Kwa ˗bha mɛn ˗nu ꞊klaŋ ˗kë ˗a ˈka ꞊kwɛɛ˗ ˗nu ˈˈkpɔɔ
1. −Zlanwopömɛn waa ˈˈdhüɲënmɛn ˗nu ˗wo ˗bhɔ wo ˈkwëë˗ ˗kɔ ˗kë ꞊dhɛ?
1 ˈˈDhüɲënmɛn ˗bha yö kë ˗a ˈka ꞊kwɛɛ˗ ˗nu ˗wo ꞊va. ˈKö ˗kë ꞊dhɛ ˈyaa yö kë ˗a ꞊kwɛɛ˗ ˈbhaa ˗nu ˈka ꞊plɛplɛ, ˗a ˈbha ˗nu ˗zë ˗wo ˗an ꞊kwɛɛ˗ ˈˈtʋ̈ŋ ꞊gban ˈka. ˈˈDhüɲënmɛn ˗nu ˈwo wo ˗bha yö dɔ, ˗an ˗bha yö kë ˗a ˈka ꞊kwɛɛ˗ suu ˈwo ˈˈdhʋ̈ ˗wo ˗an ˗gɔ ˈˈkpɔɔ ˈgü ˈˈtʋ̈ŋ ꞊gban ˈka. ˈWo ˈnën ˈwo ˗an kwɛɛˈˈ ˗dhi yö ˗bha. Biblö ˗yö Kletiɛn ˈˈpɛpɛ ꞊faan ˗mën kö ˗a ˈmɛn ˈö ˈdhö ˗yö ö ˗de nu ˗zlanwopö ˗yö ˗dhɛ, kö ˗yö kë mɛn “ˈö ˈyiʋ̈˗ ˈyaa˗ kë ˗a ˗bha yö kë ˗sü ˈgü” ˗a ˈka. (2 Tim. 2:15) Yö ˗kë ˗a ˈka ꞊kwɛɛ˗ ˗wɔngbɩɩsü ˗mɛɛn ˈö kwa ˗bha yö ˗kë ˗a ˈka ˗kwɛɛ ˗nu ˈˈkpɔɔ ˈgü? Yö ˈnën ˗tɔ ˗Zlan ˗Wo, pë ˗blɛɛsü ˈö ˈkwa bɔ ˗a ˗ta ˈö ˈkwa ‘mɛ ˗nu ˗kë Yesu ˗bha ꞊guëˈ’ ˗nu ˈka. (Mat. 28:19, 20) ˈKö ˗kë ˈˈdhʋ̈, kwa dua ˗mü kö ˈkwa kwa ˈgü dɔ ˈˈgbɩɩ˗, kö “tɛanwɔn ˈö go ˗Zlan ˈˈpiʋ̈” ˈkwa dɔ ˗a ˗zɔn mɛn ˗nu ˗dhɛ ˗kɔ ˈka. ˈˈKɛɛ ꞊ya ˈgo ˗a ˗dhɛ bhë˗ ˈgü, mɛn ˗nu ꞊klaŋ ˗kë ˗a ˈka ꞊kwɛɛ˗ ˈˈwɛɛ ˗nu ˗dhö, ˈö ˈwo kwa ˗bha mɛn ˗nu ꞊klaŋ ˗kë ˗a ˈka ꞊kwɛɛ˗ ˗nu ˈˈkpɔɔ ˈgü, ˈö Kletiɛn ˗nu dua ˈdhö ˗mü kö ˗wo yö ˗kë ˗an ˈka ˗kɔ draanˈˈ.—Prov. 22:29.
