˗Kwa kwa ˗kɔ ˗ya kwa ˗maankëmɛn Yesu ˗gɔ

1. Zoova dhɔɔbhaawɔn ˈnën ˗tɔ ˗mën ꞊dɛɛ?

꞊DƐƐ, ˗Zlan ˗ya ˈˈpiʋ̈ kö ˈkwa nɔɔn˗ ˗së ˈö ˗gban ö ˗bha ˗Gblüdëdhɛ ˗bha ˗a pö ˈˈkpɔnŋtaadhɛ ˗todhʋ̈sü ˈgü. (Mak. 13:10; 1 Tim. 2:3, 4) Zoova ˗bha yö ˗wɔngbɩɩsü ˈö ˗ya ö ˗kɔ ˈˈyɛ ö Gbö dhɔɔbhaasü ˗bha kö ˗yö ˈˈdhiʋ̈sü ˗a ˈka, yö ˗mü. -Yö ꞊mɔɔn˗ ˗bha ˈö ga kwa ˈgü ꞊dhɛ ˗yö dɔ kö ˈˈkpɔnŋtaadhɛ ˈˈdhiʋ̈toyi ˗yö ˗wo, Yesu ˗dho ˈˈdhiʋ̈sü kwa ˈka, ˈö ˈkwa˗ ˗kë ꞊dhɛ ˗kɔ ˈö Zoova ˈdhö˗ ˈˈpiʋ̈ ˈkwa˗ kë ˗a ˈka, ˗a ˈdhö.—Mat. 24:14.

2. ˈMën ˈkwa dho ˗a yö ˈwɔn ˗gɔ ˈö yö ˗a ˈgü?

² ˈWɔn ˗gɔ ˈö yö ˗a ˈgü, ˗kɔ ˈö Yesu ˗yö bɔ ˗a ˈka «gwëëmi ˗towotasü ˈö ꞊kpaɔsü» ˗a ˗ta ˈö ˗zuu ˈgü ˗bhöpë nu kwa ˗dhɛ, ˈö kwa ˗kian kö ˈkwa ˗zlanwopö ˗yö ˈkpii˗ ˈö bhë ˗a kë, kwa ˗dho ˗a yö. (Mat. 24:45) ˗Kɔ ˈö mɛn ˈö ˈdhö ˈö dho ö ˗kɔ ˗ya ˗a ˈka Yesu waa gwëëmi ˗towotasü ˗an ˗gɔ, kwa ˗dho ˗a yö ˈpö.

YESU ˗YÖ ˈˈDHIƲ̈SÜ ˗ZLANWOPÖSÜ ˈKA

3. ˗Kɔmɔnwɔnbhasü ˗mɛɛn ˈö Zoova ꞊yaa˗ nu Yesu ˗dhɛ?

³ Yesu ˗yö ˈˈdhiʋ̈sü ˗ni ˈgü ˗zlanwopösü ˈka. ˈMën ˗kë ˈö ˗dho ga kwa ˈgü ˈˈdhʋ̈? Kö ˗a ˗dho dhaŋ˗ ˈgü ˗yi ˗ya ˗lo, waa ö ˗bha gwëëˈˈ ˗nu ˗wo wo ˈko ˗yö Gadhidhe ˗tɔn ꞊troo, ˈö˗ pö ˗an ˗dhɛ: «˗Kɔ ˗ziö ˈˈsɛ waa˗ dhang˗ ˗nu ˈgü ˗pë ꞊gban ˈˈpɛpɛ ˗gɔ ˗faan bha [˗Zlan] ꞊yaa˗ nu n ˗dhɛ.» ˈYö go mü ˈzü ˈö˗ pö: «˗Ka ˈdho ˈka n ˗wɔn ˗dhiang zë ˈˈsɛ ˈˈpɛpɛ ꞊gban ˈgü mɛ ˗nu ˗dhɛ.» (Mat. 28:18, 19) ˗Ya ˗zɔn ꞊dhɛ Zoova ˗ya ꞊faan nu Yesu ˗dhɛ kö ˗yö ˈˈdhiʋ̈sü ˗zlanwopösü ˈka.

4. ˈMën ˗kë ˈö dho ga kwa ˈgü ꞊dhɛ Yesu ˈˈdhiʋ̈sü ˗ni ˈgü ˗zlanwopö ˗yö ˈka ˗kplawo?

