kwa ˈdho nɔɔn˗ bɔ mɛn ˗nu ˗dhɛ kwa ˗bha telefɔnö ˗ta ˗bhɔkwëë ˈˈtʋ̈ŋ ˈka.

◼ ˈƝëngü ˗bhöpë: ˗Ka dɔ ˈˈgbɩɩ˗ ˈka nu ka ˗bha ˈɲëngü ˗bhöpë ˈka, kö ˈka ˈdho ˈgo ˗bhɔkwëëkëdhɛ ˈgü ka dho ˗bhöpë mɛɛnˈˈ ˗dhɛ ˈˈwɛɛ ˈgü ˈˈtɛɛ pa ˈˈtʋ̈ŋ ˈka. ˗Bhöpë ˗sü ˗a ˈgü ˗pë ˈdɛdɛ ˈwo ꞊mɔɔn˗ ˗bha ˈwo˗ ˗ya ˗gbaanën ꞊löö, ka ꞊mɔɔn˗ ˗bha ˈka˗ sü. ˗A ˈˈgblʋ̈gblʋ̈ waa ˈˈvɛlɛ ˗nu ˈwo ˈwüpë ˈka, ˗an ˗duɛɛ ˈyaa mü.

◼ Gbɔɔdhe ˗nu: ˗Bhɔkwëë ˈˈkpii˗ bhë, kwa ˗dho ˗a ˗bhaa ˗kë kwa ˗dhɛ ˗së ˗sü ˗zɔn gbɔɔdhe kë ˗sü ˈka, kö ˗bhɔkwëë ˈˈgblʋ̈gblʋ̈ ˗nu ˈwo ˈˈkpɔnŋ ꞊taa ˈkwa kwa ˗kɔ ˗da ˗a yö ˗dhɛ. ˈShɛkö ˈˈpɛpɛ ˈö ˈdhö, ˈtɔ ˈö ˗dho ˗ya ˗a ˗ta ˈyö ˗tɔ, “Association Cultuelle les Témoins de Jéhovah de Côte d’Ivoire”. Kwa ꞊mɔɔn˗ ˗bha ˈkwa ꞊gbɔɔdhe ˗kë ˈzü ˈˈpo ˈkatö ˈka.

◼ Mɛn ˈˈdhɛkësü: ꞊Ya kë ꞊dhɛ ꞊wa˗ pö ˈü blɛɛdhɛ ˈbhaa ˈsü, ˗bhö dɔ ˈˈgbɩɩ˗ ü nu ˗a ˈka, ˈyö ˗tɔ ꞊dhɛ ˗a ˈˈwɛɛ ˈbha ˈti ˗dho kë ˗bhɔkwëë ˈkpii˗ ˈö bhë ˗a ˗ta. Diabɛtö ˗mɛn ˗nu dua ˗mü kö ˗wo wo ˗bha ˗sɛdhaga ˗nu ˗zuö ˈˈgbluu yaa ˗zuögüpë ˗nu ˈgü, ya ˈdho˗ kë ˈˈgbluu ˗lo ˗a ˈgü ˗pë ˗nu ˈwo ˗bhɔkwëëkëdhɛ ɛɛnˈˈ otɛdhö ˗nu ˈgü bhë, ˗an ˈgü.

◼ ˗Wɔn ˗nu ˗kë ˈsuaan˗ ˈka ˗sü: ˗Bhö dɔ ˈˈgbɩɩ˗ ˈü kë ü ˈsuaan˗ ˈka kö ü ˗gɛn ˈˈdhiʋ̈ ˈya ˗dho ˗zuö, ˈü ꞊draan, ˈü ˗pö ˈü ˗gi. ˗Kwɛ ꞊gban ˈˈpɛpɛ ˈka, mɛn ˗nu ˗bha ˗sabha talɔn ꞊gblɛnŋ ꞊gblɛnŋ ˗nu ˗wa ˗kë ˈwo ˗pö ˈwo ˗gi. ˗Yö ˗dho kë ˗së kö ˈkwa kwa ˗kɔ ˈˈyɛ ˗sabha ˗së, ˈö ˈˈta ˗sü ˗a ˈka ˗sü ˈdhö ˗së baandhɛ ˗nu, ˈˈkpankundhɛ ˗nu, ˗dhɛ ˈˈdrɔɔdrɔdhɛ ˗nu waa ˗dhɛ ˈˈwɛɛ ˗nu ˈwo to ˗an ˈgü bhë, ˗an ˗bha.

