ˈWƆN ˗GƆ 01
Biblö ˗mɔn ˗a ˗bha ˈö ü ˗takun ˗kɔ ˗kë ꞊dhɛ?
Dhɛɛˈˈ ˗nu ˈwo ˗gban ˗tosɛta, saanˈˈ, ga waa ˗dhɛkpaɔ dhiʋ̈ˈˈ ˗an ˗bha, mɛn ꞊gban ˈˈpɛpɛ kwa ˗an ˗kpɔ kwa ˗de ˗gɔ. ꞊Ya ˈgo ˗a ˈgü ˈzü zuʋ̈dhiʋ̈tɛ ˗yö kwa ˗bha ˈˈtʋ̈ŋ ꞊gban ˈˈpɛpɛ ˈka. ˗Yö ꞊mɔɔn˗ ˗bha ˈö ˗kë ˗kɔ ˈö ˈkwa ˗dho ˈwëëga ꞊slɔɔ ˗a ˗bha kö ˈkwa kwa ˗zokë kwa ˗bha ˈkɔdhi ˈˈpiʋ̈ kö zuʋ̈gblüdhi ˗yö kë mü ˗a zuʋ̈dhiʋ̈tɛ ˈka. Mɛn ꞊vadhɛ ˗wa ˗yö ꞊dhɛ ˗tosɛta dhɛɛˈˈ ˈˈgblʋ̈gblʋ̈ ˗nu ˗yɔ ˗nu ˗wo Biblö ˈgü. ˈˈKɛɛ ˈzü ˗dhioo ˗së ˗nu ˈwo ˗gban ˗tosɛta kë ˗kɔ ˈö ˗dhɛkpaɔyi ˈˈpɛpɛ ˈka ˗a ˗bha, ˗wa ˈgü. Ü ˗bha ˈka, Biblö ˗yö ꞊mɔɔn˗ ˗bha kö mɛn ˗nu ˈü ˗an dɔ ˗yö ˗an ˗takun ˗ee?
1. Dhɛɛˈˈ ˈbhaa ˗nu ˗mɛɛn ˈö ˗an ˗yɔ ˈdhö Biblö ˈgü?
Dhɛɛˈˈ ˈˈgblʋ̈gblʋ̈ ˗nu ˈwo yö, ˗an ˗yɔ ˗nu ˗wo Biblö ˈgü: ˗Tosɛta zü ˗yö ˗dɔ ˗kɔ ˗kë ꞊dhɛ? Kwa ˗bha ˗këdhösü ˗gɛn ˈtɔ˗ ˗mën? ˈMën ˗kë ˈö ˈwɔnsëkëmɛn ˗nu ˗wo ˗kë saanˈˈ ˈgü? Mɛn ˗ya ga ˗yö ˗dho ˈˈmɛn? Mɛn ꞊gban ˈˈpɛpɛ ˗wa ˈˈpiʋ̈ kö ˈˈsɛ ˗yö ˈwaannu. ˈMën ˗kë ˈö ˗gblü ˗yö ˗kë ˗dhɛ ꞊gban ˈgü ˈsa? ˈˈKpɔnŋtaadhɛ ˗dho kë ꞊dhɛ ˗dhɛkpaɔ dhiʋ̈ˈˈ ˈgü? Biblö ˗yö kwa ꞊faan ˗mën dhɛɛˈˈ ˗nu ˈwo bhë ˗an ˗yɔ ˗nu mɛɛnˈˈ ˗sü ˗bha. ˗An ˗yɔ ˗nu ˈwo mɛn ˗zokun, mɛn ˈˈmliɲɔn ꞊va ꞊dede ꞊waa˗ ꞊slɔɔ.
2. Biblö ˗yö ꞊mɔɔn˗ ˗bha ˈö kwa ˗takun ˗kɔ ˗kë ꞊dhɛ ˗dhɛkpaɔyi ˈˈpɛpɛ ˈka?
Biblö ˗yö ˗dhioo ˗së ˗nu ˗dɔ kwa ˗ta. ˗A ˈwɔnzuan ˈnën ˗tɔ ˗yö pë ˈö ˈkɔdhi ˈwaannu ꞊dedewo ˗a ˗zɔn. ˗Yö mɛn zuʋ̈dhiʋ̈tɛwɔn ˗nu bun ˗kɔ ˈˈslö ˗zɔn, ˈö yökësü ˗gleŋ ˗nu ˗da kwa ˗bha. ˈSëëdhɛ ˈö yö kwa˗ draanˈˈ ˗ni ˈgü kwa ˈkwëë˗ ˗së ˈka, pë ˈö Biblö ˗ya pö ˈö ˗gban ˈwɔn ˗nu bhë waa˗ ˈˈwɛɛ ˈbhaa ˗nu ˗bha, ü ˗dho ˗an dɔ. Ü ˗dho ˗a yö ꞊dhɛ ‹˗Wʋ ˈˈpɛpɛ ˈkö ˗bɛn zë ˗sü ˈka [Biblö] ˈgü ˗an ꞊gban ꞊trɔɔn ˗së ˗yö ˗dhö.›—2 Timote 3:16.