⁴ Yesu ˗ya ˗pö ˗zlanwopösü waa mɛn ˗nu ˗kë ö ˗bha gwëëˈˈ ˈka ˗sü ˗dho kë «ˈˈsɛ ˈˈpɛpɛ ꞊gban» ˈgü. ˗Ya ˗pö ö ˗bha gwëëˈˈ ˗nu ˗dhɛ ˈzü ꞊dhɛ ö ˗dho kë ˗an ˈˈpiʋ̈ «yi ꞊gban ˈka ˈö to˗ ˈka ˈˈdhʋ̈ ˈö zun˗ ˈka ˈˈsɛ ˈˈdhiʋ̈toyi ˗bha.» (Mat. 28:20) Yesu ˗wo ˗nu ˈwo bhë ˗wa ˗zɔn ˈˈpuu ˈka ꞊dhɛ ˗yö ˗dho ˈˈdhiʋ̈sü ˗zlanwopösü ˈka ˈö dho ˈö yö ˗a ˈka ꞊dɛɛ ˗bha.

5. ˗Wo ˈö Psaume 110:3 ˈgü bhë, kwa ˗a yö ˗ni ˈgü ˈko ˈˈdhiʋ̈ ˗kɔ ˗kë ꞊dhɛ?

⁵ ˈKö ˗kë ꞊dhɛ mɛn ˗nu ˈwo dho ˗zlanwopö ˈwii ˗dho kë ꞊va ˈˈtʋ̈ŋ ˗totaabhasü ˈgü, Yesu zuʋ̈ˈˈ ˈˈdhiʋ̈ ˈti ˈˈtɛ ˗a ˈwɔn ˈgü. ˗Ya ˈwɔn ˗dɔ ꞊dhɛ ˗wo ˈö Psaume ˗bɛnzëmɛn ˗ya to ˈˈdhiʋ̈ ˈö˗ pö, ˗yö ˗dho yö ˈko ˈˈdhiʋ̈. ˗Ya ˗pö: «Ü ˗dhɔkëmɛn ˗nu ˗dho wo ˗de nu ˈˈwɛɛwɛ ü ˗bha ˈˈsɔdha ˗nu luuˈˈ ˈˈtʋ̈ŋ ˈka.» (Ps. 110:3) ꞊Ya kë ꞊dhɛ ka ˗kɔ ˗yö ˗zlanwopösü ˈö bhë ˗a ˈgü, kö ka ka ˗kɔ ˗da ˗ni ˈgü Yesu waa gwëëmi ˗towotasü ˗an ˗dhɛ. ˗Ya ˈgo mü ˈzü kö ˗wo ˈö Biblö ˗ya to ˈˈdhiʋ̈ ˈö˗ pö ka˗ yö ˗ni ˈgü ˈko ˈˈdhiʋ̈. ˗Zlanwopö ˗yö ˗yö kë ˗ni ˈgü, ˈˈkɛɛ ˗a ˗dhɛ ˈˈgbɩɩdhɛ ˗yö mü.

6. ˈWɔn ˈˈgbɩɩ˗ ˗mɛɛn ˈö ˗Gblüdëdhɛ nɔɔnpömɛn ˗nu ˈdhö bɔ ˗ni ˈgü ˗a ˈgü ꞊dɛɛ?

⁶ ˈWɔn ˈˈgbɩɩ˗ do ˈö ˗Gblüdëdhɛ ˗nɔɔnpömɛn ˗nu ˈdhö bɔ ˗ni ˗a ˈgü ˈyö ˗tɔ ˗gban ˗an ˗gɔ ˗sü. ˗Ta ˗yö ˗Zlan ˗bha ˗mɛn ˗nu, ˗zlanwo ˗gɔmɛn ˗nu waa ˈˈsɛkɔɔnmɛn ˗nu ˗wo ꞊sua ˗nu ˗kë kwa ˗bha. ꞊Sua ˗nu ˈwo ˈˈdhʋ̈ ˗wo ꞊mɔɔn˗ ˗bha ˈwo kwa ˗bha mɛn ˗nu, kwa dɔmɛn ˗nu waa kwa yökëyɔɔ ˗nu ˗blü kö ˗wo ˈˈgbɩɩdhɛ wɔ kwa ˗ta, kö ˈkwa ˈˈkan Zoova ˗dhɔkësü waa ˗zlanwopösü ˗bha. ˈˈSɛ ˈbha ˗nu ˈgü, kwa ˈyɔɔ˗ ˗nu ˗wa ˈˈslö ˗mɛɛn kö ˈwo ˈˈsuʋ̈ ˗da kwa ˈgü, ˈö ˈwo kwa ꞊dhegblü ˈbha ˗nu kun ˈwo ˗an ˗da ˗kasho ˈgü. Pë ˗nu ˈwo ˗an kë ˗ni ˈgü kwa ˈka ˈˈdhʋ̈, ˗a ˈwɔn ˈyaa kwa ˈkun. Yesu ˗ya ˗to ˈˈdhiʋ̈ ˈö˗ pö: «Ka ˗san ˗dho mɛ ˈˈbhɩɩ˗ ˗nu kë [ . . . ] n ˗wɔn ˈgü.» (Mat. 24:9) Kwa ˗san zë ˗kɔ suu ˈö ˈˈdhʋ̈ ˗ya ˗zɔn ꞊dhɛ kwa ˈˈdhiaa ˗yö Zoova ˈgü. (Mat. 5:11, 12) Dügɔmɛn ˈnën mɛn ˗nu ˗blü kö ˗wo ˗gban kwa ˗gɔ. ˈˈKɛɛ Yesu ˈgü ˗yö ˈˈgbɩɩ˗ ˈgbɛ ˈö ˗ʒiö ˗a ˈka Sɔtraan ˗ta. Yesu ˗bha ˗takundhe ˈsaa˗ ˈgü, nɔɔn˗ ˗së ˈö bhë ˗yö pö ˗ni ˈgü mɛn ˗nu ˗dhɛ ˈˈsɛ ˈˈpɛpɛ ˈgü. ˈPë ˗kë ˈkwa˗ pö ˈˈdhʋ̈, ˗kwaa ˗ga.

