ˈˈDhiʋ̈sümɛn do waa dhebɔ ˈgügbɩɩsü ꞊plɛ

ˈDhɛ Ʒozue ˗yö ˈˈdhiʋ̈sü Zoova ˗bha ˈˈsɛgümɛn ˗nu ˈka ˗kwɛ ꞊va ˈˈpiʋ̈, ˗yö ˗ga kö ˗a ˗kwɛ ˗ya kë 110. ˈDhɛ kun ö ˈˈɲaan, ˈˈsɛgümɛn ˗nu ˗wo ˗kun Zoova ˗dhɔkë ˗ni ˈgü. ˈˈKɛɛ ˈdhɛ ga ˈwo ˗ya ꞊geebɔ ˗nu ˗dhɔkësü ˗bha ꞊dhɛ Kanaan ˗mɛn ˗nu ˈdhö. ˈDhɛ ˈö ˗kë ꞊dhɛ ˈwaa kun wo ˈˈtʋ ˈto ˗ni ˈgü Zoova ˗bha bhë, ˗yö ö ˗kwaa Kanaan ˗gblüdë Ʒabinö ˗zü ˈö ˗an ˈˈklʋʋbhɔ. ˈYö ˈˈsɛgümɛn ˗nu ˗wo ꞊bhɛɛ Zoova ˗dhɛ kö ˗yö wo ˗takun. Zoova ˗yö ˈˈdhiʋ̈sümɛn do ˈwo˗ ˗dhɛ Badhakö, ˈö dho ˗an ˗takun kö ˗wo wo ꞊yɛɛkë ˗wo ˗nu ö ˈˈpiʋ̈, ˗a ˗nu ˗an ˗dhɛ.

˗Zlan ˗wodhiʋ̈lodhe Debodha ˗yö Badhakö ˗dhɛ, ˈö˗ pö ˗a ˗dhɛ: «Zoova ˗ya ˗pö: ‹˗Bhö gɔɔn˗ ˗nu 10.000 ˈsü kö ˈka ˈdho ˗gblü gɔn Ʒabinö ˗bha ˈˈsɔdha ˗nu ˈka Kishɔnö ˈˈyiga ˈˈpian ˈta. ˗Dhɛ ˈö ü ˗kɔ dho ʒiö Sizedha ˈö Ʒabinö ˗bha ˈˈsɔdha ˗nu gɔmɛn ˈka˗ ˗gɔ, ˈyö bhë.›» ˈYö Badhakö ˗ya pö Debodha ˗dhɛ: ‹ˈBha ʒiö n ꞊kee˗, ˈyö ˈa ˗dho ˈdho.› ˈYö Debodha ˗ya pö ˗a ˗dhɛ: ‹A ˗dho ʒiö ü ꞊kee˗. ˈˈKɛɛ bhi ˈyaa ꞊nën ˈü ˗dho Sizedha zë. Zoova ˗ya ˗pö dhebɔ do ˈnën ˈö ˗dho ˗a zë.›

Debodha ˗yö ˗ʒiö Badhakö waa ö ˗bha ˈˈsɔdha ˗nu ˗an ꞊kee˗ ˈwo ˗lo Tabɔɔ ˗tɔn ˗ta kö ˈwo wo ˗de baaˈˈ ˗gblü ˗bha. ˈDhɛ Sizedha ˗ya man ˈˈdhʋ̈, ˈyö ö ˗bha ˗gblü ˗gɔn ˗a ˈka ˗gɔ ˗nu waa ö bha ˈˈsɔdha ˗nu ꞊kpaa ˈkwëe˗ ˗tɔn ˈö bhë ˗a ꞊gɛnŋdhö. ˈYö Debodha ˗ya pö Badhakö ˗dhɛ: ‹꞊Dɛɛ Zoova ˗dho ˗a kë ˈö ˗gblü ˗yö ˗dhi ü ˗gɔ.› ˈYö Badhakö waa ö ˗bha mɛn 10.000 ˗wo ꞊yɔɔ ˗bia ˈka ˗tɔn bhë˗ ꞊gɛnŋdhö kö ˈwo ˗gblü gɔn Sizedha waa ö ˗bha ˈˈsɔdha ˗nu ˈka.

ˈDhɛ ˈö ˗kë ˈdhʋ̈, Zoova ˗ya ˗kë ˈö Kishɔnö ˈˈyiga ˗yö pa. ˈYö Sizedha ˗bha ˗gblü ˗gɔn ˗a ˈka ˗gɔ ˗nu ˗wo ꞊nënŋ böö˗ ˈgü, ˈö go ö ˗bha gɔ ˈgü ˈö ˗ya ˗bialö ˗sü ˗bha. Badhakö waa ö ˗bha ˈˈsɔdha ˗nu ˗kɔ ˗yö ˗ʒiö Sizedha ˗bha ˈˈsɔdha ˗nu ˗gɔ, ˈˈkɛɛ Sizedha ˗yö ˗dha ˗an ˗gɔ ˈö ꞊duëë. ˗Yö ˗dho ˈö ö ˗bin dhebɔnën do ˈwo˗ ˗dhɛ Ʒaɛdhö ˗a ˗bha sɔ ˈkɔ ˈgü. ˈYö Ʒaɛdhö ˗yö ˈˈnɔnnɔn nu ˗a ˗dhɛ ˈö˗ mü, ˈö sɔ kpa ˗a ˗ta. ˈYö ˈˈkwlëëmi ˈˈgbɩɩ˗ ˈö bhë ˈö yi zë ˈyö ˗tɔ ꞊dhɛ ˗a ˈgü ˗kun ga ˗sü ˈka. ˈYö Ʒaɛdhö ˗yö ꞊ɲɔɔn ˗a ˗bha ˈˈlëëlë ˈka ˈö sɔ ˈkɔ ˈˈdhü ˈˈzo˗ do sü ˈö˗ ˗gban ˗a ˗gɔ ˈgü, ˈö Sizedha to ˈˈshia˗ mü ˈö ga.

Badhakö ˗yö ˗kun Sizedha mɛɛnˈˈ ˗ni ˈgü, ˈyö Ʒaɛdhö ˗yö go sɔ ˈkɔ ˈgü ˈö˗ pö: ‹˗Bhö ˗da ˈkɔɔ kö gɔndë ˈü˗ mɛɛnˈˈ ˗ni ˈgü bhë ˈa˗ ˗zɔn ü ˗dhɛ.› ˈDhɛ ˗da ˈkɔɔ, ˈyö ˗kpan Sizedha ꞊gee ˗bha. Waa Debodha ˗wo ˗ya ˈˈtan bho ˗sü ˗bha Zoova ˈˈpiʋ̈ ˈyö sü ꞊dhɛ yö ˈnën˗ ˈö˗ ˗kë ˈö ˗gblü ˗yö ˗dhi Izraɛdhömɛn ˗nu ˗gɔ. ˗Yadeflëëgüsü ˗yö ˗kë Izraɛdhömɛn ˗nu ˗gɔ ˗kwɛ 40 ˈwo dɔ ˗a ˈˈpiʋ̈ ˗a ˈgü.