Biblö draansü ꞊trɔɔn ˗së ꞊dede ˗yö ˗dhö, ˈˈkɛɛ ˗a draansü ˈyaa ˈˈplëëplë ˈˈtʋ̈ŋ ꞊gban ˈka. ˈˈTʋ̈ŋ ˈbhaa ˗nu ˈka ˗yö ˗mɔn ˗a ˗bha ˈö ˗kë ü ˈgü ꞊dhɛ ˈbhaa ˗mɔn ˗a ˗bha kö ü ˈdho ü ˗bha Biblö draansü ˈka ˈˈdhiʋ̈. ˈˈKɛɛ ˈmën ˗kë ˈö ü dua ˈdhö ˗mü kö ˈü ü ˈgü dɔ ˈˈgbɩɩ˗ kö ˈü˗ draanˈˈ ˗kplawo? ˈKö ˗kë ꞊dhɛ ˈwɔn ˈˈgbɩɩ˗ ˈbhaa ˗nu ꞊mɔɔn˗ ˗bha ˈwo ˗da ü ˗gɛn ˈgü, ˈmën ˗dho ü ˗takun kö ü ˈgü ˈya ˗dho ga?

1. ˗Mën ˈö ˗kë ˈö Biblö draansü ˗wɔn ˈdhö ˈˈgbɩɩ˗?

«˗Zlan ˗Wo ˗yö ˈˈbhɩɩ˗ ˈö˗ ˈˈpii ˈdhö ˈˈgbɩɩ˗.» (Eblö 4:12, NWT). Biblö ꞊bhlëë ˗yö ꞊va ˈyö ˗tɔ ꞊dhɛ ˗yö ˗Zlan ˗zopiʋ̈wɔn ˗zɔn, ˈö˗ ˗zɔn ˈzü ꞊dhɛ ü ˗dhɔ ˗ya ˗kë. ˗Yö ü ˗takun kö ˈwɔn ˈö ˗gban gagade ˗bha ˈü˗ dɔ, kö ü ˗bha ˈwɔndɔdhe ˗yö ˗dadhiʋ̈, kö ˈü ü ˗zo yö ˗dhɛkpaɔ dhiʋ̈ˈˈ ˗së ˗dhɛ. ˈˈKɛɛ ˗a ˈdhɛ ˈö ꞊bhlëësü ꞊dedewo ˈyö ˗tɔ Biblö ˗dho ü ˗takun kö ˈü kë Zoova ˈˈtɔŋdë ˈka. Kö ˈü Biblö draanˈˈ ü ˗dho zuʋ̈gblüdhi ꞊slɔɔ ü ˗bha ˗tosɛta ˈgü.

2. ˈMën ˗kë ˈö kwa dua ˈdhö ˗mü kö gagade ˗nu ˈwo Biblö ˈgü ˈkwa ˗an ꞊bhlëë dɔ?

Gagade ˗nu ˈwo Biblö ˈgü, ˗wo ꞊dhɛ ˈˈsënŋ ˈdhö. ˗A ˗wɔn ˈgü Biblö ˗yö kwa ꞊faan ˗mën ˈö˗ pö: «˗Bhö gagade ˈdhɔ, ˈbha ˗dho ˗a ˈˈdhɔɔdɔ toŋtoŋdhö.» (Proverbes 23:23) Kö ˈkwa˗ ˈwɔn dɔ ꞊dhɛ gagade ˗nu ˈwo Biblö ˈgü ˗wo ꞊bhlëësü, ˈkö ˗kë ꞊dhɛ ˈwɔn ˈˈgbɩɩ˗ ˗yö ˗da kwa ˗gɛn ˈgü, kwa ˗dho kwa ˈgü dɔ ˈˈgbɩɩ˗ ˈö ˈkwa ˗an ꞊draan ˗kplawo.—Proverbes 2:4, 5 ˗wo pö.

