DHƐƐˈˈ ˗NU ˈÖ WLÜÜNËN ˗NU ˗WA KPƆ
Biblö ꞊mɔɔn˗ ˗bha ˈö n ˗takun ˗kɔ ˗kë ꞊dhɛ? (ˈˈPian 2): ˗Bhö ü ˗bha Biblö ˗wopösü kë ˈˈdhiadhiasü
«ˈMɛn ˈyaa Biblö ˗woposü ˈˈslö dɔ, ˗a ˗wopösü ꞊mɔɔn˗ ˗bha ˈö˗ ˈˈɲan ˈˈyi ˗kan.» ˈPë wlüünën do ˈwo˗ ˗dhɛ Wil ˗ya pö ˈyö bhë.
ˈˈSlö ˗nu ˈwo ˗dho ü zuʋ̈gblüdhi ü ˗bha Biblö ˗wopösü ˈgü ü˗ ˈˈpiʋ̈ ˈü ˗an ˗dɔ ˗ee? ˈWɔn ˗gɔ ˈö yö ˗yö ˗dho ü ˗takun.
Biblö ˗wo pö ꞊dhɛ ˈpë bhi ꞊dede ˈü ˗kë mü ˗a ˈdhö
˗A kë ꞊dhɛ ˈpë bhi ꞊dede ü mü ˗a ˈdhö ˈˈslö ˗nu ˈwo yö ˗an kë ˗sü ˈka:
˗Kwɛzlan do ˈö Biblö ˈgü ˈü˗ ˈˈpiʋ̈ ˈü˗ draanˈˈ ü ˗kɔ ˈˈyɛ ˗a ˗bha. Ü ꞊mɔɔn˗ ˗bha ˈü ü ˗kɔ ˗yɛ ˈwɔn ˈbhaa ˈö ˗kë ˗a ˗bha ɛɛnˈˈ Biblö ˈˈɲan do ˗bha nɔɔn˗ ˗së ˈsëëdhɛ ˈgü. Ü ꞊mɔɔn˗ ˗bha ˈpö kö Biblö ˗wo pö ˗sü ˗nu ˈwo ꞊dhɛ ˗kwɛzlan bho ˗sü ˈdhö ˈö ˈwo jw.org ˗ta bhë ˈü ü ˗kɔ ˈˈyɛ ˗a ˗kwɛzlan do ˗bha.
˗A ˗kwɛzlan ˗wo pö: Ü ꞊mɔɔn˗ ˗bha ˈü˗ pö ü do ˈka ɛɛnˈˈ ˈzü ˈö kaa ü ˈˈtɔŋdë ˗nu ɛɛnˈˈ ü ˗bha ˈkɔdhigümɛn ˗nu ˈka˗ pö ka ˗wo ˗ta. Mɛn do ꞊mɔɔn˗ ˗bha ˈö ˗kë ˗a ˗kwɛzlanbhomɛn ˈka, ˈö ˈmɛn ˈwo to ˈwo ˗kë ˗a ˗kwɛzlan ˈgümɛn ˗nu ˈka.
ˈˈSlö ˗nu ˈwo yö ˗a do ɛɛnˈˈ ˗a ꞊va ˈgüdan:
Pë ˈˈbin ˗nu ˈwo ˗gban ˗a ˗kwɛzlan ˗bha ˗an ˗yökë. Ɛɛnˈˈ ˈzü ˗kɔ ˈö˗ ˈwɔn ˗yö zübho ˗a ˗bha ˈö yö˗ ˈka ˗a ˈˈdhiʋ̈todhɛ ˗bha, ˗a pë ˈˈbin ˗nu ˗yökë. ˗Bhö pë ˗bɛnzë ˗an ˗bha kö ˗kɔ ˈö ˈwɔn ˈdhɛ ˈö ˈdhö ˈö ˗kë ˗a ˈka ˈü˗ pö.
ˈMɛn ˈbha ˈö ˗klu ˗Zlan ˗bha ü˗ ˗bha ˗kwɛzlan ˗wo po ˗ni ˈgü, ˗bhö ˗a ˗bha ˈˈklʋʋsë ˗nu waa˗ këwɔn ˗nu ˗bɛnzë kö ˈü ˗an ˗gban ˈdhuëë˗ ˗nu ˈö ˗an ꞊slɔɔ ˗an ˗bha.
˗A ˗kwɛzlan kë ꞊dhɛ ˈwɔn ˈö kë ˗ni ˈgü ꞊dɛɛ ˗a ˈdhö. ˗Bhö ü ˗zota ˗a ˗kwɛzlan ˈgü kö ˈü˗ ˗wɔn blɛɛˈˈ ꞊dhɛ ˈwɔn ˈö kë ˗ni ˈgü ˗a ˈdhö, kö ˈü mɛn ˗nu ˈö ˗an ˗bha ˗kwɛzlan ˈdhö ˗mü waa mɛn ˗nu ˈö ˗kë ˗an ˈˈɲaanka ˈü ˗an dhɛɛˈˈ ˈkpɔ.