7. ˗Mën ˈö˗ ˗zɔn ꞊dhɛ ˗wo ˈö ˗ya ˗sü ˈka ˗Dhɛkpaɔ dhiaˈˈ ˈsëëdhɛ 14:6, 7 ˈgü bhë, ˗yö yö ˗ni ˈgü ˈko ˈˈdhiʋ̈?

⁷ Kwa ˗bha ˗zlanwopö ˗yö ˗dhɛ ˈˈgbɩɩdhɛ ˈbha ˈnën ˗tɔ dhiaŋzë mɛn ˗nu ˈö kwaa˗ ˗nu kwa ˗wo ˈyaa do ˗an ˗dhɛ ˗sü. ˈˈKɛɛ Yesu ˗ya ˗pö bɔmɛn Zan ˗dhɛ ˈˈɲɛɛn ˈgü ꞊dhɛ ˈwɔn ˈö bhë ˗yö ˈti dho kwa ˗kɔ ˈkun nɔɔn˗ ˗së pö ˗sü ˗bha. (˗Dhɛkpaɔ dhiaˈˈ ˈsëëdhɛ 14:6, 7 ˗wo pö.) ˗Kɔ ˗kë ꞊dhɛ? Kwa mɛn ꞊va ꞊dede ˗takun ˗ni ˈgü kö ˗wo ˗Gblüdëdhɛ nɔɔn˗ man. ˈˈKpɔnŋtaadhɛ ˗todhʋ̈sü ˈgü ꞊dɛɛ, mɛn ˗nu ꞊mɔɔn˗ ˗bha ˈwo kwa ˗bha ˈsëëdhɛ ˗nu ˗wo pö jw.org ˗ta ˗wo ˈö ˗ʒiö 1.000 ˗ta ˗an ˈgü. ˗A ˗de ꞊ʒiaan kwa ˗bha ˈsëëdhɛ ˗be Zuʋ̈gblüdhi ꞊slɔɔ ˗toëpö ˈka! ˈö ˈkwa bɔ ˗a ˗ta ˈkwa Biblö ˗zɔn mɛn ˗nu ˗dhɛ bhë, kwa ˈˈdhiʋ̈ʒiöwomɛn ˗nu ꞊waa˗ kë ˈkwa˗ dhiëëta ˗wo ˈö ˗ʒiö 700 ˗ta ˗an ˈgü. Kwa video ˗nu ˗yökë ˈpö ˈˈbhʋbhʋ ˗nu ˗bha ˈka, ˈö ˈkwa ˈˈɲɛɛntiimɛn ˗nu ˗bha ˈsëëdhɛ ˗nu ˗yökë. ˗Wo ˗nu ˈö Biblö ˗yö ˗an to ˈˈdhiʋ̈ ˈö˗ pö kwa ˈˈɲan ˗yö ˗da ˗ni ˈgü ˗an ˗bha ˗yökodhiʋ̈sü ˈgü. ˗Wo suu ˈˈpɛpɛ pömɛn ˗nu ˗wo «˗wo ˈˈslʋ̈ʋ̈slʋ̈» ˈö go Biblö ˈgü ˗a draanˈˈ ˗ni ˈgü. (Zach. 8:23; Soph. 3:9) Yesu ˈö ˗kɔmɔnwɔnbhasü ˈdhö˗ ˗gɔ ˗a ˗bha ˈˈdhiʋ̈sü kwa ˈka ˗sü ˈnën˗ ˈsaa˗ ˈgü ˈö ˈwɔn ˗nu bhë, ˈwo ˗kë.