3. Zoova ˗dho ü ˗takun ˗kɔ ˗kë ꞊dhɛ kö ˈü Biblö draansü ˈkun ˈˈgbɩɩ˗?

Zoova ˈö ˗kë ü ˗Damɛn waa ü ˈˈtɔŋdë ˈˈpiigbɩɩsü ˈka bhë, ˗ya ˈˈpiʋ̈ ˈö ü ˗takun kö ˈwɔn ˈö ˗gban ö ˗bha ˈü˗ draanˈˈ ꞊dedewo. ˗Yö ˗mɔn ˗a ˗bha ˈö ü gba ˗a ˈˈDhiwo draansü ‹꞊faan ˈka.› (Fidhipö 4:13 ˗wo pö.) ˗A ˗wɔn ˈgü ü ˗bhawɔn ˗ya yö ꞊faan ˗bha kö ˈü Biblö draanˈˈ ɛɛnˈˈ kö pë ˈü˗ ꞊draan ˈü˗ ˗ya ꞊bhlëëgü, ˗a ˗dhɛ ˗a ˗gɔ. Ü ˗bhawɔn ˗ya yö ꞊faan ˗bha ˈpö kö ˈü bɔ ˈwɔn ˈˈgbɩɩ˗ waa ˗gban ü ˗gɔ ˗sü ˗nu ˈgü, ˗yö ˗dho ˗a nu ü ˗dhɛ. ˗A pö ˗a ˗dhɛ bhɛɛwo ˈgü ˗kplawo ˗yö ü ˗takun kö ˈbha ˗dho ˈˈkan Biblö draansü ˗bha.—1 Tesadhonikö 5:17.

˗KAA ˈˈPIƲ̈ ˈPƆN

4. Biblö draansü ˗wɔn yö ˈˈdhiʋ̈ ü ˗bha ˗tosɛta ˈgü.

ˈˈTʋ̈ŋ ˈbhaa ˗nu ˈka ˗yö ꞊mɔɔn˗ ˗bha ˈö ˗kë kwa ˈgü ꞊dhɛ ˈˈtʋ̈ŋ ˈyaa kwa ˗gɔ kö ˈkwa Biblö draanˈˈ. ˈˈKɛɛ ˈmën ꞊mɔɔn˗ ˗bha ˗yö ü ˗kakun? ˗Ka Fidhipö 1:10 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:

• Ü ˗bha ˈgü, ˗mën ˗nu ˈwo ˗tɔ «ˈwɔn ˗së ꞊dede» ˈö ˈkwa ꞊mɔɔn˗ ˗bha ˈkwa ˗an kë?

• Ü ˗dho Biblö draansü yö ˈˈdhiʋ̈ ü ˗bha ˗tosɛta ˈgü ˗kɔ ˗kë ꞊dhɛ?

1. (1) Kö ˈü ˈˈɲɛɛn ˗lo ˈˈgboŋgbo ˈgü ˗blɛɛsü, kö ˈü˗ pö ˈü ˗gwë kpö ˈˈgblʋ̈gblʋ̈ ˗lo mü, wo ˈti ˗dho wo ˗yɛɛ ꞊slɔɔ˗.

2. (2) ˈˈKɛɛ kö ˈü ˗gwë kpö ˈˈgblʋ̈gblʋ̈ ˗nu ˗lo ˈˈgboŋgbo ˈgü ˗blɛɛsü, ˈˈɲɛɛn ꞊vadhɛ ˗dho bɔ ˗a ˈˈpiʋ̈ ˈwo wo ˗yɛɛ ꞊slɔɔ. ˗Kɔ do ˈö bhë ˗a ˈka, kö pë ˈö˗ ˗wɔn ˈdhö ˈˈgbɩɩ˗ ˈü˗ bɔ ˈˈdhiʋ̈ ü ˗bha ˗tosɛta ˈgü, ü ˗dho ˈˈtʋ̈ŋ ꞊slɔɔ˗ ˈü pë ˈˈwɛɛ ˈbhaa ˗nu ˗kë.

˗Yö kwa ˈˈpiʋ̈ ꞊dhɛ ˈkwa ˗Zlan dɔ kö ˈkwa˗ ˗dhɔkë. Biblö draansü ˗yö kwa ˗takun ˗a ˗bha. ˗Ka Matiö 5:6 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:

• Kö ˈü Biblö draansü ˗wɔn ˈkun ˈˈgbɩɩ˗, ˈwɔn ˗së ˗mɛɛn ˈö ˗dho kë ü ˗dhɛ?

