Dügɔmɛn ˗yö Yesu ˈgüdan

˗Dhɛ ˈö Yesu ˗yö bɔ ˈˈyi ꞊bhaa, ˈyö ˗zuu ˈˈslʋ̈ʋ̈slʋ̈ ˗yö dho ˗a ˈka ˈˈyɛɛta. Yö ˈti pëbhö ˗dhɛkpɔayi 40 ˈˈpiʋ̈, ˈö din ˗ya kun. ˈYö Dügɔmɛn ˗yö nu Yesu ˈgüdan ˈö˗ pö ˗a ˗dhɛ: ‹˗Ya kë ꞊dhɛ ˗Zlan Gbö ˗mü ü ˈka, ˗a pö ˗gwö ˗nu ˈwo ˗lo yö ˗an ˗dhɛ ˗wo ˈˈgla ˈbluu˗ ˈgü.› ˈˈKɛɛ ˈö Yesu ˗ya pö: ‹˗Yö ˗bɛnzë ˗sü ˈka ꞊dhɛ mɛnbhɩɩdhe dua ˈyaa ˗mü kö ˗yö ˗tosɛta kë ˗bhöpë dosɛnŋ ˗ta. ˗A dua ˗mü ˈpö kö ˗yö ˗tosɛta kë ˗wo ˈˈpɛpɛ ˈö go Zoova ˈˈdhii ˗a ˗ta.›

ˈYö Dügɔmɛn ˗yö Yesu ˈgüdan ˈzü ˈö˗ pö: ‹˗Ya kë ꞊dhɛ ˗Zlan Gbö ˗mü ü ˈka, ˗bhö ꞊kwaa ü ˗de ˗zü ˈü ˈgo ˗Zlan ˗dhɔkëgükɔ ˗ta ˈˈdhuŋ kö ˈü ˗puö, ˗yö ˗bɛnzë ˗sü ˈka ꞊dhɛ ˗Zlan ˗dho ö ˗bha ˈˈkiö ˗nu bɔ ˗wo wo ˗kɔ kpɔ ü ˗gɔ.› ˈˈKɛɛ ˈö Yesu ˗yö bɔ ˗Zlan ˗wo ˈsëëdhɛ ˗ta ˈö pö: ‹Ü dua ˈyaa ˗mü kö ˈü Zoova ü ˗bha ˗Zlan ˈgüdan.›

ˈYö Sɔtraan ˗yö ˗gblüdëdhɛ ˗nu, nɔɔn˗ ˗nu waa ˈtɔbhɔdhe ˗nu ˈwo ˈˈkpɔnŋ ꞊taa ˗an ˗zɔn Yesu ˗dhɛ ˈö˗ pö: ‹Kö ˈü ˈˈgblü n ˗dhɛ ˈˈshia˗ ˈü n ˗dhɔkë, ˈkö ˗kë ꞊dhɛ ü˗ ˗kë ˗gɛnɲan ˈka dosɛnŋ, a ˗dho pë ˈˈpɛpɛ ˈwo yö ˗an nu ü ˗dhɛ.› ˈÖ Yesu ˗ya pö: ‹ˈGo n ˗bha Sɔtraan, ˗yö ˗bɛnzë ˗sü ˈka ꞊dhɛ Zoova dosɛnŋ ˈnën ü dua ˈdhö ˗mü kö ˈü˗ ˗dhɔkë.›

ˈDhɛ ˗kë ˈˈdhʋ̈, ˈyö Dügɔmɛn ˗yö ö ꞊kwaa˗ ˗zü. Yesu ˗Yö ˗to ˗dhɛ do ˈö bhë ˗a ˈgü ˈö ˗Zlan ˗bha ˈˈkiö ˗nu ˗wo nu ˈwo˗ ꞊faanmën, ˈwo bhöpë nu ˗a ˗dhɛ. ˈYö Yesu ˗yö ˗ya nɔɔn˗ ˗së ˈö ˗gban ˗Zlan ˗bha ˗Gblüdëdhɛ ˗bha, ˈö ˈwo˗ bɔ ˗a ˗wɔn ˈgü bhë, ˗a pö ˗sü ˗bha. Yesu ˗bha ꞊klaŋwo ˗dhɔ ˗kun mɛn ˗nu kë ˗ni ˈgü. ˗Dhɛ ˈˈpɛpɛ ˈö Yesu ˗yö dho ˗a ˗bha, mɛn ˗nu ˗nu ˗a ꞊kee˗.