8. ˈWɔn ˗së ˗nu ˗mɛɛn ˈkwa ˗an ꞊slɔɔ kwa ˗bha ˗zlanwopösü ˈgü?

⁸ ꞊Dɛɛ, mɛn ˗nu ˈwo ˗ʒiö 8.000.000 ˗ta ˈwo ˈˈsɛ 240 ˈgü ˗wo Zoova ˗bha ˗kɔlokota ˈgü. ˗Kwɛ ˈˈpɛpɛ ˈka, ˗a mɛn ˈˈgblü ꞊va ˗wo ˗bɔ ˈˈyi ꞊bhaa. ˈˈKɛɛ ˗a ˈdhɛ ˗së ˈzü ˈyö ˗tɔ kletiɛn ˗dɛɛ ˗nu ˈwo ˈˈdhʋ̈ ˗wo ˈˈklʋʋsë ˗nu ˗draan, ˈö ˈwo ˗kë «mɛn suu ˗dɛɛ» ˈka. (Kodh. 3:8-10) ˗A mɛn ꞊vadhɛ ˗wa ˈˈkan ˈˈɲangüyaadhɛ, ˈˈvaanvandhɛ, mɛn ˗zë ˈgü zë ˗sü waa ˈˈsɛ ˗takozësü ˗bha. ˗A pö ˈö Biblö ˗ya wo Isaïe 2:4 ˈgü ꞊dhɛ «˗wo ˈti ˗dho ˗gblü gɔn ˗sü draanˈˈ» bhë, ˗yö yö ˗ni ˈgü ˈko ˈˈdhiʋ̈ ˗an ˗bha. Kwa ˗bha ˈgüdɔgbɩɩsü kö ˈkwa kë mɛn suu ˗dɛɛ ˈka bhë, ˗yö mɛn ˈˈwɛɛ ˗nu ˗ɲɔɔn Zoova ˗bha ˗kɔlokota ˗bha, ˈö ˈkwa˗ ˗zɔn ꞊dhɛ kwa ˈto ˗ni ˈgü kwa ˗maankëmɛn Yesu Klito ˗bha ˈwɔnzuan ˈˈpiʋ̈. (Zan 13:35; 1 Piɛ. 2:12) ˈMën kwa ˗takun ˗a ˗kë ˈˈdhʋ̈ ˗sü ˗bha? Yesu ˈnën ꞊faan ˈö kwa ˗bhawɔn ˈdhö˗ ˗bha ˗a nu kwa ˗dhɛ.

YESU ˗YA YÖ NU GWËËMI DO ˗DHƐ

9. ˈKwa ˗dhɛ ˗ga Matiö 24:45-47 ˈgü, ˗mën ˈö Biblö ˗ya to ˈˈdhiʋ̈ ˈö˗ ꞊blɛɛ ˈö ˗gban kwa ˗bha ˈˈtʋ̈ŋ ˈö yö ˗a ˗bha?

⁹ ˗Bhö Matiö 24:45-47 ˗wo pö. Yesu ˗ya ˗pö ˈˈtʋ̈ŋ ˗totaabhasü ˈgü, ö ˗dho ö ˗kɔ ˈˈyɛ «gwëëmi ˗towotasü ˈö ꞊kpaɔsü» ˗a ˗bha kö ˗yö ˗zuu ˈgü ˗bhöpë nu mɛn ˗nu ˗dhɛ. ꞊Ya kë ˈˈdhʋ̈, kwa ꞊mɔɔn˗ ˗bha ˈkwa˗ pö ꞊dhɛ gwëëmi ˈö bhë, ˗yö ˗dho yö ˈˈgbɩɩ˗ ꞊dede kë kwa ˗bha ˈˈtʋ̈ŋ ˈö yö ˗a ˈgü. Pë ꞊dede ˈö˗ ˗kë yö ˗mü. Kwa ˗maankëmɛn Yesu ˗yö ö ˗kɔ ˗yɛ ˈˈɲɔn ˗a ꞊troo ˗nu kpö ˈdɛdɛ ˗bha kö ˗wo ‹˗zuu ˈgü ˗bhöpë nu› ˗Zlan ˗dhɔkëmɛn ˗nu waa wo ˗bha Biblö ꞊klaŋnën ˗nu ˗an ˗dhɛ «˗a nu ˈˈtʋ̈ng ˗bha.» ˈˈKɛɛ ˈˈɲɔn ˗a ꞊troo ˗nu ˈwaa wo ˗de kë ꞊dhɛ mɛn ˗nu ˈwo to ˗an ˗gɔmɛn ˗nu ˈdhö. (2 Ko. 1:24) Mɛn ˈwo˗ sü ꞊ʒiaan ˗Zlan ˗bha ˈˈsɛgümɛn ˗nu ‹˗gɔmɛn waa ˗an ˗bha ˈˈdhiʋ̈sümɛn› ˈka, ˈyö ˗tɔ Yesu.—Is. 55:4.