5. ˗Wa ˗gban ü ˗gɔ ü ˈgü ˈya ˗dho ga.

VIDEO: ˗Yö ˈgüdɔgbɩɩsü ꞊trɔɔn -slɔɔ (5:22)

• Video ˈö bhë ˗a ˈgü, ˈdhɛ ˈö Fransico ˗yö pë ˈö kun ˗an draanˈˈ ˗ni ˈgü ˗a ˗wɔn ꞊blɛɛ ö ˈˈtɔŋdë ˗nu waa ö dhö ˗an ˗dhɛ, ˗mën ˈwo˗ ˗kë?

• ˈDhɛ˗ ˈgü yö ˈti ga, ˗a ˈwɔn ˗së ˗mɛɛn ˈö˗ ꞊slɔɔ?

˗Ka 2 Timote 2:24, 25 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:

• Biblö ˈü˗ draanˈˈ ˗ni ˈgü yö, ü ˗mɛn ˗nu waa ü ˈˈtɔŋdë ˗nu ˗wa ˗yö ˗kɔ ˗kë ꞊dhɛ?

• ˈBha ü ˗zota Biblö ˈˈɲan ˈö yö ˗a ˈgü, ü ˗bha Biblö draansü yö ˈti dhi mɛn ˈbhaa ˗nu ˗dhɛ, ˗mën ˈö ü dua ˈdhö ˗mü kö ˈü˗ kë? ˈMën ˗kë?

6. ˗Bhö ü ˗zo yö Zoova ˗dhɛ kö ˗yö ü ˗takun.

VIDEO: Zoova ˗yö n ˗takun ˈö n ˗man ˗tosɛta ˗yö ˗kë ˗së (3:56)

• Video ˈö bhë ˗a ˈgü, ˗mën ˈö Ʒimö ˗ya ˗kë kö ˈö kë Zoova ˗dhɛ ˗së?

• ˗Mën ˈö˗ ˗wɔn ˗yö ü kun ˈö ˗gban ˗a ˗bha ˈwɔnzuan ˗bha?

˗Ka Eblö 11:6 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:

• Mɛn ˗nu ˈwo Zoova ‹꞊mɛɛn› ɛɛnˈˈ ˈwo wo ˈgü dɔ ˈˈgbɩɩ˗ kö ˈwo˗ dɔ, kö ˈwo kë ˗a ˗dhɛ ˗së bhë ˈwɔn ˗së ˗mɛɛn ˈö ˗dho ˗a kë ˗an ˗dhɛ?

• ˈDhɛ ˈö ˈˈdhʋ̈, ü ü ˈgü dɔ ˗ni ˈgü ˈˈgbɩɩ˗ kö ˈü Biblö draanˈˈ, ˗yö ˗kë Zoova ˗dhɛ ˗kɔ ˗kë ꞊dhɛ?

˗A ˈDHƐ TO KWA ˈˈƝAAN

ˈKö ˗kë ꞊dhɛ Biblö draansü ˈyaa ˈˈplëëplë ˈˈtʋ̈ŋ ꞊gban ˈka, ˗yö ˗mɔn ˗a ˗bha ˈö ü ˗takun kö ˈü zuʋ̈gblüdhi ꞊slɔɔ ˗toëpö ˈka. ˗Bhö ü ˗zo yö Zoova ˗dhɛ kö ˗yö ˈdhuëë˗ ˈkpɔ ü ˗bha.

˗Zobuödhe

• ˗Mën ˈö ˗kë ˈö gagade ˗nu ˈwo Biblö ˈgü ˈwo ꞊bhlëësü ü ˗bha ˈka?

• ˈBha ü bo «ˈwɔn ˗së ꞊dede» dɔ ˗sü ˈka, ˈmën ü dua ˈdhö ˗mü kö ˈü˗ kë?

• ˈMën ˗kë ˈö ü dua ˈdhö ˗mü kö ˈü ꞊faan ˗dhɛ Zoova ˗gɔ ˗kplawo, kö ˈbha ˗dho ˈˈkan Biblö draansü ˗bha?