◼ ˈˈTʋgbumɛn ˗nu: ˗Bhɔkwëë ˈö bhë ka ꞊mɔɔn˗ ˗bha ˈka ka ˈˈtʋ to ˗a ˈgü ˗wɔn ˗bha ladio ˈgü ˗a ˗bhɔkwëëkëdhɛ ˈgü. ꞊Ya kë ꞊dhɛ ka˗ ˈˈpiʋ̈ ˈka ka ˈˈtʋ ˈto ˗a ˗bha, ˗ka nu ladio ˈnën ˈdɛdɛ waa˗ ˗yatʋbhapë ˈka.

◼ ˈNën ˗nu ˗sü ˗a ˈgü ˗gbaanën ꞊koŋsü waa ˗gbaanën ˈwo˗ ꞊yɛkoo: Ka ˈdho˗ nu ˈnën ˗sü ˗a ˈgü ˗gbaanën ˈö˗ ꞊koŋ ˈdhö˗ ꞊löö waa ˗gbaanën ˈwo˗ ˗yɛkwlëë ˗an ˈka ˗bhɔkwëëkëdhɛ ˈgü. ˈKɛɛ ˗wo ꞊mɔɔn˗ ˗bha ˈwo nu ˈnën ˗nu ˗ya ˗a ˈgü ˗gbaanën ˈka, kö wa ˈdho ˗pö, kö ˗wo ˗ya ˗a ˈgü ˗së ˈka wo ˗mɛn ˗nu ˈˈsuee.

◼ ˗Dhasiklɔɔ ˈˈyi ꞊fiisü: ˗Bhɔkwëë ˈkpii˗ ꞊vadhɛ ˗nu ˗kë ˗dhɛ ˗nu ˈö ˗an ˈˈdhiʋ̈ ˈdhö ta ˗sü ˈka, ˈö ˈˈtɛɛblümɛnbhapë ˈdhö mü ˗an ˈgü. ˈDhɛ ˈö ˈˈdhʋ̈, ˗ka ka ꞊dhegblü ˗nu ˗dhɔ ˗zɔn, kö ˈka ˗dho ˗dhasiklɔɔ ˈˈyi ꞊fii ˈˈdhiʋ̈ ˈö ꞊mɔɔn˗ ˗bha ˈö ˈˈtënŋsü ˗yua nu ˗an ˗dhɛ, ˗a ꞊wɛnŋ ka ˗bha.—1 Kod. 10:24

◼ ˈSëëdhɛ ˈˈpɛn Veuillez suivre l’intérêt (S-43): ˗Ka Veuillez suivre l’intérêt ˈsü, kö mɛn ˈˈpɛpɛ ˈka ˗zlanwopö ˗an ˗dhɛ ˗bhɔkwëë ˈkpii˗ bhë ˗a ˗ta, kö ˈwɔn ˈˈpɛpɛ ˈö ˗gban ˗an ˗bha, ˈka˗ ˗ya ˗a ˗ta. ˈSëëdhɛ ˈka pë ˗ya ˗a ˗ta ˗bhë, ˗kaa nu ˈsëëdhɛ ˈwɔnyëë˗ ˈö ˗bhɔkwëëkëdhɛ ˈgü ˗a ˗dhɛ, ɛɛnˈˈ ˈzü ˈka ꞊yɛɛ kë, ˗kaa nu ˈsëëdhɛ ˗bɛnzëmɛn ˈö ka ˗bha ˗zlanwokɔɔdhö ˗a ˗dhɛ.