ˈSëëdhɛ ˗be ˈö yö Biblö ˈyaa ˗mü. ˗Yö ü ꞊faan ˗mën ꞊ʒiaan Biblö ˗draan ü ˗de ˈˈpiʋ̈ ˗sü ˗bha. ˗A ˗wɔn ˈgü yi ü ꞊faan ˗mën kö Biblö ˈˈɲan ˗nu ˈwo˗ ˈgü bhë ˈü ˗an ˗wo pö, kö waa pë ˈü˗ draanˈˈ ˗ni ˈgü bhë ˈü ˗an dan ˈˈkwëë.
˗KAA ˈˈPIƲ̈ ˈPƆN
˗Kɔ ˈö Biblö ˗yö mɛn ˗nu ˗takun ˗a ˈka, ˗kɔ ˈü ˗dho ˗a ˗wopösü din yö ˗a ˗bha, waa ˗kɔ ˈö mɛn ˈˈwɛɛ ˗nu dhö ü ˗takun ˗a ˈgüman ˗sü ˗bha ˗a ˈka, ˗kwaa ˗ga.
3. Biblö ˗mɔn ˗a ˗bha ˈö ˈˈdhiʋ̈sü kwa ˈka.
Biblö ˗yö ꞊dhɛ ˈˈwo ˈbhü ˈdhö. ˗Yö ꞊mɔɔn˗ ˗bha ˈö kwa ˗takun kö ˈkwa ˗da ˈwɔn ˗së ˗ʒian ˗ta, kö pë ˈö ˗dhɛkpaɔ dhiʋ̈ˈˈ ˈgü ˈkwa˗ dɔ.
˗Ka Psaume 119:105 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
ˈMɛn ˈˈtan ˈö yö ˗a ˗bɛnzë bhë, ˗yö Biblö ˗yö ˗kɔ ˗kë ꞊dhɛ?
Ü Biblö ˗yö ˗kɔ ˗kë ꞊dhɛ ˈpö?
4. Biblö ˗yö ˗mɔn ˗a ˗bha ˈö kwa ˗bha dhɛɛˈˈ ˗nu ˗yɔ bɔ.
Dhebɔnën do ˗ya ˗yö ꞊dhɛ ˈwɔn ˗nu ˈö ˈyaa kun ˗an ˈgüman ˗ni ˈgü ˗kwɛ ꞊va ˈˈpiʋ̈ bhë, Biblö ˗yö ˗an ˈgü ˗pʋ. ˗Kaa VIDEO ˗ga, kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ.
Video ˈö bhë ˗a ˈgü, dhɛɛˈˈ ˗mɛɛn ˗nu ˈö dhebɔnën bhë ˈö kun ˗an ˈkpɔ ˗ni ˈgü ö ˗de ˗gɔ?
Biblö draansü ˗ya ˗takun ˗kɔ ˗kë ꞊dhɛ?
Biblö ˗yö kwa ꞊faan ˗mën dhɛɛˈˈ ˈkpɔ ˗sü ˗bha. ˗Ka Matiö 7:7 ˗wo pö, kö dhɛɛˈˈ ˈö yö ˈka˗ ˗yɔ mɛɛnˈˈ:
Dhɛɛˈˈ ˗mɛɛn ˗nu ˈü ˗an kpɔ ü ˗de ˗gɔ ˈö Biblö ˗yö ꞊mɔɔn˗ ˗bha kö ˗yö ˗an ˗yɔ bɔ?
5. Ü ˗mɔn ˗a ˗bha ˈü Biblö ˗wopösü din yö.
Mɛn ꞊vadhɛ ˗wo Biblö ˗wo ˗pö, ˈö ˈwo˗ ꞊trɔɔn ˗së yö. ˗Kaa VIDEO ˗ga, kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ.
Video ˈö bhë ˗a ˈgü, ˗mën ˈö wlüünën ˗nu ˗wa pö ˈö ˗gban pë ˗wopösü ˗bha?
ˈKö ˗kë ꞊dhɛ pë ˗wopösü ˗dhɔ ˈyaa ˗an kë, ˈmën ˗kë ˈö Biblö ˗zë ˗a ˗wo pö ˗dhɔ ˗yö ˗an ˗kë?