˗AN ˗GA ˈPÖ

ˈˈSlö ˗yiishiö ˈwo mɛn ꞊vadhɛ ˗takun ˈö ˈwo ˈwɔn ˗së ꞊va ˗kë ˈˈtʋ̈ŋ˗ ˈö ˗an ˗gɔ ˗a ˈka, ˗a ˗ga.

«Kwa ˗dho ˗a kë ꞊dhɛ kö kwa ˗bha ˈˈtʋ̈ŋ ˈya ˗dho shiʋ̈ˈˈ» (˗Kwɛ 2014 Fevlie ˗bha ˗Ka ˗ya ka ˈˈɲaan!)

Dhebɔnën do ˈö kun ö ˈgü dɔ ˗ni ˈgü ˈˈgbɩɩ˗ kö ˈö kë ˗Zlan ˗dhɛ ˗së, ˈˈkɛɛ ˈö ˈyaa kun dhi ˗ni ˈgü ˗a ꞊gɔn ˗dhɛ, ˗kɔ ˈö Zoova ˗ya ˗takun ˗a ˈka, ˗a ˗ga.

Zoova ˗yö ꞊faan ˗nu kwa ˗dhɛ kö ˈkwa kwa ˗bha ˈwɔn ˈˈgbɩɩ˗ ˗nu bun (5:05)

Dhebɔnën do ˈö˗ ˈgü yö ˈti ga Biblö draansü ˈka, ˗kɔ ˈö˗ ꞊gɔn ˗takun ˗a ˈka ˗a ˗ga.

A gagade ˗zëpiʋ̈dhɛ ˗mɛɛn (6:30)

Mɛn ˈbhaa ˗nu ˗wa ˗pö ꞊shiö ꞊dhɛ Zoova ˗bha ꞊Gbɛkiö ˗nu ˗wo mɛn ˗nu ˗bha ˈkɔdhi ˗wü. Gagade ˗mü ˗ee?

«Zoova ˗bha ꞊Gbɛkiö ˗nu mɛn ˗nu ˗bha ˈkɔdhi ˗wü ˗ee ɛɛnˈˈ ˗wa ˗gɛn ˗gban ˗ee?» (ˈWɔn ˗gɔ ˈö jw.org ˗ta)

Mɛn ꞊gban ˈˈpɛpɛ kwa ˗da ˈwɔn ˈbhaa ˗ʒian ˗ta ˗kplawo. ˗A ˈwɔn ˗nu ˈwo ˈˈdhʋ̈ ˗an ˈbhaa ˗nu ˗wo ˗gban dhesüsü, gwaankpɔsü, yö mɛɛnˈˈ ˗sü waa kwa wɔdhɛ ˗nu ˗bha. Ʒiaan ˗nu ˈö ˈkwa ˗da ˗an ˗ta ˈwɔn ˗nu ˈwo bhë ˗an ˈgü, ˗wo ꞊mɔɔn˗ ˗bha ˈwo ˗kë ˗së ɛɛnˈˈ ˈya˗ kwa ˗bha ˈka. ˗Wo ꞊mɔɔn˗ ˗bha ˈwo kwa ꞊ɲɔɔn Zoova ˗bha ɛɛnˈˈ ˈwo kwa ˗kan ˗a ˗bha ˈö ˈkwa ˗kë ˗a ˗dhɛ ˈya˗. ˈKwa ˗da ʒiaan ˗së ˗ta kwa zuʋ̈ˈˈ ꞊nii ˗yö ˗da ˈö ˈkwa ˗kë Zoova ˗dhɛ ˗së.

1. Biblö ˗yö kwa ˗takun ˗kɔ ˗kë ꞊dhɛ kö ˈkwa ˗da ˈwɔn ˗së ˗nu ˗ʒian ˗ta?

ˈBha˗ pö ˈü ˗da ˈwɔn ˈbhaa ˗ʒian ˗ta, ˗bhö ˗takundhe ˗dhɛ Zoova ˗gɔ, kö ˈü kpɔɔˈˈ Biblö ˈgü, kö ˗a ˈdhɛ ˈö Zoova ˈdhö˗ ˈˈpiʋ̈ ˈü˗ dɔ. (Proverbes 2:3˗6 ˗an ˗wo pö.) ˈKwa kë ˈwɔn ˈbhaa ˗nu ˈgü, ˈpë ˈkwa ˗dho ˗a kë Biblö ˗ya ˗zɔn vɛɛdhö. ˈBha ˈto ˗a ˗bha ˗dhioo ˈö ˈˈdhʋ̈ ˗a ˈˈpiʋ̈ kö ˈbha ˗da ʒiaan ˗së ˗ta.