2. Kwa ˗bha mɛn ˗nu ꞊klaŋ ˗kë ˗a ˈka ꞊kwɛɛ˗ ˗blɛɛsü ˗nu ˈnën ˈwo ˗tɔ ˗mën?
2 Kwa ˗bha mɛn ˗nu ꞊klaŋ ˗kë ˗a ˈka ꞊kwɛɛ˗ ˗blɛɛsü ˗nu: ˗Ya ˈgo Biblö ˗bha, mɛn ˗nu ꞊klaŋ ˗kë ˗a ˈka ꞊kwɛɛ˗ ˈˈwɛɛ ˈbha ˗nu ˗mɛɛn ˈö kwa dua ˈdhö ˗mü kö ˈkwa yö kë ˗an ˈka? ꞊Kwɛɛ˗ ˗blɛɛsü ˈö kwa ˗gɔ ˈö ˈkwa˗ sü ˈö ˈkwa gagade ˈö Biblö ˈgü ˗a ˗zɔn mɛn ˗nu ˗dhɛ ˗a ˈka ˈyö ˗tɔ Qu’enseigne réellement la Bible ? ꞊Ya kë ꞊dhɛ kwa ˗bha ꞊klaŋdhiʋ̈nën ꞊ya ɲën ˈsëëdhɛ ˗be ˈö bhë ˗a draansü ˗bha, ˗a ˈdhɛ ˈkwa bɔ ˗a ˗ta kö ˈkwa Biblö ˗bha ˈtɔŋ˗ ˗gɛngbandhɛ ˗nu ˗ya ꞊bhlëë ˈgü ˗kɔ ˗nu ˗zɔn ˗a ˗dhɛ ˈyö ˗tɔ « Gardez˗vous dans l’amour de Dieu » ˈDhɛ ˈö ˗kë ˈˈdhʋ̈, kwa dua ˗mü kö ˈsëëdhɛ ˗be ꞊plɛ ˈwo bhë ˈkwa dɔ mɛn ˗nu ꞊klaŋ ˗kë ˗an ˈka ˗dhɛ ˈka. ˈSëëdhɛ ˗be ˈnën ˈbha ˗nu dua ˗mü kö ˗wo kë kwa ˗bha mɛn ˗nu ꞊klaŋ ˗kë ˗a ˈka ꞊kwɛɛ˗ ˗nu ˈˈkpɔɔ ˈgü. Kwa ˗bha ꞊kwɛɛ˗ ˗blɛɛsü ˗nu ˈö ˈkwa bɔ ˗an ˗ta ˈö ˈkwa Biblö ˗zɔn mɛn ˗nu ˗dhɛ ˗sü zübho, ˗a do ˈnën ˗tɔ Nɔɔn˗ ˗së ˗nu ˈwo go ˗Zlan ˈˈpiʋ̈! ꞊Ya kë ꞊dhɛ kwa ˗bha ˗zlanwopödhɛ ˈgü mɛn ˗nu ˈwo mü ˈwaa dɔ pë ˗wo pö ˗dhɛ ˈka ˗së ˈka, ɛɛnˈˈ ˈö kwa ˗bha ˈsëëdhɛ ˗nu ˈwaa ˗an ˗wo ˈgü ꞊va, ɛɛnˈˈ ˈö˗ do ˗ʒiaan ˈyaa ˗an ˗wo ˈgü, kwa ꞊mɔɔn˗ ˗bha ˈkwa ˗Ka ka ˈˈtʋ ˈto ˗Zlaan ˗wʋ ˗bha ɛɛnˈˈ ˗Ka ka ˈˈtʋ ˈto ˗Zlaan ˗wʋ ˗bha kö ˈka ˗tosɛta kë yi ꞊gban ˈka ˈsü kö ˈkwa ˗an ˗takun ˗a ˈka. Kwa ˗bha ꞊kwɛɛ˗ ˈdhɛ kwa ˗bha ˗kɔlokota ˗zɔn ꞊klaŋ ˗nu ˗dhɛ ˈyö ˗tɔ Qui fait la volonté de Jéhovah ? Video ˈbha ˗nu ˈwo ˗kë ꞊dhɛ ˗Mën ˈö ˗kë ˈkwa ˗dho Biblö draanˈˈ?, Que se passe˗t˗il dans une Salle du royaume ?, waa Dieu a˗t˗il un nom? ˗nu ˈdhö bhë, ˗wo ꞊mɔɔn˗ ˗bha ˈwo kwa ˗takun mɛn ˗nu ˗kë Yesu ˗bha gwëëˈˈ ˈka ˗sü ˗bha. ꞊Kwɛɛ˗ ˗nu ˈwo bhë kwa dua ˗mü kö ˈkwa yö ˗kë ˗an ˈka ˗sü draanˈˈ.
3. −Mën ˈö Kwa ˗bha ˗Gblüdëdhɛ ˗yö ˈsëëdhɛ ˗nu ˈwo ˗dho yö ˈˈkpɛɛn ˈwo ˗dho kwa ˗takun ˗a kë ˗sü ˗bha?
3 Kwa ˗bha ˗Gblüdëdhɛ ˗yö ˈsëëdhɛ ˗dɛɛ ˗nu ˈwo ˗dho yö ˈˈkpɛɛn bhë, ˗wo ˗dho kwa ˗takun kö ˈsëëdhɛ ˗nu ˈwo kwa ˗bha yö ˗kë ˗a ˈka ꞊kwɛɛ˗ ˗nu ˈˈkpɔɔ ˈgü, ˗an ˈnën ˈbha ˈkwa ˗dho yö kë ˗an ˈka bhë, kö ˈkwa dɔ yö ˗kë ˗an ˈka ˗dhɛ ˈka ˗së ˈka. ꞊Ya kë ꞊dhɛ ˈkwa kwa ˈgü dɔ ˈˈgbɩɩ˗ kö ˈkwa yökë ꞊kwɛɛ˗ ˗nu bhë ˗an ˈka ˗së ˈka, kö ˗dhioo ˈö Pɔdhö ˗ya dɔ Timote ˗ta ˈö ˗kë: “˗Bhö ˗zʋ kë i ˗dɩ ˈgü ˗kɔ ꞊gban ˈgü, kö ˈi i ˗zʋ ˈkpɔ ˈwɔn ˗nu ˈi mɛ ˗nu ꞊klang kë sië˗ ˈka bha˗ ˈgü ˗së ˈka, i ˈgü ya ˈdho ga˗ ˗bha. ˗A ˗gɛn ˗mü ꞊dhɛ ˈbha˗ kë ˈˈdhʋ̈, i ˗dho i ˗dɩ dha, ˈi dho ˈi mɛ ˈwo ˈˈtʋ ˈto sië i ˗wʋ ˗bha bha˗ ˗nu dha ˈpö.” ˈka bhë kwa˗ ꞊bhlëë ˗ya.—1 Tim. 4:16.