Biblö ˗ya ˗zɔn ꞊dhɛ ˗dhioo ˗nu ˈwo˗ ˈgü, ˗wo ꞊mɔɔn˗ ˗bha ˈwo kwa ˗zogban, ˈö ˈkwa kwa ˗zo yö ˗dhɛkpaɔ dhiʋ̈ˈˈ ˗së ˗dhɛ. ˗Ka Wlɔmö 15:4 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
˗A pö ˈö Biblö ˗ya wo ꞊dhɛ ö ˗dho kwa ˗zogban ˈö ˗zoyödhe nu kwa ˗dhɛ bhë, ˗yö ü ˗dhɛ ˗së ˗ee?
6. Mɛn ˈˈwɛɛ ˗nu ꞊mɔɔn˗ ˗bha ˈwo kwa ˗takun Biblö ˈgüman ˗sü ˗bha.
˗Ya ˈˈkan Biblö ˗wo ˗pö wo ˗de ˈˈpiʋ̈ ˗sü ˗bha, mɛn ꞊vadhɛ ˗wa ˗yö ꞊dhɛ ˗a ˗draan mɛn ˈˈwɛɛ ˗nu ˈˈpiʋ̈ ˗sü ˗yö wo ˗takun. ˗Ka Këwɔn ˗nu 8:26-31 ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
Kwa ˗dho ˗a kë ꞊dhɛ kö ˈkwa Biblö ˈgüman? (Kpɔɔˈˈ ˗a ˈˈɲan ˈsɛɛn˗ 30 waa˗ 31 ˗bha.)
Etiopi mi ˗bhawɔn ˗yö ˗kun ˗takundhe ˗bha kö pë ˈö kun ˗a ˗wo pö ˗ni ˈgü ˗ya ˈgüman. ꞊Dɛɛ ˈpö mɛn ꞊vadhɛ ˗wa ˗yö ꞊dhɛ Biblö ˗draan mɛn ˈˈwɛɛ ˗nu ˈˈpiʋ̈ ˗sü ˗yö ˗an ˗takun.
MƐN ˈBHAA ˗NU ˗WA ˗PÖ: «Biblö draansü bhë, ˈˈtʋ̈ŋ shiʋ̈ˈˈ ˗sü ˗mü.»
ˈMën ˈü ꞊mɔɔn˗ ˗bha ˈü˗ pö ˗an ˗dhɛ? ˈMën ˗kë ˈü ˗dho ˗a pö ˈˈdhʋ̈?
˗A ˈDHƐ TO KWA ˈˈƝAAN
˗Dhioo ˗së ˗nu ˈwo ˗dho kwa ˗takun ˈˈtʋ̈ŋ ˈˈpɛpɛ ˈka ˗wo Biblö ˈgü. ˗Yö dhɛɛˈˈ ˈˈgblʋ̈gblʋ̈ ˗nu ˗yɔ ˗bɔ, ˈö kwa ˗zogban, ˈö ˗zoyödhe nu kwa ˗dhɛ.
˗Zobuödhe
˗Dhioo ˗mɛɛn ˗nu ˈwo Biblö ˈgü?
Dhɛɛˈˈ ˗mɛɛn ˗nu ˈö ˗an ˗yɔ ˈdhö Biblö ˈgü?
˗Mën ˈü˗ ˈˈpiʋ̈ ˈü˗ ˈgüman Biblö ˈgü?
˗AN ˗GA ˈPÖ
˗Kɔ ˈö Biblö ˗bha ˗dhioo ˗nu ˈdhö ꞊bhlëësü ˗a ˈka ꞊dɛɛ, ˗a ˗ga.
«ˈWɔndɔdhe ˈö ˈyaa ˈgo ˈˈgblʋʋ toŋtoŋdhö» (˗Kwɛ 2018 ˗bha ˈˈGlaadhiʋ̈ ˗Tɔn No. 1)
Mɛn ˈö kun ö ˗de ˈgü ˈyaa˗, ˗kɔ ˈö Biblö ˗ya ˗takun ˗a ˈka ˗a ˗ga.
Biblö ˗bha ˗dhioo ˗nu ˈwo ˈkɔdhigümɛn ˗nu ˗takun ꞊dedewo, ˗bhö ˗an ˗ga.
«˗Dhioo 12 ˈö ˈwo ˈkɔdhi ˈwaannu» (˗Kwɛ 2018 ˗bha ˗Ka ˗ya ka ˈˈɲaan ! No. 2)
꞊Suawɔn ˗nu ˈwo ˗gban mɛn ˈö ˈˈkpɔnŋtaadhɛ ꞊kɔɔn ˗ni ˈgü ˗a ˗bha, Biblö ˗yö ˈˈdhɛ ˗bho ˗an ˗ta. ˗A video ˗ga.