ˈˈKɛɛ pë ˈü ˗dho ˗a kë Biblö yö ˈti˗ pö vɛɛdhö ꞊wɛ? ˈKö ˗dee ˈö ˗kë ˈˈdhʋ̈, Zoova ˗dho ü ˗takun kö «ʒiaan ˈö ü dua ˈdhö ˗mü kö ˈü˗ ˈsü» ˈü˗ dɔ. (Isaïe 48:17) ˗Yö ˗dho ü ˗takun ˗kɔ ˗kë ꞊dhɛ? ˈTɔŋ˗ ˗gɛngbandhɛ ˗nu ˈwo˗ ˈˈDhiwo ˈgü ˈyö ˗dho bɔ ˗an ˗ta ˈö ü ˗takun. Biblö ˗bha ˈtɔŋ˗ ˗gɛngbandhɛ ˗nu ˈnën ˈwo ˈtɔ˗ gagadhe ˗nu ˈö ˈwo ˗Zlan ˗zopiʋ̈wɔn ˗nu ˗zɔn. ꞊Ya kë ꞊shöŋ kwa ˗Zlan ˗zopiʋ̈wɔn ˗nu ˗yö ˗kwɛzlan ˗nu ˈwo Biblö ˈgü ˗an ˈgü. Kö ˈkwa Zoova ˗zopiʋ̈wɔn dɔ, kwa ˗da ʒiaan ˈö˗ ˗dhɛ ˗së ˗a ˗ta.

2. ˈMën ˈü ˗dho ü ˗zota ˗a ˈgü ˗be kö ˈü ꞊kun ˗da ˈwɔn ˈbhaa ˗ʒian ˗ta?

Biblö ˗ya ˗pö: «Mɛn ˈö ˈwɔn ˗nu ˗kë ö ˈsuan˗ ˈka, ˗yö ö ˗gɛn yödhɛ ˗ga ˗së ˈka.» (Proverbes 14:15) ˗Ya ˗zɔn ꞊dhɛ ˈbha˗ pö ˈü ˗da ˈwɔn ˈbhaa ˗ʒian ˗ta, ü dua ˗mü kö ˈü ü ˗zota ˗a ˈgü ˗be. Ü ü ˗zota ˗ni ˈgü, ˗bhö ü ˗de dhɛɛˈˈ ˈkpɔ ꞊dhɛ: ‹Biblö ˗bha ˈtɔŋ˗ ˗gɛngbandhɛ ˗mɛɛn ˈö ˗gban ˈwɔn ˈö yö ˗a ˗bha? ˈMën ˈa ˗dho ˗a kë kö n zuʋ̈ˈˈ ˈya ˗dho za dɔ n ˗bha? ˈWɔn ˈa ˗dho ˗da ˗a ˗ʒian ˗ta bhë, ˗yö ˗dho ˗gban mɛn ˈˈwɛɛ ˗nu ˗bha ˗kɔ ˗kë ꞊dhɛ? ˈˈKɛɛ ˈman˗ kë ˈˈdhʋ̈, Zoova zuʋ̈ˈˈ ꞊nii ˗dho ˗da ˗ee?›—Deutéronome 32:29.

