1921 ˗A ˗kwɛ ˗ya kë këŋ do

˗WO ˗ZLANWOPÖ ˗ZOGBANDHE ˈKA

Biblö Draanmɛn ˗nu ꞊waa˗ pö ˈwo ˗zlanwopö, ˗an ˗bhawɔn ˗yö ˈgüdɔgbɩɩsü ˗bha. ˈMën ˗kë? ˈYö ˗tɔ ꞊dhɛ ˗wo ˗dho «nɔɔn˗ ˗së» pö ˗dekëtɩtɩmɛn ˗nu ˗dhɛ, ˈwo ˗Zlan ˗bha «˗naanzuëdhe dhɛkpaɔyi ˗dhiaŋ zë» ˈpö ˈwɔnyaakëmɛn ˗nu ˗dhɛ.

Kwa ꞊dhegblü Ɔskinö ˈö kun Kanada ˗yö ˗zlanwopö ˗zogbandhe ˈka kö kë ꞊dhɛ ˗wo ˗gban ˗a ˗gɔ. ˗Kwɛ 1921 ˈgü, ˗yö ˗kpan Metodisö ˗zlanwo ˗gɔmɛn do ˗bha. Ɔskinö ˗yö ˈö bha ˈˈdoo züdɔ ˗a ˈˈpiʋ̈, ˈö˗ pö: «Ko dua ˗mü ˈko ˈˈdoo dɔ ˗së ˈka Biblö ˗ta, kö kë ꞊dhɛ ko ˗wo ˈti ˗mɔn ˈwɔn ˈbha ˈgü, ko ꞊mɔɔn˗ ˗bha ˈko ˈto ˗a ˗së ˗ta.» ˈˈKɛɛ ˗yö ˈti kë ꞊dhɛ kɔ bhë ˗a ˈdhö. Ɔskinö ˗ya ˗pö: «˗Dhɛ yi ˈˈdoo dɔ minitö ˈnën ˈbha ˈˈpiʋ̈, gɔndënën bhë ˗yö ˗da ˈkɔɔ ˈö ö bha ˈˈkwɛɛ ˗man mü ˈˈgbɩkɩgbɩkɩ ˈka ˈö kë ꞊dhɛ ˈyaa˗ ˈwü.»

Gɔndënën ˗yö ˗gbla ˈö˗ pö: «ˈMën ˗kë ˈö ˈkaa ˈdho mɛn ˗nu ˈö ˈwaa ˗Zlan dɔ ˗an ˈˈpiʋ̈?» Kwa ꞊dhegblü Ɔskinö ˈti ˈˈwɩ. ˗Ya ˗pö ö zuʋ̈ˈˈ ˈˈpiʋ̈: ‹Mɛn ˈö ˗Zlan dɔ ˗a kë kɔ ˈnën ˈö bhë ˗ee?›

Dhɛkpaɔyi ˗dhɛ ˈö dɔ ˗a ˈˈpiʋ̈ kö ˗yö dhiaŋ˗ zë ˗ni ˈgü ö ˗bha ˗zlanwokɔɔdhö, ˗gɔndënën bhë ˗yö ꞊suawɔn ˗nu ˗blɛɛ Ɔskinö ˗bha. Ɔskinö ˗ya ˗pö: «˗Ya ˗pö mɛn ˗nu ˗dhɛ ꞊dhɛ ꞊suamɛn ˈkpii˗ ˈö ˗an dua ˈdhö ˗mü ˗wa zë ˗yö mü n ˈka.» ˈˈKɛɛ ˈwɔn ˗nu ˈwo ˈˈdhʋ̈, ˗wo ˈti kwa ꞊dhegblü ˗bha ˗zlanwopösü ˈduannu. ˗Yö ˗zlanwopö ˗kplawo ˈö ˈˈdoo dɔ mɛn ꞊va ˈˈpiʋ̈. ˗Ya pö: «˗Zlan ˗wo ˗pö ˗dhɛ ˈö bhë ˗a ˈgü ˗sü ˗kun n dhɛ ˗së ꞊dedewo. Mɛn ˈbha ˗nu ˗wa ˗pö n ˗dhɛ: ‹Yi˗ ˈwɔn dɔ ꞊dhɛ ˗Zlan ˗bha yökëmɛn ꞊dede ˗mü ü ˈka.› ˈWo˗ pö n ˗dhɛ ꞊dhɛ pë ooˈˈ pë ˈö n ˗bhawɔn ˗yö ˗a ˗bha, ˈa˗ pö wo ˗dhɛ.»