◼ Pëbhödhɛ ˗nu: Ka ˈˈta ˗kɔ ˗së ˗yö Zoova ˈtɔ bhɔ pëbhödhɛ ˗nu ˈgü. ˗Ka ˗sɔ ˗da Kletiɛn ˗nu ˗bha sɔ ˗da ˗kɔ ˈka. ꞊Ya kë ꞊dhɛ ˗wa ˗kë ˈˈdhʋ̈ ˈmü, ˗ka ˈwëë ˈsɛɛn˗ ˈto ˗an ˗gɔ.

◼ Otɛdhö:

(1) ˗Ka dɔ ˈˈgbɩɩ˗ kö ka ˈdho˗ ˈkɔdhi ꞊va ˈö ˈkaa ꞊mɔɔn˗ ˗bha ˈka wɔ ˗an ꞊gban ˈgü ˗an ˈsü, ɛɛnˈˈ ka ˈdho˗ ʒiö mɛn ˈˈdhi ˈö ˈwo ꞊mɔɔn˗ ˗bha ˈwo wɔ ˈkɔdhi do ˈgü ˗an ˗ta.

(2) ˈWɔngbɩɩ˗ ˈbha yö ˈti ˗da ka ˗gɛn ˈgü, ka ˈdho˗ ka ˗kɔ bho ˈkɔdhi ˈö ˈka˗ sü ˗a ˈgü. ˈˈKɛɛ ꞊ya kë ꞊dhɛ ka ˗dho ka ˗kɔ bho ˗a ˈgü, ˗kaa kë ˈpë˗ kö otɛdhö ˗mɛn ˗ya nu mɛn ˈˈwɛɛ ˈö˗ ˗bhawɔn ˈdhö˗ ˗bha ˗a ˗dhɛ. (Mat. 5:37) ꞊Ya kë ꞊dhɛ ˈka ka ˗kɔ bho ˗a ˈgü, ˗yö kë ka ˈˈɲaan ˈkpakpadhö ꞊dhɛ ˗kɔ ˗bho ˗a ˈgü ˈˈnimlɔn ˗yö ka ˗gɔ. ꞊Ya kë ꞊dhɛ ka ˈti ˗dhɛkpaɔyi ꞊plɛ ˈto ˈˈdhiʋ̈ kö ˈka ka ˗kɔ bho ˗a ˈgü, ka ˗bha ˈwëëga ˗dho ˈto mü.

(3) ˗Yö kë ka ˈˈɲaan ꞊dhɛ ˈka ka ˈtɔ ˗ya ˈˈpo ˈkatö ˈka, otɛdhö ˗mɛn ˗dho ˈkɔ ˈö ˈka wɔ ˗a ˈgü, waa pë ˈˈpɛpɛ ˈka˗ ꞊shiʋ̈ mü, ˗a ꞊sɔɔn ˈsü ka ˗bha ˈkɔntö. Kö ka ʒiö, ˗a ˗dhɛkpaɔyi ꞊plɛ wo ˗dho dɔ ˗a ˈˈpiʋ̈, ka ˈti ˗dho ꞊mɔɔn˗ ˗bha ˈka ˈwëëga sü ka ˗bha ˈkɔntö ˗ta, kö wɔ ˈö ˈka˗ wo otɛdhö ˈgü bhë wo ˈti˗ ꞊sɔɔn ˈsü mü ꞊köŋ.

(4) ꞊Ya kë ꞊dhɛ ka ˗bhawɔn ꞊ya yö ꞊kwɛɛsügüpë ˗bha ꞊dedewo ˈyö ˈka ꞊kun ˗a ˈsü. ˈKa ka bho ˗a ˈka, ˗ka ˈto mü ˈka˗ yɛɛ kë kö mɛn ˈˈwɛɛ ˗nu wo ˗bha ꞊kwɛɛ ˈsü ˗a ˈgü.

(5) ꞊Ya kë ꞊dhɛ ˗wa ˗kë ˈˈdhʋ̈ ka ˗gɔ ˈmü, ˗ka ˈˈyi ˗saa ꞊sɔɔn nu mɛn ˗nu ˈwo ka ˗bha ꞊kwɛɛ sü waa mɛn ˗nu ˈwo yö ˗kë otɛdhö ˈgü ˗an ˗dhɛ.