Zoova ˈnën˗ dua ˈdhö ˗mü kö ˗yö ʒiaan ˈö ˗së waa˗ ˈdhɛ ˈyaa ˗së ˗an ˗zɔn kwa ˗dhɛ. Kö ˈkwa˗ ˗bha ˈtɔŋ˗ ˗nu waa˗ ˗bha ˈtɔŋ˗ ˗gɛngbandhɛ ˗nu dɔ ˗së ˈka, kö ˈkwa ˗an ˗ya ꞊bhlëë ˈgü, ˗yö ˗dho kwa zuʋ̈ga ˈö ˈwɔn yö ˈko ˈˈdhiʋ̈ bhë ˗a dɔɔˈˈ ʒiaan ˗së ˗ta. Kwa zuʋ̈ga ˈö ˈwɔn yö ˈko ˈˈdhiʋ̈ bhë yö ˈnën ˗tɔ kwa zuʋ̈ˈˈ ˈö ˈwɔn ˗së waa ˈwɔn yaa ˗an ˗bhokoo ˗zɔn kwa ˗dhɛ. (Wlɔmö 2:14, 15) Kö kwa zuʋ̈ga ˈö bhë ˈkwa˗ dɔɔˈˈ ˗së ˈka, ˗yö ˗dho kwa ˗takun ˈö ˈkwa ˗da ʒiaan ˗së ˗nu ˗ta.

˗KAA ˈˈPIƲ̈ ˈPƆN

3. Ü ꞊kwaa Biblö ˗zü kö ˗yö ʒiaan bho ü ˈka.

VIDEO: Ü ꞊kwaa Biblö ˗bha ˈtɔŋ˗ ˗gɛngbandhɛ ˗nu ˗zü kö ˗wo ˈˈdhiʋ̈sü ü ˈka (5:54)

• ˈMën ˈö ˗tɔ ˗potaadhe?

• ˈMën ˗kë ˈö Zoova ˗yö ˗potaadhe nu kwa ˗dhɛ?

• ˈMën ˈö Zoova ˗ya nu kwa ˗dhɛ kö ˗yö kwa ˗takun kö ˈkwa ˈwɔn ˗së kë ˗potaadhe ˈö kwa ˗gɔ bhë ˗a ˈka?

˗Ka Efɛzö 5:15, 16 ˗wo pö. ˈTɔŋ˗ ˗gɛngbandhɛ ˈö˗ ˈgü ˈyö ˗tɔ: ‹ˈˈTʋ̈ng ˈö ˈwɔn ˗së kë ˗sü ˈˈsɩ ꞊ya kë ka ˗dhɛ, ˗kaa kë.› ˗Wo ˈö bhë ˗yö ˗dho ü ˗takun ˗kɔ ˗kë ꞊dhɛ kö...

• ˈü Biblö ˗wo pö ˗dhɛkpaɔyi ˈˈpɛpɛ ˈka?

• kaa ü ˗bha dhebɔ, ü ꞊gɔn, ü ˗bha ˈnën ˗nu ɛɛnˈˈ ü ˗mɛn ˗nu ˈka kë ka ˈko ꞊bhaa ˗kplawo?

• ˈü nu ˗bhɔkwëë ˗nu ˗ta?

4. ˗Bhö ü zuʋ̈ga ˈö ˈwɔn yö ˈko ˈˈdhiʋ̈ bhë ˗a dɔɔˈˈ kö ˈü ˗da ʒiaan ˗së ˗nu ˗ta.

VIDEO: «˗Kwaa kë kö kwa zuʋ̈ˈˈ ˈya ˗dho za dɔ kwa ˗bha» (5:13)

• Video ˈö bhë ˗a ˈgü, ˗mën ˈö kwa ꞊dhegblü ˈö bhë ˗ya ˗kë kö ˗yö ö zuʋ̈ga dɔɔˈˈ, kö ˗yö ˈwɔn ˈö Zoova ˗dhɛ ˗së ˗a kë?

ˈMën ˗kë ˈö ˈyaa ˗së kö ˈkwa˗ pö mɛn ˈˈwɛɛ ˗nu ˗dhɛ ˗wo ˈpë kwa dua ˈdhö ˗mü ˈkwa˗ kë ˗wa pö kwa ˗dhɛ? ˗ka Eblö 5:14 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:

• ˗A pö ˗sü ˈö mɛn ˈˈwɛɛ ˗nu ˗dhɛ ꞊dhɛ ˗wo ˈpë ˈkwa ˗dho ˗a kë ˈwɔn ˈbhaa ˈgü ˗a pö kwa ˗dhɛ, ˗yö ꞊mɔɔn˗ ˗bha ˈö ˗kë kwa ˈgü ˗së. ˈˈKɛɛ ˈmën kwa ꞊dede kwa dua ˈdhö ˗mü kö ˈkwa˗ ˗bhokoo kë?

