ˈWƆN ˗GƆ 02
Biblö ˗yö ˗dhɛkpaɔ ˈˈdhiʋ̈ ˗së ˗wɔn ˗blɛɛ
ˈWɔn ˈˈgbɩɩ˗ ˗nu ˈö ˈwo mɛn ˗kë ˗wëësü, ˈö ˈwo zuʋ̈dhiʋ̈tɛ ˗ya mɛn ˗bha, ˈö ˈwo mɛn ꞊sëë bho, ˗wo mɛn ˗nu ˗bha ˈˈkpɔnŋtaadhɛ ˗todhʋ̈sü ˈgü. ˈWɔn ˈˈgbɩɩ˗ ꞊suu ˗nu ˈwo ˈˈdhʋ̈ ˈbha bɔ ˗an ˈgü do ˗ee? ˗A ˈbhaa ˗ya kë kö ˈˈyua ˗yö ü ꞊sëë bho ˗ni ˈgü, ɛɛnˈˈ kö ü ˗bha mɛn ˈö go ü ˗bha, ˗a zuʋ̈dhiʋ̈tɛ ˗yö ü ˗bha. Ü ꞊mɔɔn˗ ˗bha ˈü ü ˗de dhɛɛˈˈ kpɔ ꞊dhɛ ‹˗tosɛta ˗dho kë ˗së yi ˈbhaa ˈka ˗ee?› Dhɛɛˈˈ ˈö bhë ˗a ˗yɔ ˈö mɛn ˗zokun ˗yö Biblö ˈgü.
1. ˗Mën ˈö Biblö ˗ya pö ˈö kwa zuʋ̈ˈˈ ˗kë ˗saa?
ˈPë ˈö ˗kë ˈö ˈkwa ˗kë saanˈˈ ˈgü, Biblö ˗ya ˗gɛn ˗pö. ˈˈKɛɛ nɔɔn˗ ˗së ˈö˗ ˈgü kwa ˗bha ˈka ˈyö ˗tɔ ˗a ˈˈtʋ̈ŋ ˗ya ˈto ꞊klöö˗ kö saanˈˈ ˗nu ˈwo bhë ˗wo ˈgo kwa ˗bha. Pë ˈö Biblö ˗ya pö ˗yö ꞊mɔɔn˗ ˗bha ˈö «˗dhɛkpaɔ dhiʋ̈ˈˈ ˗së waa ˗zoyödhe» nu ü ˗dhɛ. (Jérémie 29:11, 12 ˗wo ˗pö.) Nɔɔn˗ ˗së ˗nu ˈwo Biblö ˈgü bhë, ˗wo ꞊mɔɔn˗ ˗bha ˈwo kwa ˗takun ˈö ˈkwa bɔ kwa ˗bha ˈwɔn ˈˈgbɩɩ˗ ˗nu ˈgü zuʋ̈saadhɛ ˈka ꞊dɛɛ, ˈö ˈkwa ˗kë zuʋ̈gblüdhi ˈgü ˗toëpö ˈka.
2. ˈWɔn ˗së ˗nu ˗mɛɛn ˈö ˈwo ˗dho kë ˗dhɛkpaɔ dhiʋ̈ˈˈ ˈgü ˈö Biblö ˗yö ˗an ˗wɔn ꞊blɛɛ?
Biblö ˗ya ˗pö ˗dhɛkpaɔ dhiʋ̈ˈˈ ˈgü ‹ga ˈyii ˈdho bhɔ ˈzü, ˈˈɛɛn ˗wëë ˗ya wo ˗sü ˈbha ˈyii ˈdho kë ˈzü, ˗wëëwʋ ˈkpɔ ˗sü waa˗ pë ˈbha ˗ma mɛ ˈka ˗sü ꞊gban ˗dho yën.› (˗Dhɛkpaɔ dhiaˈˈ ˈsëëdhɛ 21:4 ˗wo pö.) ˈWɔn ˈˈgbɩɩ˗ ˗nu ˈö ˈwo mɛn ˗nu zuʋ̈ˈˈ ˈˈklʋʋbhɔ ꞊dɛɛ ꞊dhɛ ˈˈfleedhɛ ˗nu, ˈwɔn ˈö ˈyaa kpɛnŋdhö ˗a ˗kë mɛn ˈka ˗sü ˗nu, ˈˈyua ˗nu waa ga ˗nu ˈdhö bhë, ˗an ꞊gban ˗dho ɲën. Biblö ˗ya ˗pö mɛnbhɩɩdhe ˗nu ˗dho ˗tosɛta kë zuʋ̈gblüdhi ˈgü ꞊bhɔɔ ˈˈsɛ ˗ta ˈˈkpɔnŋ ꞊taa ˗toëpö ˈka.
