ˈNëngɔnnën ˗nu ˗yiishiö ˈwo ˈwɔnman Zoova ˗ta

ˈDhɛ Nabukodonozɔ ˗yö nu ˗gblüdë gbö ˗nu ˈwo go Zuda ˗an ˈka Babidhɔnö, ˈyö ö ˗bha yökëmɛn do ˈwo ˗dhɛ Asipenazö ˗ya ˗an ˗gɔ ˈˈdhiʋ̈ kö ˗yö ö ˈˈtʋ̈ŋ kë ˗an ˈgü. ˗Ya ˗pö ˗a ˗dhɛ ˗yö ˗a mɛn ˈdhɛ ˗nu ˈwo wo ˈflëëgü, ˈwo ꞊kpɔɔsü ˗an ꞊slɔɔ ˗an ꞊zinŋgü. ˗Wo ˗dho ˗an ˗kian ˗kwɛ ˗yaaga ˈˈpiʋ̈. ˗A ˗kë ˈˈdhʋ̈ ˗sü ˗dho ˗an baaˈˈ kö ˗wo kë mɛn ꞊bhlëësü ˗nu ˈka Babidhɔnö. ˗Wo ˗dho Babidhɔnömɛn ˗nu ˗wo ˈö ˗kë Akadiɛn ˈka bhë˗ pö ˗kɔ waa ˗a ˗bɛnzë ˗kɔ draanˈˈ. ˈGo mü ˗wo ˗dho ˗gblüdë waa ö ˗kɔ ꞊löö ˗mɛn ˗nu ˗bha ˗bhöpë ˗nu ˗bhö. ˈNëngɔɔn˗ ˗nu ˈwo ˈˈdhʋ̈ ˗a mɛn ˗yiishiö ˗nu ˈwo ˗tɔ Daniɛdhö, Anania, Mishaɛlö waa Azaria. ˈYö Asipenazö ˗yö Babidhɔnö ˗tɔ ˗dɛɛ ˗nu nu ˗an ˗dhɛ: Bɛshaza, Shadrakö, Meshakö waa Abɛdönego. ˗An ꞊klaŋkëkɔ ˗dɛɛ ˈö bhë ˗dho ˗a kë ˈwo ˗kan Zoova ˗dhɔkësü ˗bha ˗ee?

ˈNëngɔɔn˗ ˗nu ˗yiishiö ˈwo bhë, ˗wo ˗kun ˗a ˈˈpiʋ̈ ˈwo ˈwɔnman Zoova ˗ta ꞊dedewo. ˗Wa ˈwɔn ˗dɔ ꞊dhɛ ˗an dua ˈyaa ˗mü kö ˗wo ˗gblüdë ˗nu ˗bha ˗bhöpë ˗bhö ˈö sü ꞊dhɛ Zoova ˗bha ˈtɔŋ˗ ˗ya ˗zɔn ꞊dhɛ ˗a ˈbhaa ˗nu ˈwaa ˗së. ˈYö ˈwo˗ pö Asipenazö ˗dhɛ: ‹Dɔ ˈˈgbɩɩ˗ ˈbha ˗dho ˗gblüdë ˗nu ˗bha ˗bhöpë nu yi ˗dhɛ.› ˈYö Asipenazö ˗ya pö: ‹Ka ˈti˗ ˗bhö, ˗gblüdë ꞊yaa˗ yö ꞊dhɛ ˈˈyua ka ˗bha, ˗yö ˗dho n zë.›

Daniɛdhö ˗yö ˈˈslö do ˈbha ˗kë, ˈö˗ pö ö ˈˈɲan ˗to ˗an ˗bha mɛn ˗dhɛ: ‹˗Bhö yi gba ˈˈdhü bhɛ waa ˈˈyi ˈka ˗dhɛkpaɔyi ˗kɔŋ do ˈˈpiʋ̈. ˈGo mü kö ˈü yaa mɛn ˗nu ˈwo ˗gblüdë ˗bha ˗bhöpë ˗bhö bhë yi ˗dan ˈkwëë˗.› ˈYö ˗wɩ ˗a ˗bha.

ˈDhɛ ˈö ˗dhɛkpaɔyi ˗kɔŋ do ˗yö ˗ʒiö, Daniɛdhö waa ö ˈˈtɔŋdë ˗yaaga ˗nu ˗wo ˗kun wo ˈflëëgü ˈwo ʒiö˗ ˈka ˈnëngɔɔn˗ ˗nu ˈˈwɛɛ ˈwo to ˗an ˗ta. Zoova zuʋ̈ˈˈ ˈˈgblü ˗kun dhi ˗sü ˈka ˈö sü ꞊dhɛ ˗wo ˈwɔnman ö ˗ta. ˗Yö ꞊kpɔɔdhɛ ˗nu Daniɛdhö ˗dhɛ, ˈö˗ ˗kë ˈö ꞊mɔɔn ˈˈɲɛɛn ˗nu ˈklɔɔ˗ pö ˗sü ˗bha.

ˈDhɛ ˗dhɛkpaɔyi ˗kɔŋ do bhë ˗yö ˗ʒiö, ˈyö Asipenazö ˗yö dho ˈnëngɔɔn˗ ˗nu bhë ˗an ˈka Nabukodonozɔ ˗dhɛ. ˈDhɛ ˗gblüdë ˗yö dhɛɛˈˈ ˗nu kpɔ ˗an ˗gɔ, ˈö˗ yö ꞊dhɛ Daniɛdhö, Anania, Mishaɛlö waa Azaria ˗wo ꞊kpɔɔsü ˈö ˗an ˗zo ˈdhö ˗gban ˗sü ˈka ˈö ʒiö˗ ˈka ˈnëngɔɔn˗ ˗nu ˈwo to ˗an ˗ta. ˈYö ö ˗kɔ ˗yɛ ˗an ˗bha kö ˗wo yökë ˗a ˗bhaa ˈka. ˈYö ˗gblüdë ˗yö dhɛɛˈˈ ˗nu ˈwo ˗gban pë ˗wɔn ˈˈgbɩɩsü ˈbha ˗nu ˗bha ˗an kpɔ ˗an ˗gɔ. Zoova ˗ya ˗kë ˈwo ˗kë ꞊kpɔɔsü ꞊dedewo ˈwo ʒiö˗ ˈka ˗gblüdë ˗bha ˈwɔndɔmɛn ˗nu waa˗ ˗bha ˗dhidhakëmɛn ˗nu ˗ta.

ˈKö ˗kë ꞊dhɛ Daniɛdhö, Anania, Mishaɛlö waa Azaria ˈwaa kun wo ˗de ꞊plöö, ˗an ˗zo yö ˈti bhɔ ꞊dhɛ ˗wo Zoova ˗dhɔkëmɛn ˗nu ˈka. ˈKö ˗kë ꞊dhɛ ü ˗mɛn ˗nu ˈwaa ü ˈˈsuee, ü ˗zo ˗yö ˗bö Zoova ˗wɔn ˈka ˗kplawo ˗ee?