• ˗Mën ˗nu ˈwo ꞊mɔɔn˗ ˗bha ˗wo kwa ˗takun kwa zuʋ̈ga dɔɔsü ˗bha, kö ˈkwa ˗da ˈwɔn ˗së ˗nu ˗ʒian ˗ta?

5. ˗Bhö mɛn ˈˈwɛɛ ˗nu ˗bha ˈwɔn yö ˗kɔ ꞊bhlëë ˗ya?

꞊Ya kë ꞊shöŋ ˈwɔn ˗nu ˈö ˈkwa ˗an ˗kë ˈwɔn ˈbhaa ˗nu ˈgü waa˗ ˈdhɛ mɛn ˈˈwɛɛ ˗nu ˗wa ˗kë ˈwɔn do ˈö bhë ˗a ˈgü, ˈwaa kë do. ˈDhɛ ˈö ˈˈdhʋ̈, kwa ˗dho mɛn ˈˈwɛɛ ˗nu ˗bha ˈwɔn yö ˗kɔ ˗nu ꞊bhlëë ˗ya ˗kɔ ˗kë ꞊dhɛ? ˗Kwaa ˈwɔnzuan ꞊plɛ ˗ga:

ˈWɔnzuan 1: Kwa ꞊dhegblüdhe do ˈö dho ˈö ˗ya ˗zlanwokɔdhi do ˈbhaa ˈgü, ˗a ˗bha ˈklëë˗ ɛɛnˈˈ makiyaaʒö ˗kë ö ˈwɔɔdhö ˗kɔ ˗yö kwa ꞊dhegblü dhoŋ ˗nu ˈwo mü ˗an ˈˈtënŋ ˗sü.

˗Ka Wlɔmö 15:1 waa 1 Kodhɛngtö 10:23, 24 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:

• Biblö ˈˈɲan ˗nu ˈwo bhë, ˗wo ꞊mɔɔn˗ ˗bha ˈwo kwa ꞊dhegblü ˈö bhë ˗a ˗takun kö ˗yö ˗mën kë? ꞊Ya kë ꞊dhɛ ü˗ ˈˈpiʋ̈ ˈü ˈwɔn ˈbhaa ˈö ü ˈgü ˗së ˗a kë, ˈˈkɛɛ kö mɛn ˈbha ˈö mü ˈyaa˗ ˗dhɛ ˗së, ü ˗dho ˗a kë ꞊dhɛ?

ˈWɔnzuan 2 ˗naan: ˈKö ˗kë ꞊dhɛ Biblö yö ˈti˗ pö kwa dua ˈyaa ˗mü kö ˈkwa yɔ mü toŋtoŋdhö, kwa ꞊dhegblü do ˗ya ˗sü ö ˗de ˈgü ˈö ˗kan yɔ suu ˈˈpɛpɛ ˈwo ꞊mɔɔn˗ ˗bha ˈwo mɛn kun ˗an ˗bha. ˈˈKɛɛ ˈdhɛ ˈwo˗ ˗dhɛ ˈwlaan˗ ˈdɛdɛ do ˈbhaa ˗ta, ˗yö kwa ꞊dhegblü ˈˈwɛɛ ˗nu ˗yö kö ˗wo we mü ˗ni ˈgü.

˗Ka Ecclésiaste 7:16 waa Wlɔmö 14:1, 10 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:

• Biblö ˈˈɲan ˗nu ˈwo bhë, ˗wo ꞊mɔɔn˗ ˗bha ˈwo kwa ꞊dhegblü ˈö bhë ˗a ˗takun kö ˗yö ˗mën kë? Pë ˈö ˈyaa ü ˈgü ˗së, ˈbha mɛn ˈˈwɛɛ yö kö ˗yö ˗a kë ˗ni ˈgü, ü ˗dho ˗a kë ꞊dhɛ?

Ü ˗dho ˗a kë ꞊dhɛ kö ˈü ˗da ˈwɔn ˗së ˗ʒian ˗ta?

1. ˗Bhö ˗a pö Zoova ˗dhɛ ˗yö ˈˈdhiʋ̈sü ü ˈka.—Zakö 1:5.