10. ˈSëëdhɛ ˗be ˗nu ˈwo pë ˈˈbin ˗ta bhë, ˗a ˗mɛɛn ˈö ü ˗takun ˈü ˗da gagade ˗ʒian ˗ta?

¹⁰ ˈÖ sü ˗kwɛ 1919 ˗bha ˈö yö ˗a ˈka ꞊dɛɛ ˗bha, gwëëmi ˗towotasü ˗ya Biblö ˗draan ˗a ˈka ˈˈsëëdhɛ ꞊va yö ˈˈkpɛɛn. ˈˈSëëdhɛ ˗nu ˈwo ˈˈdhʋ̈ ˗wa mɛn ˗nu ˗takun kö ˗wo gagade ˈö Biblö ˈgü ˗a draanˈˈ ˗blɛɛsü wo. ˗Kwɛ 1921 ˈgü, gwëëmi ˗yö ˈsëëdhɛ ˗be La harpe de Dieu ˗yökë kö ˗yö mɛn ˗nu ˗takun kö ˈwɔn gaga ˗nu ˈwo Biblö ˈgü ˗wa draanˈˈ. ˈDhɛ ˈˈtʋ̈ŋ ˗nu ˈwo ʒiö ˗ni ˈgü, ˗wo ˈsëëdhɛ ˈbha ˗nu ˗yö ˈˈkpɛɛn ˈzü. ˈSëëdhɛ ˗be ˗mɛɛn ˈö ü ˗takun ˈö kwa Dë ˈö dhaŋ˗ ˈgü ˈü˗ dɔ, ˈö˗ ˗dhɔ ˗da ü ˈgü? ˗A ˗dhɛ ˈwo˗ ˗dhɛ « Que Dieu soit reconnu pour vrai !, » La vérité qui conduit à la vie éternelle, Vous pouvez vivre éternellement sur une terre qui deviendra un paradis, La connaissance qui mène à la vie éternelle, Qu’enseigne réellement la Bible ?, Biblö ˗ya ˗pö kwa ˗dhɛ ꞊dhɛ? ɛɛnˈˈ kwa ˗bha ˈsëëdhɛ ˗be ˗dɛɛ Zuʋ̈gblüdhi ꞊slɔɔ ˗toëpö ˈka! bhë, yö ˗mü ˗ee? ˈSëëdhɛ ˗nu ˈwo bhë, ˗wo ˗an ˗yökë kö ˗wo kwa ˗takun ˈkwa mɛn ˗nu kë Yesu ˗bha gwëëˈˈ ˗nu ˈka. ˗A ˗dhɛ ˈö ˈdhö, ˗yö ˗yö ˈˈkpɛɛn ˈˈtʋ̈ŋ ˗së ˗bha, ˈyö sü ꞊dhɛ pë ꞊dede ˈö mɛn ˗nu ˗bhawɔn kun ˗an dɔ ˗sü ˗bha kö ˗wo kë Yesu ˗bha gwëëˈˈ ˗nu ˈka ˈˈtʋ̈ŋ ˗nu ˈwo ˈˈdhʋ̈ ˗an ˈgü, ˈyö ˈwo˗ ˗ya ˗an ˈgü.

11. ˈMën ˗kë ˈö mɛn ˈˈpɛpɛ kwa ˗bhawɔn ˈdhö ˗zuugü ˗bhöpë ˗bha?

