Ʒoadö ˗bha ˈgüdɔgbɩɩsü

Ʒezabɛdhö ˗yö ˈnëndhe do ˗kpɔ ˈwo˗ ˗dhɛ Atali. ˗A zuʋ̈ˈˈ ˗kun ˈya˗ ˈö ˗ʒiö ˗a ˈka ö dhe ˗ta. Atali ˗kun Zudamɛn ˗nu ˗bha ˗gblüdë ˗bha dhebɔ ˈka. ˈDhɛ ˈö˗ ꞊gɔn ˗yö ga, ˗a gbö ˗yö ˗kë ˗gblüdë ˈka ˗a ˈˈgblʋʋ ˈgü. ˈˈKɛɛ ˗dhɛ ˈö˗ gbö ˗yö ga ˈpö, ˈyö ö ˗de ˗kë ˗gblüdhe ˈka Zuda. ꞊Taabha, ˗yö mɛn ˈˈpɛpɛ ˈwo ꞊mɔɔn ˗a ˗bha ˗wo ˗kë ˗gblüdë ˈka ˗an ꞊gban ˗zë. ˗Yö ö ˗de bhaanën ˗nu ˗zë ˈpö. Mɛn ꞊gban ˈˈpɛpɛ ˗kun ˈˈsuʋ̈ ˗ni ˈgü ˗a ˗gɔ.

ˈˈSaabhomɛn ˈkpii˗ Ʒoadö waa ö ˗bha dhebɔ Ʒozabɛtö ˗wa ˈwɔn ˗dɔ ꞊dhɛ pë yaa ˈnën Atali kun ˗a kë ˗ni ˈgü. ˗Wo wo ˗bha ˗tosɛta ˗dɔ ga ˗yɛ ˈˈdhiʋ̈ ˈwo Atali bhaanën do ˈwo˗ ˗dhɛ Ʒoasö ˗a ˗bin. ˗Wo ˗kun ˗a ˗to ˗ni ˈgü ˗Zlan ˗dhɔkëgükɔ ˈgü.

ˈDhɛ Ʒoasö ˗kwɛ ˗yö ˗kë ˈˈsɔɔplɛ, Ʒoadö ˗yö ˈˈkwɛnŋgɔ ˈwɔnyëë˗ waa Levi ˗gɔ ˈkɔɔmɛn ˗nu ˗kpaakwëë ˈö˗ pö ˗an ˗dhɛ: ‹˗Ka ka ˈˈɲan ˈto ˗Zlan ˗dhɔkëgükɔ ˈˈkwee ˈˈdhiʋ̈. ˈKaa dho ka ꞊kwaa mɛn ˈbha ˗zü kö ˗yö ˗da ˈkɔɔ.› ˈDhɛ ˗kë ˈˈdhʋ̈, ˈyö Ʒoadö ˗yö Ʒoasö ˗kë Zuda ˗gblüde ˈka, ˈö ˗gblüdë ˗nu ˗bha ˈfaan˗ ˗ya ˗a ꞊troo. ˈDhɛ go mü ˈö Zudamɛn ˗nu ˈwo˗ pö ˈˈgbɩɩ˗ ˈka: ‹Kwa ˗bha ˗gblüdë ˗dɛɛ ˈˈyʋʋ ˗mü!›

ˈDhɛ Atali ˗yö ˗wo ˗nu bhë ˗an man, ˈyö dho ˈˈvaandhö ˗Zlan ˗dhɔkëgükɔ ˈgü. ˗Dhɛ ˈö ˗kpan ˗gblüdë ˗dɛɛ bhë ˗a ˗bha, ˈyö˗ pö ˈˈgbɩɩ˗ ˈka: ‹ˈKa ˈˈkpënŋ˗ kë n ˗gɔ, ˈka ˈˈkpënŋ˗ kë n ˗gɔ.› ˈYö ˈˈkwɛnŋgɔ ˈwɔnyëë˗ ˗nu ˈwo bhë ˈwo ˗gblüdhe yaa bhë ˗a kun, ˈwo ˈdho˗ ˈka ˈwo˗ zë. ˈˈKɛɛ ˗a ˗dhɛ ˈö ˗gban ˗a ˈˈtakɔ yaa ˈö to ˈˈsɛgümɛn ˗nu ˗bha bhë ꞊wɛ?

Ʒoadö ˗yö ˈˈsɛgumɛn ˗nu ˗takun ko ˗wo ˗mlɛɛn ˗da waa Zoova wo ꞊zinŋgü. ˈˈSɛgümɛn ˗nu ˗wa ˗pö ˗wo dho Zoova dosɛnŋ ꞊nën ˗dhɔkë. Ʒoadö ˗ya ˗pö ˗an ˗dhɛ ˗wo Baadhö ˗dhɔkëdhɛ waa ꞊geebɔ ˗nu ꞊gban ˈˈpɛpɛ bho ˈˈshia˗. ˗Yö ˈˈsaabhomɛn ˗nu waa Levi ˗gɔ ˈkɔɔmɛn ˗nu ˗ya kö ˗wo yökë ˗Zlan ˗dhɔkëgükɔ ˈgü, kë ˈˈdhʋ̈ kö ˗wo ꞊mɔɔn Zoova ˗dhɔkë ˗sü ˗bha ˈzü ˗dɛɛwo. ˗Yö ˈˈglaadhiʋ̈sümɛn ˗nu ˗ya kö ˗wo ˗Zlan ˗dhɔkëgükɔ ˗maankë, kö ˗dhiiwɔn ˈyaa ˈdho ˗da ˗Zlan ˗dhɔkëdhɛ ˈgü. ˈDhɛ ˗ke ˈˈdhʋ̈, ˈyö Ʒoadö waa ˈˈkwɛnŋgɔ ˈwɔnyëë˗ ˗nu ˈwo dho Ʒoasö ˈka ˗gblüdë ˗nu ˗gɔ ˈkɔɔ ˈwo˗ ˗ya ˈˈgɔ ˗gbloo ˈgü. Zuda ˈˈsɛgümɛn ˗nu zuʋ̈ˈˈ ꞊nii ˗yö ˗da ꞊dedewo. ˗Wa ˈgo Atali waa Baadhö ˗dhɔkësü ˗gɔ ˈˈgan ˈgü, ˗wo ꞊mɔɔn˗ ˗bha ꞊taabha ˈwo Zoova ˗dhɔkë ˗wo ˈˈflëëgü. ˗Kɔ ˈö Ʒoadö ˗bha ˈgüdɔgbɩɩsü ˗yö mɛn ꞊vadhɛ ˗takun ˗a ˈka bhë, ü˗ ˈsuanbho ˗ee?