2. ˗Bhö ˈwɔn ˗nu ˈˈpiʋ̈ ˈpɔn Biblö waa kwa ˗bha ˈsëëdhɛ ˗nu ˈgü kö ˈtɔŋ˗ ˗gɛngbandhɛ ˗nu ˈwo ˗gban ˈwɔn ˈü˗ ˈgü ˗an ˗bha ˈü ˗an dɔ. Ü ꞊mɔɔn˗ ˗bha ˈpö ˈü˗ pö kletiɛn ˗nu ˈö ˗wa ˗kian ˗an ˗dhɛ ˗wo ü ˗takun.

3. ˗Bhö ü ˗zota kö ˗ya kë ꞊dhɛ ü zuʋ̈ˈˈ yö ˈti ˗dho za dɔ ü ˗bha ꞊taabha ɛɛnˈˈ yö ˈti ˗dho kë mɛn ˈˈwɛɛ ˗nu ˗dhɛ ˈyaa˗, kö ˈü˗ ˈwɔn dɔ.

˗A ˈDHƐ TO KWA ˈˈƝAAN

ˈKwa˗ pö ˈkwa ˈwɔn ˈbhaa kë, ˗kɔ ˈö Zoova ˗ya yö ˗a ka waa ˗kɔ ˈö ˗dho ˗gban ˗a ˈka mɛn ˈˈwɛɛ ˗nu ˗bha, ˗kwa kwa ˗zota ˗an ˈgü ˗së ˈka kö ˈkwa ˗da ʒiaan ˗së ˗ta.

˗Zobuödhe

• Ü ˗dho ˗a kë ꞊dhɛ kö ˈwɔn ˗nu ˈwo Zoova ˗dhɛ ˗së ˈü ˗an ˗kë?

• Ü ˗dho ü zuʋ̈ga ˈö ˈwɔn yö ˈko ˈˈdhiʋ̈ bhë ˗a dɔɔˈˈ ˗kɔ ˗kë ꞊dhɛ?

• Ü ˗dho mɛn ˈˈwɛɛ ˗nu bha ˈwɔn yö ˗kɔ ꞊bhlëë ˗ya ˗kɔ ˗kë ꞊dhɛ?

˗AN ˗GA ˈPÖ

Pë ˗nu ˈü ˗dho ˗an kë kö ˈwɔn ˗nu ˈü ˗dho ˗da ˗an ˗ʒian ˗ta ˗wo kaa Zoova ka ˗bha ˈˈtɔŋdëdhɛ ˗gɛn ˗gban, ˗an ˗ga.

«ˈWɔn ˗nu ˈö ˈwo ˗dho Zoova ˈtɔ bhɔ ˗kwa ˗da ˗an ˗ʒian ˗ta» (˗Kwɛ 2011 Avlidhö 15 ˗bha ˈˈGlaadhiʋ̈ ˗tɔn)

˗Kɔ ˗nu ö Zoova ˗yö ˗dhioo dɔ ˗a ˈka kwa ˗ta, ˗an ˗ga.

Zoova ˗yö ˈˈdhiʋ̈sü ö ˗dhɔkëmɛn ˗nu ˈka (9:50)

Pë ˈö wlüünën do ˈbhaa ˗takun ˈö ˗da ʒiaan ˗së ˗ta ˈwɔn ˈˈgbɩɩ˗ ˈgü, ˗a ˗ga.

Zoova ˈnën ˈö ꞊mɔɔn˗ ˗bha ˈö pë ˈˈpɛpɛ ˈwo ˗së ˗an ˗nu ˈkwa ˗dhɛ (5:46)

Biblö yö ˈti ˈtɔŋ˗ do vɛɛdhö dɔ ˈwɔn ˈbhaa ˈgü, ˈpë ˗dho kwa ˗takun kö ˈwɔn ˈö Zoova ˗dhɛ ˗së ˈkwa˗ kë ˗a ˗ga.

«Ü ˗bhawɔn ˗yö ˗Zlan ˗bha ˈtɔŋ˗ ˗bha ˈwɔn ꞊gban ˈgü ˗ee?» (˗Kwɛ 2003 Desanblö 1 ˗bha ˈˈGlaadhiʋ̈ ˗tɔn)