3. Pë ˗nu ˈö Biblö ˗yö ˗an pö, ü ˗dho ˗a kë ꞊dhɛ kö ˈü ü ˗zo yö ˗an ˗dhɛ ꞊dedewo?
Mɛn ꞊vadhɛ ˗wa ˈˈpiʋ̈ kö ˈˈkpɔnŋtaawɔn ˗nu ˈˈɲan ˗yö bhɔ, ˈˈkɛɛ ˈö ˈyaa ga ˗sü ˈka ˗an ˈgü ꞊dhɛ ˗yö ˗dho kë ˈˈdhʋ̈. Biblö ˗zë pë ˗nu ˈö ˗an ˈˈplüün bho, ˗wo ˗kë. ‹˗Wo ˈö ˗bɛnzë ˗sü ˈka Biblö ˈgü kö ˈkwa˗ draanˈˈ ˗së ˈka›, kwa ˗dho kwa ˗bha ˗zo ˗yö ˗a ˗dhɛ ˗sü ˗gɛn ˗gban. (Këwɔn ˗nu 17:11) Biblö draansü ˈnën ˗dho ü ˗takun, kö ꞊ya kë ꞊dhɛ ü ˗dho ü ˗zo yö pë ˈö˗ pö ˈö ˗gban ˗dhɛkpaɔ dhiʋ̈ˈˈ ˗bha ˗a ˗dhɛ, ˈü˗ dɔ.
˗KAA ˈˈPIƲ̈ ˈPƆN
Pë ˗së ˈbhaa ˗nu ˈö Biblö ˗yö ˗an pö ˈö ˈwo ˗gban ˗dhɛkpaɔ dhiʋ̈ˈˈ ˗bha ˗bhö ˗an ˗ga, kö ˗kɔ ˈö ˗zo ˗yö ˗an ˗dhɛ ˗sü ˗yö mɛn ˗nu ˗takun ˗a ˈka ꞊dɛɛ ˈü˗ yö.
4. Biblö ˗ya ˗pö kwa ˗dho ˗tosɛta kë ˗toëpö ˈka kö ˈwɔn ˈˈgbɩɩ˗ ˗nu ꞊wa ɲën.
ˈWɔn ˗së ˗nu ˈö Biblö ˗yö ˗an pö ˈö ˈwo ˈˈshia bhë ˗bhö ˗an ˗ga. ˗A ˗mɛɛn ˈö ü ˗dhɛ ˗së ꞊dedewo? ˈYö ˈmën ˗kë?
Biblö ˈˈɲan ˗nu ˈö ˈwo ˈˈshia bhë ˗an ˗wo pö, kö dhɛɛˈˈ ˗nu ˈwo yö ˈü ˗an ˗yɔ mɛɛnˈˈ:
Ü ˗bha ˈgü, Biblö ˈˈɲan ˗nu ˈwo yö ˗wo ꞊mɔɔn˗ ˗bha ˈwo ü ˗takun ˗ee? ˗An draansü ꞊mɔɔn˗ ˗bha ˈpö kö ˗yö ü ˗bha ˈkɔdhigümɛn ˗nu waa ü ˈˈtɔŋdë ˈbhaa ˗nu ˗takun ˗ee?
˗Bhö ü ˗zota ˗dhɛkpaɔ dhiʋ̈ˈˈ ˗së ˈö yö ˗a ˈgü.
MƐN GBƐ˗ YÖ ˈTI ˗DHO ... |
MƐN ꞊GBAN ... |
|---|---|
|
|
|
|
|
|
|
|
|
|
5. ˗Wo ˈö Biblö ˈgü ˗yö ꞊mɔɔn˗ ˗bha ˈö mɛn ˗bha ˗tosɛta ꞊slëëgü.
ˈWɔn ˈö mɛn ꞊vadhɛ ˈˈɲan ˗yö ˗da ˗a ˈgü ˗an ˗züzü, ˗yö ˗an ˈgü ˗ga ˈö ˈwɔn ˗shiö ˗an ˗dhɛ. Mɛn ˈbhaa ˗nu ˗wo wo ˈgü ˗dɔ ˈˈgbɩɩ˗ kö ˈwo ˈwɔnyaakësü bho ˈˈshia˗. ˗A pö ˈö Biblö ˗ya wo ꞊dhɛ ˈwɔn yaa ˗nu ˗dho ˈgo ˈˈshia˗ bhë, ˗kɔ ˈö mɛn ꞊vadhɛ ˗takun ˗a ˈka ꞊dɛɛ, ˗a ˗ga. ˗Kaa VIDEO ˗ga, kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ.
˗Mën ˗wɔn ˈö kun ˗shiö ˗ni ˈgü Rafika ˗dhɛ video ˈö bhë ˗a ˈgü?
ˈKö ˗kë ꞊dhɛ ˈwɔn yaa ˈö ˗kpan ˗a ˗bha ˗a ˈˈɲan yö ˈti bhɔ, Biblö ˗ya ˗takun ˗kɔ ˗kë ꞊dhɛ?