¹¹ Biblö ꞊klaŋnën ˗nu dosɛnŋ ˈyaa ˈnën ˗an dua ˈdhö ˗mü kö ˈwɔn ˈö ˗gban Zoova waa Biblö ˗an ˗bha ˗wo ˗an ˈˈpiʋ̈ ˈpɔn. Mɛn ˈˈpɛpɛ kwa ˗mü. ˗A ˗wɔn ˈgü bɔmɛn Pɔdhö ˗ya ˗pö: «˗Bhöpë ˈdhɛ ˈkö bha ˗yö ˈmɛ ꞊wa ˗kian ˗a ˗bha ˈˈta bha˗ ˈsü ˗sü ˈgü [ . . . ] bha ꞊në˗ ˗nu ˗bha ˈka.» Pɔdhö ˗ya ˗pö ˈzü pë ˗nu ˈwo Biblö ˈgü ˗an ˗ya ꞊bhlëë ˈgü ˗sü ꞊mɔɔn˗ ˗bha ˈö kwa ˗takun kö ˈkwa «ˈwɔn ˗së waa˗ ˈwɔn yaa ˗nu ˗bho ˈko ˈˈpiʋ̈ ˗sü ˗yaki dɔ.» (Ebl. 5:14) ˈˈTʋ̈ŋ ˈö ˈkwa˗ ˈgü yö, Zoova ˗bha ˈtɔŋ˗ ˗nu ˗ya ꞊bhlëë ˈgü ˗sü ꞊mɔɔn˗ ˗bha ˈö ˗kë ˈˈgbɩɩ˗ ꞊dedewo, ˈyö sü ꞊dhɛ mɛn ꞊vadhɛ ˈˈtakɔ ˗ya kë ˈya˗. ˈˈKɛɛ Yesu ˗yö pë ˈˈpɛpɛ ˗kë kö pë ˗nu ˈwo dho kwa ˗bha ˗zoyödhe kë ˈˈgbɩɩ˗ ˈö ˗an ˗zɔn kwa ˗dhɛ ˗Zlan ˗Wo ˈö ˗kë Biblö ˈka bhë ˗a ˈgü. Gwëëmi ˗towotasü ˈnën ˗zuu ˈgü ˗bhöpë ˈö ˈˈdhʋ̈ ˗a ˗yökë ˈö˗ ˗gblü ˗mɛn ˗nu ˗ta Yesu ˗kɔ ꞊löö.

12. ꞊Dhɛ Yesu ˈdhö, kwa ꞊bhlëë ˗ya ˗Zlan ˈtɔ ˗bha ˗kɔ ˗kë ꞊dhɛ?

¹² ꞊Dhɛ Yesu ˈdhö, ꞊bhlëë ˈö ˗Zlan dua ˈka kwa˗ ˗ya ˗a ˈtɔ ˗bha. (Zan 17:6, 26) ˗A ˈwɔnzuan ˈnën ˗tɔ ˗kwɛ 1931 ˈgü, kwa ˈtɔ ˈö ˗kë Zoova ˗bha ꞊Gbɛkiö ˗nu ˈka bhë ˗a ˗ya kwa ˗bha. ˗A ˗kë ˈˈdhʋ̈ ˗sü ˗ya ˗zɔn ꞊dhɛ ˗Zlan ˈtɔ ˗wɔn ˗yö kwa ˗gɔ ˈˈgbɩɩ˗, ˈö ˈkwa˗ ˈˈpiʋ̈ kö ˗wo kwa dɔ kwa Dë ˈö dhaŋ˗ ˈgü bhë ˗a ˈtɔ ˗bha. (Is. 43:10-12) ˗Kwɛ do ˈö bhë ˗a ˈgü, ˈdhɛ ˈkwa dɔ Ɔtɔblö ˈˈsu ˈgü, kwa ˗Zlan ˈtɔ ˗ya kwa ˗bha ˈˈGlaadhiʋ̈ ˗tɔn ˈsëëdhɛ ˗nu ˗ta. ˈDhɛ ˈkwa go mü ˈzü, ˗Zlan ˈtɔ ˈö Biblö ˈgü kwa˗ ꞊gban ˈˈpɛpɛ ˗to ö ˗wɛɛ ˈgü Traduction du monde nouveau ˈgü. Kwa ˈti˗ kë ꞊dhɛ kletiɛn ˗nu ˈö ˈwo Zoova ˈtɔ bho Biblö ˈˈpian ꞊vadhɛ ˈgü, ˗an ˈdhö.

YESU ˈˈDHIƲ̈SÜ Ö ˗BHA GWËËˈˈ ˗NU ˈKA

13. ˈMën ˗kë ˈkwa˗ pö ꞊dhɛ Yesu ˗yö ˗bɔ «gwëëmi ˗towotasü ˈö ꞊kpaɔsü» ˗a ˗ta ˈö ˈˈdhiʋ̈sü kwa ˈka ꞊dɛɛ? (Zan 6:68)

