Zedhizadhɛmö ˈgü ˗ya shiʋ̈ˈˈ

Zuda ˗mɛn ˗nu ˗wo ˗kan Zoova ˗bha ˗gɛnɲan ˈka ꞊va ˈö ˈwo ꞊sua ˗zlan ˗nu ˗dhɔkë. Zoova ˗yö pë ˈˈpɛpɛ ˗kë ˗kwɛ ꞊va ˈˈpiʋ̈ kö ˈö ˗an ˗takun. ˗Yö ö ˗wodhiʋ̈lomɛn ˗nu ˗bɔ ˗an ˈˈpiʋ̈ kö ˗wo ˗an ꞊kpɔɔ, ˈˈkɛɛ wo ˈti wo ˈˈtʋ ˈto ˗an ˗bha. ˗Wo ˈlëë˗ ˗dɔ ˗Zlan ˗wodhiʋ̈lomɛn ˗nu ˈwo bhë ˗an ˗bha. ˈMën Zoova ˗ya ˗kë kö ˗wo ˈˈkan ꞊geebɔ ˗dhɔkësü ˗bha?

Babidhɔnö ˗gblüdë Nabukodonozɔ ˗kɔ ˗yö ˗kun ʒiö ˗ni ˈgü ˈˈsɛgɔ ˗nu ˗gɔ do do ˈka. ˈˈTʋ̈ŋ ˗blɛɛsü ˈö˗ ˗kɔ ˗yö ˗ʒiö ˗a ˈka Zedhizadhɛmö ˗dhɛ ˗gɔ bhë, ˗yö ˗gblüdë Ʒoakinö, ˗gblüdë gbö ˗nu, ˈˈsɔdha waa ˈˈdhü ˈˈɲënmɛn ˗nu ˗kun ˈö dho ˗an ˈka Babidhɔnö. ˗Yö pë ꞊bhlëësü ˈˈpɛpɛ ˈwo kun Zoova ˗dhɔkëgükɔ ˈgü ˗an ˗sü, ˈö Sedesiasö ˗kë ˗gblüdë ˈka Zuda ˗ta.

˗A züdɔdhɛ ˈgü, Sedesiasö ˗kun ˈwɔn man ˗ni ˈgü Nabukodonozɔ ˗ta. ˈˈKɛɛ ˈˈsɛgɔ ˗nu ˈwo kun ˗a ˗züzü waa ˗Zlan ˗wodhiʋ̈lomɛn ꞊suasü ˗nu ˗wa ˗pö ˗a ˗dhɛ ˗yö ˗gban Babidhɔnö ˗mɛn ˗nu ˗gɔ. ˈDhɛ ˗kë ˈˈdhʋ̈, ˈyö Zedhemi ˗ya pö ˗a ˗dhɛ: ‹ˈBha ꞊gɔɔgbɩɩdhɛ kë, ga ˗dho bhɔ Zuda ˗sɛ ˈgü, din ˗dho ˗da, ˈö ˈˈyua ˗yö sɔ.›

ˈDhɛ Sedesiasö ˗yö ˗gblüdëdhɛ ˗kë ˗kwɛ ˈˈsaaga ˈˈpiʋ̈, ˈyö ˗gban Babidhɔnö ˗mɛn ˗nu ˗gɔ. ˈDhɛ ˗kë ˈˈdhʋ̈, ˈö˗ pö Ezitö ˈˈsɔdha ˗nu ˗dhɛ ˗wo nu kö ˗wa ˗takun. ˈYö Nabukodonozɔ ˗de ˈpö ˈö ö ˗bha ˈˈsɔdha ˗nu ˗ya Zedhizadhɛmö ˗dhɛ ˗züzü kö ˗wa ˈkun. Zedhemi ˗ya ˗pö Sedesiasö: ‹Zoova ˗ya ˗pö ꞊dhɛ ˈbha ü ˗de nu Babidhɔnö ˗mɛn ˗nu ˗dhɛ, kaa ü ˗bha ˈˈsɛgümɛn ˗nu ka dho dha. ˈˈKɛɛ ü ˈti ü ˗de nu ˗an ˗dhɛ, ˗wo ˗dho Zedhizadhɛmö ˗dhɛ ˈˈgʋ̈ ˈwo ü ˗da ˗kasho ˈgü. ˈYö Sedesiasö ˗ya pö: ‹N ˈti dho n ˗de nu ˗an ˗dhɛ.›

ˈDhɛ ˗kwɛ do waa ö ˈgbu ˗yö ˗ʒiö, ˈö Babidhɔnö ˈˈsɔdha ˗nu ˗wo Zedhizadhɛmö ˈˈkplʋʋ ˗wü ˈwo ˈˈwo ˗da ˈˈkwipö bhë ˗a ˈka. ˗Wo Zoova ˗dhɔkëgükɔ ˗gʋ̈, ˈwo mɛn zë ꞊dedewo, ˈwo mɛn ˈˈgblü ꞊va ˗da ˗kasho ˈgü.

Sedesiasö ˗yö ˗duëë ˈö go Zedhizadhɛmö, ˈˈkɛɛ Babidhɔnömɛn ˗nu ˗wa ˗kë ˗bia ˈka. ˗Wa ˗kun Zedhiko ˗dhɛ ˈˈsuee, ˈwo dho˗ ˈka Nabukodonozɔ ˗dhɛ. Babidhɔnö ˗gblüdë ˗ya ˗kë ˈö Sedesiasö ˈˈɲan ˗yö ˗kpan mɛn ˗nu ˗bha kö ˗wa gbö ˗nu zë ˗ni ˈgü. ˈDhɛ ˗kë ˈˈdhʋ̈, ˈö Nabukodonozɔ ˗yö Sedesiasö ˈˈɲan wü ˈö˗ ˗zuö ˗kasho ˈgü. ˗Yö ˗to ˗dhɛ bhë˗ ˈgü ˈö ga. ˈˈKɛɛ Zoova ˗ya ˈˈplünŋ ˗bho Zuda ˗mɛn ˗nu ˗dhɛ ꞊dhɛ ˗kwɛ 70 ˗ya ʒiö, ˗wo ˗dho wo ꞊yɛɛkë Zedhizadhɛmö.

Wlüünën ˗nu ˈwo ˗an kun ˈwo dho ˗an ˈka Babidhɔnö bhë, ˈmën dho kë ˗an ˈka? ˗Wo dho ˈto ˗klu ˗sü ˈka Zoova ˗bha ˗ee?