˗Zlan ˈnën ˈˈsɛ waa dhaŋ˗ ˗an ˗da

Zoova ˈnën ˗tɔ kwa ˗Damɛn. ˗Yö ˈnën pë ꞊gban ˈˈpɛpɛ ˗da. ˗A ˗dhɛ ˗nu ˈö ˈkwa ˗an yö waa˗ ˗dhɛ ˗nu ˈö ˈkwaa ˗an yö bhë, ˗yö ˈnën ˈö ˗an ꞊gban ˗da. ˗Yö dɔ kö Zoova ˗yö pë ˗nu ˈö ˈkwa ˗an yö ˗an ˗da, ˗yö ˈˈkië ꞊va ꞊dede ˗da. ˗Kɔ ˈö ˈˈkië ˗nu ˈwo˗ ˈka ü˗ ˗dɔ ˗ee? ˈˈKië ˗nu ˗wo ꞊dhɛ Zoova ˈdhö. ˈKwaa ꞊mɔɔn˗ ˗bha ˈkwa ˗an yö ꞊dhɛ ˗kɔ ˈö ˈkwaa Zoova yö ˗a ˈka bhë ˗a ˈdhö. ˈˈKië ˗blɛɛsü ˈö Zoova ˗ya ˗da ˗yö ˗dho ˈö ˗kë ˗a ˗takunmɛn ˈka. ˗Ya ˗takun ˈwo ˗gbɔdënën ˗nu, ˈˈkpɔnŋtaadhɛ ˗todhʋ̈sü waa pë ˈˈwɛɛ ˗nu ˈwo to ˗an ˗da. Pë ˗së do ˈbha ˈö Zoova ˗ya nu kwa ˗dhɛ ˈnën ˗tɔ ˈˈsɛtadhɛ. ˗A ˗dhɛ ˗yö ˗së ꞊dedewo.

Zoova ˗yö ˈˈsɛ ˗pëkë kö mɛnbhɩɩdhe waa wü ˗nu ˗wo ˗tosɛta kë ˗a ˗ta. ˗Ya ˗kë ˈö ˈɲanŋ˗ ˗yö bhü ˈˈsɛ ˈta. ˗Yö ˗tɔn ˗nu, ꞊weeyi waa ˈˈyiga ˗nu ˗da ˈpö.

˗Mën ˈˈwɛɛ ˈbha ˈö ˗Zlan ˈö˗ ˗kë? Zoova ˗ya ˗pö: ‹A ˗dho ˗a kë kö blëë, tapë waa ˈˈdhü ˗nu ˗wo bhɔ.› ˈDhɛ ˗kë ˈˈdhʋ̈, ˈyö ˈˈdhü suu ˈˈpɛpɛ ˈwo bhɛ ˗ya, ˈˈtʋʋ ˗kë ˗a ˈka pë ˗nu waa blëë ˈˈbin ˗nu ˗wo ˗ya bhɔ ˗sü ˗bha. ˈYö Zoova ˗yö wü suu ˈˈpɛpɛ ˈwo ꞊wlö, ˈwo ˈˈyi ꞊bhaa, ˈwo ˗ta wo ˗gɛn ˗ta ɛɛnˈˈ ˈwo ꞊gblëë wo ˈgu ˗ta ˗an ˗da. ˗Yö wü ˈsɛɛn˗ ˗nu ˈwo kë ꞊dhɛ ˗gbeŋ ˗nu ˈdhö waa˗ ˈˈgblʋ̈gblʋ̈ ˗nu ˈwo ˗kë ꞊dhɛ biö ˗nu ˈdhö ˗an ˗da. Wü ˗mɛɛn ˈö˗ ˗tuö ˗sü ˗dhɔ ˗yö ü ˗kë?

ˈDhɛ ˗kë ˈˈdhʋ̈ ˈyö Zoova ˗ya pö ö ˗bha ˈˈkië ˗blɛɛsü ˗dhɛ: ‹˗Kwa mɛnbhɩɩdhe ˗da.› Mɛnbhɩɩdhe waa wü ˗nu ˈti dho kë do. ˗Wo ˗dho ꞊mɔɔn pë ˗nu yökësü, ˈwɔn blɛɛˈˈ ˗sü, ˈˈyɩɩtosü waa bhɛɛsü ˗bha. ˗Wo ˗dho wo ˗zokë ˈˈsɛ waa wü ˗nu ˈˈpiʋ̈. Mɛn ˗blɛɛsü ˈö ˗Zlan ˗ya ˗da ˈˈsɛ ta ü˗ ˗dɔ ˗ee? ˈBha˗ pö ˈü˗ dɔ, ˗bhö ˈwɔn ˗gɔ ˈö dɔ ˗a ˗dhɛ ˈö yö ˗a ˈˈpiʋ̈, ˗a ˗wo pö.