¹³ Yesu ˗bɔ «gwëëmi ˗towotasü ˈö ꞊kpaɔsü» ˗a ˗ta ˈö ˗kɔlokota ˈö dho ˗Zlan ˗dhɔkë ˗kɔ ꞊dede kë, ˗a ˗ya. ˈKwa kwa ˗zota ˗kɔlokota ˈö ˈˈdhʋ̈ ˗a ˈgü, kwa ˗kë kwa ˗de ˈgü ꞊dhɛ? ˗A ˈbha ˗ya kë kö pë ˈö bɔmɛn Piɛdhö ˗ya pö Yesu ˗dhɛ bhë, kwa˗ ˈˈpiʋ̈ ˈkwa˗ pö. ˗Ya ˗pö: «Yi ˗dho i ˈto ˈyi dho ˈˈmɛ, ˈˈkɛɛ kö ꞊sii ˈö ˈyaa yën ˗a ˗kë mɛ ˗dhɛ ˗dhiang ˗go bhi ꞊në i ˈˈdhi!» (Zan 6:68) ꞊Ya kë ˗be ꞊dhɛ kwa ˈti ˗kpan Zoova ˗bha ˗kɔlokota ˗bha, kwa ˗dho kë ˈˈmɛn ꞊dɛɛ? Yesu ˗yö ˗bɔ ˗a ˗ta ˈö pë ˈˈpɛpɛ ˈö kwa ˗bhawɔn ˈdhö˗ ˗bha kö ˈkwa ˈto ˗klu ˗sü ˈka Zoova ˗bha, ˗an nu kwa ˗dhɛ. ˗Yö kwa ˗takun ˈpö kö kwa ˗kɔ ˗yö ˗mɔn kwa ˗bha ˗zlanwopö ˗yö ˗bha. ˈGo mü kö ˈkwa kë mɛn suu ˗dɛɛ ˈka, ˈkwa kë Zoova ˗dhɛ ˗së.—Efɛ. 4:24.

14. ˗Kë Zoova ˗bha ˗kɔlokota ˈgü ˗sü ˈwɔn ˗së ˗kë kwa ˗dhɛ ˗kɔ ˗kë ꞊dhɛ Kolona Virisö ˈˈtʋ̈ŋ ˈö yö ˗a ˈgü?

¹⁴ ˈWɔn ˈˈgbɩɩ˗ ˗nu ˗wa ˗da, Yesu ˗yö ˈˈdhiʋ̈sü kwa ˈka ˗së ˈka. Kwa kwa ˗bha ˗dhɛ ˗yö Kolona Virisö ˈˈtʋ̈ŋ ˈö yö ˗a ˈgü. Yesu ˗yö ˈpë ˈkwa dho kë kö pë ˈˈdhiʋ̈˗ ˈya ˗dho kwa kë ˗a ˗zɔn kwa ˗dhɛ ˈkpakpadhö, ˈˈkɛɛ kö ˈˈkpɔnŋtaamɛn ꞊vadhɛ ˗zë ˈpë ˈwo ˗dho ˗a kë ˈwaa˗ dɔ. ˗Yö kwa ꞊faanmën kö ˈkwa pë kpa kwa ˈˈdhi waa kwa ɲun ˗an ˗ta, ˈkwa ˗naan ˗ya kwa ˈko ˗nu ꞊zinŋgü. ˗Ya ˗pö mɛn zii ˗nu ˗dhɛ ˗wo wo ꞊dhegblü ˗nu ˗dhɛ zoodhö zoodhö kö pë ˗nu ˈö ˗an ˗bhawɔn ˈdhö ˗an ˗bha ˗wa nu ˗an ˗dhɛ, ˗wo wo ˗zokë ˗an ˈˈpiʋ̈ kö ˗wo ˈto ˗klu ˗sü ˈka Zoova ˗bha. (Is. 32:1, 2) Kwa ˈˈdhiʋ̈ʒiöwomɛn ˗nu ˗wo ˗nɔɔn ˗nu ˈwo ˗bɛ ˗sü ˈka kwa ˗bha ˈˈtʋ̈ŋ ˗bha ˗an ˗bɔ kwa ˗dhɛ ˗kplawo.

15. ˗Dhioo ˗mɛɛn ˗nu ˈwo ˗an dɔ kwa ˗ta Kolona ˈˈtʋ̈ŋ ˈgü ˈwo ˗gban kwa ˗bha ˗bhɔkwëë ˗nu waa ˗zlanwopösü ˗bha? ˈYö ˗a ꞊trɔɔn ˗së ˗mɛɛn ˈkwa˗ ꞊slɔɔ?