Mɛn ˗nu ˈö ˈwo ˈwɔn yaa ˗kë ˗a ˗kwɛzlan ˈgü, ˈpë ˈwo ꞊mɔɔn˗ ˗bha ˗wa kë ˗be, ü ˗zota ˗a ˈgü. ˗A ˈwɔnzuan ˈnën ˗tɔ ˈˈsuʋ̈ ˗yö Piɛdhö ˗kë ˈö˗ pö ˈyaa Yesu dɔ. (Makö 14:66-72) ˗Yö ꞊mɔɔn˗ ˗bha ˗be ˈö˗ ˈwɔn ˈˈɲanbhɔ ˗së ˈka ˗kɔ ˗kë ꞊dhɛ?
꞊Ya kë ꞊dhɛ ˈwɔn ˗nu ˈwo ˗kë ü ˗mɔn ˗an ˗bɛnzë ˗sü ˗bha, ü ꞊mɔɔn˗ ˗bha kö ˈwɔn ˈbha ˈö ˗kë Biblö ˈgü ˈü˗ ˗yökodhiʋ̈ ˗së ˈka ˈü˗ ˗bɛnzë. ˗Gleŋ ˗nu ˈö˗ ˗kwɛzlan ˗ya ˗da kwa ˗bha, ü ꞊mɔɔn˗ ˗bha ˈü˗ ˗ya ˗a ˈgü ˈpö.—Wlɔmö 15:4.
Ü ꞊mɔɔn˗ ˗bha ˈü Biblö ˗bha ˗kwɛzlan ˗wo pö ꞊dhɛ ˈwɔn ˈö kë ˗ni ˈgü ˗a ˈdhö.
˗A ˈˈpiʋ̈ ˈpɔn!
Kö ˈwɔn ˈsɛɛn˗ ˈˈpɛpɛ ˈwo ˗kwɛzlan ˈgü ˈü ü ˈˈtʋ̈ŋ kë ˗an ˈgü, ü ꞊mɔɔn˗ ˗bha ˈü pë ˗së ˗nu ˈwo ˗bin ˗sü ˈka ˗an yö. ˗A ˈbhaa ˗ya kë, ˗wo kpö do ɛɛnˈˈ ꞊plɛ ˈwo ˗kwɛzlan ˈgü ˗wo ꞊mɔɔn˗ ˗bha ˈwo ˗gleŋ ꞊va ˗da kwa ˗bha.
˗A ˈwɔnzuan ꞊nɛn: ˗Bhö Matiö 28:7 waa Makö 16:7 ˗an dan ˈkwëë.
ˈMën ˗kë ˈö Makö ˗ya pö ˈkpakpadhö ꞊dhɛ Yesu ˗dho ö ˗de ˗zɔn ˈö ˗bha gwëëˈˈ ˗nu waa «Piɛdhö» ˗nu ˗dhɛ?
Pë ˈö˗ ˗zɔn: ˈWɔn ˗nu ˈwo bhë wo ˈti kë Makö ˈˈɲaan ˈka, ˗a ˈbhaa ˗ya kë kö Piɛdhö ˈnën˗ ꞊blɛɛ ˗a ˗dhɛ.
Pë ꞊bhlëësü ˈö ˗bin ˗sü ˈka: ˈDhɛ Piɛdhö ˗ya man ꞊dhɛ Yesu ˗ya ˈˈpiʋ̈ ˈö ˗kpan ˗a ˗bha, ˈmën ˗kë ˈö˗ zuʋ̈ˈˈ ˗yö ˈwaannu? (Makö 14:66-72) Yesu ˗kun Piɛdhö ˈˈtɔŋdë ˈˈgbɩɩ˗ ˈka ˗kɔ ˗kë ꞊dhɛ? Ü ˗dho ʒiö ˗a ˗bha ˈwɔnzuan ˈˈpiʋ̈ ˗kɔ ˗kë ꞊dhɛ kö ˈü kë mɛn ˈˈwɛɛ ˗nu ˈˈtɔŋdë ꞊dede ˈka?
˗Kwɛzlan ˗nu ˈwo Biblö ˈgü ˈbha˗ ˗wo pö ꞊dhɛ ˈpë bhi ꞊dede ˈü˗ ˗dhɛ ˈgü ˗a ˈdhö, ˈbha˗ ˈˈpiʋ̈ ˈpɔn ˗së ˈka, Biblö ˗wopösü ˗dho kë ü ˗dhɛ ˈzü ˈˈdhiadhiasü.