Yesu ˗yö bhɛɛˈˈ ˗kɔ ˗zɔn ö ˗bha gwëëˈˈ ˗nu ˗dhɛ

ˈWɔn ˈˈpɛpɛ ˈö Fadhiziɛn ˗nu ˗wa ˗kë, ˗wa ˗kë ˈˈdhʋ̈ kö ˗wo mɛn ˗nu ˈˈɲan bɔ wo ˗ta. ˗Wa ˈwɔn ˗së kë, ˗wa ˗kë ˈˈdhʋ̈ kö mɛn ˗nu ˗wa ˗dhɛ yö. ˗Wo ˗bhɛɛ ˈˈdhɛɛtadhɛ ˗nu ˈgü kö mɛn ˗nu ˗wo ˗kpan ˗an ˗bha. ˗Wo bhɛɛwo ꞊gblɛɛn ꞊gblɛɛn ˗nu ˗draan ˈö ˈwo ˗ʒiö ˗an ˈgü ˗yakwëëkëgükɔ ˗nu ˈgü waa ˗kpinŋ ˗nu ˈˈpiʋ̈; kë ˈˈdhʋ̈ kö mɛn ꞊va ˈˈtʋ ˗yö ˗da ˗an ˗wo ˈgü. ˗A ˗wɔn ˈgü, ˗a ˈbha ˗ya kë ˈdhɛ Yesu ˗yö ˗wo ˗nu ˈwo ˈˈshia yö ˗an pö, ˗a ˈwɔn ˗yö mɛn ˗nu ˗kun. ˗Ya ˗pö: ‹ˈKaa ˈdho bhɛɛˈˈ ꞊dhɛ Fadhiziɛn ˗nu ˈdhö. ˗Wo wo ˗zota ꞊dhɛ ˗wo ꞊va ˈwo ˗ʒiö ˗an ˈgü bhë ˗a ˗wɔn ˈgü, wo ˈˈdhiaa ˗dho man ˗Zlan ˈgü, ˈˈkɛɛ ˈyaa ˈˈdhʋ̈. Bhɛɛsü ˗yö mɛn ˈö ꞊bhɛɛ waa Zoova, ˗an ꞊zinŋ ˈgü ˈwɔn ˈka. ˈKaa ˈdho ʒiö ˗wo do ˈgü ˗kplawo. Zoova ˗ya ˈˈpiʋ̈ kö ˈka ka zuʋ̈piʋ̈wɔn pö ˗a ˗dhɛ.

‹˗Kɔ ˈö ˈka ˗dho bhɛɛˈˈ ˗a ˈka, yö ꞊nɛn: «Yi Dë ü dhaŋ˗ ˈgü, ü ˈtɔ ˗yö bhɔ. Ü ˗bha ˗Gblüdëdhɛ ˗yö nu. Ü dhɔɔbhaawɔn ˗yö kë ˈˈsɛ ˗ta ꞊dhɛ ˗kɔ ˈö˗ ˈka dhaŋ˗ ˈgü, ˗a ˈdhö.›» Yesu ˗ya ˗pö ö ˗bha gwëëˈˈ ˗nu ˗dhɛ ˗wo ꞊mɔɔn˗ ˗bha ˈwo ꞊bhɛɛ wo ˗bha ˗bhöpë ˗wɔn ˈgü, ˈwo ꞊bhɛɛ kö ˗Zlan ˗yö ˗an ˗bha ˈwɔn yaa ˗nu ˗bhawɔn ˈto, ˈgo mü ˈzü ˈwo ꞊bhɛɛ wo ˗dea ˈwɔn ˈˈwɛɛ ˗wɔn ˈgü.

Yesu ˗ya ˗pö ˗an ˗dhɛ: ‹˗Ka bhɛɛˈˈ ˗kplawo. ˗Ka pë ˗së ˗nu ˗dhɛ ˗kplawo ka Dë Zoova ˗gɔ. Pë ˗së ꞊nën ˈnënmɛn ˗nu ˈˈpɛpɛ ˈwo˗ ˈˈpiʋ̈ ˈwo˗ nu wo ˗bha ˈnën ˗nu ˗dhɛ. Ka ˗bha ˈnën ˗ya ˈbluu˗ ˗dhɛ ka ˗gɔ, ˗gwö ꞊nën ˈö ˈka ˗dho ˗a nu ˗a ˗dhɛ ˗ee? ˗Ya ˈyuö˗ ˗dhɛ ka ˗gɔ, ka ˗dho ˗a gba ꞊mlɛɛn ˈka ˗ee?›

ˈPë ˗kë ˈö Yesu ˗ya pö ˈˈdhʋ̈, ˗ya ˗gɛn ˗pö ˗an ˗dhɛ ˈö˗ pö: ‹꞊Ya kë ꞊dhɛ ka dɔ pë ˗së nu ˗dhɛ ˈka ka ˗bha ˈnën ˗nu ˗dhɛ, ka Dë Zoova ˗zë ˗dho ˗kɔ ˗zuu ˈˈslʋ̈ʋ̈slʋ̈ ˗nu ka ˗dhɛ ˗sü ˈka ˗ee? ˗A ˗wɔn ˈgü, ˗kaa ˗dhɛ ˗a ˗gɔ ˗kplawo.› Ü to Yesu ˗bha ˗dhioo ˈö bhë, ˗a ˈˈpiʋ̈ ˗ee? ˗Mën ˗nu ˈü ꞊bhɛɛ ˗an ˗wɔn ˈgü?