BIBLÖ ˗DRAAN ˈÖ DE ˈˈPIƲ̈ ˗SÜ WAA ˈKƆDHI ˈGÜ ˗SÜ

Biblö ˈˈDraanmɛn ˗nu ˗wo dhɛɛˈˈ ˈbha ˗nu waa ˗an ˗daa ˗nu ˈwo Biblö ˈgü, ˗an ˗ya ˈsëëdhɛ ˈwo˗ dhɛ ˗kwɛŋzu L’Âge d’Or a bhë ˗a ˈgü kö ˗wo mɛn ˗nu ˗takun Biblö ˈgüman ˗sü bha. ˗Wo ˈwɔn ˗gɔ ˈbha ˗nu ˈwo ˗gban wlüünën ˗nu ˗bha ˗an ˗ya ˗a ˈgü kö waa wo ˗mɛn ˗nu ˗wo ˗an ˈˈdoo dɔ. ˈNënmɛn ˗nu ˗wa dhɛɛˈˈ ˗nu bhë ˗an ˈkpɔ wo ˗bha ˈnën ˗nu gɔ, ˈyö ˗dhɛ ˈö ˗yɔ ˈdhö˗ ˗bha Biblö ˈgü ˗a ˗zɔn ˗an ˗dhɛ. Dhɛɛˈˈ ˗nu ˈwo ˗kë ꞊dhɛ «ˈsëëdhɛ ˗be ꞊dhɛ ˗nu ˈwo Biblö ˈgü?» ˈka bhë, ˗wo ˗bɔ ˗an ta ˈö pë ˈö ˗gban Biblö ˗bha ˗a ˗zɔn wo bha ˈnën ˗nu ˗dhɛ.˗A dhɛɛˈˈ ˈbha ˈnën ˗tɔ: «˗Wo ˗dho kletiɛn ˗dede ˗nu ˈˈpɛpɛ ˈˈklʋʋbhɔ ˗ee?» Dhɛɛˈˈ ˈö bhë ˗yö ˗dho wlüünën ˗nu ˗takun ˈö ˈwo ˗zlanwopö ˗zogbandhe ˈka.

Mɛn ˗nu ˗de ˈö ˗wo pë ꞊va dɔ Biblö ˈgü ˈˈsaadhö ˗an ˗bha dhɛɛˈˈ ˗nu waa ö ˗yɔ ˗nu ˗wo ˗kun ˗dhö. Dhɛɛˈˈ ˗nu ˈwo ˈˈdhʋ̈ ˗an ˗daa ˗kun ˈsëëdhɛ ˗be Études des Écritures ˗blɛɛsü ˈgü. Mɛn ꞊vadhɛ ˈwo˗ ˗wo pö ˗wa ꞊trɔɔn ꞊slɔɔ. ˈˈKɛɛ ˈdhɛ ˈwo yö ˗mü ˈyö ˈwo˗ pö dhɛɛˈˈ ˗nu ˈwo bhë, ˈwii ˗dho yö ˈˈkpɛnŋ ˈzü. ˈMën ˗kë?

ˈSËËDHƐ ˗BE ˗DƐƐ DO

Kwa ˈˈdhiʋ̈ʒiömɛn ˗nu ˈwo ˈkun ˈˈtʋ̈ŋ ˈö bhë ˗a ˈgü, ˗wa ˈgüman ꞊dhɛ mɛn ˗nu dua ˗mü kö ˗wo Biblö draanˈˈ ˗së ˈka. ˗A ˗wɔn ˈgü, ˗wo ˈsëëdhɛ ˗be La Harpe de Dieu ˗yö ˈˈkpɛnŋ ˗kwɛ 1921 Novanblö ˈˈsu ˈgü. Mɛn ꞊gban ˈˈpɛpɛ ˈwo ˗wɩ ˈsëëdhɛ ˗be ˈö ˈˈdhʋ̈ ˗a ˗bha, ˗wo ˗an ꞊faanmën kö ˗wa draanˈˈ wo ˗de ˈˈpiʋ̈. ˗A ꞊klaŋ ˗yö mɛn ˗nu ˗takun ˈö ˗tosɛta ˈö ˈyaa ɲën ˈö ˗Zlan ˗ya ˈˈplüün bho bhë, ˈwɔn ˈö ˗gban ˗a ˗bha ˈwo˗ dɔ. ˗Wa ˗kë ˗kɔ ˗kë ˗dhɛ?