(6) ˗Ka pë ˗kpa pëkpadhɛ dosɛnŋ ꞊nën˗ ˈgü.

(7) ˈˈKafeyi waa pë ˗saa ˗nu ˈwo˗ ˗ya mɛn ˗nu ˈwo nu otɛdhö ˈgü ˗an ˗bha dhiapiʋ̈ˈˈ ˗bhöpë ˈka bhë, ka ˈdho ˗a ˗bhö ꞊va.

(8) ˈˈTʋ̈ŋ ˈˈpɛpɛ ˈka, ˗ka ˈˈta ˗kɔ ˗së ˗zɔn ka ˗bha ˈwɔn ˗nu ˗kë otɛdhö ˈgü ˗mɛn ˗nu ˈˈpiʋ̈ ˗sü ˈka. Mɛn ˗nu ˗an ˗kɔ ˗ta ꞊va. Ka ˗bha ˈˈgblüsëdhɛ, ka ˗bha zuʋ̈saadhɛ, waa ˗kë dhɔŋdhɔŋsü ˗sü ˗dho kë ˗an ˗dhɛ ˗së.

(9) ˈNënmɛn ˗nu wo ˗zo kë wo ˗bha ˈnën ˗nu ˈˈpiʋ̈ ˈˈtʋ̈ŋ ꞊gban ˈka otɛdhö ˗züzüdhɛ ˗nu, ˈˈkpankundhɛ ˗nu, ˈˈyikëdhɛ ˗nu, trʋʋkëdhɛ ˗nu, ˈfɔɔyisüdhɛ ˗nu waa ˗dhɛ ˈˈwɛɛ ˗nu ˈwo to ˗an ˈgü.

(10) Wɔdhɛ ˗nu ꞊sɔɔn ˈwo ˗ya ˗sü ˈka Liste des lieux d’hébergement recommandés (Otɛdhö ˗nu ˈtɔ ˗bhüöö ˈsëëdhɛ) ˗ta bhë, wo ˈnën ˈwo ˗tɔ gbeŋyi do ꞊sɔɔn. ꞊Ya ˗kë ꞊dhɛ ꞊waa˗ ꞊sɔɔn ˗da ˈˈdhiʋ̈, ˗ka ˗kɔ ˗a ˈka, ˈka ˈto mü ˈka wɔdhɛ ˈwɔnyëë˗ ˗nu ˗dhɛ.

(11) ꞊Ya kë ꞊dhɛ ˈwɔn ˈbhaa ꞊ya ka ꞊slɔɔ otɛdhö ˈgü ˗kaa blɛɛˈˈ wɔdhɛ ˈwɔnyëë˗ ˗nu ˗dhɛ ˗bhɔkwëë ˗ta kö ˗wo ka ˗takun.

◼ De ˗nu yö ˗dhɛ ˗mɛn ˗nu: Mɛn ˈˈoo ˗mɛn ˈö˗ ˈˈpiʋ̈ ˈö ö ˗de nu yö ˗dhɛ, ˗a dua ˗mü kö ˗yö ö ˈtɔ ˗ya ˗de ˗nu yö ˗dhɛ ˗mɛn ˗nu ˗bha ˈwɔnyëë˗ ˈˈpiʋ̈. ˈNën ˗nu ˈö ˗an ˗kwɛ ˈti ˗mɔɔn ꞊köŋ 16 ˗bha, ˗wo ꞊mɔɔn˗ ˗bha ˈwo yö ˗së ˗kë ˈpö ˗an ˗mɛn ˗nu, ˈˈɲan ˗to ˗an ˗bha ˗mɛn ˗nu ɛɛnˈˈ mɛn ˈkpii˗ ˈbhaa ˈö˗ ˗mɛn ˗nu wo ˗kɔ ˗yɛ ˗a ˗bha kö ˗yö ˈö ˗zo kë ˗an ˈˈpiʋ̈ ˗an ˗kɔ ꞊löö.