¹⁵ Kolona Virisö ˈˈtʋ̈ŋ ˈö yö ˗a ˈgü, pë ˈkwa dho ˗a kë kö ˈkwa ˗bhɔkwëë ˗nu kë ɛɛnˈˈ ˈzü ˈkwa ˗zlanwopö, ˗wa ˗zɔn kwa ˗dhɛ. Kwa ˗to mü ˈkwa ˗ya kwa ˗bha ˗bhɔkwëë ˈsɛɛn˗ ˗nu, ˗a ˈkpii˗ ˗nu kë ˗sü ˗bha ɛntɛnɛtö ˗ta, ˈö ˈkwa ˗zlanwopö ˈsëëdhɛ ˗bɔ mɛn ˗nu ˗dhɛ ˗sü waa telefɔnö ˗kë ˗an ˗dhɛ ˗sü ˈka. Zoova ˗yö ˈdhuëë˗ ˈkpɔ ˗sü ˈka kwa ˗bha ˈgüdɔgbɩɩsü ˗bha. Betɛdhö ꞊vadhɛ ˗wa ˗pö ꞊dhɛ Zoova ˗dhɔkëmɛn ˗nu kë ˗ni ˈgü ꞊va wo ˗bha ˈˈpian ˗ta. ˗A ˗de ꞊ʒiaan ˗zlanwopömɛn ꞊va ˗wo ˗bɔ ˈwɔn ˗sɛŋbɔ ˗nu ˈgü ˈˈtʋ̈ŋ ˈö yö ˗a ˈgü.—Kpɔɔˈˈ ˈkɔnën ˈö ˗gɔ ˗kë «Zoova ˗yö ˈdhuëë˗ ˗kpɔ kwa ˗bha ˗zlanwopösü ˗bha» ˈka bhë, ˗a ˗bha.

16. ˗Mën ˈö˗ ˗wɔn dho ga kwa ˈgü?

¹⁶ Mɛn ꞊vadhɛ ˗bha ˈgü, Zoova ˗bha ˗kɔlokota ˗yö ˈwɔn ˗nu ˗ʒiö ꞊gɔa Kolona Virisö ˈˈtʋ̈ŋ ˈö yö ˗a ˈgü. ˈˈKɛɛ kwa˗ ˗yö ˈko ˗ta ꞊va ꞊dhɛ ˗dhioo ˗nu ˈwo˗ dɔ kwa ˗ta ˈˈdhʋ̈ ˗wo ˗kun ˗dhioo ˗sɛŋbɔ ˗nu ˈka. (Mat. 11:19) ˈKwa kwa ˗zota ˈˈdhiʋ̈ ˈö Yesu ˗ya sü kwa ˈka ˗dhɔkaadhe ˈgü bhë ˗a ˈgü, ˗yö kwa ˗zogban ꞊dhɛ ˈkö ˈwɔn suu ˈˈoo ˗su ˗nu kwa ˗ta ˗dhɛkpaɔ dhiʋ̈ˈˈ ˈgü, Zoova waa ö Gbö dhɔɔbhaasü ˗wo ˗dho kë kwa ˈˈpiʋ̈.—Eblö 13:5, 6 ˗wo pö.

17. ˗A ˈwɔn dɔ ˗sü ˈö ꞊dhɛ Yesu ˈnën ˈˈdhiʋ̈sü ˗ni ˈgü kwa ˗bha yö ˈka bhë, kwa kwa ˗de ˈgü ꞊dhɛ ˗a ˗wɔn ˈgü?

¹⁷ Yesu ˗bha ˈˈdhiʋ̈ ˗sü ˈka ˗sü ˗yö kwa zuʋ̈ˈˈ ˈˈgblü ˗dhi ꞊dedewo. Pë ˗nu ˈwo ˗kë ꞊dhɛ wɔkɔ ˗nu, ˈˈsɛ ˗nu ˈkwa go ˗an ˈgü ɛɛnˈˈ ˗wo ˗nu ˈö ˈkwa ˗an pö ˗an ˈdhö bhë, ˈwaa mɛn ˗nu ˈˈkan ˈkwëë˗ ˗kɔlokota ˈkwa˗ ˈgü yö ˗a ˈgü. Kwa ˗dhioo ꞊va ˗nu ˗slɔɔ ˗Zlan ˗Wo ˈgü, ˈö pë ˗nu ˈö kwa ˗bhawɔn ˈdhö ˗an ˗bha kö ˈkwa dɔ ˗zlanwopödhɛ ˈka ˈkwa ˗an ꞊slɔɔ. ꞊Ya ˈgo mü, mɛn ˈö ˈdhö ˗yö pë ˈˈpɛpɛ ˗kë kö ˈö kë mɛn suu ˗dɛɛ ˈka, ɛɛnˈˈ ˈzü kö mɛn ˗nu ˈwo to ˗an ˗dhɔ ˗yö ö kë. ˗A ˗dhɛ ˗mü kö ˈkwa kë kwa ˗de ˈgü ˈˈgɔɔgɔ, Yesu ˗bha ˗kë ˈˈdhiʋ̈sü kwa ˈka ˗mɛn ˈka ˗sü ˗wɔn ˈgü.