Mɛn ˗ya ˈˈwɩ ˈsëëdhɛ ˗be bhë ˗a ˈsü ˗sü ˗bha, ˗wo ˈsëëdhɛ ˈklu ˈnën ˈbha nu ˗a ˗dhɛ kö ˗a ˈˈpian ˗dhɛ ˈö ˗dho ˗a ˗wo pö ˗ya dɔ. ˈˈDhoogɔ ˗dhɛ ˈö dɔ ˗a ˈˈpiʋ̈, ˈyö ˈwo dhɛɛˈˈ ˗nu ˈwo ˗gban ˗a ˈˈpian ˗dhɛ ˈö˗ ˗wo pö bhë ˗a ˗bha, ˗a ˈsëëdhɛ ˈklu nu ˗a ˗dhɛ. ˈSëëdhɛ ˈö ˈˈdhʋ̈ ˗a dhiʋ̈todhɛ ˈgü, ˗a ˈˈpian ˗dhɛ ˈö ˈdho ˗a pö ˈˈdhoogɔ ˗dhɛ ˈö dɔ ˗a ˈˈpiʋ̈ ˗a ˗bha ˈka ˗wa ˗ya ˗a ˗ta.

ˈˈDhoogɔ 12 ˈˈpiʋ̈, ꞊klaŋnën ˈö bhë ˗wo ˗dho ˈsëëdhɛ ˈklu nu ˗a ˗dhɛ ˗kplawo. ˗Ya kë ꞊shiö, mɛn ˗nu ˈö ˗wa kë zii ˈö ˈwaa ꞊mɔɔn˗ ˗bha kö ˗wo dho ˗zlanwopö ˈkɔ ˈgü ˈkɔ ˈgü, ˈwo ˈsëëdhɛ bhë ˗a bɔ. Anö Gaanɛ ˈö go Mivalö Pɛnsivani Zeta Zuni ˗ya ˗pö: «ˈSëëdhɛ ˗be La Harpe de Dieu ˗bha ˗yö ˈˈkpɛnŋ ˗sü ˗ya ˗kë ˈö n ꞊dhegblüdhe ꞊niɔɔnsü ˈwo˗ ˗dhɛ Teilö ˗a kë ˗yö ꞊va ˗yö ˗kë ˗dhö. ˈˈDhoogɔ ˈˈpɛpɛ ˈka, ˗yö ˈsëëdhɛ ˈklu ˈö dhɛɛˈˈ ˈdhö˗ ˗ta bhë ˗a ˗bɔ mɛn ˗nu ˗dhɛ.» ˗A ˗mɛn ˗ya ˈö bo ꞊klaŋ ˈö bhë ˗a ˈka, ˈyö ˗zlanwokɔdhigümɛn ˈbha ˗yö dho ˗a ˈˈpiʋ̈ kö waa˗ ˗nu ˈwo Biblö draanˈˈ.

YÖ ˈÖ KUN KWA ˈˈDHIƲ̈GAN ˗NI ˈGÜ

˗Kwɛ bhë ˗a ˈˈdhiʋ̈tadhɛ ˈgü, kwa ꞊dhegblü Lutɛfɔdö ˗yö ˈsëëdhɛ ˗bɔ ˗zlanwokɔdhi ˈˈpɛpɛ ˗dhɛ. ˗Ya pö ꞊dhɛ «˗Zlan ˗bha ˗Gblüdëdhɛ ˗nɔɔn pö ˗sü ˈö ˗kë ˗kwɛ ˈö yö ˗a ˈka, ˗yö mɛn ꞊vadhɛ ˗takun ˈö ˗ʒiö ˗a ˗dhɛ ˈwo kun ˈˈdhiʋ̈ ˗be ˗an ˗ta.» ˗Dhɛ ˈö go mü ˈzü ˈyö˗ pö: «Yö ˗yö ꞊kun kwa ˗bha ꞊va, kwa mɛn ˗nu ꞊faan ˈmën kö ˗wo nu ˗wo ˗da kwa ˈˈpiʋ̈ yö ˗së ˈö ˈˈdhʋ̈ ˗a kë ˗sü ˈgü.» ˗Wo ˈö˗ pö bhë, Biblö Draanmɛn ˗nu ˗wo ˗to ˗a ˈˈpiʋ̈. ˗Kwɛ 1922 ˈgü, ˗nɔɔn ˗së ˈö ˗gban ˗Zlan ˗bha ˗gblüdëdhɛ ˗bha ˗wa ˗pö wo ꞊faan ˈka ˈzü ˈgbɛ ˈö ˗ʒiö mü.