Kö ˈkwa kwa ˗zo yö pë ˈö Biblö ˗ya pö ˈö ˗gban ˗dhɛkpaɔ dhiʋ̈ˈˈ ˗bha ˗a ˗dhɛ, ˗yö ˗dho kwa ˗takun ˈö ˈkwa to ˗a ˈˈgbɩɩ˗ ˈka ˈgügadhe ˗ta, ˈö ˈkö ˗kë ꞊dhɛ ˈwɔn ˈˈgbɩɩ˗ ˗yö kwa ˗ta, ˈö ˈkwa ˗kë zuʋ̈gblüdhi ˈgü. ˗Ka Proverbes 17:22 waa Wlɔmö 12:12 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
Ü ˗bha ˈgü ˈbha ü ˗zo yö pë ˈö Biblö ˗ya pö ˈö ˗gban ˗dhɛkpaɔ dhiʋ̈ˈˈ ˗bha ˗a ˗dhɛ, ü ˗bha ˗tosɛta ˗dho kë ˗së ˗ee? ˈMën ˗kë ˈü˗ pö ˈˈdhʋ̈?
MƐN ˈBHAA ˗NU ˗WA ˗PÖ: «Pë ˈö Biblö ˗ya pö ˈö ˗gban ˗dhɛkpaɔ dhiʋ̈ˈˈ ˗bha bhë ˗yö ˗së ˈgbɛ, ˈwɔn ˈö ꞊mɔɔn˗ ˗bha ˗yö kë ˈyaa ˗mü.»
Ü ˗bha ˈgü, ˈmën ˗kë ˈö ü dua ˈdhö ˗mü kö pë ˗nu ˈwo˗ ˗zɔn ꞊dhɛ pë ˗nu ˈö Biblö ˗yö ˗an to ˈˈdhiʋ̈ ˈö ˗an pö ˗wo ˗dho kë bhë, ˈü ˗an draanˈˈ?
˗A ˈDHƐ TO KWA ˈˈƝAAN
Biblö ˗yö ˈwɔn ˗së ꞊va ˗blɛɛ ˈö ˗gban ˗dhɛkpaɔ dhiʋ̈ˈˈ ˗bha. ˗Yö kwa zuʋ̈ˈˈ ˗kë ˗saa, ˈö kwa ˗bha ˗tosɛta ˗kë ˗së ꞊dɛɛ.
˗Zobuödhe
ˈMën ˗kë ˈö mɛn ˗nu ˗bhawɔn ˈdhö pë ˈö Biblö ˗ya pö ˗a dɔ ˗sü ˗bha?
˗Mën ˈö Biblö ˗ya pö ˈö ˗gban ˗dhɛkpaɔ dhiʋ̈ˈˈ ˗bha?
Kwa ˗bha ˗zo ˗yö ˗dhɛkpaɔ dhiʋ̈ˈˈ ˗së ˗dhɛ ˗sü ˗yö ꞊mɔɔn˗ ˗bha ˈö kwa ˗takun ꞊dɛɛ ˗kɔ ˗kë ꞊dhɛ?
˗AN ˗GA ˈPÖ
ˈBha kë ˈwɔn ˈˈgbɩɩ˗ ˗nu ˈgü, ˗kɔ ˈö ˗zoyödhe ꞊mɔɔn˗ ˗bha ˈö ü ˗takun ˗a ˈka, ˗a ˗ga.
«Kwa ˗dho ˗zoyödhe ꞊dede ꞊slɔɔ ˈˈmɛn?» (˗Kwɛ 2004 Avlidhö 22 ˗bha ˗Ka ˗ya ka ˈˈɲaan!)
Mɛn ˗nu ˈö ˈˈyua ˈˈgbɩɩ˗ ˈdhö ˗an ˗bha, ˗kɔ ˈö ˗zo ˗yö ˗dhɛkpaɔ dhiʋ̈ˈˈ ˗së ˗dhɛ ˗sü ˗yö ꞊mɔɔn˗ ˗bha ˈö ˗an ˗takun ˗a ˈka ˗a ˗ga.
«ˈˈYua ˗ya ꞊gwëë kwa ˗bha, Biblö ꞊mɔɔn˗ ˗bha ˈö kwa ˗takun ˗ee?» (ˈWɔn ˗gɔ ˈö jw.org ˗ta)
Ü ü ˈˈtʋ ˈto ˗ni ˈgü video ˈˈtan ˈö yö ˗a ˗bha, ˗bhö ü ˗zota kö kaa ü ˗bha ˈkɔdhigümɛn ˗nu ka ꞊bhɔɔ ˈˈsɛ ˈö Biblö ˗ya ˈˈplüün bho bhë ˗a ˗ta.
Mɛn ˈö˗ ˗kɔ ˗yö kun ˈˈsɛkɔɔwɔn ˈgü ˗be, ˈdhɛ nɔɔn˗ ˈö Biblö ˈgü ˈö ˗gban ˗dhɛkpaɔ dhiʋ̈ˈˈ ˗bha ˗a man, ˗kɔ ˈö˗ ˗bha ˗tosɛta ˗yö ꞊dhiëëta ˗a ˈka, ˗a ˗ga.